❝ ခဲလေသမျှ သဲရေကျ ❞
▢ မျိုးနိုင် (တန့်ဆည်)
ကျုပ်တို့ ကျွဲဆွဲရွာမှာ ကိုရင်ကြီးလူထွက် ကိုကျော်သန်း ဆိုတာ ရှိတယ်။ သူဟာ ကိုရင်ကြီးလူထွက်ပီပီ ရသမျှ တရားစာတွေကို ညစဉ် ရွတ်ဖတ်လေ့ ရှိတယ်။ ထူးခြားတာက ရွာထဲမှာ နေအိမ်အသစ် ဆောက်ရင်ပဲဖြစ်ဖြစ်၊ ရေတွင်း အသစ် တူးရင်ပဲဖြစ်ဖြစ် ဘုရားစာ၊ တရားစာ အစုံအလင်နဲ့ နတ်ရေကန်ပွဲ တင်တတ်တယ်။ ကျွဲဆွဲရွာဟာ လမ်းဆုံနဲ့ ကပ်နေတာဆိုတော့ တစ်ခါတစ်ရံ လမ်းဆုံ မြို့ပေါ်ထိ နတ်ရေကန်ပွဲ လိုက်တင်ရတယ်။
အခုတော့ အရင်ကလို ကိုကျော်သန်း မဟုတ်တော့ပါဘူး။ အပေါင်းအသင်း မှားပြီး အရက်သမားလုံးလုံး ဖြစ်လာပါတော့တယ်။ အရွယ်ကလည်း ရလာ၊ အရက်သမားလဲ ဖြစ်လာ ဆိုတော့ မှတ်ဉာဏ်က အရင်ကလို မကောင်း တော့ဘူး။ ညရောက်ပြီဆို ပရိတ်ကြီးဆယ့်တစ်သုတ်ကို ကပေါက်တိ ကပေါက်ချာ ဟိုရောက် ဒီရောက် အရက်မူးသံနဲ့ အော်ဆိုတော့တယ်။ ဒါပေမယ့် သူ့ကို ယုံကြည်နေတဲ့ သူတွေကတော့ တစ်ခါတစ်ရံ နတ်ရေကန်ပွဲ တင်ဖို့ လာခေါ် တတ်ကြသေးတယ်။
တစ်နေ့ လမ်းဆုံ၊ မဟာမြိုင်ရပ်ကွက် အိမ်အသစ်ဆောက် ပန္နက်ရိုက်မှာ ကိုကျော်သန်း နတ်ရေကန်ပွဲ တင်ရတယ်။ ကန်တော့ပွဲကို လေထဲမှာ မြှောက်ချီပြီး ပါးစပ်က တတွတ်တွတ် ရွတ်နေတာကို သူ့သူငယ်ချင်း လက်သမားဆရာ ကိုဘခက် သေချာ ကြည့်ပြီး “ဒီကောင် ရွတ်နေတာ မရိုးသားဘူး၊ ညနေ အရက်မူးအောင် တိုက်ပြီး ငါ အစ်မေးကြည့်ရင် ဒီကောင် ပြောမှာ သေချာတယ်” လို့လည်း တွေးမိတယ်။
ညနေ လမ်းဆုံ မြနန်းတော်အရက်ဆိုင်မှာ ကိုကျော်သန်းနဲ့ ကိုဘခက် အရက်မူးကြတဲ့အခါ “ဟေ့ကောင်ကျော်သန်း၊ မင်းမနက်တုန်းက နတ်ရေကန်ပွဲ တင်ရာမှာ မင်း ပါးစပ်လှုပ်တာ မရိုးသားဘူး၊ ငါ့ကို အမှန်အတိုင်း ပြောစမ်း” လို့ ပြောတော့ ကိုကျော်သန်းဟာ အာလေးလျှာလေးနဲ့ “ဟုတ်တယ် ဘခက် ... ငါလည်း ဘယ်သူ သိတာမှတ်လို့ ဆိုပြီး တွံတေးသိန်းတန်ရဲ့ ပြေးကြိုတော့ ထွေးညိုသီချင်းကို ခေါက်ချိုးခေါက်ပြန် ဆိုနေတာပဲကွ” လို့ ဝန်ခံပါတော့တယ်။
တကယ်လို့ ကိုကျော်သန်းရဲ့ လုပ်ရပ် ကာယကံရှင်များသိသွားရင်တော့ ခဲလေသမျှ သဲရေကျ ဖြစ်ကြမှာ။
▢ မျိုးနိုင် (တန့်ဆည်)
📖 ရယ်စရာ မဂ္ဂဇင်း
ဇွန်လ ၊ ၂၀၁၅
