မေတ္တာဗေဒင် ဇာတ်လမ်းဆင်

 

❝ မေတ္တာဗေဒင် ဇာတ်လမ်းဆင် ❞
       ( အောင်လင်း )

ကျွန်တော် သည် အချစ် ပြဿနာပေါင်း များစွာ ကို ဖြေရှင်း ပေးခဲ့ဖူးသူ ဖြစ်သည် ။ ဤသို့ ရေး၍ ကိုယ်ရည်သွေးသည် ဟု မထင်ရန် ကြိုတင် တောင်းပန်ထားရပေမည် ။

အမှန်အတိုင်း ရေးသားခြင်း ဖြစ်သည် ။ ကျွန်တော် သည် အချစ် ပြဿနာပေါင်း များစွာ ကို ဖြေရှင်းပေးခဲ့ဖူးသူ ဖြစ်သည် ။ ပြေလည်အောင် လည်း ဖြေရှင်းပေးနိုင်ခဲ့သူ ဖြစ်သည် ။ သို့ ဖြေရှင်းရာ၌ ပြဿနာ အသေးအမွှား လည်း ပါ၏ ။ ကြီးကြီးမားမား လည်း ပါ၏ ။ ပြဿနာ ကို လိုက်၍ ဖြေရှင်းရာ၌ လည်း နည်းအမျိုးမျိုး ဖြင့် ဖြေရှင်းခဲ့ရသည် ။ လွယ်လွယ် နှင့် ဖြေရှင်း၍ ရသည်လည်း ရှိသည် ။ ခက်ခက် နှင့် ဖြေရှင်းရသည် လည်း ရှိသည် ။

တက္ကသိုလ် တွင် နေစဉ် က မူ အင်းလျားဆောင် ဘင်တန်ဆောင် တို့ ရှေ့တွင် တယော ကို ဆိုထိုး ထိုး ၍ ဖြေရှင်း ပေးခဲ့ရသည့် နည်းမျိုး လည်း သုံးခဲ့ရဖူးသည် ။ ကျွန်တော့် မိတ်ဆွေ တစ်ယောက် က အင်းလျားဆောင် မှ ကျောင်းသူ တစ်ယောက် ကို ပိုးပန်းသည် ။ မိန်းကလေး က မိတ်ဆွေ အနေဖြင့် ဆက်ဆံခြင်း ကို လက်ခံသော်လည်း ချစ်ရေး ကြိုက်ရေး ကိစ္စ ကို ကျောင်းနေစဉ်တွင် မစဉ်းစား ဟု ဆိုသည် ။ ဤသည်တွင် ကျွန်တော့် မိတ်ဆွေ မှာ အချစ်နာ ကျ၍ အသည်း အစိမ်း လိုက် ကွဲလေတော့၏ ။

သူ ၏ အချစ်နာကျပုံ ကို ကောင်မလေး သိစေလို၏ ။ သူ့ အား သနားစေချင်၏ ။ ဤအကြောင်း ကို စာ နှင့် ဖွဲ့နွဲ့၍ ရေးသည် ။ ဤသည်နှင့် လည်း အားမရ ၊ ညဉ့်သန်းခေါင်ယံ တွင် အင်းလျားဆောင် ရှေ့၌ သူ ၏ အသည်း အစိမ်းလိုက် ကွဲပုံ ကို ဂီတဖြင့် သီကျူးလိုသည် ။ သို့သော် ကျွန်တော့် မိတ်ဆွေ မှာ တီးလည်း မတီးတတ် ၊ ဆိုလည်း မဆိုတတ်ချေ ။ ထို့ကြောင့် သူ့ အစား ကျွန်တော် က အသည်းကွဲသော သီချင်းများ ကို ဆို၍ တီး၍ ပေးရသည် ။ မိန်းကလေး ကို သူ ကိုယ်တိုင် ဆိုလေဟန် ဖြင့် ကြိုတင် ပြောထားနှင့်လေသည် ။ သူ ပြောသည့် အတိုင်း လည်း မိန်းကလေး က ယုံသည် ။

ကျွန်တော့် ဂီတသံ ကို ကြားရ လျှင် ပြတင်းဝ မှ သို့မဟုတ် ဝရန်တာ မှ ထွက်ပြူ ရပ်ကာ နားထောင် တတ်၏ ။ ကျွန်တော့် မိတ်ဆွေ က သူ ဆိုလေဟန် အမူအရာ လုပ် ပြ ရသည် ။ ကျွန်တော် က သူ့ ဘေး မှ ကွယ်၍ မိန်းကလေး မမြင်အောင် ဆိုတီး တီး၍ ပေးရ သည် ။ နောက် မိန်းကလေး က သူ့ ကို သနားသည် ။ နောက် သူ့ အချစ် ကို လက်ခံသည် ။ ဤသို့သော နည်းမျိုးဖြင့် လည်း ဖြေရှင်း ပေးရသည် ။

အချို့ ပြဿနာများ ကို မူ စာရေး ပေးခြင်း ဖြင့် ဖြေရှင်း ပေးရသည် ။ ပြဿနာ ကို လိုက်၍ စာ ဘယ်နှစောင် နှင့် ကိစ္စပြီးရမည် ဟု လောင်းကြေး စားကြေး ဖြင့် ဖြေရှင်း ပေးရသည် ။

တချို့ကို မူ ကိုယ်တိုင် အောင်သွယ်ကောင်းကြီး လုပ်ကာ ဖြေရှင်း ပေးရသည် ။ တချို့ကိုမူ အသေးစိတ် အနေအထိုင် အသွားအလာ အပြောအဆို အဝတ်အစား မှ စ၍ အကြံပေး ညွှန်ကြားကာ ဖြေရှင်း ပေးရသည် ။ ခေါင်း မဖြီး နှင့် ၊ မိန်းကလေး နှင့် တစ်လ လောက် မတွေ့အောင် ရှောင်နေ ၊ အဝတ်အစား စုတ်စုတ်ပြတ်ပြတ် ဝတ် ၊ ရှိုး လုပ်သည့် အခါ လုပ် ၊ ကျောင်း မတက်ဘဲ နေ စသည်ဖြင့် အသေးစိတ် တာဝန် ယူကာ ဖြေရှင်း ပေးခဲ့ရသည် ။

ကျွန်တော် ဖြေရှင်းသမျှ အချစ်ပြဿနာများ သည် ပြေလည်ခဲ့သည် သာ များသည် ။ အောင်မြင်ခဲ့သည် သာ များသည် ။ သို့သော် ကျွန်တော် သည် ဤကိစ္စ ကို ကား မည်သူ့ ကို မျှ အသိ မပေးခဲ့ချေ ။ ပေး၍ လည်း မဖြစ် ။ ကာယကံရှင် မိန်းကလေးများ သည် ဤကိစ္စ ကို သိသွားလျှင် ကျေနပ်ချင် မှ ကျေနပ်ပေမည် ။ ယောက်ျား လုပ်သူ က လည်း အသိခံရဲမည် မဟုတ်ချေ ။ သူ့ အရှက် ကို ခွဲသည် ဟု ဆိုချင်ဆိုမည် ။ မိန်းကလေး က သူ့ အား အထင်သေးမည် ကို လည်း စိုးရိမ်ပေလိမ့်မည် ။

ထို့ကြောင့် အချစ်ပြဿနာ နှင့် ပတ်သက်၍ ကျွန်တော် သည် အသည်း အစိမ်း လိုက် ကွဲသောဒဏ် ကို ကုစားနိုင်သည့် ဒေါက်တာ ကောင်းကြီး လည်း ဟုတ်၏ ။ ပြဿနာ ကို အမှုသည် ကိုယ်စား ပြေလည်အောင် ဆောင်ရွက် ပေးသော ရှေ့နေ ကောင်းကြီး လည်း ဟုတ်၏ ။

အချစ်ရေး နှင့် ပတ်သက်၍ ရှေ့ ဖြစ်မည် ကို ကြိုတင် နိမိတ် ဖတ်နိုင်သော မေတ္တာ ဗေဒင်ဆရာကြီး လည်း ဟုတ်၏ ။

ဤကား စာရေးဆရာ မဖြစ်ခင် ကတည်း က ပင် ရရှိခဲ့သော ကျွန်တော့် ဘွဲ့ထူး ပင် ဖြစ်၏ ။

စာရေးဆရာ ဖြစ်မည် ယောင်ယောင် ရှိသောအခါ ကျွန်တော် သည် ဤ စွန့်ပစ် ထားသော အလုပ် ကို ပြန်၍ လုပ်ရလေတော့သည် ။ စာဖတ်သူများ ထံ မှ သူတို့ အချစ် ပြဿနာ ကို ဖြေရှင်းပေးရန် ၊ အသည်းအစိမ်းလိုက် ကွဲ နေသည် ကို ကုစားပေးရန် ၊ ရင် တွင်း ၌ တောက်လောင် နေသော အချစ်မီးကြီး ကို ငြှိမ်းသတ်ပေးရန် ထို ဇာတ်လမ်းများ ကို ပင် စာတစ်စောင် ဖွဲ့၍ ရေး ပေးရန် စာအမျိုးမျိုး ရောက်လာ၏ ။

ထို အထဲတွင် ရွှေညာသူ ‘ နွဲ့ ’ ဆိုသော အမျိုးသမီး တစ်ယောက် ထံ မှ စာတစ်စောင် ရောက် လာသည် ။ သူ့ အချစ် ပြဿနာ နှင့် ပတ်သက်၍ မည်သို့ ဖြေရှင်းရမည် ကို အကြံဉာဏ် တောင်းသော စာ ဖြစ်သည် ။ ထို စာ ကို ဖတ်ရသောအခါ ကျွန်တော် က မူလ ဝါသနာ ကို မစွန့်နိုင်ဘဲ အချစ်ရှေ့နေ ကောင်းကြီး ၊ မေတ္တာဗေဒင်ဆရာ ၊ အသည်းကွဲ ရောဂါကု ဒေါက်တာ အလုပ် ကို စေတနာ သန်သန် ဖြင့် လုပ်မိတော့သည် ။

ဤ ဝတ္ထု ဇာတ်လမ်း သည် ဤ စာ မှ ဖြစ်ပေါ်၍ လာလေသည် ။

•••••   •••••   •••••

ဆရာရှင့်

ကျွန်မ ရဲ့ ကိုယ်ရေး ကိုယ်တာ ပြဿနာ ကို ဆရာ့ အား ယုံကြည် ကိုးစားစွာ ဖြင့် တိုင်ပင်ပါရစေ ရှင့် ။ ဆရာ နှင့် လူချင်း ရင်းနှီးခင်မင်မှု မရှိပေမယ့် ဆရာ ၏ ဇာတ်ဝတ္ထုများ ကို ဖတ်ရှု နှစ်သက်ခဲ့ သဖြင့် ကျွန်မ ၏ အတွင်းရေး ကိစ္စများ ကို ခုလို တိုင်ပင်ရခြင်း ဖြစ်ပါတယ် ။

လွန်ခဲ့သော နှစ်နှစ် ခန့် က ကျွန်မ နှင့် ကိုမြင့်ဆွေ တို့ တစ်ယောက် နှင့် တစ် ယောက် ရင်းနှီးခင်မင် ချစ်ခင်ခဲ့ကြပါတယ် ။ ကိုမြင့်ဆွေ မှာ ကျွန်မ နှင့် တက္ကသိုလ် ဝင်တန်း တွင် အတူ နေခဲ့သူ ဖြစ်ပါတယ် ။ ကျွန် မနှင့် ကိုမြင့်ဆွေ ရဲ့ သတင်း ကို တစ်ကျောင်းလုံး က သိကြပါတယ် ။ တစ်မြို့လုံး က လည်း သိကြပါတယ် ။ ကြားဝင် ၍ ဖျက်သူများ လည်း ရှိပါတယ် ။ ဒါပေမဲ့ ကျွန်မ တို့ အချစ်ဟာ ဘယ်သူ ဖျက်လို့ မှ မရခဲ့ပါဘူး ။ ကိုမြင့်ဆွေ ရဲ့ မိဘများ မှာ လူကုံထံ အရာရှိပိုင်း မှ ဖြစ်ပါ တယ် ။

ဒါကြောင့် ကိုမြင့်ဆွေ နှင့် ကျွန်မ ကို သဘော မတူပါ ။ အမျိုးမျိုး ဖျက်ပါ တယ် ။ ဒါပေမဲ့ ကိုမြင့်ဆွေ က တော့ မိဘစကား ကို နား မဝင်ခဲ့ပါ ။ ဒီလိုနဲ့ အဆင် ပြေလာတဲ့ ကျွန်မတို့ အချစ်ရေး ဟာ ပညာရေး အတွက် တစ်ယောက် နဲ့ တစ်ယောက် ကွဲကွာခဲ့ပါတယ် ။ ကိုမြင့်ဆွေ နဲ့ ကျွန်မ နဲ့ အတူ စာမေးပွဲ ဖြေခဲ့ကြပေမယ့် ကိုမြင့်ဆွေ က နှစ်နှစ် ဖြေပြီး အောင်ခဲ့ပါတယ် ။ ကျွန်မ ကတော့ သုံးနှစ် အထိ ဝါဆို ခဲ့ပါတယ် ။ စာမေးပွဲ ဆိုတဲ့ တံတိုင်းကြီး ကြောင့် ကိုမြင့်ဆွေ နဲ့ ကျွန်မ ဟာ လူချင်း ဝေးကွာ ခဲ့ရသလို ကိုမြင့်ဆွေ ရဲ့ အချစ် ဟာ လည်း ကျွန်မ အပေါ် မှာ ပျက်ပြယ် စ ပြုလာ ပါတယ် ။

တက္ကသိုလ် ရောက် စ တော့ ကျွန်မ ဆီ ကို စာ မှန်မှန် ပေးပါသေးတယ် ။ နောက်ပိုင်းကျတော့ စာ လုံးလုံး မလာတော့ပါ ။ တက္ကသိုလ်ပျိုဖြူတွေ တွေ့ ပြီး ကျွန်မတို့ လို တောကျီးကန်းမတွေ ကို မေ့သွားတာ ဆိုတာ သိရလို့ ရင်နာမိပါ တယ် ။ ဒီ အချစ်ဝေဒနာ ကြောင့် ကျွန်မ လည်း ကျောင်းစာ နဲ့ တောင် ပေးရတဲ့အထိ ဖြစ်ရပါတယ် ။ အဲဒါ ကျွန်မ တို့ ပြဿနာ ကို ဘယ်လို ဖြေရှင်းရမလဲ ဆိုတာ အကြံ ပေးရန် တောင်းပန်ပါတယ် ဆရာ ။ ပြီးတော့လည်း တစ်ချုံကွယ် တစ်မယ်မေ့ တတ်တဲ့ ယောက်ျားတွေ မတည်ကြည်မှုကို အခြေပြုပြီး ဝတ္ထု တစ်ပုဒ်လောက် ရေးပေးပါ ဆရာ ။

    ဆရာ့ အကြံ ကို မျှော်လင့်နေသူ
  
      နွဲ့
      နံပါတ် .... ၊ .... လမ်း ၊
                         ....... မြို့

အထက်ပါ စာ ကို ဖတ်၍ ကျွန်တော် သည် တစ်ချက် ပြုံး လိုက်မိသည် ။ ဤ ပြဿနာ သည် ကျွန်တော့် အတွက် အလွန် သေးငယ်သော ပြဿနာ ဖြစ်၍လည်း ပြုံး လိုက်မိခြင်း ဖြစ်သည် ။

ဤ ပြဿနာ၏ အခြေခံ အကြောင်းရင်းများ ကို ရှာသော် အလွယ်တကူ တွေ့ ရှိ နိုင်၏ ။ ထို တွေ့ ရှိသော အကြောင်းရင်း မှာ လည်း အလွန် ရိုးသားလှ၏ ။

အချစ် ဆိုသည် ကား နီးစပ်မှု မှ ပေါက်ဖွားလာခြင်း အကြောင်း တစ်ရပ် ဖြစ်၏ ။ လူချင်း အနေ ဝေး၍ အချစ် လည်း ဝေးကွာခြင်း ဖြစ်သည် ။ ထိုသို့ ဝေးကွာနေသည့် အပြင် ပတ်ဝန်းကျင်သစ် နှင့် တွေ့သောအခါ အဟောင်း ကို မေ့တတ်ခြင်း မှာ လည်း ဓမ္မတာ တစ်ရပ်ပင် မဟုတ်လော ။

ဤသည် ကို သဘောပေါက်မိသော ကျွန်တော့် အတွက် ဤ ပြဿနာ သည် ဘာမျှ ခက်ခဲစရာ မလိုတော့ချေ ။ ထို့ကြောင့်လည်း ကျွန်တော် သည် မေတ္တာဗေဒင် ဟောစာတမ်း တစ်စောင် ရေး၍ နွဲ့ ဆိုသော အမျိုးသမီး ထံ ပေးပို့လိုက်သည် ။

မကြာမီ ပင် နွဲ့ ထံမှ ပြန်စာ ရခဲ့သည် ။ ထိုအခါတွင် ကား ထူးထူးထွေထွေ မပါလှချေ ။ စာ ရကြောင်း ၊ ကျေးဇူး အထူး တင်ကြောင်း ၊ ပေးသော အကြံအတိုင်း တစ်သဝေ မတိမ်း လိုက်နာမည် ဖြစ်ကြောင်းလောက်သာပါသည် ။

ဤသို့နှင့် တစ်နှစ် ကျော်မျှ ကြာခဲ့သည် ။ ထို ပြဿနာ ကို မေ့သလောက်ပင် ရှိလေသည် ။

တစ်နေ့တွင် နွဲ့ ထံမှ စာတစ်စောင် ရလေသည် ။ ထို စာ ကို ဖတ်လိုက်သည့် အခါ တွင် ကျွန်တော် ၏ ဗေဒင် မှန်ကြောင်းလည်း သိရသည် ။ ကျွန်တော် ဖြေရှင်းသည့် အတိုင်း ပြေလည်သွားသည် ကို သိရ၍ ဝမ်းမြောက် မိလေသည် ။

ဆရာ ရှင့်

      ကျွန်မ အခု ရန်ကုန်တက္ကသိုလ် မှာ ရောက်နေပါပြီ ။ အကြံဉာဏ် အတိုင်း တစ်သဝေမတိမ်း လိုက်နာခဲ့၍ အရာရာ အဆင်ပြေပါသည် ။ ကိုမြင့်ဆွေ ကို ဖွင့် ပြောပြလို့ တောင် ဆရာ့ ကို ကျေးဇူး တင်နေပါတယ် ။ ဒီနှစ် ကိုမြင့်ဆွေ ကျ၍ အလွန် စိတ်ပျက် နေပါတယ် ။ ကျွန်မ က ပင် သူ့ ကို စိတ်မပျက်ရန် အားပေးနေရပါသည် ။ နှစ်ယောက် အတူ အောင် လျှင် တစ်ယောက် ကို တစ်ယောက် စောင့်မနေ ရဘဲ အလုပ်အတူ လုပ်နိုင်တဲ့ အကြောင်း ပြောမိပါသေးတယ် ။

ခုတော့ ဆရာ နည်းပေးတဲ့ အတိုင်း တောကျီးကန်း လို မနေတော့ပါ ။ ရန်ကုန် သူများ လို ဥဒေါင်းတောင်များ တပ်ဆင် တတ်ပါပြီ ။ ကိုမြင့်ဆွေ က ပင် ကျွန်မ ကို ခေတ်မဆန်ဖို့ ၊ ဆိုမရှယ်ဖို့ ဆုံးမ နေရပါတယ် ။ ဘာပဲဖြစ်ဖြစ် လူ ဆိုတာ ပတ်ဝန်းကျင် အလိုက် နောက်မကျန်ရအောင် ပြောင်းလဲကြရတာပဲ မဟုတ်လား ဆရာ ။

     ဆရာ့ ကို ကျေးဇူး တင်လျက်
              
     နွဲ့
     ရန်ကုန်တက္ကသိုလ်

ကျွန်တော် သည် နွဲ့ ထံ မှ စာ ကို ဖတ်၍ တစ်ပိုင်း မှ ဝမ်းသာသော်လည်း တစ်ပိုင်း က မူ စိုးရိမ်မိသည် ။ မိန်းမများ သည် ယောက်ျား ချစ်အောင် နေတတ် ထိုင်တတ် ရသည် ။ ရိုးလွန်း လျှင် လည်း တချို့ ယောက်ျားများ ၏ မျက်စိ ထဲတွင် ဆွဲဆောင်ခြင်း ကင်းတတ် ၏ ။ ဤသဘော ကို ကျွန်တော် က နွဲ့ အား ပြောခဲ့မိသည် ။ ဤသည်ကို ပုံသေ ယူ၍ ခေတ် ရှေ့ လွန် လိုလျှင် ဒုက္ခရောက်မည် ကို စိုးမိသည် ။

ဤအဖြစ်အပျက် သည် လည်း ငါးနှစ် ပင် ကျော် ခဲ့လေပြီ ။ ကျွန်တော့် စိတ် ထဲတွင် ကား သတိပင် မရတော့ချေ ။

သို့သော် တစ်နေ့ တွင် ကျွန်တော် သည် မိတ်ဆွေ စစ်ဗိုလ်များ နေရာသို့ ရောက် သွားသည် ။ ထို ဝိုင်းတွင် ကျွန်တော် ၏ ဇာတ်လိုက်ကြီး ကိုမြင့်ဆွေ ကို တွေ့ရလေသည် ။

ကျွန်တော့် မိတ်ဆွေ က ဗိုလ်မြင့်ဆွေ နှင့် ကျွန်တော့် အား မိတ်ဆက် ပေး လိုက်သည် ။ ကျွန်တော် ၏ စိတ်တွင် သူ ၏ နာမည် ကို ကြားဖူးသလို ရှိနေသည် ။ စဉ်းစား၍ လည်း မပေါ် လာ ၊ အလိုက်သင့် သာ ပြုံး၍ နှုတ်ဆက်ရ လေသည် ။

ဗိုလ်မြင့်ဆွေ က မူ ကျွန်တော့် နာမည် ကို ကြားလျှင်ပင် ဝမ်းသာအားရ ရင်းနှီးစွာ နှုတ်ဆက်လိုက်သည် ။

“ ခင်ဗျား လား ၊ ခင်ဗျား ကို ကျွန်တော် ကောင်းကောင်း သိတာပေါ့ ၊ ကျွန်တော့် ကို တော့ ခင်ဗျား မှတ်မိမှာ မဟုတ်ဘူး ၊ နေဦး ရန်ကုန်တက္ကသိုလ် က အနွဲ့ ဆိုတာ ခင်ဗျား သိမှာပေါ့ ၊ ခင်ဗျား ဆီ မှာ အကြံဉာဏ်တွေ ဘာတွေ တောင်းဖူးသေးတယ်ဗျာ ”

သည်တော့မှ လည်း လွန်ခဲ့သော ငါးနှစ် ခန့်က အနွဲ့ ကို သတိရ မိတော့သည် ။ ဗိုလ်မြင့်ဆွေ နာမည်သည် လည်း အလိုလို သတိရ လာတော့သည် ။

“ ဟုတ်ကဲ့ သိပါတယ် ၊ ကျွန်တော် တောင် အနွဲ့ ကို တတ်သမျှ မှတ်သမျှ အကြံ ဉာဏ် ပေးခဲ့ပါသေးတယ် ”

“ ဟုတ်တယ်လေ အဲဒါပေါ့ဗျ ၊ အားလုံးကို သွက်သွက်လည် သွားတာပဲ ၊ အင်းလေ ခင်ဗျား အပြစ်တော့ မဟုတ်ပါဘူး ”

ဗိုလ်မြင့်ဆွေ ၏ စကား ကြောင့် ကျွန်တော့် မှာ ထိတ်လန့်တကြား ဖြစ်မိသည် ။ အချစ်ရေး နှင့် ပတ်သက်လာလျှင် ကျွန်တော့် ဗေဒင်သည် မှားခဲ့သည် မရှိ ၊ မှန်သည် သာ  များ၏ ။ ဤ မကြီးကျယ်သော ကိစ္စကလေး မှ မှားရမည် ဆိုလျှင် ရာဇဝင် ရိုင်းပေတော့မည် ။

“ ဗျာ ဘယ်လို သွက်သွက်လည်တာလဲ ”

“ ခင်ဗျား တွက်တာတော့ မှန်ပါတယ် ၊ အနွဲ့ ဟာ ရိုးလွန်း အ လွန်းတယ်ဗျာ ၊ ပြီးတော့လည်း ရန်ကုန်သူ ဆတ်ကော့လတ်ကော့ကလေးတွေ အသစ်အဆန်း ဖြစ်နေတဲ့ ကျွန်တော့် အနေနဲ့ အနွဲ့ ကို မေ့ချင် သလို ဖြစ်လာတယ်ဗျ ၊ အဲဒါ ခင်ဗျား အကြံဉာဏ် ပေးတဲ့ အတိုင်း အနွဲ့ က ပုံစံ ပြောင်းလိုက်တော့ တက္ကသိုလ် မှာ ကို အတောက်ပဆုံး ကြယ် တစ်ပွင့် ဖြစ်လာတာပေါ့ ၊ အဲဒီတော့ ကျွန်တော့် အနေနဲ့ က သူ့ အပေါ် ပြန်ပြီး စိတ်လည် လာရတာပေါ့ ၊ ဒါပေမဲ့ သူ ကတော့ မရဘူးဗျို့ ၊ ဗိုလ်ရူးတွေ နဲ့ တွဲပြီး ခေတ် ကို နှစ်ပြန် လောက် လွန်ထွက် သွားတာပဲဗျို့ ၊ ဒီအထဲ ကျွန်တော် က အင်တာ မှာ တဖုန်းဖုန်း ကျ ကောင်းကုန်း ၊ သူ့ အတွက် က လည်း စိတ်ညစ်တယ် ၊ နောက်တော့ လက်လျှော့ ရတာပဲ ”

“ ဟင် ဒါဖြင့် နောက်ဆုံးကျ ဘယ်လိုလဲ ၊ ခင်ဗျား နဲ့ အဆင်ပြေရဲ့လား ”

“ နောက်ဆုံးကျ ကျန်ရစ်ပေါ့ဗျာ ၊ ကပြားတစ်ကောင် နဲ့ ရသွားတာပေါ့ ”

ကျွန်တော့် စိတ် ထဲ တွင် ကား အရှက်ကြီး ရှက်မိတော့သည် ။ လူတတ်ကြီး လုပ်၍ ဇာတ်ဆင် ပေးလိုက်သည် မှာလည်း ဆင်သည့် အတိုင်း မဖြစ် ၊ ကျွန်တော် သည် ဗိုလ်မြင့်ဆွေ ၏ စကား ကို နားထောင်ရင်း ပြုံးရမလို မဲ့ရမလို ရှိတော့သည် ။

“ အေးဗျာ ၊ တစ်ခါတလေ ထင်တာနဲ့ ဖြစ်တာဟာ တခြားစီပဲ ၊ ကျွန်တော် မှားတာပဲ ”

“ ခင်ဗျား မမှားပါဘူး ၊ ကျွန်တော် မှားတာ ၊ ကျွန်တော် သူ့ ကို ပုံစံ ပြောင်းတာ လွန်သွားတယ် ”

“ ဗျာ ခင်ဗျား က ပုံစံပြောင်းတယ် ဟုတ်လား ၊ သူ က ပြောင်းတာ မဟုတ်ဘူးလား ”

ဗိုလ်မြင့်ဆွေ ၏ နောက်ဆုံး စကားသည် ကျွန်တော့် ခေါင်း တစ်ခုလုံး ကို ချာချာ လည် ၍ သွားစေတော့သည် ။

“ ကျွန်တော် ပြောင်းတာပေါ့ ၊ ခင်ဗျား ပေးတဲ့ အကြံ အတိုင်း သူ့ ကို ကျွန်တော့် အကြိုက် ခေတ်ဆန်ဆန် ပုံ ပြောင်းတာ လွန် သွားလို့ ဒုက္ခ ရောက်တာပေါ့ ၊ ခင်ဗျား နားရှုပ် သွားပြီ ထင်တယ် ၊ ရှင်းရှင်း ပြောမယ်ဗျာ ၊ ခင်ဗျား ဆီ ကို အကြံဉာဏ် တောင်းတာ က အနွဲ့ မဟုတ်ဘူး ၊ ကျွန်တော် ဗျ ၊ ကျွန်တော် ”

▢ အောင်လင်း
📖ဝတ္ထုတိုများ ပေါင်းချုပ်