❝ လူပေါကြီးဘဝ ဆက်လျှောက်ခြင်း ❞
စာဖတ် ပရိသတ်များ ခင်ဗျား.. အထက် မှာ ကျွန်တော်ရေးခဲ့တာတွေဟာဖြင့် ကိုယ့်ကိုယ်ကိုယ် ဖော်တာ မဟုတ်ပါဘူး ၊ အရှိ ကို အရှိ ၊ အမှန် ကို အမှန် အတိုင်း ရေးချင်တာ ၊ ကျွန်တော့်ရဲ့ ပင်ကို စိတ်ပါ ။ ဘာဖြစ်လို့ ရေးရတာလဲ ဆိုတော့ အခြားခြားေသာ လူငယ်တွေ ဝါသနာရှင်တွေ ဘဝကို ကြံ့ကြံ့ခံပြီး ၊ ကိုယ်လျှောက်ချင်တဲ့ အနုပညာလမ်း ကို ရဲရဲဝံ့ဝံ့ ဖောက်နိုင် ၊ လျှောက်နိုင် အောင်လို့ တွန်းအားပေးတဲ့ သဘောပါ ။
"ကျွန်တော်လူေပါကြီး ” ကတော့ ဆက်လက်ပြီး ၊ ဒီလမ်းကို ဖောက်နေဦးမှာပဲ လျှောက်နေဦးမှာပဲ ။ ပေးဆပ်မှုတွေ ၊ ရုန်းကန်မှုတွေ များစွာနဲ့ ဖြတ်သန်းခဲ့ရသော လူေပါကြီးပါဗျာ ... ။ ဒါပေမယ့် အဲလို ကျွန်တော်လူပေါ ဖြစ်ခဲ့ရတာ ၊ မိသားစု စားဝတ်နေရေးအတွက် အရာရာကို အောင့်အီးသည်းခံခဲ့ရပေမယ့် တစ်ခါတစ်ရံမှာ ကျွန်တော်သာ လူပျိုလူလွတ် ၊ မိသားစု ၊ မိဘတွေ မရှိရင် ... လူပေါကြီး အစား ၊ လူရိုင်းကြီးများဖြစ်လေမလားလို့ စဉ်းစားမိသေးတယ် ။ အဲဒီတော့ အယဉ်နဲ့ အရိုင်း ကြားမှာ မိသားစု စားဝတ်နေရေးအတွက် မိခင်ဖခင်တွေ အတွက် ကျွန်တော်လူပေါကြီးအဖြစ် ခံယူလိုက်ပါတယ် ။ ဒီဘဝ အတွက်ရော ၊ နောင်ဘဝ အတွက်ပါ ။
တစ်ခါတလေဗျာ .. ရှိပါသေးတယ် ။ “ မင်းသားက အသစ်ဖြစ်နေလို့ ၊ ဈေးလျှော့ပေးပါ ” ဆိုလို့ လျှော့ပေးရတာမျိုးရှိသလို ၊ “ မင်းသားက စူပါကြီး ဖြစ်နေလို့ ၊ သူမှာတင် တော်တော်လေး ပေးလိုက်ရလို့ပါ ... လျှော့ပါဦး .. နောက်ကားတွေ ခေါ် သုံးပါဦးမယ် .. ” ဆိုလာပြန်တော့ ကျွန်တော် လူပေါကြီး ၊ နောက်ကား မျှော်လင့်ချက်နဲ့ လျှော့ရပြန်ရော... ၊ ဟော - ရင်းနှီးတဲ့ ဒါရိုက်တာ ကျပြန်တော့လည်း “ သူ့ကန်ထရိုက်ယူထားရလို့ ” ၊ ထုံးစံအတိုင်း လျှော့ရပြန်ရော .. ။
အိမ်က “ ထူးသခင် ” က ဈေးက ပြန်လာပြီဆိုတာနဲ့ “ ဝုန်း ” ဆို ဆွဲခြင်း ပစ်ချ ။ နဖူးက ချွေးတွေကို လက်ဖမိုးနဲ့သပ်ချပြီး ... မဲ့ကာရွဲ့ကာနဲ့ ပြောလာပြန်ရော ။
အင်း ... သူပြောလည်း ပြောချင်စရာပါ ။ ဒါပေမယ့် ကျွန်တော် လုပ်နေတဲ့ ၊ ကျင်လည်နေရတဲ့ဘဝကို သူ မသိစေချင်ဘူး ။ စဉ်းစားကြည့်လေ.. မင်းသားတွေက ( ၁၀ ) ရာခိုင်နှုန်း ၊ ကျွန်တော်တို့ ဇာတ်ပို့ဇာတ်ရံတွေက ( ၁ ) ရာခိုင်နှုန်း တော်တော်လေး ကွာပါတယ် ။ အဲ ... ကားရိုက်လို့ ရတဲ့ ငွေကို စုပုံ ၊ ဟောဒါက အိမ်လခ ၊ ဟောဒါက ကျူရှင်ခ ၊ ဟောဒါက မီးဖိုချောင်ကိစ္စ ၊ ဟောဒါက အဖေတို့ အမေတို့အတွက် ၊ ဒါက ဒီကားမှာ ငါဝတ်ဖို့ အဝတ်အစားဖိုး .. စသည်ဖြင့် ခွဲခြားပိုင်းခြားပြီး ၊ ဟောတစ်ပုံ ဟောတစ်ပုံ , ပုံလိုက်ရတာ ... ။
အံမယ် ... ဒါတောင် မင်းသားသူငယ်ချင်း သူဌေးသား ဆို သွားရောဗျာ ။ ခုခေတ် အဝတ်အစားဈေးကလည်း နည်းတာ မှတ်လို့ ။ တောကား ဆိုရင်တော့ နည်းနည်း သက်သာသေးတယ် ။ တစ်သက်လုံးတော့ ကားရိုက်နေရရင်တော့ OK ပေါ့ ။ ရှုတင်မန်နေဂျာ ဆိုတာကလည်း ကျွန်တော်တို့လို အလွှာကဆိုတော့ ကိုယ်ချင်းစာပါတယ် ။ သူ့လည်း နည်းနည်းပါးပါးတော့ ပေးကျွေးရသေးတယ် ။ ပေးမကျွေးလို့ကတော့ ရန်ကုန် မှာ ရှိနေလည်း မန္တလေး ရောက်နေတယ် ပြောချင် ပြောတာဗျ ။ ကိုယ်ကြိုက်ဈေးရမှ လိုက် မယ် ဆိုပြန်တော့လည်း TAXI သမားတွေလိုပဲ ကိုယ်က ရှေ့က တစ်ထောင် ခေါ်ရင် နောက်က ရှစ်ရာ နဲ့ လိုက် မယ့် လူတွေ တစ်ပုံကြီး ။ အချို့ ကုမ္ပဏီတွေက အရည်အချင်း ကြည့်တာ မှုတ်ဘူး ။ ဇာတ်နဲ့ လိုက်၏ ၊ မလိုက်၏ မကြည့်ဘူး ။ ငွေ သက်သာရရင် ပြီးရော ... တစ်ကျပ်ဖိုး ငါးကောင် နဲ့ လည်း ရိုက်လိုက်တာပဲ ... အဲဒီလို တစ်ကျပ်ဖိုး ငါးကောင်တွေ ရှိနေတော့ ကျွန်တော်တို့လို အနုပညာမာန်တွေ ရှိတဲ့ လူတွေ ငုတ်တုတ်မေ့ ပေါ့ဗျာ ။
ကြာတော့လည်း မိသားစု စားဝတ်နေရေးအတွက် အဲဒီ မာန်တွေ ခဝါချပြီး ၊ လူပေါကြီး ပြန်ဖြစ်ရပြန်ရော ။ ကိုယ်က ဘုန်းကြီးလူထွက် ၊ စစ်သားလူထွက် လိုပဲ ဒီ အနုပညာတစ်ခုပဲ လုပ်တတ်တာ ၊ အဲဒါမှ မလုပ်ရင် အခြား ဘာမှလည်း လုပ်ကိုင်စားသောက်တတ်တာ မှုတ်ဘူး ။ မကျွမ်းလည်း မကျွမ်းကျင်ဘူးလေ ။ ကျွမ်းကျင်ရအောင်ကလည်း အချိန်ပေးရဦးမယ် ။ အရင်းအနှီးကလည်း ရှိရဦးမယ် ။ အဲဒီ အရင်းအနှီး ကို ဘယ်လို စုဆောင်းရမလဲ ။
ရတဲ့ ငွေကို အဝတ်အစားဖိုးဝယ် ၊ မိသားစုဖို့ဖယ် ၊ ဟိုဖယ် ဒီပုံ နဲ့ တစ်ကား ပြီးသွားတာနဲ့ တစ်ပြားမှ မကျန်တော့ဘူး ။ နောက် တစ်ကား ထပ် မျှော် ၊ မစုမိ ၊ မဆောင်းမိတာတောင် ပုံမှန်ဖြစ်ဖို့တောင် တော်တော်လေး ကြိုးစားနေရတာ နည်းနည်းလေး ကျဲသွားလို့က တော့ ငယ်ငယ်က ပြောသလို " မန်းမန်း တူတူပုန်းပြီသာ မှတ် ”
အဲဒီတော့ တတ်ထားသော အနုပညာလေး နဲ့ပဲ လူေပါကြီး ကျွန်တော် ဘယ်အချိန် ဘယ်ကာလအထိ အသက်ရှင်နေသရွေ့ကာလပတ် အထိပေါ့လေ ။ ဆက်လက်ပြီး အနုပညာအလုပ်တွေကို လုပ်နေရဦးမှာပါ ... ။
မြန်မာနိုင်ငံမှာ ရှိနေကြသော အနုပညာရှင် အပေါင်းများစွာကို ထမင်းကျွေးကြတဲ့ “ ထမင်းရှင် ၊ ဟင်းရှင် ” မိဘပြည်သူ အပေါင်းကို ကျန်သော အနုပညာရှင်တွေရဲ့ ကိုယ်စား ကျွန်တော် ဒီစာအုပ်လေးနဲ့ ဂါရဝပြု ကန်တော့လိုက်ပါရစေလားဗျာ ...
ယခုတော့ဖြင့် ကျွန်တော် ကြိုးစားခဲ့သမျှ ပင်ပန်းခဲ့သမျှ အနစ်နာခံသမျှ “ ကျော်ထူး ” ဆိုတဲ့ နာမည်လေး တစ်လုံးကို ပရိသတ် ရင်ထဲ ရောက်အောင် ပို့နိုင်ခဲ့ပါပြီ ။ ယခုအချိန်အထိလည်း ပရိသတ်ကို အနုပညာဖြင့် စာပေနဲ့ တစ်မျိုး ၊ ဗွီဒီယိုဇာတ်ကားဖြင့် တစ်ဖုံ ၊ ရုပ်ရှင်ကားကြီးဖြင့် တစ်သွယ် ၊ အငြိမ့်နည်းဖြင့် တစ်နည်း ၊ နည်းမျိုးစုံဖြင့် ဖျော်ဖြေတင်ဆက်ကျေးဇူးဆပ်နေပါပြီ ။ ရှေ့လျှောက်လည်း “ ဇွဲ ” ၊ “ လုံ့လ ” ၊ “ ဝီရိယ ” ကြိုးစားအားထုတ်ပြီး ၊ လူပြောများတဲ့ လူပေါကြီး ကျွန်တော်က အနုပညာဖြင့် ကျေးဇူးဆပ်ပါဦးမည် ခင်ဗျာ ... ။
◾ ကျော်ထူး
📖 လူပြောများတဲ့ လူပေါကြီး
koaungnaingoo.blogspot.com
.
No comments:
Post a Comment