ဘဝ ဆိုတာ တို လွန်းလို့ပါ

❝ ဘဝ ဆိုတာ တို လွန်းလို့ပါ ❞  

အနှစ်ချုပ် လိုက်ရင် ကာလ အပိုင်းအခြားလေး တစ်ခု အတွင်း မှာ စိတ် ကို နေရာတကျ ထားနိုင်ဖို့ပဲ အရေးကြီး တာပါ ။ စိတ် ချမ်းသာဖို့ ၊ စိတ် လွတ်မြောက်ဖို့ အတွက် နေတတ်အောင် ကြိုးစားသင့် တယ်လေ ။ 

ဘဝ ဆိုတာ တိုလွန်းလို့ပါ ။

ကိုယ် သူ့ ကို ချစ်တာ က ချစ်တာပဲ ။ ဒါကို သူ လည်း သိတယ် ။ သိတဲ့ လူတွေ လည်း တော်တော် များတယ် ။ ထို့ထက် သိအောင် ဘာလို့ သက်သေပြချင် နေသေးလဲ ! သူ့ စိတ် ကို ကိုယ့် စိတ် နဲ့ ချည်နှောင်ဖို့ ဘာလို့ စိတ်ကူးယဉ် ချင် နေသေးလဲ !

ဘဝ ဆိုတာ တို လွန်းလို့ပါ ။

သူ့ စိတ်ကလေး လွတ်လပ်စွာ တည်ရှိပါစေ ။

သူ့ ဆန္ဒကလေး ကို လွတ်မြောက်စွာ ရှင်သန်ပါစေလေ ။

" Don't Blame the Dark ,

Please light it up " တဲ့ ။ အမှောင် ကို အပြစ် မတင်ချင်စမ်း ပါနဲ့ ။ အလင်း စ ကို သာ ကူရှာ ပေးလိုက်ပါ ဆိုသလိုပဲလေ ။

ဘဝ ဆိုတာ တို လွန်းလို့ပါ ။

သူ ဟာ ကိုယ့် ချစ်သူ ပဲ ။ သူ့ ရဲ့ မသိတတ်မှုတွေ အပေါ် အပြစ်ပုံ မချ ချင် ပါဘူး ။ တတ်နိုင်သလောက် ခွင့်လွှတ် နားလည်ဖို့ ကြိုးစား ကြည့် ပေးပါတယ် ။

ဘဝ ဆိုတာ တို လွန်းလို့ပါ ။

ချစ်သူ ... ငဲ့ညှာစွာ အသိပေး ခဲ့တဲ့ မင်း က မှန်တယ် ။ မနိုင်မနင်း ခွင့်ပြုခဲ့တဲ့ ကိုယ် က အမှား ကို လက်ယပ် ခေါ်ခဲ့မိ သလို ဖြစ်နေတယ် ။ အဲဒီတော့ ဖြစ်လာ သမျှ ဆိုးရွားမှု ဒဏ်ရာ ဒဏ်ချက်တွေ က ကိုယ် နဲ့ ပဲ ဆိုင်မယ် ။

ချစ်သူ ...

ဘဝ ဆိုတာ တို လွန်းလို့ပါ ။

စိတ် ထင်ရာ လုပ်ပါ ။ မှားယွင်းမှု ဆိုတာတွေ ကို သိမ်းဆည်းပေး ဖို့ မင်း ဘေး မှာ ကိုယ် တစ်ယောက်လုံး ရှိ နေပါတယ် ။ အပြစ် အားလုံး ကို ဝန်ခံပေးဖို့ မင်း ရဲ့ ကိုယ်စား ကိုယ် က အသင့် ရှိနေတယ် ။ မလိုဘူး လို့ ပြောရင် ကိုယ် ထွက် သွားမယ် ။ မလာနဲ့ လို့ ပြောရင် ကိုယ် ဝေးဝေး နေ ပေးပါ့မယ် ။ ဒါပေမယ့် လိုအပ်ရင်တော့ ကိုယ် က မင်း အတွက် ပဲ ဖြစ်ရမယ် ။

ဘဝ ဆိုတာ တို လွန်းလို့ပါ ။

တကယ်တော့ အချစ် တစ်ခု ကို ခံစား နားလည်ဖို့ လေ့လာရတဲ့ အချိန်တွေ အင်မတန် ကို နည်းတယ် ။ မင်း က တော့ အချစ်တွေ အများကြီး ထင်ယောင် မှားပြီး အချိန်တွေ ကို ဖြုန်းတယ် ။ ဒါပေမယ့် မင်း ပျော်ဖို့ က အဓိက ပါ ။ အယူအဆ တွေ ၊ ရည်ရွယ်ချက် တွေ မတူပေ မယ့် မင်း အနေ နဲ့ ကြားဖူးနားဝ ရှိအောင် ပြောပြခွင့် ရ ချင်ပါတယ် ။ 

ချစ်သူ ဆိုတာ ကိုယ့် အတွက် တော့ ဖတ် မကုန်တဲ့ သင်ခန်းစာ ပါ ကွာ ။

ဘဝ ဆိုတာ တို လွန်းလို့ပါ ။

ချစ်သူ တစ်ယောက် ရဲ့ စိတ် ကို ဖြည့်ဆည်း မြတ်နိုးခွင့် ရ တဲ့ အခွင့်အရေးလေး က ကိုယ့် အတွက် မလောက်ငှ ဘူး ။

ဘဝ ဆိုတာ တို လွန်းလို့ပါ ။

ချစ်သူ ကို ချစ်ရတဲ့ ခံစားမှုတွေ ရေတွက် ရင်း ... ချစ်ရတာ မဝဘူး ။

ဘဝ ဆို တာ တိုလွန်းလို့ပါ ။

ချစ်သူ ကို ရှာတွေ့ပြီး အခုချိန် ထိ ... အချစ်တွေ က လတ်ဆတ်တုန်း ။

ဘဝ ဆိုတာ တို လွန်းလို့ပါ ။

အချိန်တန် တော့ လူ ဆိုတာ ကိုယ့် ဆုံးဖြတ်ချက် နဲ့ ကိုယ် ရှင် သန်နေကြတာပါပဲ ။

သူ့ စိတ် ကို ကိုယ့် စိတ် နဲ့ ချည်နှောင် ထားပြီး တခြား တစ်ယောက် ရဲ့ စိတ် ကို ထပ်မံ ချည်နှောင်ဖို့ ကြိုးစားတဲ့ အခါ သူ့ စိတ် ကို ချည် နှောင်ထားတဲ့ ကြိုးကလေး က တော့ မခိုင်မခံ့ လျော့ရဲ သွားမှာပဲ ။ 

ဒါကို ကြို တွေးထား တတ် ရမယ် ။ ခံနိုင်ရည် ရှိရမယ် ။ အခန့် မသင့် ရင် စွန့်လွှတ်ပစ် ဖို့ လည်း အဆင်သင့် ရှိနေရဦးမယ် ။ 

ဘဝ ဆိုတာ တို လွန်းလို့ပါ ။

တည်ငြိမ်မှု ဆိုတာ နဲ့ နေသားတကျ ရင့်ကျက်ဖို့ ကြိုးစားသင့် ပါ လျက် ဘာလို့များ အပြောင်းအလဲ ကို လူတွေ က စိတ်ဝင်စား ကြရတာ လဲ ။ လူ ဆိုတာ ... ကိုယ့် ဆီ မှာ သေချာမှု တစ်ခု ရှိနေပါ လျက် နဲ့ မသေချာမှု ကို မှ ရင်ခုန် တတ်ကြတယ် ။

ဘဝ ဆိုတာ တို လွန်းလို့ပါ ။

လူတွေ ဟာ ... အစားထိုး စရာ တစ်ခု ရှိ လာရင် ကိုယ် ပိုင်ဆိုင် ထားတဲ့ တစ်စုံတစ်ရာ ကို စွန့်ပစ်ချင် တတ်ကြတယ် ။

ချစ်သူ က .. အဲဒီလိုမျိုး တွေးတော နေပါသလား !  

ဘဝ ဆိုတာ တို လွန်းလို့ပါ ။

လုပ်စရာ အလုပ်တွေ ကို တပုံတပင် ရှေ့ ချပြီး စောင့်စားခြင်း ၊ တွေဝေငေးမောခြင်း ၊ တွေးတောအားငယ်ခြင်း စတဲ့ စိတ်ပင်ပန်းစရာ ခံစားမှုတွေ နဲ့ စိတ်ကူးယဉ် အစားထိုး ပြီး အချိန်တွေ ကို ဖြတ်သန်းနေ ခဲ့ရပြီလေ ။

ဘဝ ဆိုတာ တို လွန်းလို့ပါ ။

အတုံ့အလှည့် ဆိုတာ မြန် လွန်းတယ်

အနိုင် လိုချင်တဲ့ သူ ကို အနိုင် ပေးပါတယ် ။ လူတိုင်း က တော့ အနိုင် က လွဲရင် တခြား ဘာကို လိုချင်ပါ့မလဲ !

အရှုံးတွေချည်းပဲ ကိုယ် က လက်ခံ ထားတဲ့ အခါ တစ်နေ့ နေ့ ၊ တစ်ချိန် ချိန် တော့ အနိုင်ချည်း ပဲ ကိုယ့် ဆီ ပြန် ရောက်လာမယ် လို့ ထင် ရတာပါပဲ ၊

ဘဝ ဆိုတာ တို လွန်းလို့ပါ ။

မျှော်လင့်ရတာ ဟာ ဝဋ်ကြွေး တစ်မျိုးပါပဲ ။ ချစ်သူ နဲ့ ပတ်သက် လာရင် ကိုယ် က ယုံကြည်ချက် လည်း အကြီးကြီး ထား မိတယ် ။ အများကြီး လည်း မျှော်လင့်ထား မိတယ် ။

ဒါတွေဟာ သူ့ အလိုအလျောက် ဖြစ် လာတာ ။

ဒါဟာ ... ကြိုတင် စီစဉ်ထားမှု မပါတဲ့ အငိုက်မိခြင်း သက်သက်ပါပဲ ။

ဘဝ ဆိုတာ တို လွန်းလို့ပါ ။

ချစ်သူ ကို လွမ်း ရတာ အချိန် မလောက်ဘူး ။ ဘဝ ဆိုတာ တို လွန်းလို့ပါ ။

◾ရွှေထိုက်

📖 ကြယ်ကိုးစင်းနဲ့ လင်းတဲ့ကောင်းကင်

#ကိုအောင်နိုင်ဦး

.