အနုဝင်္ကပါ ( ၂၅ )

 

( ၂၅ )

ရုပ်မြင်သံကြား နှင့် ပတ်သက်၍ ရုပ်မြင်သံကြား မှ လွှင့်ထုတ် ပြသခဲ့ သော နန်းတော်ရှေ့ ဆရာတင် ၏ မြေးမလေး နန်းခင်မွှေး ၏ ဆင်ကြီး ဂဠုန်ချီ သီချင်း ကို အကြောင်း ပြုပြီး သာဓု ယခင်လ က ရေးသား ခဲ့ရာမှ ယခုလည်း ဆက်လက် ၍ ပင် ရုပ်မြင်သံကြား မှ လွှင့်ထုတ် နေသော သီချင်းများ အဆိုကျော်များ မကျော် တကျော် အကြောင်း များ နှင့် တကွ တီဗွီ ရိုက် ရာ ၌ ပြင်ဆင် မွမ်းမံ ကြ သော အခမ်းအနား တို့ နှင့် ပတ်သက်သည် များ ကို ရေး ချင် လာ ချေသည် ။

စင်စစ် မရေးဘဲ နေ၍ မဖြစ်သော အကြောင်းချင်းများ မဟုတ် ဟု ဆိုလို က ဆို နိုင်သော်လည်း ဤအတိုင်း ကြည့် နေ ပါက အသေးအမွှား အကြောင်းတရားကလေးများ မှ တစ်ဆင့် တဖြည်းဖြည်း ရင့် ပြီး ပုံပျက် လာမည် ကို စိုးရိမ် မိ သဖြင့် လည်းကောင်း ၊ နောင် ထွက်ပေါ်လာ မည့် တက်လူငယ် ကလေးများ အရေး ယူ မမှားစေရန် လည်းကောင်း အိမ်း ရေးရ ချေ ဦးမည် ။

အနှီ မြန်မာ့ရုပ်မြင်သံကြား စတင် လွှင့် စဉ်က နှင့် ယခု လုံးလုံး မတူ တိုးတက် ကောင်းမွန် လာသည် များ ရှိသကဲ့ သို့ ဆုတ်ယုတ် ပုံ ပျက်သွား သည် များ လည်း ရှိခဲ့သည် ။

မြန်မာ့ရုပ်မြင်သံကြား အစီအစဉ် ၏ နောက်ခံ ပန်းချီကား များမှာ အလွန် အားရဖွယ် ကောင်းလှသည် ။ အထူးတလည် တိုးတက် လာသည် ။ အချို့သော တောတောင် ရေမြေ ရှူခင်း ပန်းချီတို့ သည် ပြင်ပ တွင် သွားရောက် ရိုက်ကူးခဲ့သည် နှင့် မခြား လက်ရာ ပြောင်မြောက်လှ သည် ကို တွေ့ရသည်  ။

ပန်းချီကား နောက်ခံ ရှူခင်း တစ်ခု တွင် မြက်ခင်းပြင် ပေါ် သို့ နေရောင် ထိုး နေသည် ကို ရေးဆွဲ ရာ၌ ပန်းချီဆရာ သည် အနုပညာ စွမ်း ပြ လိုက် သကဲ့သို့ အချို့ မြက်ခင်းပြင် တွင် မှောင်ညို့ညို့ ကလေးများ ကွက် ၍ ခြယ်မှုန်း ထားသည် အဓိပ္ပာယ် မှာ ကွင်းပြင်ကျယ်များ ပေါ်သို့ နေရောင် ထိုး သည့် အခါ တစ်ခါတစ်ရံ တစ်ကွင်းလုံး လင်း နေ သော်လည်း တစ်ခါတစ်ရံ တိမ်တိုက် များ ခံ နေ၍ နေရောင်သည် မြေပြင် သို့ တိုက်ရိုက် မထိုးနိုင် သဖြင့် ကွက်ကျား လင်း ကွက်ကျား မှောင် နေ တတ်သည့် သဘာဝ ကို ပန်းချီဆရာ က သတိ မလစ်ဘဲ တင်ပြ ထားချေ သည် ။ ကောင်းလေစွ ။

အခမ်းအနား အခင်းအကျင်း ( ဆက်တင် ) ဆိုင်ရာ ပညာရှင် တို့ လည်း တော်ကြပါပေသည် ။ တစ်နေ့ နှင့် တစ်နေ့ မတူ စေဘဲ အခမ်းအနား အပြင်အဆင် ရော အသွေးအရောင် ဟပ်စပ် ဖန်တီးပုံ ပါ အဆင်ပြေ လှသည် ။

သာဓု မကြိုက်သော အချက် အချို့ ကား ရှိ၏ ။ ထို အချက် တစ်ချက်မှာ တေးဆို သူ ကို လည်းကောင်း ၊ ကပြနေသူ ကို လည်းကောင်း အာရုံ စိုက် ၍ ကြည့် နေ ရသည့် အခန်းများ တွင် မီး ရောင်စုံ အသွယ်အတန်း တို့ အကန့် တို့ က ဖွင့်လိုက် ပိတ်လိုက် လုပ် ပြ နေသည် မှာ ကြည့်ရသူ များ အရသာ ပျက် လှသည် ။

ရံဖန်ရံခါ ဆိုသလို ထိုထို ရောင်စုံ မီးများ က ဒေါင်လိုက် လည်းကောင်း ၊ ကန့်လန့် လည်းကောင်း ၊
ပတ်ချာလည် ၍ လည်းကောင်း ၊ ( မီးပြေး ) အဖြစ် ခလုတ် ကစား ပြ နေတတ် ရာ ကြည့်သူ ပရိသတ် အနေဖြ င့် မီးကစား သည် ကို ဂရု စိုက် ရမည် လော ၊ သီဆို ကပြသူ ၏ သရုပ်ဆောင် ချက် ကို အရသာ ခံရမည် လော စသဖြင့် အာရုံ များ နေ ရသည် ။ ရှင်းရှင်း ဆိုရသော် ( မျက်စိ နောက် သည် )

ရုပ်မြင်သံကြား ရိုက်သော ကင်မရာမင်း ဓာတ်ပုံဆရာ တို့ နှင့် ပတ်သက်၍ လည်း ပြော စရာ ရှိလာသည် ။

တစ်ခါက မင်းသမီး တစ်ဦး ယိုးဒယား က က နေရာမှ တစ်ဖက် သို့ ကော့ ၍ နွဲ့ ၍ ကပြ နေစဉ် ကင်မရာဆရာ က ဓာတ်ပုံ ကစား သလို စောင်း ပြီး ရိုက် လိုက် သောကြောင့် ထို မင်းသမီး မှာ ပက်လက် လန် လဲကျ တော့မည် ကဲ့သို့ ဖြစ်သွား ချေသည် ။ ဤလို ကင်မရာ ကို ဝဲယာ စောင်း ကစား ပြီး ရိုက်ကူးခြင်း သည် ယိုးဒယား အကနှင့် ဖြောင့် ဖြောင့် ကြီး ဆန့်ကျင် နေသည် ယိုးဒယား အက ဆိုသည် မှာ အားလုံး သိကြသည့် အတိုင်း အလွန် ညင်သာသည် ။ ငြိမ့်ညောင်း သာယာစွာ ကကြ ( က ရ ) သည် ။

ပတ်ဝန်းကျင် တစ်ခုလုံး ပါ ငြိမ်သက် နေရန် လိုသည် ။ အထက် အောက် တန်း နေသည့် တိုင်များ နံရံ များ သော်မှ ဖြောင့်မတ် နေရ သည် ။ သို့မှ လည်း ယိုးဒယား အက ၏ ပညာသား ပါ မှု လက်ကွေး လက်မြှောက် တို့ ၏ အတိုင်းအတာ ပမာဏ ကို  အကဲခတ် ၍ ရသည် ။ ကင်မရာ က ယိုင် ၍ ရိုက် လိုက်သော ကိုယ်နေဟန် တစ်ခုလုံး ထောင့် မမှန်တော့ဘဲ ယိမ်းယိုင် သွားသည် ။ ကြည့် ၍ မ ကောင်း ။

ကင်မရာ ကစား ရာ တွင် အန္တရာယ် အကင်း ဆုံး မှာ (Zoom) ‘ ဇွမ်း ’ အနီး အဝေး ဆွဲ ပြ ခြင်း ဖြစ်၏ ။ အပေါ် မှ ဆီး ရိုက်ခြင်း ၊ အောက် မှ ပင့် ရိုက်ခြင်း များ သည် နေရာတိုင်း မကောင်း သည် ကို သတိ ပြု သင့်သည် ။

ကင်မရာဆရာ နှင့် ပတ်သက်၍ တစ်ဆက် တည်း ပြောလိုသည် မှာ တေး ဆိုသူများ ကို ရိုက်ကူး ရာ ၌ မညီမမျှ ဖြစ် နေသည် ကို တွေ့ ရသည် ။ တစ်နေ့ တည်း ပြသော အဆိုတော်  ၃, ၄ ဦး ကို ရိုက်ကူး ရာ တွင် တစ်ဦး နှင့် တစ်ဦး ကို ရိုက်ပုံချင်း မတူ ။ တစ်ဦး ကို အရုပ် ကြီးကြီး အနီးကပ် များများ မျက်နှာ အသား ပေး ရိုက်ကူး လျက် နောက် တစ်ဦး ကို မူ အဝေး မြင်ကွင်း အရုပ်သေးသေး က များ ပြီး မျက်နှာ အသားပေး အရုပ်ကြီး က နည်း နေ တတ်သည် ။ မမျှတ ။

တစ်ဖန် တစ်ယောက် ကို ရိုက်ကူး ရာ ၌ သီချင်း ဆို ပိုဒ် ရပ် ပြီး အတီး ပိုဒ် ရောက်သည့် တိုင် အောင် ထို အဆိုတော် ၏ မျက်နှာ ကို သာ ထောင့် အမျိုးမျိုး မှ အလှ ရိုက် တတ်ကြပြီး ။

အခြား တစ်ယောက် ကို မူ အဆို ပိုဒ် ပြီး သည် နှင့် အတီးပိုဒ် တွင် တီးဝိုင်း အဖွဲ့သားများ ကို ပြသည် ။ သို့ တီးဝိုင်းအဖွဲ့ ကို ရိုက် ပြရာ တွင် လည်း အချိန် ရ ပါလျက် လူစုံ မပြဘဲ လည်း ရှိတတ်သည် ။

အခါခါ ဆို သလို အမျိုးသမီး စန္ဒရား စောင်းကောက် စ သဖြင့် တီးခတ်သူများ ပါလာ တတ်ကြ သည် ဖြစ်ရာ သူကလေး တို့ အားကြိုး မာန်တက် ရှိ လာရန် အနီးကပ် တစ်ယောက် ချင်း ရိုက် ပြသင့် သည် ။

သူတို့ ကလေးမလေးများ ဝါသနာ ပါ လွန်း၍ စေတနာ့ဝန်ထမ်း သီဆို တီးခတ် ကြ ရာဝယ်
လွယ်လှသည် မဟုတ် ။ သီချင်း တစ်ပုဒ်စာ ၄ , ၅ မိနစ် ခန့် မျှ တီးခတ် သီဆို ရရန် အဝတ်အစားဖိုး နှင့် ပြင်ဆင်စရိတ် ၃၀၀ နှင့် ၆၀၀ ကြား တွင် ကုန်ကျ သည် ။ ကား ငှား ရ လျှင် နောက်ထပ် ငွေ ငါးဆယ် ။

သူတို့ လည်း လှလှပပကလေး ထင်ပေါ် ချင် ကြပေမည် ။ မျှမျှတတ ကလေး လုပ်ပေး စေချင် သည် ။

တစ်ခါတစ်ရံ လည်း သီ ဆိုသူ အရုပ် က နည်းပြီး တီးဝိုင်း ခေါင်းဆောင် ၏ မျက်နှာ နှင့် လက် တို့ က အပြ များ နေသည် ။ တစ်ခါတစ်ရံ အဆန်းပင် ထွင် ၍ တစ်ယောက် တည်း ကို မျက်နှာထား ၃ , ၄ မျိုး ရိုက်၍ ထပ်၍ ရော၍ မှောင်၍ လင်း၍ ပြ တတ်ကြသည် ။

ခြုံ၍ ရေး ရသော် ဆို သူရော တီး သူ တို့ ပါ ဝါသနာ ကြီး လွန်း ကြ၍ တစ်တပ် တစ်အား ကူညီ ဖြေဖျော် နေကြရင်း က ပင် ( မည်သို့ ဖြစ်စေ ) ပေါ်ပေါ်ထင်ထင်ကလေး ဖြစ် စေ လိုကြချေမည် ။

ထို့ကြောင့် မျှမျှတတ နှင့် တစ်ပြေးညီ ဖြစ်စေရန် သီချင်း တစ်ပုဒ် လျှင် အရုပ်ကြီး ၊ အရုပ်သေး ၊ သီဆိုသူ ၊ တီးဝိုင်း စသဖြင့် ကင်မရာ ရိုက်ကွက် ကို ရာခိုင်နှုန်း ဖြင့် သတ်မှတ် ပေး ထား လျှင် အားလုံး အဖို့ ကျေနပ် ဖွယ် ရာ ပင် ။

ကင်မရာဆရာ တို့ နှင့် ပတ်သက်၍ နောက်ဆုံး ရေး လိုသည် မှာ သီချင်းများ သီဆိုကြသည့် ကြား တွင် ရူမျှော်ခင်းများ ၊ တိမ်တိုက်များ ၊ ရေတံခွန်များ ၊ ပန်းမျိုးစုံ လှလှကလေးများ ညှပ်၍
ပြသွား တတ်သည် မှာ အလွန် အားရဖွယ် ကောင်းလှသည် ။ မှန်ကူကွက် သဏ္ဌာန် နှင့်
ရောင်စုံဖလ်လှိုင်းကလေးများ အရုပ်ချင်း ရော ၍ ရှုမျှော်ခင်း ချင်း မှန်း ၍ ရိုက်ပြသွား သည် ကို လည်း မချီးမွမ်းဘဲ မနေနိုင် ၊ သာဓု တို့ ရုပ်ရှင်ကင်မရာ ထက် အဆ များ စွာ သာ နေသည် ။

အဆို သမား တို့ နှင့် စပ်လျဉ်း၍ ရေးရချေ ဦးမည် ။ မြန်မာ့ ရုပ်မြင်သံကြား ၏ အစပိုင်း လောက် က အတော်ကလေး ဣန္ဒြေ ရ ခဲ့ပြီး တင်တင်မြ တို့ ၊ ချိုပြုံး တို့ ၊ မြင့်မြင့်ခင် တို့  ၊ ခင်ယုမေ တို့ စသဖြင့် သူတို့ လည်း တည်တည်ငြိမ်ငြိမ် တည်တည်တံ့တံ့ ဆို ခဲ့ကြသည် ။ နောက် ခေတ်ပေါ်တေး ဆိုသည် လော အဘယ်လော မသိ စတီရီယို တေးများ တီဗွီ အပေါ် လွှမ်းမိုး လာ သော အချိန်မှ စ၍ တဖြည်းဖြည်း ပုံ ပျက် လာချေတော့သည် ။

စတီရီယိုတေး ဟူသည် ရော့အင်ရိုးလ် ၊ ရှိတ် ၊ ဒစ်စကို စသည့် ဆတ် ကော့ လတ်ကော့ ( က ) မှ (က ) ၍ ရ သော သီချင်း ဖြစ်သည် ။ တေးသွား ဖြစ်သည် ။

ကြည့်ပါ ၊ ယခု သူတို့ ဆို နေသော စတီရီယို ။ ငြိမ်ငြိမ် ဆို သလော ။ လက် က မလှုပ် ခြေ က မလှုပ် ၊ တစ်ခါတစ်ရံ နှစ်မျိုး စလုံး လှုပ် ၊ ကိုယ် က လည်း ဝဲဘက် လိမ် လိုက် ၊ ယာ ဘက် တွန့် လိုက် ။

တေးသီချင်းများ ကို ရှု ပါဦး ...

( မင်းနှင့် တို့ နှင့် ချစ်နေတာ ရန်ကုန်တစ်မြို့လုံး သိကုန်ကြပြီ ကမ္ဘာ ပတ်ပြီး လျှောက်လည်ရ အောင် )

( ကမ္ဘာကြီး က အလုံးကြီး ၊ လကြီး က အဝိုင်းကြီး ပျော်လိုက်ကြပါ )

( သူ က ပြောတယ် - ဝေါ ၊ သူ က ပေးတယ် ... ဟေး သူ က ကဲတယ် ... ဗြဲ ... ပြန်ပေးပါတဲ့ ... ကဲ .... ရော့ ... ရော့ ... ဝေါ့ .. )

သာဓု တော့ အဓိပ္ပာယ် မဆက်စပ်တတ်ပါချေ ။

သီဆိုကြ ရာ တွင် လည်း ထို က လှုပ် ဤ က လှုပ် ဖြင့် နောက်ဆုံး လှုပ်စရာ တီးကွက် မပါသည့် နေရာ တွင် ပင် ကိုယ် အထက်ပိုင်း ကို ဝဲယာ ယိမ်းလှည့်ပြ နေကြသည် မှာ ကြည့် မကောင်းလှ ။

သီချင်း ဆိုသူ အချို့ က လည်း ခြေ လက် နှင့် ကိုယ် လှုပ်ရုံ သာ မက ပါးစပ် ပါ အမူအရာ လုပ်နေကြသည်  ။ မည်သည့် အကြောင်း ကြောင့် ဟူ၍ မသိ ။ ခေါင်း လှုပ် လိုက် ၊ မဲ့ လိုက် ရွဲ့လိုက် မေး ဆတ်လိုက် မျက်မှောက် ကြုတ် ပြ လိုက် ဆတ်ခနဲ ရယ် ပြ လိုက် ဖြင့် သီချင်း နှင့် ဆက်စပ်မှု မရှိဘဲ မျက်နှာထား ပုံစံ အမျိုးမျိုး လုပ်ပြ နေကြပြန်သည် ။ တီဗွီ ပရိသတ် ကို ပြောင် ပြသည် နှင့် တူ နေသည် ။

အချို့က သီချင်း ဆိုရင်း အကြောင်းမဲ့ ရယ်ပြ နေကြသည် ။ အချို့ ဝါ မရင့်သေးသော ကောင်မလေးများ ရယ်ပြ ရန် မေ့ နေ၍ လော မသိ ၊ သူတို့ နှင့် ပတ်သက်သူ တစ်ဦး တစ်ယောက် က ခပ်လှမ်းလှမ်း မှ ( ရယ် ရန် ) အရိပ် ပြ လိုက်သည့် အလား ဗြုန်းစားကြီး ရယ်ပြသည် ကို လည်း တွေ့နေရသည် ။ သရုပ် ပျက် လှသည် ။

အလွန် စိတ် မချမ်းသာဖွယ် ကား မြန်မာ သီချင်း ဆိုသူ အကျော်အမော် တို့ ပါ ထို ရောဂါ ကူးပြီး ယခု ပုံပျက်လာ လေသည်  ။

မြန်မာသံ မြန်မာ သီချင်းကြီး အဆိုတော် ထိတ်ထိတ်ကြဲ အချို့ သီချင်း ဆိုရင်း ရယ်ပြ နေကြ သည် ။ သီချင်း စာသား က လွမ်းစရာ ပင် ဖြစ်စေ ၊ သူတို့ မျက်နှာ  မမှိုင် ၊ မငိုင် ၊ ရယ် ၍ သာ ပြ နေချေသည် ။ ယခုတလော ရှေးသီချင်း ထိုင်ဆို ကလေးမ များ သာ တည်တည်ငြိမ်ငြိမ် ရှိကြ
သည် ။

ဖြစ်ရပလေ ၊ ယောက်ျား အဆိုကျော်တို့ လည်း  သွားဖြီး ပြနေပြန်သည် ။ သီချင်းသွား စာသား ဘာ နှင့် မျှ မဆိုင် ။ ဆိုင်ဆိုင် မဆိုင်ဆိုင် သွားဖြဲ ပြ နေသည် များ မှာ တေးဂီတ နှင့် ယှဉ်သော အနုပညာ မဟုတ်ပါချေ ။

ဥမာ နှိုင်း ရသော် မင်္ဂလာ အခမ်းအနား တွင် ပွဲထုတ် လာသော သတို့သား နှင့် သတို့သမီး တို့ က ပတ်ဝန်းကျင် မှ ပရိသတ် တွေ့တိုင်း ရယ်ပြ နေသည် နှင့် တူ နေ ချေသည် ။ ဣန္ဒြေ မရ ဟု ဆိုချင်သည် ။

မကြာသေး မီ က ( ပွင့်နိုင် ခဲပါဘိ တယ် ) ဟူသော သီချင်း ကို သီဆို သွား သည့် မန္တလေးသိန်းဇော် ကို ကြည့်လိုက်မိကြမည် ဆိုက အဘယ်မျှ ဣန္ဒြေ ရသည် ကို သတိထား မိ ကြပေ လိမ့်မည် ။ သူ ဆိုစရာ ရှိသော သီချင်း ကို ဆိုသည် ။ ပတ်ဝန်းကျင် ကို ခေါင်း ထဲ မထား ၊ သီချင်း စာသား
အလိုက် မျက်နှာ ပြောင်း သွားသည် ။ ပြုံး ၍ ပင် မပြ ။

တစ်ဖန် ကြာ ပြီ ဖြစ်သော တစ်ချိန် က ကိုင်ဇာ ၏ ချစ်ဇနီးသည် ကလေး က လွမ်းယောင်ယောင် သီချင်တစ်ပုဒ် သီဆို သွား ရာ၌ အသံ က လည်း လွမ်း ပြီး မျက်ရည်ကလေး တစမ်းစမ်း နှင့် သီဆို သွား သည် မှာ အဓိပ္ပာယ် ပါ လှသည် ။

မကြာသေးမီ က လည်း ( မိုင် ) ဟူသော အဆိုတော်ကလေး က မလွမ်းပို သီချင်း ကို ဝမ်းနည်း မျက်နှာ ဖြင့် သီဆို သွားရာ တေး နှင့် သရုပ် လိုက်ဖက် ညီ လှသည် ။

သူတို့ နှစ်ယောက် နှင့် မန္တလေး သိန်းဇော် တို့ သာ အများ နည်းတူ သွားဖြဲ ပြ ပြီး သီဆို ခဲ့သော် ... မျှော်လင့်တကြီး စောင့် နေသော အချစ်ပန်းကလေး ( ပွင့်နိုင်ခဲ့သည် ) ကို တဟားဟား သဘောကျ သလို ဖြစ် မသွားပါတုံလော ။

“ ဟေ့ - မြန်မာသံ မြန်မာသီချင်း အဆိုပဂေး သားတို့ သမီးတို့ ခေါင်း ဆတ်တောက်တွေ အပြုံးတွေ အရယ်တွေ တဖြည်းဖြည်း လျှော့ကြ ပြင်ကြ ဣန္ဒြေ ရကြတော့ကွာ ”

“ ကိုင်း ခွေ, း မသား သုမောင် မင်း လဲ ကျပ်ကျပ် သတိထား လက် နှစ်ဖက် ဆန့် ပြီး အချစ်တောင်း တာ တို့ ... အလကား နေရင်း ရယ် ပြတာ တို့ ပုံ ပျက် လာ ရင် ဒီမှာ လက်သီး ရော ... လက်ဝါး ရော ဝင်လာ ချိမ့်မယ် အိမ်း ... ”

◾သာဓု

📖 ချယ်ရီ မဂ္ဂဇင်း
      နိုဝင်ဘာ ၈၆
     
📖 အနုဝင်္ကပါ

#ကိုအောင်နိုင်ဦး

.