မေတ္တာဖြင့် ဖေးမခြင်း

 

❝ မေတ္တာဖြင့် ဖေးမခြင်း ❞

[ HIV / AIDS ခံစား နေရ သူတွေ ကို သက်သာမှု ရစေဖို့ ဆရာတော် ဒေါက်တာ ဓမ္မရက္ခိတ ( သက်တော် ၅၄ နှစ် ) က တရားပြ ပေး နေတယ် ။ World Vission က HIV / AIDS ခံစား နေရသူတွေ ဆရာတော် ရဲ့ ကျောင်း ကို ပုံမှန် ပို့ပေး နေတယ် ။

ဆရာတော် ဒေါက်တာ ဓမ္မရက္ခိတ ဟာ ရန်ကုန် တက္ကသိုလ် က နေ စိတ်ပညာ အဓိက နဲ့ ဝိဇ္ဇာဘွဲ့ ၊ မဟာ ဝိဇ္ဇာဘွဲ့ တွေ ရခဲ့တယ် ။ ၁၉၈၁ ခု မှာ ရန်ကုန် တက္ကသိုလ် စိတ်ပညာ ဌာန မှာ နည်းပြဆရာ အဖြစ် အလုပ် စတင် ဝင်ရောက် ပြီး လက်ထောက် ကထိက ၊ သုတေသနအရာရှိ တာဝန်တွေ ထမ်းဆောင် ခဲ့တယ် ။ ၁၉၈၉ ခုနှစ် မှာ ဝန်ထမ်း အဖြစ် မှ နှုတ်ထွက် ပါတယ် ။

၁၉၉၁ ခုနှစ်မှာ Mental Energy Reseaech Design ကို ရေး ဆွဲပြီး ယူနက်စ်ကို ဌာနချုပ် ကိုပေး ပို့တယ် ။ ၁၉၉၂ ခုနှစ် မှာ ရဟန်းဘောင် သို့ ဝင်တယ် ။ ၁၉၉၃ ခု မှာ သီရိလင်္ကာ နိုင်ငံ ကိုလံဘိုမြို့ ရှိ The Open International Univrersity for Complementry Medocine က ဂုဏ်ထူးဆောင် ဒေါက်တာဘွဲ့  M.D ( M.A ) ကို ချီးမြှင့် အပ်နှင်းတယ် ။ ၁၉၉၅ ခု မှာ သိပ္ပံ ပါရဂူဘွဲ့  D.Sc ( H.C ) ကို အပ်နှင်း ခံရတယ် ။

ဆရာတော် ရဲ့ ကျောင်း က မန္တလေးမြို့ အနီး ၊ ပုသိမ်ကြီး ရန်ကင်းတောင်ခြေ မှာ ရှိတယ် ။ ဆရာတော် ကို တွေ့ ဆုံဖို့ စီစဉ်ရာ မှာ ဆရာတော် က တောင်သာ ကို ကြွပြီး တရားစခန်း ဖွင့် နေတယ် ။ ပုသိမ်ကြီး မှာ တစ်ရက် နှစ်ရက် သီတင်းသုံး ပြီး ရန်ကုန် ကို ကြွတယ် ။ ရန်ကုန် မှာ သုံးလေးရက် သာ သီတင်းသုံး ပြီး ကလေးမြို့ ကို ကြွဖို့ စီစဉ် နေတယ် ။ ရန်ကုန် တောင်ဥက္ကလာပမြို့ ၊ အမှတ် ( ၉ ) ရပ်ကွက် က လူထု ဓမ္မာရုံကြီး ဆောက်လုပ်ရေး မှာ ဆရာတော် ဒေါက်တာဓမ္မရက္ခိတ ကမကထ ပြု ခဲ့တယ် ။ လူထု ဓမ္မာရုံကြီး ကို ကြွ လာပြီး ဆရာတော် က တရား ပြ လေ့ ရှိတယ် ။ ဆရာတော် သီတင်းသုံးရာ တောင်ဥက္ကလာပ ကို ကျွန်တော် လိုက် သွားပြီး ဖူးမြင် ပါတယ် ။

အသား ညိုပြီး အညာသူ အညာသား ရုပ်သွင် ရှိတဲ့ ဆရာတော် က စကား ပြောရာ မှာ ပွင့်လင်း ရင်းနှီးမှု ရှိတာ တွေ့ ရပါတယ် ။ ]

•••••   •••••   •••••

ဘုန်းတော်ကြီး ဇာတိ က တောင်သာမြို့ ။ ငယ်ငယ် က ဘကြီး ဘုန်းကြီးကျောင်း မှာ ပညာ သင် ခဲ့ရတာ ။ ဘုန်းကြီး ငယ်စဉ် က သိပ် ဆင်းရဲ တယ် ။ ဆင်းရဲသမှ တက္ကသိုလ် ကို ကျောင်း ထား ပေးမယ့် သူ မရှိဘူး ။ ကိုယ့် စားစရိတ် ကိုယ် ရှာပြီး တက် ရတာ ။ လမ်းဘေး မှာ ၃ ကျပ် ၁၅ ပြားစား ဘဝ နဲ့ မြူနီစီပယ် မှာ အလုပ် လုပ်ခဲ့ ရ သေးတယ် ။ ဘယ်သူ က ဘာပြောပြော ရည်မှန်းချက် နဲ့ အစွမ်းကုန် ကြိုးစား တာပဲ ။

ဘုန်းကြီး အဖြစ်ချင်ဆုံး က သိပ် ချမ်းသာတာ ။ ပိုက်ဆံ ရှိရင် ချမ်းသာမယ် လို့ ထင်တာ ။

ဆရာကြီး ရွှေဥဒေါင်း ရေး တဲ့ အကြံဉာဏ် ဖြင့် ကြီးပွားရေး စာအုပ် ကို လက်ကြား ထဲ က မချဘူး ။ ဘုန်းကြီး လက် ထဲ အမြဲတမ်း ထားပြီး ဖတ်တာ ။ အခု ထိ လည်း ဖတ် တုန်းပဲ ။ မြန်မာ လို လည်း ဖတ်တယ် ။ အင်္ဂလိပ် လို လည်း ဖတ်တယ် ။ နည်းနည်းတော့ Extreme ( အလွန် ပြင်းထန်ခြင်း ) ဖြစ်တာပေါ့ ။

ဒေါက်တာဘွဲ့ ကို ဘုန်းကြီး တအား လိုချင်တယ် ။ ဘုန်းကြီး က အသက် ကြီး မှ ကျောင်း နေရတာ ။ အသက်၂၄ နှစ် မှာ တက္ကသိုလ် တတိယနှစ် ပဲ ရှိ သေးတယ် ။ ဒေါက်တာဘွဲ့ လိုချင် လိုက်တာလို့ သူများ ကို ပြောတော့ ဒီကောင် ရူးပြီပေါ့ ။ ဘာ အခွင့်အလမ်း မှ မရှိဘဲ ။

ဘုန်းကြီး က စိတ်စွမ်းအင် ကို တကယ် အသုံးချတာ ။ တစ်နေ့ ထက် တစ်နေ့ ငါ သည် ကျန်းမာ၍ ကျန်းမာ၍ လာသည် ဆိုတာ အာရုံ ပြု ရင် တကယ်ပဲ ပိုပြီး ကျန်းမာ လာတယ် ။ လူ တစ်ယောက် ကို မင်း နေမကောင်းဘူး ထင်တယ် လို့ သွား ပြောရင် သူ ဖျားချင်ချင် ဖြစ် လာမယ် ။

အသက်၂၄ နှစ် က လိုချင်တဲ့ ဒေါက်တာဘွဲ့ ကို ၄၂ နှစ် ကျ ရတယ် ။ အင်မတန် ကြီးမားတဲ့ စိတ်ဆန္ဒ ကို ရူး လောက်အောင် ထား ခဲ့လို့ ဒေါက်တာဘွဲ့ ရတာ ။ ဘုန်းကြီး ကြွားလုံး ထုတ် နေတာ မဟုတ်ပါဘူး ။ လူ တစ်ယောက် ဟာ ဘယ်အခြေ နေမျိုး မှာ ပဲ ဖြစ်ပါစေ စိတ်ဆန္ဒ ပြင်းထန်ပြီး ကြိုးစား ရင် ဖြစ်ပါတယ် ။

မဟာဝိဇ္ဇာဘွဲ့ စာမေးပွဲ အောင်စာရင်း ထွက် လာ တော့ ဘုန်းကြီး နာမည် မပါဘူး ။ ခွ ကျ ပြီပေါ့ ။ ဒါ နောက်ဆုံး ။ ပြီးပြီ ။

ကျောင်းသားရေးရာဌာန ကို သွား မေးတော့ ကျောင်းလခ ကြွေး ကျန် နေလို့ အောင်စာရင်း ထုတ် မပေးတာ တဲ့ ။ ကြွေး ကျေ အောင် လက်နှိပ်စက် အခစား ရိုက်ပြီး ပိုက်ဆံ ရှာ ခဲ့ရတာ ။ တစ်ညလုံး သူများ စာတမ်းတွေ ရိုက် ပေး ရတာ ။ အခုဖြင့် လက်နှိပ်စက် ဆိုရင် မကြည့်ချင် တော့ လောက် အောင်ပါပဲ ။ ပိုက်ဆံ ပြည့် လို့ ငွေ သွား သွင်း တော့ အောင်စာရင်း ထုတ် ပေးတယ် ။ ဂုဏ်ထူး နဲ့ အောင် သတဲ့ ။ အကြေငြာ မခံရ တော့ ကိုယ့် ဟာ ကိုယ် တစ်ယောက် တည်း ပဲ ဂုဏ်ယူ ရ တော့တာပေါ့ ။

မဟာဝိဇ္ဇာဘွဲ့ ရ ပြီးတော့ အလုပ်အကိုင် အဆင်ပြေ လာတယ် ။ အချိန်ပိုင်း ကျူတာ လုပ်တယ် ၊ နောက် ကျူတာ ဖြစ် လာတယ် ။

ဝန်ထမ်း အဖြစ် က နှုတ်ထွက် ပြီး နောက် ရေး ခဲ့တဲ့ သုတေသန စာတမ်း ကြောင့် ဒေါက်တာဘွဲ့ ၊ သိပ္ပံပါရဂူဘွဲ့ တွေ အပ်နှင်း ခံရတယ် ။ ၁၉၉၂ ခု နိုဝင်ဘာ၂၀ ရက် နေ့ မှာ ဘုန်းကြီး ရဟန်းဘောင် ကို ရောက်ပါတယ် ။ ၁၉၉၆ ခု မှာ အမေရိကန် ပြည်ထောင်စု ကင်တပ်ကီ ပြည်နယ် မှာ ပြုလုပ်တဲ့ ညီလာခံ နဲ့ ချီကာကိုမြို့ ဒီပေါတက္ကသိုလ် မှာ လုပ်တဲ့ ညီလာခံတွေ ကို တက်ပြီး စာတမ်းတွေ ဖတ်တယ် ။ အမေရိကန် ယောဂီတွေ ရဲ့ ပင့်ဖိတ်ချက် အရ သမထ ဝိပဿနာ တရား စခန်းတွေ ဖွင့် ပေးခဲ့တယ် ။ မေတ္တာ နဲ့ ယှဉ်တဲ့ စိတ် ရဲ့ လွတ်မြောက်မှု ၊ မေတ္တာစေတော ဝိမုတ္တိဝိပဿနာ တရား ကို ဟောပြော ပါတယ် ။

အမေရိကန် မှာ တုန်း က ဆရာဝန်ကြီး တစ်ယောက် ဟောပြော တာ ဘုန်းကြီး အမှတ်ရ ပါတယ် ။ ဆရာဝန်ကြီး က ကင်ဆာ ဝေဒနာသည် တွေ ကို တရား ထိုင် ခိုင်းတယ် ၊ သက်သတ်လွတ် စား ခိုင်းတယ် ၊ ဂန္ထဝင်ဂီတတွေ နားထောင် ခိုင်း တယ် ။ ပျော်ရွှင်ချမ်းမြေ့ တဲ့ အတွေးအမြင် က ( ခန္ဓာကိုယ် တွင်း မှာ ) ပျော်ရွှင်ချမ်းမြေ့ တဲ့ ဆဲလ် ကို ဖြစ်ပေါ်စေတယ် ။ မပျော်ရွှင် မချမ်းမြေ့တဲ့ အတွေးအမြင် က မပျော်ရွှင်မကျန်းမာ တဲ့ ဆဲလ် ကို ပေါက်ပွား လာစေတယ် တဲ့ ။ လူရုပ် ကို စိတ် က လွှမ်းမိုး နေလို့ စိတ် ကို ပြုပြင် စမ်းပါ ။ ရုပ် က လည်း လိုက် ပြင် သွား ပါလိမ့်မယ် ။ စိတ် ကြည် ရင် သွေး ကြည်မယ် ၊ သွေး ကြည် ရင် ရုပ် ကြည် မယ် ။ ကင်ဆာ ဆိုတာ က လည်း မမြဲတဲ့ ဆဲလ်လေး တစ်လုံး ပါ ပဲ တဲ့ ။

ဘုန်းကြီး တို့ စခန်း မှာ HIV / AIDS ခံစား နေရသူတွေ ကို တရား အားထုတ်ဖို့ World Vission က စီစဉ် ပေးတယ် ။ ဘုန်းကြီးတို့ ဆီ မှာ တရား ရှုမှတ် တာ က လည်း ထူးထူးထွေထွေ မဟုတ်ပါဘူး ။ လူတိုင်း အသက်ရှူ နေကြတာပဲ ။ အသက်ရှူ ရာ မှာ လေ ဝင် ရင် ဝင်သည် လို့ မှတ် ၊ လေ ထွက် ရင် ထွက်သည် လို့ မှတ်တယ် ။ သည်လို မှတ်ရင်း သမာဓိ ဖြစ်တယ် ။ တရား အားထုတ် ခိုက် မှာ စိတ် ၏ စင်ကြယ်ခြင်း ဖြစ်တယ် ။

လူ မှာ HIV positive ဖြစ်တော့ အရမ်း စိတ်အား ငယ်တယ် ။ ငါတော့ သွားပါပြီ ဆိုပြီး လောက ကို အရှုံး ပေး ချင်တယ် ။ တရား အားထုတ် တော့ ပီတိ ပေါ် လာ တယ် ။ ပီတိ ကြောင့် စိတ္တဇရုပ် က ပြောင်း သွားတယ် ။ ကင်ဆာ လို့ ပြောရရင် တိုက်ခိုက်ရေး T - Cell တွေ အားကောင်း လာတယ် ။ သူတို့ ရွှင်လန်း လာတယ် ။ အားကိုးစရာ ခိုနားစရာ ရှာ လာတယ် ဆိုပြီး အား တက် လာတယ် ။ Negative စိတ်နေ စိတ်ထား က နေ positive စိတ်နေ စိတ်ထား ကို ပြောင်းလဲတယ် ။ မျှော် လင့်ချက် ရောင်ခြည် ဖြစ်လာတယ် ။

HIV / AIDS ခံစား နေရသူတွေ စိတ်အား တက်ကြွ လာပြီး ခုခံအား တွေ ပြန် မြင့်တက် လာရင် တစ်ကမ္ဘာလုံး က ရှာဖွေ နေတဲ့ ဆေးဝါးနည်းလမ်း တစ်ခု ပေါ့ ။ သုတေသန ပြုပြီး ရှာဖွေဖော်ထုတ် ပေး နိုင်ရင် လူသားတွေ အတွက် အကျိုး ဖြစ် တာပေါ့ ။ ခုခံအားတွေ တက် လာလို့ သူတို့ အသက် တစ်ရက် ၊ တစ်လ ၊ တစ်နှစ် ပို ရှည် လာကြမယ် ဆိုရင် သိပ္ပံပညာ က လည်း မနားမနေ ဆေးဝါး နည်းလမ်း ရှာဖွေ နေတာ မို့ ဆေး တွေ့ပြီ ဆိုရင် သူတို့ အတွက် တန်ဖိုး မဖြတ်နိုင် တဲ့ အသက်ရှည်ခြင်း ပေါ့ ။

ဘုန်းကြီး ရဲ့ယောဂီတွေ ထဲ မှာ မေတ္တာတရား အားထုတ် နေချိန် မှာ မေတ္တာအား ကောင်းတဲ့ ယောဂီတွေ ကို ဖိတ်ပြီး မေတ္တာဝိုင်း ပို့ ကြပါတယ် ။ မေတ္တာ ဆိုတာ ပို့ ရင် ရောက်ပါတယ် ။ သူတို့ မျက်နှာတွေ က ထူးထူးခြားခြား ပြောင်းလဲ ကြည်လင် လာတယ် ။ ဘဝ ကို တန်ဖိုး ရှိရှိ နေသွား ချင်သူတွေ အတွက် ဘုန်းကြီး တို့ က အမြဲ ကြိုဆို နေပါတယ် ။

အလှူရှင် ပေါ် လာ လို့ HIV / AIDS Positive တွေ အတွက် ဆယ်ရက် စခန်း ဖွင့်ပြီး ဆက်တိုက် ဆက်တိုက် အားထုတ်ဖို့ အခွင့်အလမ်း ရကြမယ် ဆိုရင် သူတို့ ဟာ ရုပ် - နာမ် တွေ သိ ၊ ဖြစ်ပျက် ကြောင်းကျိုး တွေ သိမြင် လာပြီး သက်သာခွင့် တွေ ရကြမှာပါပဲ ။

◾ကျော်ရင်မြင့်

📖 ဘဝဇာတ်ခုံ

#ကိုအောင်နိုင်ဦး

.