သတိတရ ရုပ်သွင်

❝ သတိတရ ရုပ်သွင် ❞

( ၁ )

ဆရာသော်တာဆွေ ပါဝင်ခဲ့သည့် မမေ့နိုင်သော ညှိနှိုင်းပွဲကလေး တစ်ပွဲ ၌ မိမိ ရှိနေခဲ့ဖူးသည် ။

ထို နေ့ စေ့စပ်ညှိနှိုင်းပွဲ ၌ တာဝန်ရှိသူ ပုဂ္ဂိုလ်များ စေ့စပ်ပေး သော်လည်း မကျေအေးနိုင်ကြ ။ လိပ်ခဲတည်းလည်း နှင့် ကိစ္စ မပြီးပြတ်နိုင် ဖြစ်ခဲ့ရသည် ။

ကာယကံရှင်များ မှာ တရားရုံး တွင် တရားသူကြီးများ ရှေ့မှောက် ၌ ပင် အမှု ရင်ဆိုင်ခဲ့ကြပြီးသူများ ဖြစ်သည် ။ မပြီးပြတ်ကြ ။ ထိုသို့ ကြီးကျယ်ခဲ့သော မှုခင်း ကို ဆရာသော်တာဆွေ က ထ၍ ရှင်းလင်း ပြတ်သားစွာ ဒိုးခနဲ ဒေါက်ခနဲ ပြောဆို လိုက်သော စကားများ ကြောင့် ကာယကံရှင်များ အမှုကျေအေး ခဲ့ရသော ညှိနှိုင်းပွဲ ဖြစ်သည် ။

ထို ပွဲ တွင် ဆရာသော်တာဆွေ သည် အခရာ ဖြစ်ခဲ့၏ ။ သို့သော် ထို ပွဲ တွင် ဆရာသော်တာဆွေ က တာဝန် ရှိသူ မဟုတ် ။ ဆရာ က စိတ်ဝင်စား ၍ ရောက်လာသူ ဧည့်သည် သာ ဖြစ်၏ ။

မည်သို့ ပုံစံ ဖြင့် ရောက်လာ စေကာမူ ထို ပွဲ တွင် ဆရာသော်တာဆွေ ရောက်လာပုံ က မိမိတို့ ကဲ့သို့ပင် အမှု ကာယကံရှင် နှင့် ခင်မင်ရင်းနှီးစွဲ ရှိ သော ဓာတ်အခံ ဖြင့် ရောက် လာသော ဧည့်သည်တော် တစ်ယောက် သက်သက် ထက် မပိုခြင်းပင် ။

တာဝန်ရှိသူ လူကြီးများ စေ့စပ် ညှိနှိုင်းပေး ၍ မပြီးပြတ်နိုင်ခြင်း ကို ဧည့်သည် အဖြစ် တက်ရောက် နားထောင်သူ က ထပြီး ရှင်းလင်းပုံ မှာ ဆရာသော်တာဆွေ ၏ လူပုံ အလယ် တွင် ရဲဝံ့စွာ ထ ပြောဝံ့သည့် သတ္တိ နှင့် တိကျသော ဆုံးဖြတ်ချက် စကားများ ဖြစ်ကြောင်း ၊ မိမိ ယနေ့တိုင် အကြောင်း တိုက်ဆိုင်တိုင်း ပြန်လည် သတိရ ရှိနေ ဆဲ ဖြစ်၏ ။ ကြာတော့ ကြာခဲ့ပါပြီ ။

မှတ်မှတ်ရရ လွန်ခဲ့သည့် ၁၀ နှစ်ဝန်းကျင် က ၁၉၈၅ - ၈၆ ခုနှစ် လောက် က ရှိပေမည် ။

( ၂ )

ထိုစဉ်က ကာတွန်းဆရာ မောင်ဝဏ္ဏ သည် ဂီတသတင်းစဉ် အပတ်စဉ် စာစောင် ၌ ကာတွန်း တစ်ပုံ ရေးလိုက်၏ ။ သူ ၏ ပင်တိုင်ကဏ္ဍ ဂီတဘိုးအေ စထရစ်ကာတွန်း ကဏ္ဍ မှ ဖြစ်သည် ။ သူ့ အာဘော် က နိုင်ငံခြား မှ ပြန် ရောက် လာသော အဆိုတော် နာမည်ကြီး တစ်ယောက် အကြောင်း စိတ်ကူး ဖြစ်သည် ။

ထိုစဉ်က စတီရီယို အဆိုတော် နာမည်ကြီး တစ်ယောက် သည် နိုင်ငံခြား မှ ပြန် ရောက်လာခါစ ဖြစ်သည် ။

ထို အဆိုတော် သည် လည်း ထို ကာတွန်း မှာ သူ့ ကို ရေးသည် ဟု အထင် ရောက် ကာ ဆတ်ဆတ်ထိ မခံနိုင် ဖြစ်တော့သည် ။ ကာတွန်း ဆိုတာ ဒီလိုပဲ ရေး တတ်ပါကလား ဟု သဘောထား မကြီးနိုင် ။

နီးစပ်ရာ အချို့မှ လည်း မြှောက်ပေးပုံ ရ၏ ။ ပွဲ ဆူ အောင် ဖြစ်မည် ထင်သည် ။ ပွဲ ဆူ သော် ပွဲဆူအောင် လုပ်သည့် မဂ္ဂဇင်း အချို့ ရောင်းကောင်း မည် မဟုတ်ပါလား ။

ထို အဆိုတော် က ကာတွန်းဆရာ မောင်ဝဏ္ဏ ကို တရား စွဲဆိုသည် ။ အသရေဖျက်မှု ဖြင့် တရား စွဲ ၏ ။ ဗဟန်းတရားရုံး မှ နေ၍ တရား စွဲခဲ့ခြင်း ဖြစ်သည် ။

ထို သတင်း ကား ထိုစဉ် က စာနယ်ဇင်းလောက တွင် အုတ်အော် သောင်းတင်း ဖြစ်ခဲ့သည် ။ စာနယ်ဇင်းသမား တိုင်း စိတ်ဝင်စား ခဲ့ရသော သတင်း ဖြစ်ခဲ့၏ ။

စာပေ ၊ ပန်းချီ ၊ ကာတွန်း ဆိုသည် မှာ မဂ္ဂဇင်း တစ်အုပ် ဖွဲ့စည်းရာ တွင် တာဝန် အသီးသီး ယူ ထားရသူများ ဖြစ် ကြရကား မိသားစု သဖွယ် ဖြစ်၏ ။ ပညာရပ်ချင်း မတူလင့် ကစား နေအိမ် တူ သဖြင့် ခင်မင်ရင်းနှီးစွဲ ဖြစ်၏ ။ သံယောဇဉ် ရှိစမြဲ ။

ကာတွန်းဆရာ နှင့် ဖြစ်သော ပွဲ ကို ကဗျာဆရာ က လည်း စိတ်ဝင် စားသည် ။ စာရေးဆရာ က လည်း ရိုင်းပင်းသည် ။ ပန်းချီဆရာ က လည်း တစ်တပ်တစ်အား ။

သို့ဖြင့် ဆရာ ကာတွန်းမောင်ဝဏ္ဏ နှင့် နာမည်ကြီး အဆိုတော် တို့ ရင်ဆိုင်ကြရသည့် အမှု ကို စိတ်ဝင်တစား ရှိကြတော့သည် ။ ဗဟန်း တရားရုံး မှာ ရွှေဂုံတိုင်မီးပွိုင့် နှင့် မနီးမဝေး တွင် ရှိ၏ ။ သို့ဖြင့် ထို ဗဟန်းတရားရုံး သို့ သွားရန် စာနယ်ဇင်းရပ်ကွက် တွင် အချို့ က လည်း လိုက်လံ ဆော်သြ၏ ။ တစ်ဦးစ နှစ်ဦးစ လက်တို့ သတင်း ပေးရင်း လူ အတော်များများ သိ ကြသည် ။

မှတ်မှတ်ရရ လူ တွေ့တိုင်း ပြောပြီး ထို ပွဲ သို့ လာရန် ဆော်သြသူ မှာ ဆရာအီကြာကွေး က တက်ကြွ လှ၏ ။

အမှု စစ်သော နေ့ တွင် ဆရာအီကြာကွေး က မိမိ အိမ် လာသည် ။ မိမိ အိမ် တွင် ပန်းချီဆရာ နှင့် ကာတွန်းဆရာ အချို့ စု ကြ၏ ။ ထို မှ ဗဟန်း တရားရုံး သို့ ဆက် သွား ကြသည် ။

ဗဟန်းတရားရုံး ကား ထို နေ့ တွင် လူ အတော် စည်ကား၏ ။ စာရေးဆရာ လည်း လာသည် ။ ထုတ်ဝေသူ လည်း ပါ ၊ ကာတွန်းဆရာ လည်း မလွတ် ၊ ကဗျာဆရာ တချို့ ကို လည်း တွေ့  ရ၏ ။

တရားရုံး ဝန်းကျင် ရှိ လက်ဖက်ရည်ဆိုင်များ တွင် လူ ပြည့်လျှံ သွား၏ ။ လာရောက်သူများ မှာ အနုပညာ သံယောဇဉ် ဖြင့် လာ ခဲ့ကြခြင်း ပင် ။ ကာတွန်းဆရာ ဆရာမောင်ဝဏ္ဏ နှင့် ခင်မင်သူ သိကျွမ်းသူ မဟုတ် သူများ လည်း ပါ ကြသည် ။ မိမိ သူငယ်ချင်း ပန်းချီဆရာ တချို့ သည် ကိုဝဏ္ဏ နှင့် မကျွမ်းကြ ။ သို့သော် အနုပညာ သံယောဇဉ် ဖြင့် ရောက်လာခဲ့ ကြခြင်းပင် ။

အမှု စစ်ခါနီး မှ ထို စတီရီယို အဆိုတော် ရောက် လာ၏ ။ တစ်ယောက် တည်း ဖြစ်သည် ။ အသိုင်းအဝိုင်း မပါ ။ ဂီတ အသိုင်းအဝိုင်း မှ တစ်ယောက် မျှ မမြင် ။ ပီဘိ သူ တစ်ယောက် တည်း အမှု ရင်ဆိုင်ရန် ရောက်ရှိ လာခဲ့ခြင်း ပင် ။ ဂီတ အသိုင်းအဝိုင်း သည် မိမိ တို့ စာနယ်ဇင်း အသိုင်းအဝိုင်း ကဲ့သို့ မရှိအတူ ရှိအတူ အပေါင်းအသင်း ကဏ္ဍ မရှိတော့ပြီ လော မသိ ။ ဒါတော့ ဟုတ်ပုံ မရ ။ ကာယကံရှင် ၏ စုစည်းနိုင်အား ကြောင့် လည်း ဖြစ်ပုံရမည် ။

အဆိုတော် က တစ်ယောက် တည်း ။ စာနယ်ဇင်း အသိုင်းအဝိုင်း က လူ တစ်လှေကြီး ။ ပွဲ က ပရိသတ် မမျှ ။ လက်ဖက်ရည်ဆိုင်တွေ မှာ ၊ ရုံး အဆောင်ရှေ့ မှာ ၊ လှေကားထစ် မှာ ပြန့်ကျဲ နေကြသော စာနယ်ဇင်း အနုပညာသမားများ ရှေ့ တွင် အဆိုတော် မှာ ခြေလှမ်း မမှား အောင် သတိ ထား လျှောက်သွား ရပေမည် ။

သို့ဖြင့် တရားသူကြီး ရှေ့မှောက် တွင် အမှု စစ် ကြသည် ။ စာနယ် ဇင်းသမားများ ကား ရုံး အပြင် မှ စောင့်ဆိုင်း နေကြရသည် ။ စာနယ်ဇင်း အချို့မှ သတင်းဓာတ်ပုံသမားများ က လည်း ဓာတ်ပုံ တဖျပ်ဖျပ် ရိုက်ယူနေ ကြ၏ ။

ကာတွန်းဆရာ မောင်ဝဏ္ဏ က ပင်နီတိုက်ပုံအင်္ကျီ ကို ဝတ်ဆင် ထားသည် ။ စတီရီယို အဆိုတော် က တီရှပ်အဖြူရောင် ဝတ် ထားကြောင်း မှတ်မိသည် ။ သူ လည်း ပုဆိုး နှင့် သာ ဖြစ်၏ ။ သူ ၏ သီချင်းစီးရီး ဓာတ်ပုံ အများစု မှာ ကဲ့သို့ ဘောင်းဘီ ဝတ် မထား ။

ရုံး သတ်မှတ်ချိန် ပြည့်သော် အမှု က မပြတ် ။ စီရင်ချက် မချနိုင် ။ ရမန်ကြီးရက် ထပ် ချိန်း လိုက်ကြောင်း သိရ၏ ။ မိမိ တို့ လည်း ဧည့်သည် အဖြစ် လာရောက် နားထောင်သူ ကာတွန်း ဆရာကြီး ဦးဘထွေး ကို ဖေးမရင်း ဗဟန်းတရားရုံး မှ ပြန်ခဲ့ကြသည် ။

( ၃ )

သို့ဖြင့် ထို ကိစ္စ သည် တရားရုံး တွင် မပြတ် ။ အဆိုတော်များ ဘက် မှ ဂီတကောင်စီ ရှိသည် ။ ကာတွန်းဆရာများ ဘက် မှ ပန်းရိုးရာ ပညာရှင် များ ကောင်စီ ရှိသည် ။

ကောင်စီချင်း ညှိနှိုင်းပေးဖို့ ကိစ္စ ဖန်လာသည် ။ သို့ဖြင့် ကာတွန်း ဆရာ မောင်ဝဏ္ဏ နှင့် ထို အဆိုတော် တို့ ၏ ကိစ္စ ကို ဂီတကောင်စီ ရုံးခန်း တွင် ညှိနှိုင်းပေးမည် ဆိုသော သတင်း ထွက်ပေါ် လာပြန်သည် ။ ထို ကိစ္စ သည် လည်း ထုံးစံအတိုင်း စာနယ်ဇင်း အသိုင်းအဝိုင်း တွင် ပျံ့နှံ့၏ ။ သို့ဖြင့် ထို နေ့ တွင် ဂီတကောင်စီရုံးခန်း သို့ မိမိတို့ လာခဲ့ကြ ပြန်သည် ။ ထိုစဉ်က ဂီတကောင်စီရုံးခန်း နေရာ ကား လမ်းမတော်မြို့နယ် ထဲ တွင် ဖြစ်၏ ။

မနက်ပိုင်း ဖြစ်သည် ။

မိမိတို့ ကား တစ်ခါမျှ မရောက်ဖူးသော ဂီတကောင်စီရုံးခန်း ကို မေးမြန်း စုံစမ်း ၍ ရောက်လာ ကြသည် ။ မိမိ တို့ ရောက်တော့ အချိန် စော နေ သေးသည် ။ လက်ဖက်ရည်ဆိုင် ထိုင် ကြ၏ ။ မိမိတို့ ဝိုင်း တွင် ဆရာ အီကြာကွေး ပါ သည် ။ ထိုမှ ဆရာသော်တာဆွေ ရောက်လာပြီး မိမိ တို့ ဝိုင်း တွင် လက်ဖက်ရည် သောက် ၏ ။ ဆရာသော်တာဆွေ ကား ပလေ ကတ်လုံချည် အပြာနုရောင် ကွက်ကျဲ ကို ဝတ် ထား၏ ။ အင်္ကျီ ကား လက်တို အဖြူပွပွကြီးကြီး ၊ ပိန်သွယ်ပြီး ဖြူစင်သော သူ့ အသားအရေ နှင့် သူ့ အသွင် မှာ ကြည်စင် နေသည် ။ ဆရာသော်တာဆွေ ကား ငယ်စဉ် က ရုပ်ရည် ချောမောသူ ဟု ဆောင်းပါး တချို့တွင် ဖတ်ဖူးသည် ။ မြာ အတော် စွံ သူ ဟု လည်း ဖတ် ဖူး၏ ။ ထိုနေ့ က သူ လွယ် ထားသော လွယ်အိတ်ကြိုး ကို အထုံးကလေး ထုံးထား၏ ။ ထိုစဉ်က လူငယ်များ လွယ်အိတ်လွယ် လျှင် ကျား မ မဟူ အထုံးကလေး ထုံး ထားတတ်သော အလေ့ ခေတ် ထ ၏ ။ သူငယ်ချင်း ပန်းချီဆရာ က ဆရာသော်တာဆွေ ၏ လွယ်အိတ်ကြိုး အထုံးဖုကလေး ကို ကြည့်ရင်း သဘောကျ ကာ “ ဟော့ရှော့တ်ပဲ ” ဟု ပြောသံ ကို မှတ်မိသေး၏ ။

ဆရာသော်တာဆွေ နှင့် ဆရာအီကြာကွေး ကား စကား အမျှင် မပြတ် ။ မိမိ တို့ က နားထောင်သမား သက်သက် ။ လက်ဖက်ရည်ဖိုး ရှင်း တော့ မိမိတို့ လူငယ်များ ရှင်းမည် ကို ဆရာသော်တာဆွေ က လက်မခံ ။ သူ ရှင်းမည် ဟု ဆို၏ ။ စောစောကပဲ သူ့ တပည့် တစ်ယောက် က ငွေ တစ်ထောင် ကန်တော့ လိုက်တာ သူပဲ ရှင်းမည် ဟု ပြောပြီး ငွေထုပ်ကလေး ကို ဖြေ ကာ လက်ဖက်ရည်ဖိုး ရှင်း၏ ။

ဆရာ နှင့် အတူတူ မိမိတို့ ဂီတကောင်စီရုံးခန်း ထဲ ရောက်တော့ လူများ ရုံးစု ရုံးစု ဖြစ်နေကြ ချေပြီ ။ ထုံးစံအတိုင်း ကာတွန်းဆရာ ၊ စာရေး ဆရာ ၊ ပန်းချီဆရာများ ချည်း သာ ။ ရုံးခန်း မှာ ပေနှစ်ဆယ် အစိတ် ဝန်းကျင် သာ ရှိရာ လူများ ဖြင့် ပြည့်လု မတတ် ဖြစ်နေချေသည် ။ အခန်း အလယ် တွင် အစည်းအဝေး ပုံစံ စားပွဲများ ဆက် ခင်း ထားပြီး နံဘေး တစ်ဖက် တစ် ချက် တွင် ကု,လားထိုင်များ ချ ထား၏ ။ ထို ကု,လားထိုင်များ တွင် လူ မဆံ့ တော့ သဖြင့် အချို့က မိုးတိုးမတ်တတ် ရပ် နေကြရသည် ။

မှတ်မှတ်ရရ စားပွဲ ထိပ် မှ ကု,လားထိုင် တွင် ဂီတကောင်စီ ဥက္ကဋ္ဌ ထင် သည် ။ ဘိုကလေးတင့်အောင် ထိုင် ၏ ။ သူ့ နံဘေး တွင် ဂီတ ကောင်စီ အတွင်းရေးမှူး ဦးလွင်မြင့် ၊ ပန်းရိုးရာ ကောင်စီ ဘက် မှ အတွင်းရေးမှူး ကာတွန်းဆရာကြီး ဦးဖေသိန်း ၊ သူ့ ဘေး တွင် ဆရာ သော်တာဆွေ ၊ နောက် ကာတွန်းဆရာ မောင်ဝဏ္ဏ ၊ နောက် ကာယကံရှင် တရား စွဲဆိုသူ စတီရီယို အဆိုတော် ၊ နောက် ဆရာအီကြာကွေး ၊ နောက် နာမည်ကျော် ပုဂ္ဂိုလ် ပန်းချီဆရာ ၊ ကာတွန်းဆရာများ ၊ အခြား ထိုင် နေကြသူများ ကို တော့ မမှတ်မိတော့ ။

မိုးတိုးမတ်တတ် ရပ် နေကြသူများ ကလည်း ပန်းချီဆရာ ၊ ကာတွန်း ဆရာ ၊ စာရေးဆရာများ ပင် လူစုံ တက်စုံ မမှတ်မိတော့ သော် လည်း အသေ အချာ မှတ်မိနေသည်က စတီရီယို အဆိုတော် ဘက် မှ ဂီတ အသိုင်း အဝိုင်း တစ်ယောက် မျှ ပါ မလာခဲ့ခြင်းပင် ။

ဆရာ ဘိုကလေးတင့်အောင် က ဖြစ်စဉ် ကို ရှင်းလင်း ပြောကြား ၏ ။ ဆရာဦးဖေသိန်း က အားနာ တတ်သည် ။ ထ ပြော သည် ကို မတွေ့ရ ။ သို့ဖြင့် သူရှင်း ကိုယ်ရှင်း နှင့် ကိစ္စ က မပြတ် ။ အကြော ရှည် လာသည် ။ ထိုစဉ် ကင်မရာသမား က လည်း ကင်မရာ တကိုင်ကိုင် ဖြစ် နေချေရာ စတီရီယို အဆိုတော် က ယခု ပွဲ တွင် ဓာတ်ပုံ လုံးဝ မရိုက်ရန် ကြားဖြတ် ပြောဆို၏ ။ ကင်မရာသမားများ မှာ လည်း တားမြစ် ထား သဖြင့် ဓာတ်ပုံ မရိုက်ရဲ ။

တာဝန်ရှိ ပုဂ္ဂိုလ်များ မှ နေ၍ ပြေလည်အောင် ညှိနှိုင်း ပေးသော်လည်း ကာယကံရှင်များ မှာ ကျေအေးသွား မည့် အရိပ်အယောင် မမြင်ရ ။ စတီရီယို အဆိုတော် က လည်း ဤ ကိစ္စ ဖြစ် ရသည့် နေ့ မှ စ၍ သူ မစားနိုင် မအိပ်နိုင် ခံစားရကြောင်း ထ ၍ ရှင်းလင်းချက် ထုတ်၏ ။ ဆရာအီကြာကွေး က လည်း မလှမ်းမကမ်း မှ နေ၍ တစ်စုံတစ်ရာ ပြောမည့် ဟန် ကုန်း ရုန်း ထသဖြင့် ဘေး မှ တစ်ယောက် က ဆွဲပြီး ပြန် ပြန်ထိုင် ခိုင်းနေဟန် မြင် ရသည် ။

အခြေအနေ က ရှုပ်ထွေး လာသည် ။ တာဝန်ရှိ လူကြီးများ အပြော ဖြင့် ပြတ်ပုံ မရတော့ ။

ထိုစဉ် ရုတ်တရက် ထ ရပ် လိုက် သူ က ဆရာသော်တာဆွေ ဖြစ် သည် ။

ဆရာသော်တာဆွေ က ကာတွန်း အကြောင်း နှင့် ဖြစ်စဉ် ကိစ္စရပ် များ ကို ဒိုးခနဲ ဒေါက်ခနဲ ရေပက် မဝင် ထ ပြော၏ ။ ပြောသည့် စကား လုံးများ ကို လုံးစေ့ပတ်စေ့ မမှတ်မိတော့ သော်လည်း သူ့ ပြောဟန် မှာ အင်မတန် မာန် ပါကြောင်း ၊ အချက်အလက် နှင့် သွက်လက်စွာ ပြောသွား နိုင်ကြောင်း မှတ်မိ၏ ။

ပြောရင်း မတ်တတ် ဓာတ်ပုံဆရာများ ကို လည်း ဓာတ်ပုံ ရိုက်နိုင် ကြောင်း ဆရာသော်တာဆွေ က ခွင့် ပေး လိုက်သည် နှင့် စောစောက စတီရီယို အဆိုတော် က တား ထား သဖြင့် ဓာတ်ပုံ မရိုက်ရဘဲ လက်ယား နေ သော ကင်မရာမင်းများ မှာ ဓာတ်ပုံ တဖျပ်ဖျပ် ဖြင့် အတိုးချ ရိုက် လိုက်ကြ ပုံမှာ အစည်းအဝေးခန်းမ တွင်း တွင် မီးရောင် တဝင်းဝင်း ၊ ခလုတ်နှိပ်သံ တစ်ချက်ချက် ဖြင့် တစ်မုဟုတ်ချင်း ပြောင်းလဲ သွားတော့၏ ။

ဆရာ က ကာတွန်း မောင်ဝဏ္ဏ ရေးဆွဲသော ကာတွန်း တွင် အဆိုတော် ၏ နာမည် လည်း မပါ ။ ကာတွန်း ဆိုသည် မှာ ကာတွန်းဆရာ က သူ မြင်ရာ ကို သရော် ၊ ဝေဖန် ၊ ထောက်ခံ ထောက်ပြ ရေးဆွဲ ရသော အလုပ် ဖြစ်ကြောင်း ကာတွန်း တစ်ကွက် ၏ သဘောတရား ကို ရှင်းလင်း ပြောပြ သွားသည် ။

ဆရာသော်တာဆွေ ပြော နေစဉ် အဆိုတော် က ထပြီး နှစ်ခွန်း ၊ သုံးခွန်း ချေပကြောင်း မှတ်မိ၏ ။ ထို အဆိုတော် ချေပသည့် စကားများ ကို ဆရာသော်တာဆွေ က လက်ညှိုး ညွှန်ပြီး မေးခွန်း ပြန် ထုတ်ပုံ ကိုလည်း မှတ်မိ၏ ။ ဆရာ သော်တာဆွေ ၏ မေးခွန်းများကို ထို အဆိုတော် သည် တိကျရေရာ စွာ ပြန်လည် မချေပနိုင် ။

သူ့ အနေဖြင့် ယခု ထ ပြောသူ မှာ နိုင်ငံကျော် စာရေးဆရာကြီး ဆရာသော်တာဆွေ မှန်း လည်း သိပုံ မရချေ ။ နံဘေး မှ ပုဂ္ဂိုလ်များ မှာ လည်း နိုင်ငံကျော် ကာတွန်းဆရာကြီး ဦးဖေသိန်း ၊ ဦးဘထွေး ၊ ဆရာ အီကြာကွေး အစ ရှိသည့် နာမည်ကျော် စာရေးဆရာ ၊ ပန်းချီဆရာ ၊ ကာတွန်းဆရာ များ ဟု လည်း သိပုံ မပေါ် ။ သူ ကား စာနယ်ဇင်းလောက နှင့် နယ်ပယ်စိမ်း အရပ် က ဖြစ်၏ ။

သို့ဖြင့် ထိုနေ့ က စေ့စပ်ညှိနှိုင်းပွဲ မှာ ဆရာသော်တာဆွေ ထ ပြီး အကျယ်တဝင့် ပြော ကြားခဲ့မှု မှာ အလွန်တရာ အရေး ပါ ထိရောက် ခဲ့ရ သည် ။

တရားရုံး တွင် မပြတ် ၊ ဂီတကောင်စီ ရုံးခန်း တွင် တာဝန်ရှိ ပုဂ္ဂိုလ် ကြီးများ ၏ ညှိနှိုင်းပေးခြင်း ဖြင့် မပြီးမစီး ဖြစ်နေသော ညှိနှိုင်းပွဲ ကို ဆရာ သော်တာဆွေ က ထပြီး ချက်ကျ လက်ကျ ပြောကြားခဲ့ရာ ယင်း နောက်ပိုင်း ကိစ္စ ပြတ် ခဲ့ရသည် ။

သို့သော် ဆရာသော်တာဆွေ မှာ ထိုနေ့ ညှိနှိုင်းပွဲ သို့ တာဝန် ဖြင့် ရောက်ရှိ လာ သူ မဟုတ် ။ မိမိတို့ နည်းတူ ပင် စာနယ်ဇင်းသမား ဘက် မှ သံယောဇဉ် ဖြင့် ရောက်ရှိ လာ သူ ဧည့်သည် တစ်ဦး မျှ သာ ဖြစ်ခဲ့၏ ။

( ၄ )

နောက် လ ထုတ် မဂ္ဂဇင်း အချို့ တွင် အဆိုတော် က ကာတွန်းဆရာ မောင်ဝဏ္ဏ ကို တောင်းပန်ကြောင်း နှင့် အမှု ကို ပြန်လည် ရုပ်သိမ်းကြောင်း စာများ ပါလာခဲ့သည် ။ အချို့ မဂ္ဂဇင်းများ က ထို သတင်း ကို ဓာတ်ပုံ ဝေဝေဆာဆာ ဖြင့် ဖော်ပြ ကြ၏ ။ ဓာတ်ပုံများ ရိုက်ခွင့် က လည်း ဆရာ သော်တာဆွေ ခွင့်ပြု လိုက် သဖြင့် မှတ်တမ်းပုံများ ရရှိ ခဲ့ကြခြင်း ။

မိမိ ကား အကြောင်း တိုက်ဆိုင်တိုင်း ထိုစဉ် က ဂီတကောင်စီ ရုံးခန်း ထဲ တွင် လူပုံ အလယ် ၌ မားမား ရပ် ကာ ပြတ်သား ပီသပြီး အားမာန် ပါ သည့် စကားများ ကို ပြောကြား နေ သူ ဆရာသော်တာဆွေ ၏ ရုပ်သွင် ကို သာ ပြန်လည် မြင်ယောင် မိ နေဆဲ ဖြစ်၏ ။

◾ဆွေမင်း ( ဓနုဖြူ )

📖 သော်တာဆွေ ရာပြည့်အမှတ်တရ လွမ်းတသသ

#ကိုအောင်နိုင်ဦး မှ မျှဝေသည် ။

.