❝ ကြေကွဲ ဝတ္ထုတို ❞
ဝတ္ထုတစ်ပုဒ် ဆိုတာ စာရေးသူတစ်ယောက် ရဲ့ နှလုံးသွေးစက်တွေနဲ့ ဖန်တီးထားတဲ့ အရာ တစ်ခုပါ ။ အရွေးခံရသည် ဖြစ်စေ ၊ အပယ်ခံရသည် ဖြစ်စေ အဲဒီ ဝတ္ထုကလေးက စာရေးသူ အတွက်တော့ ဘယ်လိုမှ တန်ဖိုးဖြတ်လို့ မရဘူး ဆိုတာ စာရေးသူတိုင်း နားလည်စွာ ကိုယ်ချင်းစာလို့ ရမှာပါ ။
သူမ လို ကလောင်သစ် တစ်ယောက် အကြောက်ဆုံးကတော့ ကိုယ်ပို့တဲ့ ဝတ္ထုကို ရွေးမှာ ၊ မရွေးမှာ ထက် မဖတ်ဘဲ ချောင်ထိုးလိုက်မှာကိုပါပဲ ။ ဒီလို အဖြစ်မျိုးတွေ မကြာခဏ ရှိခဲ့ဖူးတယ်လို့ ကြားဖူးနားဝ ရှိထားတဲ့ သူမ ခမျာ သူမရဲ့ ဝတ္ထုတိုကလေးတွေကို မဂ္ဂဇင်းတိုက် ပို့မယ့်အစား နှမြောစိတ်နဲ့ စိုးရွံ့စွာ သိမ်းဆည်းထားမိပါတယ် ။
သူမ ရဲ့ အကြောက်လွန်မှုကို ဖြေရှင်းဖို့ သူမရဲ့ အချစ်ဆုံးသူငယ်ချင်း က အကြံတစ်ခု ပေးပါတယ် ။ အဲဒါကတော့ သူမ နဲ့ ငယ်စဉ်က အထက်တန်းကျောင်း မှာ အတူတူ တက်ခဲ့ဖူးတဲ့ လက်ရှိလုံးချင်းလောက မှာ နာမည်ရနေတဲ့ စာရေးဆရာမလေး ကို အကူအညီ တောင်းဖို့ပါပဲ ။ သူကနေ တစ်ဆင့် ပို့တော့ အနည်းဆုံး အားနာပါးနာနဲ့ ဖတ်မှာပေါ့ လို့ သူငယ်ချင်းက ဆိုပါတယ် ။ သူမ အနေနဲ့ ကလည်း သူမရဲ့ ဝတ္ထုတွေကို ဒီအတိုင်း သိမ်းထားမယ့် အတူတူ စမ်းကြည့်တာ မဆိုးဘူးလို့ တွေးပြီး အဲဒီ စာရေးဆရာမလေး ဆီကို ချဉ်းကပ်ပြီး အကူအညီတောင်းခဲ့ပါတယ် ။ သူကလည်း လိုလိုလားလားနဲ့ လက်ခံလိုက်တာမို့ သူမ အရမ်း ပျော်သွားပြီး ဝတ္ထုတိုတစ်ပုဒ် စတင် ပေးပို့ခဲ့ပါတယ် ။
ဒါပေမယ့် သူမရဲ့ ဝတ္ထုလေး ရွေး မရွေး ဆိုတဲ့အကြောင်းကို တစ်လကြာလည်း မကြား ၊ နှစ်လကြာလည်း မကြား မို့ သူမ စိတ်ပူစ ပြုလာပါတယ် ။ စာရေးဆရာမလေး ကို မေးတော့လည်း “ မအားသေးလို့ဖြစ်မှာပါ ၊ ဖတ်နေပါတယ် ” စတဲ့ ဝေဝေဝါးဝါး အဖြေတွေကိုသာ ရရှိခဲ့ပါတယ် ။ ကြာတော့ သူမလည်း “ ဪ ... ငါ့ ဝတ္ထုကိုတော့ မကောင်းလို့ ပယ်လိုက်ပြီထင်တယ် ။
သူ ပြောရမှာ အားနာနေလို့ ဖြစ်မှာပါ ” လို့ တွေးပြီး မေ့မေ့ပျောက်ပျောက်ပဲ နေလိုက်ပါတယ် ။
ခြောက်လခန့် အကြာမှာ သူမရေးဖြစ်သမျှ ဝတ္ထုတွေကို ပေးဖတ်နေကျ သူမရဲ့ တစ်ဦးတည်းသော ပရိသတ်ဖြစ်သူ သူငယ်ချင်းက သူမဆီ မဂ္ဂဇင်းတစ်အုပ် ယူလာပြီး “ ဒီမှာ နင့်ဝတ္ထု ပါလာပြီ ... ” လို့ မျက်နှာ မကောင်းစွာနဲ့ ပြောပါတယ် ။
သူမက “ ဟင် ... ဟုတ်လား ” ဆိုပြီး မဂ္ဂဇင်းစာအုပ်ကို ဝမ်းသာအားရ လှမ်းယူလိုက်ပါတယ် ။ သူပြတဲ့ စာမျက်နှာပါတဲ့ ဝတ္ထုတို ကလေးက သူမ ရွေးချယ်ထားတဲ့ ခေါင်းစဉ် အစစ်ပါ ။ အထဲက စာသားတွေကလည်း သူမ အခါခါ ၊ အထပ်ထပ် စိတ်ကြိုက် မဖြစ် ဖြစ်အောင် သူ ပြင်ခဲ့တဲ့ စာသားတွေပါပဲ ။ နည်းနည်းလေးတောင် မလွဲပါဘူး ။ အဲ ... လွဲနေတာက တစ်ခုတည်းပါ ။ အဲဒါကတော့ စာရေးသူရဲ့ အမည်နေရာမှာ သူမရဲ့ နာမည်အစား သူမဝတ္ထု ကို မဂ္ဂဇင်းတိုက် ကို ပို့ပေးပါမယ် ဆိုတဲ့ နာမည်ရ စာရေးဆရာမလေး ရဲ့ နာမည် ဖြစ်နေတာလေး တစ်ခုပါပဲ ။
◾ကျွန်း
📖 လုံမလေးမဂ္ဂဇင်း
ဖေဖော်ဝါရီလ ၊ ၂၀၀၁ ခု
koaungnaingoo.blogspot.com
.
No comments:
Post a Comment