အမြင်ချင်းတော့ မတူပါလေ
▢ ရန်နိုင် ( ယုဇန )
နေရာ တစ်နေရာ၌ လူသားတစ်ယောက်နှင့် နတ်သားတစ်ပါး တွေ့ဆုံမိကြလေ၏ ။ နတ်သားက လူသားကို “ ကျွန်ုပ်ဟာ ကုသိုလ်ကောင်းမှုလည်း ပြုလုပ်လို့ရ ၊ သီလလည်း ဆောက်တည်လို့ရတဲ့ လူ့ဘဝကို ရချင်လိုက်တာ ” ဟု ပြောလေ၏ ။ ထိုအခါ လူသားကလည်း “ ကျွန်ုပ်ကလည်း အိမ်ငှားခလည်း ရှာစရာမလို ၊ ကုန်ဈေးနှုန်းလည်း ပူစရာ မလိုတဲ့ နတ်သားဘဝကို လိုချင်လိုက်တာ ” ဟု ပြန်ပြောလိုက်လေသည် ။
နောက်တစ်နေရာ၌လည်း အဘိုးကြီး တစ်ယောက်နှင့် ဖိနပ်ဆိုင်ပိုင်ရှင် လူငယ်လေးတစ်ယောက်တို့သည် အသိမိတ်ဆွေ တစ်ယောက်၏ အသုဘကို အတူတကွ လာပို့ကြရင်း စကားစပ်မိကြလေ၏ ။ အဘိုးကြီးက “ သံဝေဂ ရစရာပဲ ငါ့တူရယ် ၊ လူ့လောကမှာ မိတ်ဆွေတစ်ယောက် လျော့သွားတာ နှမြောစရာ ကောင်းလိုက်တာကွာ ” ဟု ညည်းလေ၏ ။ ထိုအခါ ဖိနပ်ဆိုင်ရှင်လူငယ်လေးကလည်း “ ဟုတ်တယ် အဘရယ် ၊ ကျွန်တော်လည်း ဖိနပ် ဝယ်နေကျ ဖောက်သည်တစ်ယောက် လျော့သွားလို့ နှမြောလိုက်တာဗျာ ” ဟု ပြန်ညည်းလိုက်လေသည် ။
▢ ရန်နိုင် ( ယုဇန )
📖 ရယ်စရာ မဂ္ဂဇင်း
ဖေဖော်ဝါရီ ၊ ၂၀၁၅
No comments:
Post a Comment