ဝက်သစ်ချသီးကလေး

 

❝ ဝက်သစ်ချသီးကလေး ❞
             ( ပုံပြင် )

ရှေးသရောအခါ တောင်ထိပ် ပေါ်ရှိ ဝက်သစ်ချပင် တစ်ပင်၌ ဂျွန်းဂျွန်း ဆိုသော ဝက်သစ်ချသီးကလေး တစ်လုံး ရှိလေ၏ ။ ဂျွန်းဂျွန်းသည် သူ ရှိသော ဝက်သစ်ချပင် ပေါ်မှနေ၍ ကြည့်လိုက်လျှင် တောင်ခြေရှိ ရွာကလေး တစ်ရွာကို ကောင်းစွာ မြင်ရလေ၏ ။ တစ်နေ့သ၌ သူသည် ရွာကလေးကို ကြည့်နေစဉ် ရွာထဲတွင် ရွာသူရွာသားများသည် နွေဦးရာသီပွဲ လုပ်ကာ ပျော်ရွှင်စွာ ကခုန် နေကြသည်ကို တွေ့မြင်ရလေ၏ ။ ဂျွန်းဂျွန်း လည်း သူတို့လို ကခုန်ချင်စိတ် ဖြစ်ပေါ်လာလေ၏ ။ ထို့ကြောင့် ဂျွန်းဂျွန်းသည် ရွာသို့ သွားလိုသည် ဖြစ်၍ လေအား “ လေမင်းကြီးရယ် ၊ ကျွန်တော် ရွာထဲကို သွားပြီး ပျော်ပွဲကြည့်ချင်လို့ပါ ၊ ကောင်းကောင်းကြီး တိုက်လိုက်စမ်းပါ ” ဟု တောင်းပန်လေ၏ ။ ထိုအခါ လေကလည်း ဂျွန်းဂျွန်းကို ချစ်သည်နှင့် ပြင်းစွာပင် တိုက်ခတ် လိုက်လေ၏ ။ လေက ပြင်းစွာ တိုက်ခတ်လိုက်သောကြောင့် ဂျွန်းဂျွန်းသည် သစ်ပင်ပေါ်မှ ကြွေကျ ပြီးလျှင် တောင်အောက်သို့ လိမ့်ကျသွားလေ၏ ။ သူသည် လိမ့်၍လိမ့်၍ ကျသွားရာ ကောင်းစွာ ရပ်၍ မရနိုင်ဘဲ တောင်ခြေရှိ မြစ်ထဲသို့ ကျပြီးနောက် မျောပါ သွားလေ၏ ။ ဂျွန်းဂျွန်းလည်း ကြောက်အားလန့်အားနှင့် ရေစီးရာသို့ မျောပါသွားရာ ဘုရားရှိခိုးကျောင်း တစ်ကျောင်း နောက်သို့ ရောက်ရှိ သွားလေ၏ ။ ဂျွန်းဂျွန်းလည်း ကြောက်အားလန့်အားနှင့်ပင် “ ကယ်တော်မူကြပါ ခင်ဗျာ ၊ ကျွန်တော် ရေနစ် နေပါတယ် ၊ ကယ်တော်မူကြပါ ” ဟု တအား ကုန်းဟစ်၍ အော်လိုက်လေ၏ ။ ထိုဘုရားရှိခိုးကျောင်း မှာလည်း နွေဦးရာသီပွဲ ကျင်းပရာဖြစ်၍ နေလေ၏ ။ ထို့ကြောင့် ဘုရားရှိခိုးကျောင်း ထဲမှာ ရှိနေသော လူကလေး နှစ်ယောက်တို့က ဂျွန်းဂျွန်း၏ ဟစ်အော်သံကို ကြားလိုက်ကြ၍ မြစ်ဆိပ်သို့ ပြေးထွက်လာခဲ့ကြလေ၏ ။ သူတို့သည် ကမ်းပေါ်မှ နေ၍ “ ဟေ့ ဘယ်ကလဲ ၊ ဘာဖြစ်နေတာလဲ ” ဟု ဟစ်အော်၍ ပြန်မေးလိုက်ကြလေ၏ ။

မြစ်ထဲမှ ဂျွန်းဂျွန်း ကလည်း ဝမ်းသာအားရဖြင့် “ ဒီမှာ ဒီမှာ ၊ ကျွန်တော် မြစ်ထဲမှာ မျောပါလာပါတယ် ၊ ကျွန်တော်ဟာ ဟိုတောင်ပေါ်က ဝက်သစ်ချသီးကလေး ဂျွန်းဂျွန်း ဆိုတာပါ ၊ ဒီရွာက နွေဦးရာသီ ပျော်ပွဲကို လာတာပါ ၊ အဲဒါ တောင်ပေါ်က လိမ့်ကျပြီး မြစ်ထဲမှာ မျောပါသွားလို့ပါ ” ဟု ပြန်ပြော လိုက်လေ၏ ။ ထိုအခါ လူကလေး နှစ်ယောက်တို့လည်း မြစ်ထဲသို့လိုက်၍ ကြည့်ကာ မျောနေသော ဂျွန်းဂျွန်းကို ကူး၍ ဆယ်လိုက်ကြလေ၏ ။ ထို့နောက် လူကလေးတို့သည် ဂျွန်းဂျွန်း ရောက်ချင်နေသော ရွာထဲမှ နွေဦးရာသီပွဲ ရှိရာသို့ ခေါ်သွားပြီးလျှင် ကောင်းစွာ လိုက်ပြကြလေ သတည်း ။

( ဘာသာပြန် )

〇 နုယဉ်
📖ရှုမဝ မဂ္ဂဇင်း
     ၁၉၆ဝ ၊ မေ