မဖြူတုတ်တို့ အကြောင်း

 

❝ မဖြူတုတ်တို့ အကြောင်း ❞
        ( အဏ္ဏဝါစိုးမိုး )

မဖြူတုတ် တို့ အကြောင်း ဆိုတော့ မဖြူတုတ် ဘယ်နှစ်ယောက် တောင် ရှိလို့လဲ ဟု မေးစရာ ဖြစ်နေသည် ။ မဖြူတုတ် တစ်ယောက် သာ ရှိပါသည် ။ ကိုအဏ္ဏဝါ ၏ ပါရမီဖြည့်ဘက် မဟေသီ ၊ ဇနီး ၊ မယား မဖြူတုတ် တစ်ယောက်တည်း သာ ရှိပါသည် ။ နာမည် နှင့် လိုက်အောင် ဖြူဖြူတုတ်တုတ် မို့ မဖြူတုတ် ဟု အမည်ပေးထားခြင်း ဖြစ်သည် ။ မဖြူတုတ် တစ်ယောက်တည်း ရှိပါလျက် မဖြူတုတ် အကြောင်းလို့ မပြောဘဲ မဖြူတုတ် တို့ အကြောင်းလို့ အများကိန်း ( ဗဟုဝုဒ် ) ဖြင့် ပြောရတာ အကြောင်း ရှိပါသည် ။

မဖြူတုတ် သည် ကိုအဏ္ဏဝါ ၏ ဇနီး ဖြစ်သည် ဟု ပြောပြီး ဖြစ်သည် ။ ကိုအဏ္ဏဝါ  ၏ ဇနီးသည် မိန်းမ ဖြစ်သည် ။ ထို့ကြောင့် မဖြူတုတ် သည် မိန်းမ ဖြစ်သည် ကို အထူး ပြောစရာ လိုတော့မည် မထင်ပါ ။ မဖြူတုတ် တို့ အကြောင်း ဆိုသောကြောင့် မိန်းမတွေ အကြောင်း ဟု ဆိုလိုခြင်း ဖြစ်သည် ။ တစ်ကမ္ဘာလုံး က မိန်းမတွေ အကြောင်း ကို သိလို့လား ၊ ပြောနိုင်လို့လား ဟု မေးကြမည် ထင်ပါသည် ။ အမှန်အတိုင်း ဝန်ခံရလျှင် တစ်ကမ္ဘာလုံး က မိန်းမတွေ အကြောင်း ကို မဆိုထားနဲ့ ၊ မြန်မာနိုင်ငံ က မိန်းမတွေ အကြောင်း ကို တောင် သိဖို့ရာ မလွယ်ပါ ။ ဒါပေမယ့် မဖြူတုတ် ရဲ့အကြောင်း ကိုတော့ ကိုအဏ္ဏဝါ က နောကျေအောင် သိသည် ။ မဖြူတုတ် အကြောင်း ကို သိသည် ဆိုလျှင် တစ်ကမ္ဘာလုံး က မိန်းမတွေ ၏ စရိုက်သဘာဝ နဲ့ ထပ်တူထပ်မျှ မဟုတ်တောင် ရာခိုင်နှုန်း အတော်များများ တူနိုင်သည် ဟု ယုံကြည်မိသည် ။ ထို့ကြောင့် မဖြူတုတ် သည် ကမ္ဘာပေါ် ရှိ မိန်းမ အားလုံး ကို ကိုယ်စားပြုနိုင်သူ ဖြစ်သည် ဟု ထင်မိသည် ။ မဖြူတုတ် ၏ အကြောင်းသည် မိန်းမတွေ ၏ အကြောင်း ဖြစ်နိုင်သည် ။

မဖြူတုတ် သည် ချစ်ပါလျက် မချစ် ယောင် ဆောင် တတ်သည် ။ ကြိုက်ပါလျက် မကြိုက် ယောင် ဆောင်တတ်သည် ။ မဖြူတုတ် ကို သူ့ အမေ က ကိုအဏ္ဏဝါ နဲ့ ပေးစားမလို့ ရန်ကုန် ကို ခေါ်လာပြီး သာကေတမြို့သား ကိုအဏ္ဏဝါ ကို ပြသောအခါ နှာခေါင်း ရှုံ့ပြီး မကြိုက်ယောင် ဆောင် ခဲ့တာကို မှတ်မိသေးသည် ။ အသားမည်းသည် ။ ဗိုက်ပူသည် ။ ထိပ်ပြောင်သည် ။ နှာခေါင်းပွသည် စသည်ဖြင့် ချေးများပြီး တင်းခံနေခဲ့သည် ။ မိန်းမဈေး ကို မချပဲ ကိုင်ထားခဲ့သည် ။ တစ်လ နှစ်လခန့် တစ်အိမ်တည်း အတူ နေလာသောအခါ မဖြူတုတ် ၏ မကြိုက်ယောင် ဆောင်မှု အရှိန် လျှော့ကျလာသည် ။ ကိုအဏ္ဏဝါ ၏ အားနည်းချက်တွေ ဖြစ်သည့် ဗိုက်ပူ ၊ ထိပ်ပြောင် ၊ မည်းပြာ ၊ ပုကွ ၊ နှာခေါင်း ပွတာတွေ ကို မမြင်ချင် ယောင် ဆောင် လာသည် ။

ဒီဘဝ မှာ မိန်းမ မရနိုင်တော့ဘူး ထင်ပြီး စိတ်အားငယ် နေသည့် ကိုအဏ္ဏဝါ ကလည်း မဖြူတုတ် ကို မြင်လျှင်မြင်ချင်း ကြိုက်သွားသည် ။ မိမိ အရည်အချင်း ကို အားကိုးပြီး ကိုယ်တိုင် ကြိုးစားမှုဖြင့် ဆိုပါက ဒီလို ဖြူဖြူတုတ်တုတ် ကို ရဖို့ မလွယ်ဘူး ဆိုတာကို သိနေသည့် ကိုအဏ္ဏဝါ က မဖြူတုတ် ကို လွတ်သွားမှာ စိုးလို့ ယောက္ခမ အဘွားကြီး ကို အသေကပ် ထားသည် ။ မဖြူတုတ် ကို လည်း ချစ်လှချည်ရဲ့ ၊ ကြိုက်လှချည်ရဲ့ ဆိုတဲ့ အမူအရာ ကို အခွင့်သာ တိုင်း ပြသည် ။ ယောက်ျား တစ်ယောက် က ချစ်ပါ တယ် ၊ ကြိုက်ပါတယ် ၊ မရရင် သေရပါတော့မယ် လို့ ပြောနေတဲ့ ဒဏ်ကို မဖြူတုတ် သာမက ဘယ်မိန်းမ မှ ကြာကြာ အောင့်မခံနိုင်ဘူး ဆိုတာကို သိထားသည့် ကိုအဏ္ဏဝါ က လည်း နောက်မဆုတ်ဘဲ လက်ရဲ ဇက်ရဲတွေ လုပ်လာသည် ။ ပထမ တော့ မဖြူတုတ် က ဟန်ဆောင်ပန်ဆောင် ရှောင် ပြေး တွန်းပစ် လုပ်သေးသည် ။ နောက်ဆုံး ဟန် မဆောင်နိုင်တော့သည့် အဆုံးမှာ ကိုအဏ္ဏဝါ ၏ အချစ် ကို လက်ခံ လိုက်ရတော့သည် ။

ကိုအဏ္ဏဝါ သည် မဖြူတုတ် နှင့် ပတ်သက်ပြီး အို .. အပွင့်လင်းဆုံး ပြောရလျှင် မိန်းမတွေ နဲ့ ပတ်သက်ပြီး အတွေ့အကြုံ တစ်ခု ရလိုက်သည် ။ မိန်းမတွေ ကို ချစ်ရေး ဆိုရတာဟာ ခွေးပေါက်စလေး နဲ့ ဆော့ ကစားရသလိုပါလား ဆိုတဲ့ အသိကို ရလိုက်ခြင်း ဖြစ်သည် ။ ခွေးပေါက်စလေး နဲ့ ဆော့ကစားဖူးကြမည် ထင်ပါသည် ။ ကိုယ် က လိုက် လျှင် သူ က ပြေးသည် ။ ဝေးချင်လို့ မဟုတ် ၊ ကိုယ် က ပြေးလျှင် သူ က လိုက်သည် ၊ ကိုက် ချင်လို့ မဟုတ် ။ အပြေးအလိုက် လုပ်ပြီး အထွေးအပိုက် အယုအယ လုပ်ဖို့ မိအောင် ဖမ်းလိုက်လျှင် မကိုက်ဘဲ ပါး ကို လျှာလေး နဲ့ လျက်ပြီး ဖက်နမ်း တော့သည် ။

ဒီလိုဖြင့် ကိုအဏ္ဏဝါ နှင့် မဖြူတုတ် တို့ အကြောင်းပါခဲ့ကြသည် ။ လင်ရယ် မယားရယ်လို့ ဖြစ်လာကြတော့ လျှာ နဲ့ သွား လိုပေါ့ဗျာ ၊ ပါးစပ် ထဲ မှာ အတူနေကြပေမယ့်လို့ တစ်ခါတလေ ကိုက်မိတယ် ၊ ငြိတယ် ၊ စကား များတယ် ၊ ရန်ဖြစ်တယ် ။ ရန်ဖြစ်ရတဲ့ အကြောင်း က အထွေအထူးတော့ မဟုတ်ပါဘူး ။ ကိုအဏ္ဏဝါ က ယောက်ျား မာန ကို ပြသည် ။ မဖြူတုတ် က မိန်းမ သဘာဝ ကို ပြသည် ။ ပြတာချင်း ကီး မကိုက်ဘဲ ထိပ်တိုက် ရင်ဆိုင်မှု ဖြစ်သွားသည့် အခါတွေမှာ စကားများ ရန်ဖြစ်ကြရသည် ။ မဖြူတုတ် က လူရှေ့သူရှေ့ မှာ ကိုအဏ္ဏဝါ ကို နိုင်ကြောင်း ပြလိုသည် ။ မိန်းမသဘာဝ ကို မသိ နားမလည်သေးသည့် ကိုအဏ္ဏဝါ က လူရှေ့ သူရှေ့မှာ သူ့ ကို အရှက် ခွဲရမလား ဆိုပြီး မဖြူတုတ် ကို လူရှေ့သူရှေ့ မှာပင် ပြန် ဟောက်သည် ။ အဲဒါ ပြဿနာ တက် သွားတော့သည် ။ စကားများ ရန်ဖြစ်ကြပြီး သုံးလေးရက် မခေါ် မပြောဘဲ နေကြရသည့် အခြေအနေ ရောက်သွား တော့သည် ။

ကိုအဏ္ဏဝါ သည် မဖြူတုတ် ရဲ့ အကြောင်း ( တစ်နည်း ဆိုရသော် မိန်းမတွေ ရဲ့အကြောင်း ) ကို သိသွားသောအခါ အိမ်ထောင်ရေး အဆင်ပြေ လာသည် ။ မဖြူတုတ် က လူရှေ့သူရှေ့ မှာ လင် နိုင်ကြောင်း ပြချင်လို့ ကို အဏ္ဏဝါ ကို လှိမ့်ပိမ့် ဆူပူကြိမ်းမောင်းတာ ကို လူပေါကြီး လို ပုံစံဖြင့် ပြုံးစိစိ ကြီး လုပ်ပြီး ခေါင်းငုံ့ ခံနေသည် ။ လူသူ ကင်းရှင်းသွားလို့ ကိုအဏ္ဏဝါ နှင့် မဖြူတုတ် တို့ နှစ်ယောက်တည်း ရှိတော့သည့်အခါ ကိုအဏ္ဏဝါ က မဖြူတုတ် ကို နားရင်းပိတ်တီးလို့ လည်း ရသည် ။ ပြန်လှန် အော်ဟောက်လို့ လည်း ရသည် ။ မဖြူတုတ် က ငြိမ်ခံသည် ။ လူရှေ့ သူရှေ့ မှာ လင် နိုင်ကြောင်း ပြလိုက်ရ၍ ကျေနပ်နေပြီး ဖြစ်သည် ။

ကိုအဏ္ဏဝါ နှင့် မဖြူတုတ် တို့ ၏ အိမ်ထောင်ရေး သည် စီးပွားရေး နှင့် ဆက်စပ် နေသောကြောင့် စီးပွားရေး နှင့် ပတ်သက်ပြီး လင်မယား ကတောက်ကဆ ဖြစ်ရတာတွေ ရှိသည် ။ ကိုအဏ္ဏဝါ က အိမ်ထောင်ဦးစီး ဆိုပြီး စီးပွားရေး ကို ဦးဆောင် ကြိုးကိုင် ထိန်းချုပ် ကြည့်သည် ။ အကုန်အကျ ပိုများတာ တွေ့ရသည် ။ ကိုအဏ္ဏဝါ က အဆင်းရဲခံပြီး ခြိုးခြံ သလောက် မဖြူတုတ် က လက်ဖွာပြသည် ။ ကိုအဏ္ဏဝါ ကို ချက်ပြုတ် ကျွေးတာ ကျတော့ တော်ရိလျော်ရိ သာ ဖြစ်သည် ။ ရှင် ပေးတဲ့ ဈေးဖိုးပိုက်ဆံ နဲ့ ကတော့ ဒါလောက်ပဲ စားရမှာပဲ ဆိုတဲ့ အမူအရာ ကို ပြထားလိုက်သေးသည် ။

ကိုအဏ္ဏဝါ က ပိုက်ဆံ မကိုင်တော့ပဲ အိမ် မှာ ရှိသမျှ ပိုက်ဆံ အားလုံး နှင့် ဝင်ငွေ အားလုံး အပြင် ဘဏ်စာအုပ်တွေ ပါ မဖြူတုတ် ကို အပ်လိုက် သောအခါ အရမ်း ဟန်ကျ သွားသည် ။ အကုန်အကျ လည်း သက်သာ သွားသည် ။ ကိုအဏ္ဏဝါ လည်း ဟင်းကောင်း စားရသည် ။ ကိုအဏ္ဏဝါ  အရက်သောက် ဖို့ နဲ့ ဘာညာ ဘာညာ အတွက် လိုအပ်သည့် ပိုက်ဆံ ကို လည်း တောင်းသလောက် ထုတ်ပေးသည် ။ လူစိမ်းသူစိမ်း ဧည့်သည်တွေ နှင့် သူ့ ဆွေမျိုးတွေ ရှေ့ မှာ ကိုအဏ္ဏဝါ က လက်ဖြန့်ပြီး ပိုက်ဆံ တောင်းလျှင် ပိုရသည် ။ မိန်းမ ဆိုတာ လင် ရှာလို့ ရတဲ့ စီးပွား ကို သူ့လက် သူ့ခြေ ကိုင်တွယ် ခြယ်လှယ်ရမှ ကျေနပ်တယ်ပါလား ဆိုတာကို အသိ နောက်ကျလေခြင်း လို့ ကိုအဏ္ဏဝါ  နောင်တရသည် ။

ကိုအဏ္ဏဝါ  သင်္ဘောသား ဖြစ်ပြီးနောက် အထိုက်အလျောက် ပြေလည် လာသောအခါ ကိုအဏ္ဏဝါ  သတိထားမိတာ တစ်ခု ရှိသည် ။ မဖြူတုတ် သည် ကိုအဏ္ဏဝါ ကို ကောင်းကောင်း ချက်ကျွေးသည့် အပြင် အင်္ကျီ အဝတ်အစား က အစ ဟိုဟာဝယ်ပေး ၊ ဒါဝယ်ပေး ၊ မင်္ဂလာဈေး က အပြန်မှာ ကျားတံဆိပ် ဘီယာတွေကဒ်လိုက် ဝယ်လာပေး လုပ်လာပြီ ဆိုလျှင် သတိထား ရတော့သည် ။ သူ့ နား က စိန်နားကပ် ကို အထူး ဂရုစိုက် ကြည့်ရသည် ။ ပုံစံရော အရွယ်အစားပါ ပြောင်းနေတာ တွေ့ရလေ့ ရှိသည် ။ နောက်ထပ် တစ်သိန်း လောက် အလိုက် ပေးပြီး ကိုအဏ္ဏဝါ  မသိအောင် အလဲအထပ် လုပ်ထားခြင်း ဖြစ်သည် ။ ကိုအဏ္ဏဝါ က မကျေနပ်လို့ ဆူပူကြိမ်းမောင်းချင်ပါသော်လည်း ဝယ်ခြမ်း ပေးကျွေးနေတဲ့ ဟာတွေ ရဲ့ မျက်နှာ ကို ထောက်ပြီး မဆူနိုင် မကြိမ်းနိုင် ဖြစ်သွားသည် ။

တစ်ခါ တလေ မှာ ကိုအဏ္ဏဝါ ဘက်က မခံမရပ်နိုင်လို့ ထသ,တ်တော့မည့် နီးပါး စကားများကြပြီ ဆိုလျှင် တစ်ပတ်ဆယ်ရက် လောက် အထိတောင် တစ်ဦး ကို တစ်ဦး နှုတ်မဆက် စကား မပြောဘဲ နေကြသည် ။ တစ်အိမ်တည်း အတူ နေရုံသာ မက တစ်ခြင်ထောင် တည်း အတူ အိပ်နေ ပါလျက် နှုတ်ဆက် စကားပြော မလုပ်ဘဲ နေကြရတာဟာ အတော် အနေရ ခက် အခံရ ခက်သော ကိစ္စ ဖြစ်သည် ။ ပြောစရာ ကိစ္စ ရှိလျှင် သားသမီးတွေ က တစ်ဆင့် ပြောကြသည် ။ အိပ်ရာ ဝင် လျှင်လည်း တစ်ယောက် က အလျင် ဦးအောင် ခြင်ထောင် ထဲ ဝင်ပြီး အိပ်ပျော်ချင် ယောင် ဆောင်နေရသည် ။ တစ်ယောက် က ရုပ်မြင်သံကြား ကြည့်ချင် ယောင် ဆောင်နေရသည် ။

ကိုအဏ္ဏဝါ က စောစော အိပ်ရာ ဝင်ပြီး အိပ်ချင် ယောင် ဆောင် နေလျှင် မဖြူတုတ် က တရုတ်ကား ကြည့်ပြီး ခိုးခိုးခစ်ခစ် ရယ်သည် ။ သူ့ သားသမီးတွေ နဲ့ လေသံမြှင့်ပြီး စကား ပြောပြသည် ။ အိပ်ရာ ထဲ က ကိုအဏ္ဏဝါ ကြားအောင် လေသံမြှင့်ပြီး ပြောနေခြင်း ဖြစ်သည် ။ ရုပ်မြင် သံကြား အစီအစဉ် ပြီးသည်အထိ မကြည့်ချင်ဘဲ ထိုင် ကြည့်နေသည် ။ သားသမီးတွေ အိပ်ရာ ဝင် ကုန်ကြလို့ သူ့ တစ်ယောက်တည်း ကျန်တော့မှ မီးတွေ ပိတ်ပြီး ကိုအဏ္ဏဝါ အိပ်နေသည့် ခြင်ထောင် ထဲ ဝင်လာသည် ။

မဖြူတုတ် ခြင်ထောင် ထဲ ဝင်လာပြီ ဆိုတာကို သိသည့် ကိုအဏ္ဏဝါ ကလည်း မသိယောင် ဆောင်ပြီး တစ်ဖက် ကို စောင်းအိပ် ၍ အိပ်ပျော် နေယောင် ဆောင်သည် ။ အဲဒီတော့ မဖြူတုတ် ကလည်း ကိုအဏ္ဏဝါ  နှင့် အသားချင်း မထိမိအောင် အထူး သတိထားပြီး လှဲအိပ်ချသည် ။ သူ နှင့် ကိုအဏ္ဏဝါ ကြားမှာ ဖက်ခေါင်းအုံး အရှည်ကို ချပြီး ခြားထားလိုက်သေး သည် ။ ကိုအဏ္ဏဝါ အိပ် မပျော်ဘဲ တစ်ဘက် စောင်းပြီး အိပ်ချင်ယောင် ဆောင်နေတယ် ဆိုတာကို သိနေတယ်လေ ။ ဒါကြောင့် ရှင့် ထက် ပြတ်တယ် ဆိုတဲ့ ပုံစံ ကို တမင် လုပ်ပြခြင်း ဖြစ်သည် ။

မဖြူတုတ် က စောစော အိပ်ရာ ဝင်ပြီး ခြင်ထောင် ကို လက်ဦးမှု ရယူ သွားလျှင် ကိုအဏ္ဏဝါ က နိုင်ငံတကာ က  လွှင့်ထုတ်နေသည့် ရေဒီယို အသံလွှင့်ချက်တွေ ကို ဖမ်းယူ နားထောင်နေသည် ။ အချိန်ကုန်အောင် လုပ်နေရခြင်း ဖြစ်သည် ။ ရေဒီယိုတွေ နားထောင်ပြီး တော့လည်း ညဆယ်နာရီ တောင် မထိုးသေးလို့ ဘာမှ စိတ်ဝင်စားစရာ မရှိသည့် ရုပ်မြင်သံကြား ကို ဆက် ကြည့်ရပြန်သည် ။ သိုင်းပညာ အစွမ်းကုန် ပြပြီး တိုက်ခိုက်နေတဲ့ တရုတ် မင်းသမီး ဟာ အလှပျက်မှာ စိုးလို့ ချွေးတောင် ထွက်တာ မတွေ့ရ ၊ အနုပညာ ခေါင်းပါးသည့် အမူအရာတွေ နဲ့ သရုပ်ဆောင် နေကြတာတွေ ကို မကြည့်ချင်ဘဲ အချိန် ကုန်အောင် ကြည့်နေရသည် ။ ရုပ်မြင်သံကြား လည်း သိမ်းလို့ ၊ ရပ်ကွက် တစ်ခုလုံး တိတ်ဆိတ် သွားတော့မှ ကိုအဏ္ဏဝါ အိပ်ရာဝင်သည် ။ ကိုအဏ္ဏဝါ  ခြင်ထောင် ထဲ ဝင်လာတာ ကို သိသော်လည်း အိပ်ပျော်ချင် ယောင် ဆောင် နေသည့် မဖြူတုတ် က သဘာဝ မကျ ၊ ယုတ္တိမတန်သည့် ဟောက်သံလေးတောင် ပေး လိုက်သေးသည် ။ သူ တကယ် အိပ်ပျော် နေသယောင် ဟန်ဆောင်ခြင်း ဖြစ်သည် ။ ဒီအကြောမျိုး ကို နောကျေနေသည့် ကိုအဏ္ဏဝါ က အမှောင်ထဲ မှာ ပြုံးလိုက်သည် ။ နင် အိပ်ချင်ယောင် ဆောင် နေတာ ငါ သိပါတယ်ကွာ လို့ ပြောလို့ မဖြစ် ၊ အမူအရာ ပြလို့လည်း မဖြစ် ၊ မဖြူတုတ် ရှက်သွားပြီး နှုတ်ဆက် စကားပြော မလုပ်သည့် ရက် တာရှည် သွားနိုင်သည် ။ နှုတ်ဆက် စကားပြော မလုပ်ဘဲ နေကြတာ ရက်တွေ ကြာလာတော့ ကိုအဏ္ဏဝါ ရော မဖြူတုတ် ပါ အာညောင်းလာသည် ။ အခေါ်အပြော ပြန်လုပ်ချင် နေကြပြီ ဖြစ်သည် ။

ကိုအဏ္ဏဝါ က ခြင်ထောင် ထဲ ကို အသာလေး ဝင်သည် ။ အိပ်မော ကျနေသည့် မဖြူတုတ် နိုးသွားမှာ စိုးလို့ အထူး သတိထားပြီး ညင်ညင်သာသာလေး ဝင်လာလေဟန် လုပ်သည် ။ အိပ်ချင်ယောင် ဆောင်နေသည့် မဖြူတုတ် က ဟောက်သံသဲ့သဲ့ ဆက်ပေးနေသည် ။ ကိုအဏ္ဏဝါ က သူ့ နေရာမှာ အသာ ဝင်လှဲချပြီး မျက်စိ မှိတ်နေသည် ။ ကိုအဏ္ဏဝါ တို့ နှစ်ယောက် ကြားမှာ ဖက်ခေါင်းအုံးကြီး က ခြားနေသည် ။ လင် နှင့် မယား စိတ် ကြည်ကြည်လင်လင် ဆိုပါက ပွေ့ဖက် နမ်းရှုံ့ပြီး ပျော်ရွှင်စွာ အိပ်ရာ ဝင်ကြမည် ဖြစ်သည် ။ အခုတော့ ခြင်ထောင် တစ်လုံး ထဲမှာ အတူ ရှိနေကြပါလျက် တစ်ဦး ကို တစ်ဦး စကား မပြောကြ၍ နီးလျက် နှင့် ဝေးနေကြသည် ။

ကိုအဏ္ဏဝါ နှင့် မဖြူတုတ် တို့ လက်ထပ်ကြတော့ ကိုအဏ္ဏဝါ ၏ အသက် က ၂၈နှစ် ၊ မဖြူတုတ် က ၁၈နှစ် ၊ ၁၀ နှစ် ကွာသည် ။ အိမ်ထောင် သက်အနှစ် ၃ဝ ရှိပြီ ဖြစ်လို့ မဖြူတုတ် ရဲ့ အသက်တောင် မငယ်တော့ပါလား ဟု တွေးမိသည် ။ ကိုယ့် ထက် အသက်ငယ်တဲ့ မယား ကို ယူထား တော့ ကိုယ် က အလျှော့ပေးပြီး ချော့ရမှာပေါ့ လို့ တွေးမိသည် ။ လက်ထပ်ပြီးစ က ဖြူဖြူဖွေးဖွေး ၊ ဖွံ့ဖွံ့ထွားထွား ဖြင့် စွဲမက်စရာ ကောင်းသည့် မဖြူတုတ် ၏ ပုံကို ပြန်လည် မြင်ယောင် လာပြီး ကိုအဏ္ဏဝါ ဖီလင် အသစ်တွေ ပြန်ဝင် လာသည် ။ အိပ်ဟန် ဆောင် နေသည့် မဖြူတုတ် ဘက် ကို အသာ စောင်းငဲ့ ကြည့်လိုက်သည် ။

ကိုအဏ္ဏဝါ သည် မဖြူတုတ် ကို ချော့ဖို့ မေ့မေ့ နေသည် ။ မိန်းမ ဟူသည် အချော့ကြိုက်တယ် ဆိုတာ ကို မေ့နေခြင်း ဖြစ်သည် ။ မကင်းနိုင် ၊ မပြတ်နိုင်တဲ့ အတူတူ ခြောက်တစ်ခါ ၊ ချော့တစ်လှည့် ပေါင်းသင်း သွားရမည် ဆိုတာကို သတိရလိုက်သည် ။ နှစ်ယောက် ကြားက အတားအဆီး ဖြစ်နေသည့် ဖက်ခေါင်းအုံးကြီး ကို အသာ ဖယ်ပစ်လိုက်သည် ။ မဖြူတုတ် ဘက် ကို အသာ တိုးကပ်လိုက်သည် ။ ကိုအဏ္ဏဝါ ၏ လက်မောင်း နှင့် မဖြူတုတ် ၏ ကျော မတော်တဆ ထိသွားသည် ။ မဖြူတုတ် က လန့်သွား သလိုလို ၊ အသားချင်း လာ ထိတာကိုပင် မကြိုက် သလိုလို တွန့်ခနဲ လုပ်လိုက်သေးသည် ။ မွှန်ဟောက် ပြီး အိပ်ပျော်နေသူ က အသားချင်း ထိတာလေး ကို တောင် တွန့်ခနဲ ဖြစ်ရသလားလို့ တွေးပြီး ကိုအဏ္ဏဝါ  ပြုံးလိုက်မိသည် ။

ကိုအဏ္ဏဝါ က ပက်လက် အနေအထားမှ မဖြူတုတ် ဘက်ကို စောင်း အိပ်လိုက်သည် ။ မဖြူတုတ် ကတော့ ကိုအဏ္ဏဝါ ကို ကျောပေးပြီး ခွေခွေလေး လှဲနေသည် ။ ကိုအဏ္ဏဝါ သည် မဖြူတုတ် ၏ ပခုံးကို အသာ လေးဆွဲပြီး သူ့ ဘက် ကို လှည့်ရန် ဆွဲယူလိုက်သည် ။ မဖြူတုတ် သည် အသာလေး ဆွဲ တာကို အလိုက်သင့် ပါလာသော်လည်း စောင်း နေသည့် လောင်းလှေ ကို ဆွဲလှန်လိုက် သလို ပက်လက်ကြီး လန်နေသည် ။ သူ အိပ်ပျော်နေလို့ ဆွဲလှည့်တာ ကို မသိတဲ့ ပုံစံမျိုး လုပ်နေသေးသည် ။ အထာပေါက် အလိုက်သိသည့် ကိုအဏ္ဏဝါ က သူ့ဘက် ကို လှည့်လာအောင် နောက်တစ်ခါ အသာလေး ဆွဲလှည့်လိုက်သည် ။ ဒီတစ်ခါမှာ လည်း အသာလေး ဆွဲတာနဲ့ အလိုက်သင့် ပါလာသည် ။ သူ အိပ်ပျော်နေလို့ ကိုအဏ္ဏဝါ  လုပ်သမျှ ကို မသိဘဲ လိမ့်ပါလာသည့် ပုံစံမျိုး ပြနေသည် ။

ကိုအဏ္ဏဝါ က မဖြူတုတ် ၏ ဦးခေါင်း ကို အသာ မပြီး သူ့ လက်ရုံး ပေါ် မှာ ခေါင်းအုံး စေလိုက်သည် ။ လက်တစ်ဖက် က မဖြူတုတ် ကို သိုင်းဖက်လိုက်သည် ။ မဖြူတုတ် ကတော့ သူ့ လက်တွေကို ပျော့ပျော့ကြီး လုပ် ပြီး ရှေ့ မှာ ချထားသည် ။ ကိုအဏ္ဏဝါ က မဖြူတုတ် ရဲ့ အပေါ် က လက် ကို ယူပြီး သူ့ ကိုယ်ပေါ် မှာ တင်သည် ။ ငါ့ ကို လည်း ပြန်ဖက် ဆိုသည့် သဘော ဖြစ်သည် ။ မဖြူတုတ် ရဲ့ လက်ကြီး က ကြိုးပြတ်နေသော ရုပ်သေးမင်းသမီး လက် လို ကိုအဏ္ဏဝါ ရဲ့ ကိုယ်ပေါ် ကို ဘုတ်ခနဲ ကျလာသည် ။ သူ အိပ်ပျော် နေသည့် အတွက် ပြန်ပြီး မဖက်နိုင် ဖြစ်နေသည် ဆိုတဲ့ ပုံစံ ပြထားသည် ။ သို့သော် မဖြူတုတ် ၏ လက်တစ်ဖက် သည် ကိုအဏ္ဏဝါ ၏ ခါး ကို ဖြတ်ပြီး ကျောပေါ် ကို ရောက်နေပြီ ဖြစ်သည် ။

မဖြူတုတ် အသက် ၁၈ နှစ် အရွယ် မှာ လက်ထပ် ယူခဲ့သည့် ကိုအဏ္ဏဝါ က ငယ်ချစ် ဖီလင် တက်ပြီး မဖြူတုတ် ၏ ဆံပင်တွေ ကို သပ်တင် ပေးသည် ။ အသက် ငါးဆယ် ပြည့်ခါနီးပေမယ့် ဖြူဖြူဖောင်းဖောင်း ပြည့်ပြည့်တင်းတင်း ရှိနေသေးသည့် မဖြူတုတ် ၏ ပါး ကို ရွရွလေး မွှေးမွှေး ပေးလိုက်သည် ။ မဖြူတုတ် ၏ တစ်ကိုယ်လုံး ကို လည်း တင်းတင်းလေး သိုင်းဖက်လိုက်သောအခါ စောစောက ရုပ်သေးမင်းသမီး လက်ကြီး လို ဖြစ်နေသည့် မဖြူတုတ် ၏ လက် သည် ကိုအဏ္ဏဝါ ကို ခပ်တင်းတင်း လေး ပြန် ဖက်တာ ကို တွေ့ရသည် ။ အိပ်ပျော်နေတယ် ဆိုပြီး ဘယ့်နှယ်ဟာပါလိမ့်နော် ။

▢ အဏ္ဏဝါစိုးမိုး
📖 ရွှေအမြုတေ မဂ္ဂဇင်း
      စက်တင်ဘာလ ၊ ၂ဝဝ၃