❝ အနော်ရထာ လော ကျန်စစ် လော ❞
( ဗေလုဝ )
အနော်ရထာမင်း က ပထမ မြန်မာနိုင်ငံတော်၊ ဘုရင့်နောင် မင်းတရားကြီး က ဒုတိယ မြန်မာ နိုင်ငံတော် နှင့် အလောင်းမင်းတရားကြီး က
တတိယ မြန်မာနိုင်ငံတော် ကို ထူထောင် ခဲ့ကြသည် ။
ထို မင်းကောင်း မင်းမြတ် များ ၏ ကြီးမားသည့် အစဉ်အလာ ကို နောင် လူတို့ က လေးစား အတုယူ တန်ဖိုး ထားတတ်ဖို့ ငယ်စဉ် က ပင် ကျောင်းသုံး စာအုပ်များ ၌ ပင် သင်ကြား မှတ်ယူခဲ့ကြရ သည် ။ ကျောင်း တွင် အသင်းအဖွဲ့ များ ကို ပင် ဘုရင့်နောင် အသင်း ၊ ကျန်စစ်သား အသင်း ဟု ပင် ဂုဏ်ပြု မှည့်ခေါ်ခဲ့ကြ ရသည် ။
ထို သမိုင်းများ ကား ဖျောက် လို့ မရ သလို ၊ ပျောက်ကွယ် လို့ လည်း မရ ။ ထို သမိုင်းဝင် ခဲ့ သော သူရဲကောင်းများ အား ကျွန်ုပ် တို့ မြန်မာပြည် ၌ ခေတ် အဆက်ဆက် ပေါ်ထွန်း လာခဲ့ကြသည် ။ ထိုမှ နယ်ချဲ့ ဆန့်ကျင်ရေး ၊ ဖက်ဆစ်စနစ် တော်လှန်ရေး တွင် လည်း သူရဲကောင်း များစွာ ပေါ်ထွန်း လာခဲ့ကြ သည် ။
သမိုင်း တွင် သည့် ပုဂ္ဂိုလ်များ ရှိ သလို သမိုင်း မတွင် သည့် အညတြ သူရဲကောင်း များစွာ လည်း ရှိခဲ့သည် ။
မြန်မာပြည်၏ အထင်ကရ စာမျက်နှာများ ...၊ ထို စာမျက်နှာများ အား တစ်စ တစ်စ မှေးမှိန် ပျောက်ကွယ် သွားအောင် လုပ်ပစ် လိုကြသည့် လူများ လည်း ရှိခဲ့သည် ။
ဥပမာ ... ဦးဥတ္တမရုပ်တု ကျောက်တိုင် နှင့် ရုပ်တု သည် လည်း ချုံနွယ် ပိတ်ပေါင်း များစွာ ထူထပ် ၍ မူလ နေရာ မှ ပျောက်ခြင်း မလှ ပျောက်ကာ ထွက်ရပ်ပေါက် သွားသည် လား မသိတော့ ။ ဒါသည် လည်း အင်မတန် မှ ရင်နာစရာ ကောင်းသော ဖြစ်ရပ် တစ်ခု ပင် ။ တစ်မြို့တည်း သာ ခိုင်ခိုင်ခံ့ခံ့ နှင့် တည်တည်တံ့ တံ့ ရှိခဲ့သည် ။ အာဇာနည် ကျောက်တိုင် သည် လည်း မြေ အရောင်းအဝယ် ကြား မှာ မြေစာ ပင် ဖြစ်ကာ ပုဂ္ဂလိ က အာဇာနည် ကျောက်တိုင် ဘဝ သို့ ရောက်ရှိ သွားပြီး အာဇာနည်နေ့ ရောက် တိုင်း ထို မြို့ မှ ဂါရဝ ပြုချင်သည့် မြို့ခံများ လည်း ခြံပိုင်ရှင် ထံ ခွင့်တောင်း ၍ အာဇာနည်နေ့ ရ တော့ မလိုလို ဖြစ်သွားကြပြီ ။
အထင်ကရများ ၏ ရှေ့ တွင် ပုဂံသူရဲကောင်းများ ကို ဟိုတယ် စောင့် ခိုင်း ထားသည် မှာ လည်း မြန်မာလူမျိုး မှ ဟုတ်လေစ ဟု မေးခွန်း ထုတ် ရ မလို ။
ဂုဏ် မပြုချင် နေပါ ဂုဏ် သိမ်အောင် တော့ မလုပ်ကြစေလို ပါ ဟု ...။
နိုင်ငံ အသီးသီး ၌ သူတို့ တိုင်းပြည် ၏ သူရဲကောင်း များ ကို အထွတ်အမြတ် ထားကြ သည် ။ ဦးညွှတ် ဂုဏ်ပြု ကြသည် ။
ကျွန်တော်တို့ သူရဲကောင်း များကို တော့ ဂုဏ် သိမ်အောင် လုပ်ပစ် လိုက်ကြသည် ။
အသိပညာ ကြီးမားခဲ့သူ နိုင်ငံရေးခေါင်းဆောင်များ သည် နောင်လာ နောက်သား များ သိမှတ် ဂုဏ်ယူ အတုယူ ကြရန် သူတို့ ခေတ် ကာလ က ထင်ရှား ကျော်ကြား ခဲ့ကြသည့် လွတ်လပ်ရေး ၏ မီးရှူးတန်ဆောင် ပုဂ္ဂိုလ်များ ကို ပန်းခြံများ ၌ ရုပ်တု သွန်း လုပ်၍ ဂုဏ်ပြုကြခြင်းများ ၊ လမ်းများ ၊ ဈေးများ ဖြင့် ဂုဏ်ပြုခဲ့ကြသည် မှာ ကောင်းမြတ်သော အမြော်အမြင်ကြီးများ ဟု လေးစား ရပါသည် ။
ခေတ် အဆက်ဆက် မြို့တိုင်း ရှိ ပန်းခြံများ မှ ဗိုလ်ချုပ်ကြေးရုပ်များ သည် လည်း အရပ်သား အစိုးရ လက်ထက် ကျ မှ ကြေးအထပ်ထပ် မှ အနည်းငယ် ကင်းစင် တောက်ပ လာသည် ဟု ထင်သည် ။
အဓိက ပြောချင်တာ တွေ ကတော့ မြေပဒေသာ စိုက်ပျိုးရေး ပန်းခြံထောင့် က ငုံစိစိ ပန်းပုရုပ်ကလေး ဖြစ်သည် ။ စာဖတ်ပရိသတ် များ လည်း အမှုမဲ့ အမှတ်မဲ့ မြင်ဖူးကြ လိမ့်မည် ။ တစိမ့်စိမ့် တွေး ရင် တသိမ့်သိမ့် ရင်နာ စရာပါ ။ နာဂစ် လက်ကျန် ဖြစ်ပါ လိမ့်မည် ။ လှံ တစ်ချောင်း ကိုင် ပြီး ငုတ်တိုလေး မတ်တတ် ရပ် နေသည့် ပန်းပုရုပ်ကလေး က ပုဂံခေတ် အဝတ်အစား လက်ရာ ဖြစ်ပါသည် ။ ပထမ မြန်မာနိုင်ငံ ကို ထူထောင်ခဲ့သည့် ခေတ် ၏ ပြယုဂ် ဖြစ်ပါသည် ။
အသေအချာ စဉ်းစားလျှင် စော်ကား ရာ လည်း ရောက် ပါသည် ။ ထို ရုပ်တု ရှေ့တွင် ဖြတ်သန်း နေကြသော ကား များ စွာ အနက် မှ သံရုံးကား များ လည်း ပါ ပါလိမ့်မည် ။ အနီးကပ်ဆုံး ဂျပန်သံရုံး ရှိပါသည် ။ မြန်မာ တစ်ပြည်လုံး ၏ စာပေများ ကို စိစစ် ပေး နေသည့် စာပေ စိစစ်ရေး သည် လည်း ဝင်္ကပါ လမ်း ထဲ မှာ ရှိ သည် ။ ရုပ်ရှင်အစည်းအရုံး လည်း ရှိသည် ။
နိုင်ငံခြားသား တစ်ယောက် က ဒါ ဘာ အရုပ် လဲ ။ လှံ ကိုင် ထားပုံ ထောက် ရင် သူတို့ ဆီ က သူရဲကောင်း တစ်ယောက် ဖြစ်မယ် ထင်တယ် ။ လမ်းဘေး မှာ ငုံစိစိ နဲ့ ဘာ ရပ် လုပ် နေတာလဲ ။ ပန်းခြံ ကို စောင့် နေတာလား ဟု သူ တို့ စိတ် ထဲ တွေးတော သွားလျှင် မြန်မာ့သူရဲကောင်း တွေ က ဘယ် ဘဝ ရောက် သွားမည် လဲ စဉ်းစားကြရမည် ။
အမြော်အမြင် ရှိကြပါ ။
လက်လွတ်စပယ် မလုပ်ကြပါနဲ့ ။ ရှေ့နောက် တွေးခေါ် ချိန်ဆကြပါ ။ ကျွန်တော့် အတွေး ထဲ မှာ တော့ ထို ပန်းပုရုပ်ကလေး ကို အနော်ရထာ လော ၊ ကျန်စစ် လော ဟု မေးလိုက်ချင်ပါတော့သည် ။
⎕ ဗေလုဝ
📖 တဲ့တောက် နှင့် ပြာသောနားရွက်
#ကိုအောင်နိုင်ဦး
.
No comments:
Post a Comment