❝ နွယ်တစ်ပင် ထပ်တိုးခြင်း ❞
အထက် ဖော်ပြပါဆိုသလို ...
ကျွန်တော် သုံးဆယ့်ငါးကျပ် ရတဲ့ ဈေးသည်ကြီးဦးဆန်နီ ခင်မာချို အငြိမ့်မှာ တစ်ကျော့ပြန် , ပြန်ဝင်လာချိန်နဲ့ တန်းတိုးတော့တာပါပဲဗျာ ။
ဦးဆန်နီ က ကျွန်တော့်တွေ့ တော့ ..
“ မင်း မဆိုးဘူး .. အပြော နဲ့ လက်တွေ့တစ်ထပ်တည်းပဲ ”
ဆိုပြီး ...
ခေါင်းကို အသာယာ ပုတ်တယ် ။
အဲ ... ဦးဆန်နီ ၊ ဦးရာကျော် တို့နဲ့ ...
ပြီးတော့ နောက်နှစ် ငါးကျပ် ထပ် တိုးတယ် ။
ငါးဆယ် ရတဲ့ နှစ်မှာပဲ တွံတေး က အိုးလုပ်ငန်း ၊ အိုးကုန်သည် ဦးတင်အောင် ၊ ဒေါ်အေးမြင့် တို့ရဲ့ ဒုတိယသမီး မမြဝင်း ( ခ ) မယဉ်ယဉ်မြင့် နဲ့ ကျွန်တော် အိမ်ထောင်ကျတယ် ။
အိမ်ထောင်ကျတယ် ဆိုတာကလည်း ပွဲသွားကရင်း တွေ့တာ မှုတ်ပါဘူး ...
သူကလည်း ကျွန်တော့်လိုပဲ အနုပညာ ဝါသနာပါတော့ မင်းသမီး လုပ်မယ် ဆိုပြီး ....
အငြိမ့်ထဲကို သူ့မိဘတွေ မသိအောင် ခိုးလိုက်လာရင်းနဲ့ မင်းသမီး မဖြစ်လိုက်ရဘဲ “ ကျော်ထူးကတော် " ဖြစ်သွားရတယ် ။
အခုမှ ကျွန်တော့် အဖေ ကျွန်တော့် အမေတို့ရဲ့ ဘဝကို ကျွန်တော် ရောက်သွားပါပြီ ။
ကျွန်တော့် ဇနီး အိမ်မှာ သားဦးလေး မွေးချိန်မှာ ကျွန်တော်က ဗန်းမော် ၊ ကသာ ရောက်နေတယ်။
သံကြိုးစာ ရပေမယ့် ပြန်လို့ မရဘူး ဖြစ်နေတယ်။
ကျွန်တော့် သူငယ်ချင်း မြင့်အောင် ကပဲ အဖေ နေရာမှာ လက် မှတ် ထိုးပြီး ၊ ဗဟိုအမျိုးသမီး ဆေးရုံမှာ မွေးပေးတယ် ။
နောက် ဒုတိယမြောက်သား မွေးတုန်းကလည်း ကျွန်တော့် ဇနီးအနား မှာ ကျွန်တော် မရှိခဲ့ပါဘူး ။
ကျွန်တော့်ဇနီး ခမျာ မိဝေးဖဝေး ဆွေမျိုးဝေး နဲ့ သူ့ဒုတိယ ကိုယ်ဝန်ကို သတ္တိရှိစွာနဲ့မွေးဖွားခဲ့တယ် ။
အဲဒီအချိန် ကျွန်တော် ဟာ “ ကျော်ထူး ” မဖြစ်သေးပါဘူး။
ပွဲကတဲ့ နေရာ မြို့၊ ရပ်ကွက်တွေ လောက်ပဲ လူသိပါသေးတယ် ။
အိမ်ထောင်ကျပြီ ဆိုတော့ ခါတိုင်းလို ဝါသနာအရ လုပ်လို့ မရတော့ဘူးလေ။
ပိုပြီး ကြိုးစားရတော့မှာပေါ့။
ပိုပြီး လေ့လာရတော့မယ်။
◾ ကျော်ထူး
📖 လူပြောများတဲ့ လူပေါကြီး
koaungnaingoo.blogspot.com
.
No comments:
Post a Comment