ဂီတနက်သန်ကိုစောညိန်း ၏ ပွင့်ဦး

 ❝ ဂီတနက်သန်ကိုစောညိန်း ၏ ပွင့်ဦး ❞

        ( စောနိုင်ဦး )

၁၉၅၁ ခုနှစ်ခန့်က ရေးသားခဲ့သော ဂီတနက်သန်ကိုစောညိန်း ၏ “ ပွင့်ဦး ” သီချင်း သည် ယခု ဆိုလျှင် နှစ်ပေါင်း ( ၆၇ ) နှစ်ခန့် ပင် တိုင်ခဲ့ပြီ ဖြစ်သည် ။ နှစ်တွေ မည်မျှပင် ကြာညောင်းခဲ့ သော်လည်း ' ပွင့်ဦး ' သီချင်းသည် ဂီတနက်သန်  မြတ်နိုးသူများ ၏ အသည်းလွှာမြေ တွင် အစဉ် မွှေးမြနေလျက်ပင် ရှိပါသေးသည် ။

ဂီတနက်သန် ကိုစောညိန်း ၏ “ ပွင့်ဦး ” နှင့် “ သစ္စာ ”  သီချင်းများ တွင် မေတ္တာ ၊ သစ္စာ အကြောင်းအရာများ အပြင် အဘိဓမ္မာ တရားများ လည်း နက်နဲစွာ ပါဝင်လျက်ရှိသည် ။ “ ပွင့်ဦး ” သီချင်း ကို ကိုစောညိန်း ကိုယ်တိုင် သီဆို အသံလွှင့်သောအခါ မြန်မာ့အသံ ညွှန်ကြားရေးဝန် ၊ ဦးခင်ဇော် ကိုယ်တိုင် တယ်လီဖုန်း ဆက်၍ ထိုသီချင်းကို ဓာတ်ပြား ကူးထားရန် လှမ်း မှာသည် ။ အသံကူးပြီးသောအခါ ဓာတ်ပြားလေဘယ် ကတ်ပြား ပေါ်တွင် ဤသီချင်းသည် အနုပညာရသအမြောက်ဆုံးသော ခံစားမှု တေးတစ်ပုဒ် ဖြစ်သည် ဟု ဦးခင်ဇော် ကိုယ်တိုင် အင်္ဂလိပ်လို ရေးကာ လက်မှတ်ထိုးပေးထားသည် ။

“ ပွင့်ဦး ” သီချင်းသည် ကိုစောညိန်း ၏ နှလုံးသားခံစားချက် မှ ပေါက်ဖွားလာသော တေးတစ်ပုဒ် ဖြစ်သည် ။ သူ၏ ရင်တွင်းခံစားချက် ရေပေါက်ကလေးများ သည် ဘဝတည်းဟူသော ကျောက်ဆောင် ပြင်ပေါ်သို့ ကျရောက်လာသောအခါ တေးသွား ၊ သံစဉ်ကလေးများ အဖြစ် အစီအရီ ထွက်ပေါ် လာကြသည် ။ “ ပွင့်ဦး ” သီချင်း ၏ တေးနောက်ခံ အရိပ် က ...

ကိုစောညိန်း ငယ်စဉ်က ( ၂၁ ) လမ်း ရှိ ဦးဘိုးအေးကျောင်း တွင် ပညာ သင်ခဲ့ရာ “ ခင် ” ဆိုသော မိန်းကလေး တစ်ယောက်နှင့် သိကျွမ်းခဲ့ရသည် ။ “ ခင် ” တို့ မိသားစု က ကြွယ်ဝချမ်းသာသည် ။ သူ သည် ဖြူစင်ချောမော သော အသားအရေ ရှိပြီး စိတ်သဘောထား မှာ လည်း စင်ကြယ်သန့်ရှင်းသည် ။ ထို့ကြောင့် ကိုစောညိန်း က “ ခင့် ” ကို စံပယ်ပန်းကလေး နှင့် တင်စားခဲ့သည် ။

ကိုစောညိန်း က ဓနုဂုဏ် ချို့တဲ့ သော်လည်း ဉာဏ်ကောင်းသည် ။ ဂီတ ၊ စာပေ ၊ အနုပညာ၌ ဝါသနာထုံသည် ။ ရည်ရည်မွန်မွန် ရှိပြီး ခင်မင်စရာ ကောင်းသောကြောင့် လူတိုင်း က ချစ်ခင်ကြသည် ။ “ ခင့် ”  မှ လည်း လူတိုင်းထဲက တစ်ယောက်မို့ ကိုစောညိန်း ကို ခင်မင်တွယ်တာ သံယောဇဉ် ဖြစ်ခဲ့ရသည် ။ သူတို့ နှစ်ဦးသည် တစ်ဦး ကို တစ်ဦး တွယ်တာ နှောင်ဖွဲ့ နေခဲ့ကြ သော်လည်း ဖွင့်ပြောဖို့ ရန်မှာ လက်တွေ့တွင် မဖြစ်နိုင်ဘဲ ရှိနေသည် ။ တစ်ဖက်သား မှာ လည်း မိန်းကလေး တန်မဲ့ ဖွင့်ပြောရမှာ ခက် သလို တစ်ဖက်သား ယောက်ျားလေး မှာ လည်း မတန်သည့် ပန်း ကို မလှ မ်းဝံ့ဝံ့ ဖြစ်နေခဲ့ရသည် ။ မည်သို့ပင် ဖြစ်စေ “ ခင့် ” အား တစ်နေ့နေ့တွင် ဖွင့်ပြောနိုင်လိမ့်မည်ဟု အားခဲထားနေစဉ်မှာ ပင် သူတို့ နှစ်ဦး ကို ဒုတိယကမ္ဘာစစ်ကြီး က တစ်နယ်တစ်ကျေး ဆီသို့ ခွဲပစ် လိုက်လေသည် ။ 

စစ်အတွင်း တွင် ကိုစောညိန်း သည် အလျဉ်းသင့် သလို “ ခင့် ” အကြောင်းကို လိုက်လံ စုံစမ်းသည် ။ “ ခင် ” နှင့် ရင်းနှီးခဲ့ဖူးသူများ နှင့် တွေ့တိုင်း “ ခင့် ” အကြောင်း မေးသည် ။ ကြုံလျှင် ကြုံသလိုလည်း “ ခင့် ” ကို ရှာဖွေ နေမိပါတော့သည် ။ လောကသစ္စာတရား ကို ရှာဖွေတွေ့ဖို့ ရန် ခက်ခဲသလို “ ခင့် ” ကို ရှာရသည် မှာ လည်း လွယ်လှသည် တော့ မဟုတ်ပေ ။

ရေမြေဆုံးစေသည့် တိုင် “ ခင့် ” ကို ရှာဖွေမည်ဟု အားခဲထားသော် လည်း “ ခင် ” နှင့် ပတ်သက်၍ ကိုစောညိန်း အတွက် စိတ်မကောင်းစရာ သတင်းတစ်ခု ကြားခဲ့ရသည်  ။ မိတ်ဆွေ တစ်ဦး ၏ ပြောပြချက် အရ “ ခင့် ” မှာ မိဘများ ပေးစာသော စက်သူဌေးသား တစ်ဦး နှင့် လက်ထပ်သွားပြီ ဟု သိလိုက်ရသည် ။ ရွှေသည်း မှာ ပျိုးပါတဲ့  ၊ မညှိုးပင်ကလေးသည် ကြွေကြွေကာ နွမ်းခဲ့ရလေပြီ ။ သူ့ အား အရိုင်းစံပယ်မို့ ပစ်ပယ်ခဲ့ပြီး နန်းထိုက်သည့် ပန်းမကိုဋ်တော် သခင်ကို ရွေးသွားသည် ဟု သာ မှတ်ယူလိုက်သည် ။

“ အသည် လွှာမြေဝယ် အမြစ်ဖြာယှက်သွယ် အချစ်ညှာခက်ခါနွယ် မာယာပင်နန်း ချစ်ပန်းပွင့်ဦးစ အရွယ် ချူတော်မူလာနိုး မျှော်ကိုးကာ ပူဗျာပါကြွယ် ရည်ရွယ်သွယ်သွယ်ပျောင်း ကြာလေ ညှာကြွေညောင်း မျှ ရယ် အရိုင်းစံပယ်မို့ ပစ်ပယ် ပန်တော်မဝင်တယ် ငွေသဇင်ကြူမွှေး သူ ရွေးပြီးထင် အားငယ် တွက်ရေသော် ရက်တွေခြား စောင့်စားရင်း မြေမှာ ကြွေကြွေကာ နွမ်းလေပြီကွယ် ငွေချပ်လွှာဆွေး မာလာမွှေး ရနံ့ပြယ် ”  

ထို့နောက် ကိုစောညိန်း သည် လောင်ကျွမ်း ခဲ့ရသော အသည်းနှလုံး ကို ဂီတ နှင့် ဖုံးဖိ ကုစားခဲ့ရသည် ။ “ ချစ်တိုင်းမညား ” “ ထီးကျန်ဘဝ ” “ သည်း ကြွေလုပြီ ( စန္ဒာပဝင်း ) ” စသော တေးသီချင်းများ ရေးစပ်၍ တစ်ယောက်တည်း ညည်းတွား နေခဲ့သည် ။ အချိန်က ကုစား ပေးသဖြင့် “ ခင့် ” အား တဖြည်းဖြည်း မေ့နိုင်လာသည် ။ နာကြည်းစိတ် နှင့် ဂီတတို့ ကလည်း “ ခင့် ” အား သတိမရ နိုင်စေရန် ကူညီပေးသည် ။

အချိန်တွေ တစ်စတစ်စနှင့် တိုက်စား ကုန်ဆုံးလာသည် ။ ဒုတိယကမ္ဘာစစ်ကြီးပြီးသောအခါ “ ခင် ” သည် ရန်ကုန် သို့ ပြန် ရောက်လာသည် ။ သမာဓိ သတင်းစာတိုက် တွင် ကိုစောညိန်း နှင့် တွေ့၍ အကျိုးအကြောင်း ရှင်းပြသည်  ။ မိဘများ က စက်သူဌေးသား နှင့် လက်ထပ်ပေးရန် စီမံခဲ့သည် မှန်သော်လည်း မိမိမှာ ကိုယ် တကယ် ချစ်ရသူနှင့် သာ လက်ထပ်ရန် ဆုံးဖြတ် ထားသည် ။ အချစ် နဲ့ ဘဝ ကို တစ်ထပ်တည်း ကျအောင် တည်ဆောက် လိုသူသာ ဖြစ်သည် ။ ကိုစောညိန်း လည်း အံ့သြခြင်း ကြီးစွာ ဖြင့် ဘာ ပြန် ပြောရမှန်းမသိဘဲ ကြက်သေ ၊ သေနေမိသည်  ။

သူ အနှစ်နှစ် ကာလက စိုက်ပျိုး ထားခဲ့သော အချစ်ပန်းပွင့်ဖူးကလေး သည် ကြွေနွမ်းခြောက်သွေ့ ခဲ့ပြီး ဖြစ်လေသည် ။ အချစ်တွေ ဆိတ်သုန်း ခဲ့ပြီး ဖြစ်၍ ထပ် ချစ်၍ မရတော့ပါ ။ သို့သော် မုန်းသလား ဆိုတော့လည်း မမုန်းပါ ။

“ စံပယ်ဖြူတုံးကာ မှ ခင်ဖုန်းသက်ဝေရယ် ဘယ်စိတ်လည်လို့ ပေါ်လာပြန်တယ် လှောင်တာလေ လားနော်ကွယ် ဖန်လာပုံ ခုမှ ဆန်းကြယ် အချစ်ဖြင့် ဆိတ်သုဉ်း ဆုံးရှုံးခြောက်ခန်း လောင်ကျွမ်းခဲ့ရ မောင့်ဘဝ အစဉ်ဝယ် ဆက်သွယ်သန္တာတိ မမြဲသော ရုပ်နာမ် ပြောင်းလွဲသည့် နှယ် ဖြစ်ပြန်ပျက်ပြန် အချစ်မှန်တရားရယ် မူလွန်ခဲ့သူရယ် ပွင့်ဦး ကြွေမှ ဖြင့်ကွယ် မပန်စေချင် ရက်တော့တယ် ”

သန္တတိသင်္ခါရ သဘောတရား အရ အရာရာတိုင်းသည် တစ်သမတ်တည်း မရှိနိုင်ပါ ။ အခု ချစ်လို့ ရပေမဲ့ နောင် ချစ်လို့ ရချင် မှ ရမည် ။ မြေမှာ ခ ခဲ့ရသော ပွင့်ခြောက်ကလေး အား တစ်ဖန် ပြန်ကောက်၍ မပေးချင် တော့ပါ ။ ကြွေနွမ်းမှုသည် ပြန်လည်လန်းဆန်း လာနိုင်တော့မည် မဟုတ်ပေ ။ ကိုစောညိန်း ၏ သဘောထား အမှန်ကို သိရသော “ ခင် ” မှာ မျက်ရည်သုတ်၍ ပြန်ခဲ့ရရှာသည် ။

သန္တတိသင်္ခါရ အနိစ္စ ကြောင့် ကိုစောညိန်း ၏ စိတ်အစဉ်တွေ ပြောင်းလဲခဲ့တာလား “ သစ္စာ ” သီချင်း ထဲ ကလို “ ဇရာ ကား ဝါးမျိုခဲ့ပြီကွယ် ” ဆို သည့် အတိုင်း “ ခင့် ”  မှာ ယခင်ကလို မလှပနိုင်တော့ပြီလား ၊ “ မမြဲသော ရုပ်နာမ် ပြောင်းလွဲသည့် နှယ် ” ဆိုသည့် အတိုင်း နှစ်ခုစလုံးကြောင့် ပဲလား ဆိုတာကတော့ ကိုစောညိန်း တစ်ယောက် သာ သိနိုင်ပေတော့သည် ။

“ ပွင့်ဦး ”  သီချင်း နှင့် ပတ်သက်၍ စာရေးဆရာကြီး အောင်သင်း က သူ့ အယူအဆ တစ်ရပ် ကို တစ်ချိန်က ကျွန်တော့် ကို ပြောပြခဲ့ဖူးသည် ။ သူ့ ထင်မြင်ချက်အရ “ ပွင့်ဦး ” သီချင်း သည် မိန်းမသား တစ်ဦး ၏ ခံစားချက်သာ ဖြစ်ရမည် ဟု ဆိုသည် ။ “ ချုတော် မူလာနိုး မျှော်ကိုးကား ပူ ဗျာပါကြွယ် ရည်ရွယ် သွယ်ညွတ်ပြောင်း ကြာလေ ညှာကြွေညောင်း မျှရယ် ” .. ဆိုသော စာသားသည် အမျှော်စိုက် အဖွဲ့ ပင် ဖြစ်သည် တဲ့ ။ ယောက်ျားလေး ပဲ ကိုယ် ကြိုက်နေမှ တော့ ရည်းစားစကား သွား ပြောလို က်မှာပေါ့တဲ့ ။ “ ချူတော် မူလာနိုး ” တွေ ဘာတွေ လုပ်နေပါ့မလား ။ မဟာဂီတ မှာ လည်း မြင်စိုင်းမင်းသမီး တို့ နန်းမတော် မမြကလေး တို့ ၊ လှိုင်ထိပ်ခေါင်တင် တို့ လည်း အမျှော်စိုက် သီချင်းတွေ ရေးခဲ့ဖူးပါသည် တဲ့ ။

“ ပွင့်ဦး ” သီချင်း အပေါ် ဆရာကြီး တက္ကသိုလ်ဘုန်းနိုင် ကလည်း ဤ သို့ နှယ် မှတ်ချက် ချခဲ့ဖူးပါသည် ။ “ ခင်ဖုန်း သက်ဝေရယ် ”  ဟု စာသား ကို တစ်ဆက်တည်း ဆက် ဆိုလိုက်လျှင် “ ခင်ဖုန်း ဆိုသော သက်ဝေကလေး ၊ ချစ်သူကလေး ” ဟု အဓိပ္ပာယ် ထွက်မည် ။ “ ခင်ဖုန်း သက်ဝေရယ် ”  ဟု “ ဖုန်း ” မှာ နည်းနည်းလေး ဆောင့် ဆိုလိုက်လျှင် “ ခင်ဖုန်း ၏ ချစ်စွာသော သက်ဝေ ရယ် ”  ဟု အဓိပ္ပာယ် ထွက်မှာ ဖြစ်ကြောင်း ဆရာကြီး က ထင်မြင်ချက် ပေးခဲ့ဖူးသည် ။

ဂီတနက်သန် ကိုစောညိန်း တွင် “ ခင်ဖုန်း ” ဟု အမည် ရသော တပည့်တစ်ဦး ရှိခဲ့ဖူးကြောင်း ကြားသိရဖူးသည် ။ ငယ်ငယ်ရွယ်ရွယ် နှင့် ယောက်ျား နောက် လိုက်သွားခဲ့ဖူးပြီး သဘောထားချင်း မတိုက်ဆိုင်ကြသည့် အချိန်တွင် လမ်းခွဲကာ မိဘရပ်ထံ ပြန်လာခဲ့သည် ။ “ ပွင့်ဦး ” သီချင်း ကို တပည့်ဖြစ်သူ ခင်ဖုန်း သီဆိုဖို့ ရန် ရေးပေးခဲ့သည် ဆိုသော ပါးစပ် ရာဇဝင်လေး တစ်ခု ကြားသိခဲ့ရဖူးသည် ။ ယောက်ျား နောက် လိုက်ခဲ့ဖူးသည့် မိန်းမသား တစ်ဦး ချစ်သူဟောင်း နှင့် ပြန်အတွေ့ နင့်နင့်နဲနဲ သီဆို လိုက်သည့် ပွင့်ဦး ကြွေ မှ ဖြင့်ကွယ် မပန်စေချင်ရက်တော့တယ် ” ဆိုသော အချ စာသားလေး ကို ရင်ထဲတွင် ကြေကြေကွဲကွဲ ကြားယောင် နေမိတယ် ။

၂၀ဝ၂ ခုနှစ် ၊ အောက်တိုဘာလ ( ၃၁ ) ရက်နေ့ ၊ ဂီတနက်သန် ကိုစောညိန်း ၏ နေအိမ် တွင် ပြုလုပ်ခဲ့သော ကိုစောညိန်း ကွယ်လွန်ခြင်း နှစ် ( ၅၀ ) ပြည့် ဆွမ်းကျွေးပွဲ တွင် စာရေးဆရာမကြီး အဘွား ဒေါ်ကြည်ဦး က အမှတ်တရ စကားများ ပြောကြားပေးခဲ့သည် ။ ဂီတနက်သန် ကိုစောညိန်း ၏ တေးသီချင်း များ အနက် သူ အစအဆုံး ရသော သီချင်း ဆို၍ “ ပွင့်ဦး ” သီချင်း တစ်ပုဒ် ပဲ ရှိပါသည် တဲ့ ။ အဘွား ဒေါ်ကြည်ဦး တွင် သားသုံးယောက် ရှိသည်  ။ မောင်သူရ ခေါ် ဦးဇာဂနာ ကို အချစ်ဆုံးပါတဲ့ ။ “ မေမေသား အိမ်ထော င်ပြုတော့မယ် ” ဟု မောင်သူရ ပြောလိုက်သည့် စကား ကို ကြားလိုက်ရသည့် အခိုက်မှာ ပဲ သူ့ ရဲ့ သား ချစ်ပန်းပွင့်ဦးလေး ကြွေခဲ့ရပါပြီတဲ့ ။ သူ့ ဘဝတွင် သူ့ သားကို သတိရတိုင်း “ ပွင့်ဦး ”  သီချင်း ကို အမြဲ သီဆိုဖြစ်ခဲ့ပါသည် တဲ့ ။ သားကြီး အပေါ် မေတ္တာ အစွဲအလမ်း ကြီးမားခဲ့ သော မိခင် တစ်ဦး၏ ခံစားချက် ကို ကျွန်တော် တို့ အားလုံး သိရှိ ၊ ကြားသိ ခွင့်ရခဲ့ဖူးပါသည် ။

“ ခပ်သိမ်းကလျာ ရှုဖွယ်သာတည်း ” စာအုပ် ထဲ တွင် ဆရာကြီး တက္ကသိုလ်ဘုန်းနိုင် ရေးသားခဲ့သော သြဝါဒ တစ်ခု ကို ပြေး အမှတ်ရမိသေးသည် ။ အနုပညာရှင် ဖန်တီးသူ က သူ့ နှလုံးသွေး ခံစားချက် နဲ့ ရေးပြီး ကမ္ဘာမြေကို ပေးဆပ်ခဲ့ပြီးပြီ ။ ခံစားမယ့်သူတွေ ၊ ခင်ဗျားတို့ ဆက် လုပ်ကြတော့ ။ ဆင့်ပွားခံစားကြ ၊ အကျယ်ဝိတ္တာရ ချဲ့ကြပေရော့ တဲ့ ။ မှတ်သားစရာ ကောင်းလှပါသည် ။

ဂီတ ကို ကဗျာမှု ပြုသူ ဂီတနက်သန် ကိုစောညိန်း ကွယ်လွန်ခဲ့သည် မှာ ယခုနှစ် ဆိုလျှင် ( ၆၆ ) နှစ် သို့ တိုင်ခဲ့ပြီ ဖြစ်သော် လည်း သူ ၏ နှလုံးသွေး ဖြင့် ရေးသားထားခဲ့သော “ ပွင့်ဦး ” သီချင်း ကတော့ ဂီတနက်သန် ချစ်သူ တိုင်း ၏ အသည်းလွှာ မြေဝယ် မွှေးမြ လတ်ဆတ်ဆဲပင် ရှိနေပါ သေးသည် ။

 ▢ စောနိုင်ဦး 

     ကိတ္တိမ အဖိုး ၊ မြေး ( ဂီတနတ်သန်ကိုစောညိန်း )

📖 စာပေမျိုးဆက်များ