❝ ဗွီဒီယို စတင် ရိုက်ကူးခြင်း ❞
သူ က ဗွီဒီယို မင်းသား ၊ ဝဇီရာ ပြဇာတ်မှာ ကနေချိန် ၊ ကျွန်တော် က သူ့နောက်လိုက် ပြန်ဖြစ်နေတယ် ။
အရင်က ကျွန်တော် ပွဲကနေရင် ဇာတ်စင်အောက်က လိုက် လိုက်ကြည့်တယ် ။
အခု သူ ပွဲကရင် ၊ သူ ကားရိုက်ရင် ကျွန်တော် က ပြန်ကြည့်နေရတယ် ။
ဘယ် နေရာ ၊ ဘယ် ပြက်လုံး ဆိုပြီး ၊ နောက်က ပြောပြပေးရတယ် ။
တစ်ရက်ပေါ့ ...
ဒါရိုက်တာ ပြက္ခဒိန်မောင်မောင်စိုး ရိုက်တဲ့ “ သင်္ကြန်ဖူးစာ " ဇာတ်ကားမှာ အဓိက မင်းသား က ကိုမေတ္တာ ၊ မင်းသမီး က ခင်သန်းနွယ် ။
အဲဒီကားမှာ ပထမဦးဆုံး တစ်ခန်း ပါဝင်ခွင့် ရတယ် ။ ကျွန်တော် ဆိုတဲ့ ကောင်ကလည်း သံယောဇဉ် ကြီးတယ်ဗျ ။
ကိုယ်တောင် မနည်း လုပ်နေရတဲ့ အချိန်မှာ ကျွန်တော့်ကောင် “ ဧရာ ” ကို မပါ,ပါအောင် ဒါရိုက်တာ ရော ၊ မင်းသား ရော ကို မနည်း ပြောပေးလို့ ၊ ဒီကောင် ဆရာဝန်ခန်း က တစ်ခန်း ပါလိုက်ရတယ် ။
နောက် ဒုတိယကား ဒါရိုက်တာ သန်းဇော် ရိုက်တဲ့ “ မိုးရဲ့အေးမ ” ၊ မင်းသား က ကိုမေတ္တာ ၊ မင်းသမီး က မူမူမြင့်ရှိန် ( ယခု ခင်နွဲ့နွဲ့မူ ) ဆိုပြီး ၊ ကုမ္ပဏီ ထောင်ထားသူ ။
အဲဒီ အချိန်မှာပဲ လမ်းကြောင်းလေးက ပွင့်ချင်လာတော့ ဒါရိုက်တာ စိန်သံမဏိ နဲ့ မှော်ဘီကိုးလုံးကွင်း မှာ နှစ်ကား ရိုက်ရတယ် ။ တစ်ကားကို သုံးထောင် ရတယ် ။
အဲဒီ ပိုက်ဆံလေးနဲ့ပဲ လှိုင်သာယာ အိမ်လေးကို လောလောဆယ် လူနေဖြစ်ရုံလေး ဆောက်ဖြစ်သွားတယ် ။
မဆောက်လို့လည်း မရတော့ဘူး ။ တစ်ရပ်ကွက်လုံး အိမ်တွေ ဆောက်ပြီးနေပြီ ။ ကျွန်တော့် အိမ်တစ်လုံးပဲ ကျန်တော့တယ် ။
မိုး ကလည်း ကျနေပြီ ။ သွပ်ပြား အစုတ်လေးတွေကို ယာယီ မိုးပြီး မိသားစုက မိုးရွာရင် အစို ၊ နေပူရင် အခြောက် နဲ့ ဖြစ်သလို နေနေ ရတာကိုး ။
နှစ်ဖက် မိဘတွေကိုလည်း အားမကိုးပါဘူး ။
ဘာဖြစ်လို့လဲ ဆိုတော့ နှစ်ဖက်လုံး က သဘောမှ မတူဘဲ ။ ကျွန်တော့် မိန်းမ က အင်မတန် သတ္တိ ရှိတယ် ။ သူ ချစ်လို့ ယူထားတဲ့ အနုပညာသမား တစ်ယောက်ရဲ့ ဘဝကို ကျွန်တော် နှ င့်အတူ ရင်ဆိုင် ဖြေရှင်းတယ် ။
သူ ဖောက်ပြန်ချင်ရင် အလွယ်လေး ။
လက်တွဲ ဖြုတ်ချင်ရင် အလွယ်လေး ။ သူ့ မိဘဆီ ပြန်သွားရုံပဲ ။
မသွားဘူးဗျာ ... ဘဝကို ကြံ့ကြံ့ ခံတယ် ။
( လှိုင်သာယာ အိမ်ကိစ္စကတော့ ကျွန်တော့်ရဲ့စာအုပ် “ ထူးထူးရှယ် ဒိုင်ယာရီ ” ထဲမှာ ပါပြီးသွားပါပြီ )
◾ ကျော်ထူး
📖 လူပြောများတဲ့ လူပေါကြီး
koaungnaingoo.blogspot.com
.
No comments:
Post a Comment