❝ ဈေးသည်ကြီး နဲ့ တွေ့ဆုံခြင်း ❞
ဒီလိုနဲ့ ပွဲတစ်ည သုံးကျပ်ခွဲ ကနေ ဆယ့်ငါးကျပ် ၊ ဆယ့်ငါးကျပ် ကနေ သုံးဆယ့်ငါးကျပ် ဖြစ်လာတဲ့ အချိန် ..
ကျောင်းသားလေး ချိုတူး ကနေ ကျွန်တော့် ဘကြီး ရေဒီယိုဦးစိန်ခင်မောင် က
ကျောင်းသားလေး “ ကျော်ထူး " ဆိုပြီး .. နာမည် ပြောင်းပေးတယ် ။
တိုက်တိုက်ဆိုင်ဆိုင် ကျွန်တော် သုံးဆယ့်ငါးကျပ် ရတဲ့ နှစ်ပေါ့ ။
ကျွန်တော်ကတဲ့ တေးသံရှင်ခင်မာချို အငြိမ့်မှာ ဈေးသည်ကြီး ဦးဆန်နီ ပါဝင်လာတယ် ။
သူက အဲဒီအချိန်မှာ လျှမ်းလျှမ်းတောက် ပေါ့ ။
ပွဲညကြေး ၊ တစ်ည တစ်ရာ့ငါးဆယ် စပေါ် ( အသုံး ) တစ်သောင်းခွဲ လား ၊ နှစ်သောင်းခွဲလားပဲ သိပ် မမှတ်မိတော့ဘူး ။
ညဈေး အမြင့်ဆုံးစပေါ် အများဆုံး ၊ ကားစစီးတဲ့ ကျွန်တော် သိတဲ့ လူရွှင်တော်ဟာ ဈေးသည်ကြီးဦးဆန်နီ ပဲ ။
သူ နဲ့ ကျွန်တော် က ရာဇဝင် ရှိတယ် ။
ဒီလို ခင်ဗျ ။
ကျွန်တော် ခုနစ်တန်းနှစ် သန်လျင် ကျိုက်ခေါက် ဘုရားပွဲမှာ အဖေ တို့ ပါတဲ့ အငြိမ့် ခင်မာချိုပေါ့ ။
ပွဲကချိန် ကျွန်တော်ကလည်း ပွဲကြည့်ချင်တော့ အဖေ့ကို ပူဆာပြီး ...
ညနေပိုင်း ပုဇွန်တောင်က ထွက်တဲ့သီတာ ( ၁ ) ၊ သီတာ ( ၂ ) သင်္ဘောကြီး နဲ့ သန်လျင်ကျိုက်ခေါက်ဘုရားပွဲကို ရောက်သွားတယ် ။
ဟိုရောက်တော့ မျက်နှာသစ်နေတဲ့ ဈေးသည်ကြီး ဦးဆန်နီ ကို ဇာတ်ရုံရဲ့ နောက်ဘက် မှာတွေ့တော့ အဖေက ...
“ ဆန်နီ .. ဒါ ငါ့သားလေ .. ”
ဆိုပြီး မိတ်ဆက်ပေးတယ် ။
ဦးဆန်နီ က ..
“ မင်းကရော .. ဘာလုပ်မှာလဲ .. မင်း ဘကြီးက အငြိမ့်ထောင် ဆရာ ၊ မင်း အစ်မက နာမည်ကြီး အငြိမ့်မင်းသမီး ၊ မင်းအဖေ
က လူရွှင်တော် ၊ မင်းကျမှ ဘာမှ သုံးမရတဲ့ ခဲမူးစေ့ မဖြစ်စေနဲ့ ”
လို့ ကျွန်တော့်ကိုပြောတယ် ။
အဲဒါနဲ့ ကျွန်တော် ကလည်း ...
“ ကြည့်လိုက်ပါဦး ဦးလေးရယ် ... တစ်ချိန် ဦးလေး နဲ့ ကျွန်တော် ဟောဒီ အငြိမ့်စင်ပေါ်မှာ ပြန်ဆုံစေရမယ် ”
လို့ လူငယ်ပီပီ မခံချင်စိတ် နဲ့ ပြန်ပြောလိုက်တော့ ဘေးက အသံဝိဇ္ဇာဦးသံချောင်း ( ကွယ်လွန် ) နဲ့ ပတ္တမြားဦးသိန်း ( ကွယ်လွန် ) လူရွှင်တော်ကြီးတွေက ဝိုင်းရယ်ရင်းနဲ့ ...
“ ဆန်နီ ရေ ... မင်းအတွက် ပြိုင်ဖက်အသစ်လေးပေါ်လာပြီ ... ပြေးနိုင်မှ လွတ်မှာနော် ”
ဟု ပြောခဲ့ဖူးပါတယ် ။
◾ ကျော်ထူး
📖 လူပြောများတဲ့ လူပေါကြီး
koaungnaingoo.blogspot.com
.
No comments:
Post a Comment