ပလက်ဖောင်း လူရွှင်တော်

 

❝ ပလက်ဖောင်း လူရွှင်တော် ❞

လှိုင်သာယာ ကို ရောက်တော့ ချက်ချင်း အိမ်ပြန် မဆောက်နိုင်သေးပါဘူး ။

သစ်တွေ ဝါးတွေ ၊ ပျဉ်တိုပျဉ်စတွေ ၊ အားလုံး ပုံထားပေါ့ ။

အိမ်ဆောက်ဖို့ထက် ဗိုက်ပြဿနာက အရေးကြီးတယ်လေ ။

မနက်စောစော ထ ၊ ကားတိုး စီး ၊ သင်္ဘောတိုးစီးနဲ့ ရန်ကုန် မှာ အလုပ် လိုက်ရှာ ...

တစ်ခါတလေ ပြန်ချိန် မရလို့ ၊ သင်္ဘော မမီတဲ့ အခါမျိုးတွေမှာ စမ်းချောင်း တို့ ၊ ဟုမ်းလမ်း တို့မှာ ရှိနေတဲ့ အမျိုးတွေအိမ် တစ်ညတလေ အိပ်ပါရစေ ဆိုပြီး ခွင့်တောင်းတာ တောင်း ...

ဗေဒင်ကိန်းဂဏန်း အရ ခြေနှစ်ချောင်း မဝင်ကောင်းဘူး ။ ညအိပ်ညဉ့်နေ လက်ခံလို့ မရဘူး ပြောလွှတ်လို့ ...

ကြုံရာ သစ်ပင်အောက် ၊ ကြုံရာ ဓမ္မာရုံတွေမှာ ဝင်အိပ်ခဲ့ရတယ် ။

ကြည့်မြင်တိုင် ပန်းတဉ်းတန်း ဓမ္မာရုံဟာ ကျွန်တော့် ရဲ့ ခိုနားရာ ညအိပ် ဖဲမွေ့ယာ ဖြစ်ခဲ့တယ် ။

တူတွေ ၊ တူမတွေ ၊ အမျိုးတွေ ဆိုလည်း လမ်းတွေ့ရင် ပိုက်ဆံ ချေးမှာ စိုးလို့ ရှောင်သွားကြတယ်လေ ။

ဓမ္မာရုံ လူရှင်းတဲ့ အချိန်အထိ မယောင်မလည်နဲ့ စောင့်နေ ...

လူလည်း ရှင်းရော .. ဦးလေး ဦးပေါကြွယ် ကို ပြောပြပြီး ဝင်အိပ် ...

မနက်စောစော လူတွေ မတွေ့ခင် ဓမ္မာရုံ က အုတ်ကန်ထဲ က ရေနဲ့ မျက်နှာသစ် ပုဆိုး နဲ့ သုတ်ပြီး ... ပြန်ထွက် ... ခလုတ်တိုက်နဲ့ပေါ့ ။

မိသားစုကို ပြန်ပေးဖို့ နေနေသာသာ ကိုယ်တောင် မနက်စာ လွတ် ၊ ညစာ လွတ် နဲ့ ။

တစ်ရက်ပေါ့ ...

ကိုမေတ္တာ ဟာ သူ့ အိမ်မှာ လာ အိပ် ၊ လာစား တဲ့ ။

ဘယ်ဖြစ်မလဲဗျာ ။

သူ့ ဆီမှာက သူ့ ညီမ အပျိုတွေ ရှိတယ် ။

သူ နဲ့ ကျွန်တော် က ဆွေရိပ် မကင်း မျိုးရိပ် မကင်းပါ ။

ကျွန်တော် က အားနာတော့ တခြားနည်းကို စဉ်းစားသေးတယ် ။

မရတဲ့ အဆုံးကျတော့ သူ့စကားကို နားထောင်လိုက်တယ် ။

ကျွန်တော့် ဘဝမှာ ကျေးဇူးရှင် စာရင်းထဲမှာ သူက ထိပ်ဆုံးကပါပဲ ။

“ ကိုမေတ္တာ ”  ကျွန်တော်တို့ ရပ်ကွက် သင်္ကြန်အလှပြကား မှာ သံချပ်တိုင် သရုပ်ပြ လုပ်နေချိန်မှာ ...

ကျွန်တော်က တေးသံရှင်ခင်မာချို အငြိမ့်မှာ “ လူရွှင်တော် ” ကနေပြီ ။

◾ ကျော်ထူး

📖 လူပြောများတဲ့ လူပေါကြီး

koaungnaingoo.blogspot.com

.