❝ ဘယ်သူ လုပ်တာလဲ ❞
( ရန်နိုင် - ယုဇန )
ကျွန်တော့်ရဲ့ ဒီအဖြစ်လေးက ကြာတော့ကြာခဲ့ပါပြီ ... ။ ဒါပေမယ့် မမေ့နိုင်သေးတာနဲ့ပဲ မိတ်ဆွေတို့ကို ပြောပြချင်လို့ပါ ။ ဖြစ်ပုံကဒီလိုဗျ .. ။
မနှစ်တုန်းက “ ဦးစံလင်း ဓမ္မစေတီခေါင်းလောင်းကြီးကို ရှာတွေ့ပြီ ” လို့ ပြောတဲ့ နေ့ကပေါ့ ။ ကျွန်တော့်မှာ ဗုဒ္ဓဘာသာမြန်မာလူမျိုးပီပီ ဝမ်းသာပျော်ရွှင်မိတာပေါ့ ။ ဒါနဲ့ပဲ ဆိုင်မှာ ဈေး လာဝယ်တဲ့ အဒေါ်ကြီးကို ဝမ်းသာအားရနဲ့ ပြောပြမိပါတယ် ။
“ အဒေါ် ကြားပြီးပြီလား ... ဓမ္မစေတီခေါင်းလောင်းကြီးကို ပြန်ရှာတွေ့ပြီတဲ့ ”
ဒီတော့ အဒေါ်ကြီးက ကျွန်တော်ကို ဘာပြန်ပြောလဲ ဆိုတော့
“ ဟင် ... ဟုတ်လား ... ခေါင်းလောင်းကြီးက ဘယ်တုန်းက ပျောက်သွားတာလဲ ” တဲ့ ။
ရောခက်ပြီကော ။ အဒေါ်ကြီးက အဲဒီသတင်းကို ဘာမှ သိပုံ မရပါဘူး ။ ဒါနဲ့ပဲ ကျွန်တော့်မှာ သူ နားလည်အောင် ထပ်ရှင်းပြရတာပေါ့ ။ ခေါင်းလောင်းကြီး ရေထဲကျသွားတာ ဘယ်မင်းလက်ထက်က ဖြစ်ကြောင်း ၊ နှစ်ပေါင်း ဘယ်လောက်ကြာပြီ ဖြစ်ကြောင်း ... စသဖြင့်ပေါ ။ အဲဒီလိုလည်း ရှင်းပြလိုက်ရော သူက ဘာထပ်မေးလဲ ဆိုတော့
“ အော် ဟုတ်လား .. ။ ရေထဲ ကျသွားအောင် ဘယ်သူ လုပ်တာလဲ ” တဲ့ ။
ကောင်းရောဗျာ ... ။
ဒါနဲ့ ကျွန်တော်လည်း စိတ်ပေါက်ပေါက်နဲ့ပဲ သူ့ကို အခုလို ပြောလိုက်မိပါတော့တယ် ။
“ ဘယ်သူ လုပ်ရမှာလဲဗျ ... အဲဒါ အဒေါ့် ယောက်ျား လုပ်သွားတာလေ ” လို့ ... ။
ကဲ မှတ်ပြီလား ... ။
▢ ရန်နိုင် ( ယုဇန )
📖 ရယ်စရာ မဂ္ဂဇင်း
ဧပြီ ၊ ၂၀၁၅
No comments:
Post a Comment