စားမှာလား ၊ ခါးတယ် ခင်ဗျား

 

❝ စားမှာလား ၊ ခါးတယ် ခင်ဗျား ❞
      ( အဏ္ဏဝါစိုးမိုး )

ကိုအဏ္ဏဝါ တို့ သင်္ဘော က ဒုတိယအရာရှိ ပီတာလင်ချောင်မင်း ပြန်ရောက်လာပြီ ဆိုသည့် သတင်းကြောင့် အံ့သြ ဝမ်းသာ သွားကြသည် ။ ပီတာ ၏ အခန်း သို့ အပြေးအလွှား သွားပြီး သတင်း မေးကြသည် ။ ဝမ်းသာ အားရ လက်ဆွဲ နှုတ်ဆက်ကြသည် ။

ဒုတိယအရာရှိ ပီတာလင်း သည် လွန်ခဲ့သည့် တစ်ပတ်ခန့်က မူးယစ်ဆေးဝါး လက်ဝယ် တွေ့ရှိမှုဖြင့် အဖမ်း ခံရပြီး ..... နိုင်ငံ ... မြို့ ရဲစခန်းမှာ ကျန်နေခဲ့ခြင်း ဖြစ်သည် ။ ယခု ကိုအဏ္ဏဝါတို့ သင်္ဘော ရောက် ရှိနေရာ အမေရိကန်နိုင်ငံ ဘောလ်တီမိုးမြို့ သို့ နယူးယောက် မှ တစ်ဆင့် ရောက်လာခြင်းဖြစ်သည် ။ လုပ်ဖော်ကိုင်ဖက်သင်္ဘောသားတွေ က ဝမ်းသာအားရ နှုတ်ဆက်ကြရင်း မေးကြသည့် မေးခွန်းတွေ ကို ဖြေနေရသည် ။

ဇာတ်လမ်း က လွန်ခဲ့သည့် တစ်လ လောက်က စခဲ့သည် ။ ကိုအဏ္ဏဝါ တို့ သင်္ဘော သည် ကာရေဗီယံ ပင်လယ် အစပ် က ဧရာမ မူးယစ်ဆေးဝါးဂိုဏ်းကြီးများ ရှိရာ နိုင်ငံ ဆိပ်ကမ်းမြို့ တစ်မြို့သို့ ရောက်သွား သည် ။ ထိုဒေသ သည် မည်မျှ ဆိုးရွားသနည်း ဆိုလျှင် ထို နိုင်ငံ၏ မူးယစ်ဆေးဝါး မှောင်ခိုဂိုဏ်း တစ်ဂိုဏ်း ၏ ခေါင်းဆောင် ကို ဖမ်းပေးနိုင်သူ အား ဆုငွေ ဒေါ်လာ နှစ်သန်း ပေးမည် ဟု အစိုးရ က ကြော်ငြာထားသည် ။ ထို ဂိုဏ်းခေါင်းဆောင် ကလည်း သူ့ ကို ဖမ်းနိုင်သူ အား ဆုငွေ ဒေါ်လာ လေးသန်း ပေးမည်ဟု ပြန်ကြော်ငြာသည် ။ သို့ဖြစ်၍ ဖမ်းပေးနိုင်သူ သည် ဆုငွေ ဒေါ်လာ ခြောက်သန်းရမည် ဖြစ်သည် ။ ဤမျှ ပွဲကြမ်းနေသော အရပ် သို့ ကိုအဏ္ဏဝါ တို့ သင်္ဘော က ရောက်သွားသည် ။

နိုင်ငံ တစ်နိုင်ငံ ၏ ဆိပ်ကမ်း တစ်ခုကို ရောက်တယ် ဆိုရင် ကို အဏ္ဏဝါ တို့ ကလည်း ထုံးစံ အတိုင်းပေါ့ ။ ကိုအဏ္ဏဝါ အပါအဝင် လူမျိုးစုံ ပါဝင်သော အုပ်စု သည် မြို့လယ်ရှိ အလွန် ထင်ရှားသည့် နိုက်ကလပ် သို့ သွားကြတော့သည် ။ ( RED SPIDER ပင့်ကူနီ ညကလပ် ဟု ပြောလိုက် လျှင် ရောက်ဖူးသူ တို့ ပြုံးကြမည် ထင်ပါသည် ) ။ ထားပါတော့ ပြောချင်တာ က နိုက်ကလပ် အကြောင်း မဟုတ်ပါ ။ ဒုတိယအရာရှိ မစ္စတာပီတာ လင်ချောင်မင်း ၏ အကြောင်း သာ ဖြစ်ပါသည် ။

နိုက်ကလပ် သို့ ရောက်သောအခါ အသက် ငယ်၍ ရုပ်ရည် ချောမောသူ ပီတာ သည် သူ လိုပင် ရုပ်ရည် ချောမောလှပသည့် ကောင်မလေး နှင့် တွဲမိသွားသည် ။ ဗိုက်ရွှဲ မဲပြောင် အဏ္ဏဝါမောင် တို့ ကလည်း ကိုယ်နဲ့ တန်ရာ တန်ရာလေးတွေ အသီးသီး နဲ့ တွဲကြလေသည် ။ သောက်ကြသည် ။ ကကြသည် ။ ပျော်ကြသည် ။ ညသန်းခေါင် ကျော် ၍ နိုက်ကလပ် ပိတ်တော့ မှ သင်္ဘော သို့ ပြန်ခဲ့ကြသည် ။

အဲဒီ မြို့မှာ ကုန်တင်တာ သုံးပတ် လောက် ကြာသွားသည် ။ သကြားညို BROWNSUGAR တွေ တင်နေရ၍ မိုး ရွာလျှင် ကုန်ပေါက် တွေ ပိတ်ပြီး ကုန်တင်တာ ရပ်ထားရ၍ ကြာသည် ။ ဆိပ်ကမ်း အလုပ် သမားတွေ ဆန္ဒပြလို့ ကြာသည် ။ မဲရွေးပွဲ မှာ ဆူပူမှုတွေ ဖြစ်လို့ ကြာသည် စသည်ဖြင့် အကြောင်းအမျိုးမျိုးကြောင့် ထို မြို့မှာ ကြာနေသည် ။

ကိုအဏ္ဏဝါ တို့ အဖို့တော့ လေ မလာ ကြာတိုင်း ကောင်း နေသည် ။ ကြာလာတော့ နိုက်ကလပ် က ကိုယ့် အတွဲလေးတွေ နဲ့ သံယောဇဉ်လေး တွေ ဖြစ်ကုန်ကြသည် ။ ပီတာ ၏ ကောင်မလေး မှာ အပျက်မလေး မဟုတ် ပဲ ချည်မျှင်နှင့် အထည်အလိပ် ဘာသာရပ် ဖြင့် ဘွဲ့ယူရန် ကျောင်းတက် နေသော သိပ္ပံတက္ကသိုလ် ကျောင်းသူလေး ဟု သိလိုက်ရသောအခါ ကာယကံရှင် ပီတာ သာ မက ကိုအဏ္ဏဝါ တို့ ပါ ဖီလင်တွေ ဆောင့်တက်ကုန်ကြသည် ။ ပီတာ က တော့ သူ့ ကောင်မလေး ကို ယုယုယယ မြတ်မြတ်နိုးနိုး ဖြစ်နေလေသည် ။ လက်ပတ်နာရီ နှင့် အဝတ်အစားတွေ ဝယ်ပေးသည့် အပြင် ကျောင်းစရိတ်ဆိုပြီး အမေရိကန်ဒေါ်လာ တစ်ရာ ပေးသည် ဟု သိရသည် ။

“ မာရီယာ အချစ်ကလေးရယ် .... မင်း ကို ကိုယ် တကယ် ချစ်နေမိပြီကွယ် ... ”

“ ပီတာ အချစ်ဆုံးရယ်... မာရီယာလည်း မောင့် ကို အသည်းထဲ နစ်ပြီး စွဲနေပြီမို့ အခုလို အမြဲ ဖက်ပြီး ဟင့် ... ဟင့် မခွဲနိုင်တော့ဘူး အချစ်ရယ် ...”

ဒီတော့လည်း ချစ်သည်း တို့ ဘဝင် အစုံမှာ အဖြစ် ကဲသမို့ ရင်ခုန်စရာ စကားလေးတွေ ပြောကြရင်း ပျော်ကြရင်း နှစ်ပတ်ခန့် အချိန်တွေ ကုန်သွားခဲ့လေသည် ။

ကိန္နရီ ၊ ကိန္နရာ တို့ ဘဝမုန်တိုင်း ထန်၍ ကံဆိုး မိုးမှောင်ကျမည့် ည ဆယ်နာရီ လောက်မှာတော့ ပီတာ နှင့် မာရီယာ တို့ တစ်ဦး ကို တစ်ဦး ဖက်ပြီး မဆုံးနိုင်တဲ့ အချစ် ENDLESS LOVE အကြောင်းတွေ ချွေပြီး အပီ ကြွေနေကြစဉ် နိုက်ကလပ် ထဲ ကို ယူနီဖောင်းဝတ် ရဲတွေ ဝင်လာပါ တော့သည် ။ ရဲအရာရှိ တစ်ယောက် နှင့် ရိုးရိုးရဲသား လေးယောက် တို့ ဖြစ်သည် ။

အခြေအနေ ကို အကဲခတ်ရသည် မှာ အထွေအထူး သတင်းရ၍တော့ ဟုတ်ဟန် မတူ ၊ သာမန် ရှောင်တခင် ဝင်ရောက် စစ်ဆေးသည့် လုပ်ရိုးလုပ်စဉ် သဘောမျိုးသာ ဖြစ်မည် ။ သို့မဟုတ် လမ်းကြုံလို့ ဝင်လာ တာလည်း ဖြစ်နိုင်သည် ။ နိုက်ကလပ် ပိုင်ရှင် က အမူအရာ မပျက် စီးကရက်သောက်ပါဦးလား ၊ ဘီယာ သောက်ပါဦးလား ဟု ဧည့်ခံနေတာ တွေ့ရ၍ ဖြစ်သည် ။ သို့သော် ကခုန် ပျော်မြူး ဖက်ပွေ့နမ်းရှုပ်နေကြသည့် အုပ်စု ထဲ က မိန်းကလေး ဆယ်ယောက် လောက် နောက်ဖေးပေါက် က ထွက်ပြေး သွားကြသည် ။ ထွက်ပြေး သွားကြသည့် အထဲ မှာ ပီတာ ၏ ချစ်သည်း မာရီယာ လည်း ပါသွားသည် ။

ရဲအရာရှိ သည် အားလုံးကို ခါးထောက် ကြည့်ပြီး တစ်စုံတစ်ခု ပြောလိုက်သည် ။ သူတို့ ဘာသာစကား ကို နားလည်သူ တစ်ယောက် က အင်္ဂလိပ် လို ပြန်ပြောပေး၍ နိုင်ငံခြားသားတွေ နဲ့ ဒေသခံ နိုင်ငံသားတွေ သီးခြား စီခွဲပြီး နေရာယူ ရပ်နေကြရသည် ။

ကိုအဏ္ဏဝါ အပါအဝင် လူမျိုး ပေါင်းစုံ သင်္ဘောသားတွေ က တစ်ခု ၊ သူတို့ လူမျိုး ယောက်ျားမိန်းမတွေ က တစ်စု ဖြစ်သွားသည် ။သူတို့ လူမျိုးအများစု မှာ အပျော် မိန်းကလေးတွေ ဖြစ်သည် ။ သုံးလေးယောက် မျှသော ယောက်ျားတွေ က အဆွယ်တွေ ၊ ခေါင်းတွေ ၊ ဆေးရောင်းသူတွေ ဖြစ်ကြသည် ။

သူတို့ လူမျိုး မိန်းကလေးတွေ ထံမှ မှတ်ပုံတင် လို ကဒ်ပြားလေး တွေကို တောင်းကြည့် စစ်ဆေးပြီး ခန္ဓာကိုယ် ကို စမ်းသပ် ရှာဖွေတာ တွေ့ရသည် ။ ပထမအရာရှိ ဂရိလူမျိုး မစ္စတာ နီကိုလာ့စ်တိုက်ဗားရပ် က တိုးတိုး ပြောပြ၍ သိရတာက ဆေးထိုးကဒ်ပြား စစ်တာဟု သိရသည် ။ ခန္ဓာကိုယ် ကို စမ်းသပ်တာက မူးယစ်ဆေးဝါး ရှာဖွေတာ ဟု ဆိုသည် ။ ထို နိုင်ငံတွင် ပြည့်တန်ဆာ လုပ်စားသူ မိန်းကလေးများ ငွေကြေး မတတ် နိုင်၍ သော် လည်းကောင်း ၊ မအားမလပ်၍ သော် လည်းကောင်း အကြောင်း အမျိုးမျိုး ကြောင့် ဆေးထိုးလက်မှတ် သက်တမ်း ကုန်နေပါက အဖမ်း ခံ ကြရသည် ။

သူတို့ လူမျိုးတွေ ကို စစ်ဆေး ပြီးသောအခါ ကိုအဏ္ဏဝါ တို့ နိုင်ငံခြားသား တွေကို စစ်ဆေးရန် တစ်ဦးချင်း ကို လက်ညှိုး ထိုး၍ ခေါ်ယူ သည် ။ နံရံ ကို မျက်နှာမူ ရပ်စေပြီး ခြေလက်တွေကို ခွဲကား၍ နံရံ မှာ ကပ်ထားရသည် ။ ရဲသား တစ်ယောက် က စမ်းသပ် ရှာဖွေသည် ။ ရှိသမျှ အိတ်တွေ ကို နှိုက်စမ်းသည် ။

စမ်းမိသမျှ အဖု ၊ အဖောင်း ၊ အိတ်ငယ် ၊ စာရွက်ခေါက် အားလုံး ကို ဆွဲထုတ်ပြီး ကြည့်သည် ။ အများစု ထံ မှ အများဆုံး ထွက်လာတာက တော့ ကွန်ဒွန် ခေါ် ရာဘာစွပ်ကလေးတွေ ဖြစ်၍ နည်းနည်းတော့ ပွဲကျ သွားသည် ။

ပွဲကျသွားသည့် ရယ်မောစရာ ကာလလေး က သိပ် မကြာလိုက် ပါ ။ ပီတာ ၏ အလှည့်သို့ ရောက်သောအခါ ပီတာ ၏ ဘောင်းဘီအိတ် ထဲမှ ကွန်ဒွန် ရာဘာအစွပ်ကလေးများ နှင့် အတူ ဘိန်းဖြူ တစ်ဂရမ် ပါသော အထုပ်ငယ် တစ်ထုပ် တွေ့သွား၍ ဘိန်းဖြူ ဆိုတာ အသေအချာ သိသည်နှင့် တစ်ပြိုင်နက် ပီတာ ကို လက်ထိပ်ခတ် လိုက်တော့သည် ။ အားလုံးပင် အံ့ဩ တုန်လှုပ်ကုန်ကြသည် ။ ပီတာ သည် ကျန်းမာရေးလိုက်စားသူ ဖြစ်၍ ဘိန်းဖြူ မပြောနဲ့ ဆေးလိပ်ပင် သောက်သူ မဟုတ် ၊ သို့သော် အရောင်းအဝယ်များ လုပ်နေလေသလား ဟု ပင် သံသယ ဝင်မိကြတော့သည် ။

ပီတာ က သူ့ပစ္စည်း မဟုတ်ကြောင်း ၊ တစ်စုံတစ်ယောက် က သူ မသိအောင် ထည့်လိုက်တာ ဖြစ်နိုင်ကြောင်း ပြောပါသော်လည်း လူ အများ ရှေ့မှာ သက်သေခံ ပစ္စည်းနှင့် တကွ လက်ပူးလက်ကြပ် မိနေ၍ မလွတ်သာတော့ပဲ ရဲစခန်း သို့ ပါသွားလေတော့သည် ။ ကိုအဏ္ဏဝါ နှင့် အပေါင်းအပါ တစ်စု တို့မှာ စိတ်မကောင်းစွာ ဖြင့်ပင် နိုက်ကလပ် မှ သင်္ဘော သို့ စောစော ပြန်ခဲ့ကြသည် ။

နောက်နေ့တွင် ကိုအဏ္ဏဝါ တို့ သင်္ဘော ကပ္ပတိန် သည် ရဲစခန်း သို့ လိုက်သွားပြီး အခြေအနေ ကို စုံစမ်းသည် ။ ဥပဒေ အရ ပြစ်မှု ထင်ရှား ပါက အလုပ်ကြမ်းဖြင့် ထောင်ဒဏ် သုံးနှစ် အထိ ဖြစ်နိုင်၍ အာမခံ ပင် မရခဲ့ ဟု သိရသည် ။ ထို နိုင်ငံတွင် ပီတာတို့ နိုင်ငံသံရုံး ကို အကြောင်းကြား ခဲ့ပြီး ကိုအဏ္ဏဝါ တို့ သင်္ဘော အမေရိကန် ကို ထွက်လာခဲ့ရခြင်း ဖြစ်သည် ။ နောက် တစ်ပတ်ခန့် အကြာတွင် ဘော်လ်တီမိုးမြို့ ရောက်ပြီး သကြားတွေချနေစဉ် ပီတာ ပြန်ရောက်လာခြင်း ဖြစ်သည် ။ ဘေးမသီ ရန်မခ ဘာမှ မဖြစ်ပဲ ပြုံးပြုံးရွှင်ရွှင် ဖြင့် ပြန်ရောက်လာသော ပီတာကို လုပ်ဖော် ကိုင်ဖက်တွေက ဝမ်းသာအားရ မေးကြ မြန်းကြသည် ။

ရဲတပ်ဖွဲ့ ၏ စုံစမ်း ဖော်ထုတ်ချက် အရ မာရီယာ သည် ဘိန်းဖြူ ဖြန့်ဖြူးသူ အမျိုးသမီး ဖြစ်ပြီး ရဲတွေ နဲ့ ပက်ပင်း တိုးသောအခါ လန့်ဖျပ်ပြီး ဘိန်းဖြူထုပ်ကလေး ကို ပီတာ ၏ ဘောင်းဘီအိတ် ထဲသို့ ပီတာ မသိအောင် အသာ ထိုးထည့်ခဲ့ပြီး လစ်ထွက်သွားခဲ့ကြောင်း သိရတော့သည် ။ မာရီယာ သည် သူတို့ နိုင်ငံ တက္ကသိုလ် မှ ဘွဲ့ရ ပြီးပါက အမေရိကန်နိုင်ငံ တွင် အလုပ် လုပ်ရင်း ဘွဲ့လွန် သင်တန်း တစ်ခု ဆက် တက်နိုင်ရန် အတွက် ရည်ရွယ်ချက် ကြီးမားစွာဖြင့် ပိုက်ဆံ ကို ရနိုင်တဲ့ နည်းမျိုးစုံဖြင့် ရှာဖွေနေသူလေး ဖြစ်ကြောင်း သိရသည် ။

မာရီယာ ၏ ဝန်ခံချက်ကြောင့် လည်းကောင်း ၊ ပီတာ ၏ ပကတိ ရိုးသားသော အမူအယာ နှင့် အပြောအဆိုကြောင့် လည်းကောင်း ၊ ပီတာ တို့ နိုင်ငံ သံရုံး ၏ ကြိုးပမ်း ဆောင်ရွက်နိုင်မှုကြောင့် လည်းကောင်း ၊ ကွင်းလုံးကျွတ် လွတ်လာခဲ့ခြင်း ဖြစ်သည် ။

“ မင်း ပြောတော့ မင်းကောင်မက တက္ကသိုလ် ကျောင်းသူ ဆိုကွ ..”

“ ဟုတ်ပါတယ် ... တက္ကသိုလ်ကျောင်းသူမို့ ကျောင်းစရိတ် ကို သူ ဝါသနာပါတဲ့ အလုပ်နဲ့ ရှာနေတာလေ ... ရှင်းရှင်း ပြောရရင်တော့ သူ ကိုက မကောင်းတာပါ ... တခြား နည်းနဲ့ ရှာလည်း ရနိုင်သားပဲ ”

ကဲ ... ရဲဘော်ရေ အဲဒီ နိုင်ငံကို ရောက်ရင် တက္ကသိုလ်ကျောင်း က ကြက်သား စားကြဦးမှာလား ၊ သတိထားနော် .. ကြာကြာ ဝါးရင် ခါးတယ် ခင်ဗျား ။

▣ အဏ္ဏဝါစိုးမိုး
📖 ရွှေအမြုတေ မဂ္ဂဇင်း
      ဇန်နဝါရီလ ၊ ၁၉၉၉ ခုနှစ်