❝ လောကကြီးမှာဗျာ ❞
▢ မိုင်ဆွန်ခ ( သီပေါ )
ရွှေအုန်းပင်ဆိုင်ရှေ့ကို ခပ်ချောချော ကောင်မလေးတစ်ယောက် စီးလာတဲ့ ဆိုင်ကယ်တစ်စီး ရုတ်တရက် ထိုးရပ် လာပါတယ် ။ ကြည့်ရတာ ဆီပြတ်သွားတဲ့ပုံပါပဲ ။ ဒါကို ဆိုင်ထဲမှာ ထိုင်နေတဲ့ နေ့ခင်းကြောင်တောင် ဆိုတဲ့လူ မြင်တော့ အံ့ဩသွားပြီး နီးစပ်ရာ ခုံအောက်ကို ချက်ချင်း ဝင်ပုန်းပါတော့တယ် ။ ဆိုင်ရှင်ကိုလည်း ပြောလိုက်တယ် ။
“ အစ်ကို … အစ်ကို အဲဒီကောင်မလေး ကျွန်တော့်ကိုမေးရင် ကနေ့ မလာဘူးလို့ ပြောပေးနော် ”
ဆိုင်ရှင် ဇဝေဇဝါဖြစ်သွားတယ် ။ ဘာကြောင့်ဆို ဒူးရင်းသီးကြွက်ကိုက်ထားသလို ဥပဓိရုပ်ပိုင်ရှင် နေ့ခင်းကြောင်တောင်နဲ့ ဒီကောင်မလေး ဘယ်လိုများ ပတ်သက်နေပါလိမ့်ဆိုတဲ့ အတွေးနဲ့ပေါ့ ။ ဆိုင်ရှင်နဲ့ နေ့ခင်းကြောင်တောင်တို့က ရင်းနှီးလာတာ ကြာပြီဆိုတော့ ပြောမနာ ဆိုမနာတွေလို့ ပြောရမှာပေါ့ ။ ဒါနဲ့ ဆိုင်ရှင်က ခုံအောက်က နေ့ခင်းကြောင်တောင်ကို “ ဟေ့ကောင် ... မင်းအကြောင်း ငါသိတယ် .. ဘေးလူ အထင်ကြီးအောင် ရှောက်လုပ်ပြမနေနဲ့ ... မင်းလို တွမ်တီးဖိုးအာဝါ အချိန်ပြည့် မူးနေတဲ့ကောင်ကို ဘယ်သူမှ လာမေးမှာ မဟုတ်ပါဘူး ၊ ဒီလိုကောင်မလေးဆို ပိုဝေးသေး .. ။ ပြန်ထွက်ခဲ့ ” လို့ အော်ပြောလိုက်တယ် ။
အဲဒီတော့မှ နေ့ခင်းကြောင်တောင်ဟာ ညောင်နာနာအသံလေးနဲ့ တိုးတိုးပြန်ပြောလိုက်ပါတယ် ။
“ အစ်ကို ဘာသိလို့တုန်း … ကောင်မလေးက မေးရုံတင်မကဘူး … ကျွန်တော့်ကို မြင်ရင် ဆိုင်ထဲတောင် တန်းဝင်လာမှာ .. သူက ကျွန်တော့်ရဲ့ကြွေးရှင်ဗျ ။
◾ဘိုင်တွန်သမျှ- မိုင်ဆွန်ခ ( သီပေါ )
📖 ရယ်စရာ မဂ္ဂဇင်း
အောက်တိုဘာ ၊ ၂၀၁၅
No comments:
Post a Comment