မန္တလေး သင်္ကြန် .. သင်္ကြန် .. သင်္ကြန်

 

❝ မန္တလေး သင်္ကြန် .. သင်္ကြန် .. သင်္ကြန် ❞

အမေတို့ အသက် တော်တော်ကြီး လာ တော့ မန္တလေးသင်္ကြန် က ပြောင်းလဲ သွား လိုက်တာ ။ ဟိုတုန်းက နဲ့ ဘာဆို ဘာကမှ မတူတော့ဘူး ။ ပြောင်းသမှ အားလုံး ကို ပြောင်း လဲသွားတာ ။

ပထမ ပြောင်းတာ က နေရာပါ ။ ဟိုး အရင် က တော့ သင်္ကြန်ပွဲ ဟာ အိမ်ရှေ့ တွေ မှာ အရပ် က သမီးပျို ၊ သားပျိုတွေ ပျော်ချင် လို့ နွှဲ ကြတဲ့ ရေသဘင်ပွဲ မို့ ရွှေဘုန်းရှိန် က အမျိုး သမီးရေပက်အဖွဲ့ ချည်း သုံးဖွဲ့ အပြိုင်အဆိုင် လုပ်ကြတယ် ။ ပိုက်ကျုံး က တော့ အဝီစိ တွင်းဒကာ က ရေ အလျှံပယ် ပေးတာမို့ ရေပက် ဘယ်လို ကြမ်းတယ် ၊ ဆေးရုံကြီး နား မှာ ရေခဲရေ နဲ့ ပက်တာ ရှိတယ် ။ ဝါးတန်း က ပွဲစားကုန်သည် သူဌေးတွေ က သူတို့ ဝါးတန်း လူ စည်အောင် ပွဲရုံ တစ်ရုံ ငွေ ၁,ဝဝဝ ကျပ်စီ ထည့် တာတဲ့ ... စတဲ့ စတဲ့ သတင်းတွေ ၊ ၈၄ လမ်းမကြီး ပေါ် မှာ က လည်း နဂါး ချည်း မကဘူး ၊ မြောက် ဆိုရင် ဒါးတန်း အထိ ၊ တောင် ဆိုရင် ဘုရားကြီးကွေ့ အထိ ရေပက်မဏ္ဍပ်တွေ က နည်းတာ မဟုတ်ဘူး ။ သိပ် များတာ ဆိုတဲ့ သတင်းတွေ နဲ့ နှစ်တိုင်း ရှိပေမဲ့ လွန်ခဲ့တဲ့ ၄ - ၅ - ၁၀ နှစ် ကတော့ သင်္ကြန်ပွဲ ဟာ မြို့ ထဲ ကနေ ကျုံးဘေး ရွှေ့ သွားပါလေရော ။ ပြီးတော့ နေရာ ပြောင်းတာ နဲ့ အတူ ရေပက် မဏ္ဍပ်ကြီး တွေ လည်း ပုံစံတွေ က လည်း အများကြီး ပြောင်း သွား ပါတယ် ။

ပြီးတော့ အရင် က ရေပက်အဖွဲ့ ၊ ရေခံအဖွဲ့ ဆိုတာ လူငယ်တွေ ပျော်ရ ပါးရ အောင် အရပ်က  ငွေ စုကြ ၊ လူငယ်တွေ ကိုယ်တိုင် ထည့်ဝင်ကြ ၊ ရပ်ကွက် ထဲ က များများ ထည့်နိုင် တဲ့ သူ က များများ ထည့် ၊ နည်းနည်း တတ်နိုင်သူ က နည်းနည်း ထည့်ပြီး ဘုံငွေ နဲ့ ပျော်ကြတာ ။ ခုတော့ ဒီနှစ် ကျင်းပ သွားတဲ့ မန္တလေးသင်္ကြန် မှာ စီးပွားသတင်းစာ တစ်စောင် ဖြစ် တဲ့ ဝါးလ်ဒ်ဂရု ( ပ် ) က ၂ဝ - ၄ - ၉၅ နေ့ မှာ ဘယ်လို သတင်း ပေးသလဲ ဆိုတော့ “ သင်္ကြန် ရက်များ နှင့် ကြော်ငြာပွဲတော် ” ဆိုတဲ့ ခေါင်းစီး အောက် မှာ

“ ယခု ကာလ သည် ဈေးကွက် စီးပွားရေးခေတ် ကာလ ဖြစ် လေရာ ပုဂ္ဂလိက စီးပွား ရေးလုပ်ငန်းများ စန်းထ နေချိန် ဖြစ်သည် ။ သို့ဖြစ်၍ ယခုနှစ် သင်္ကြန်မဏ္ဍပ် တိုင်း လိုလိုပင် စီးပွားရေး လုပ်ငန်းများ ၊ ကုမ္ပဏီများ ၏ ကြော်ငြာများ က လွှမ်းမိုး ခဲ့သည် ။

၁၉၉၅ ခု ၊ သင်္ကြန်ရက်များ အတွင်း ရေကစား မဏ္ဍပ်များ ၉၀% စီးပွားရေး လုပ်ငန်းရှင်များ ၏ ကြော်ငြာများ က နေရာ ယူ ထားကြသည် ။ စီးပွားရေး လုပ်ငန်းများ နှင့် ကုမ္ပဏီ များ ၏ ရေကစားမဏ္ဍပ်များ ကို လည်း အပြိုင်အဆိုင် တွေ့ ရသည် ။ ဖျော်ဖြေရေး အစီအစဉ် များ တွင် ခေတ်ပေါ် တေးဂီတ ကို ထည့်သွင်း ထားခြင်းသည် လည်း ပရိသတ် က ကြော်ငြာ ကို သတိထား မိ စေသည့် အဓိက အကြောင်းရင်း ဖြစ်ကြောင်း တွေ့ ရသည် ” လို့ သတင်း ပေး ထားပြီး စီးကရက် နဲ့ ဘီယာ ဧရာမ စာလုံးကြီးတွေ နဲ့ နဖူးစီး တပ်ထားတဲ့ ရေကစား မဏ္ဍပ် မှာ ရေကစား နေတဲ့ သတင်းဓာတ်ပုံတွေ နဲ့ ဖော်ပြ ထားပါတယ် ။

ဒီလို ကြော်ငြာမဏ္ဍပ်တွေ ပေါ် မှာ ဘယ်သူတွေ က ဆိုကြ ၊ ကကြ သလဲ လို့ မေး တော့ အရပ်တကာ က မိန်းကလေးတွေ ပါပဲ ။ ယူနီဖောင်းဖိုး တစ်ယောက် ၁၀၀၀ စီ ပေးပြီး ထမင်းကျွေး ခေါ်တာပဲ လို့ ဆိုပါတယ် ။ တချို့ ကြော်ငြာမဏ္ဍပ် က လည်း က,မယ့် အက အဖွဲ့ ကို တစ်ည တစ်ဖွဲ့ ပြောင်း ပြီး ငှား ကြတယ် ။ ဒီလို အငှား လိုက် ကမယ့် အက အဖွဲ့ တွေ ကို ထောင် စားတဲ့ လုပ်ငန်း တစ်ခု ဒီနှစ် မှာ မှ ပေါ်လာ သတဲ့ ။ ၄ - ၅ - ၁၀ ယောက် လောက် ပါတဲ့ အဲဒီ အဖွဲ့ ကို သင်္ကြန် မတိုင်ခင် မှာ တစ်ပတ် လောက် ကြိုပြီး က,တတ်တဲ့ လူ တစ်ယောက် က သီချင်း သုံးပုဒ် လောက် နဲ့ ယိမ်းတိုက် ထားတယ် ။ ဒီ သီချင်း သုံးပုဒ် က ဘယ် မဏ္ဍပ် မဆို ဒါနဲ့ ဆိုကြ ၊ ကကြ တာပဲ ။

စီးပွားရေးသတင်းလွှာ က လည်း သတင်းပေး ၊ မြင်ရ ကြားရသူတွေ က လည်း သင်္ကြန်မဏ္ဍပ်ကြီး တွေ က ကုန်ပစ္စည်းတွေ ချည်း ကြော်ငြာ ထား လိုက်ကာ သိပ် ပေါ် ထင်တယ် ။ ကြော်ငြာမဏ္ဍပ် မဟုတ်ရင် ဌာနဆိုင်ရာမဏ္ဍပ် တွေ သာ ရှိ တာကိုး ။ အမေတို့ အရင် က တွေ့ ရတဲ့ အရပ် ထဲ က မိန်းကလေး ၊ ယောက်ျားလေးတွေ စု ထောင် ကြတဲ့ ‘ ပိတောက် ရွှေဝါ ’ တို့ ၊ ‘ မေသင်္ကြန် ’ တို့ လို ရေပက်သင်းမ ဏ္ဍပ် မျိုး က ပါ မှ မပါတော့ဘဲ ကိုး ။

ဟိုတုန်း က တော့ မြို့မအသင်း က ဆရာငြိမ်း ရေးစပ် ပေးလိုက်တဲ့ သင်္ကြန်သီချင်း ဟာ တစ်နှစ် တစ်ပုဒ် မက တစ်ခါတလေ နှစ်ပုဒ် လောက် ရေးပေး လိုက်လို့ လူငယ် မိန်းမငယ် တွေ ပါးစပ်ဖျား မှာ စုံရေမက်ရေ သီဆို ကြရတာ က အမော ။ မန္တလေးသင်္ကြန် က ဆရာငြိမ်း သီချင်း နဲ့ ခွဲ လို့ ရတာက မဟုတ်ဘူး ။

မြို့မအဖွဲ့ က တီးမှုတ် ပြီး ရင် တစ်မဏ္ဍပ် က တစ်မဏ္ဍပ် ကို ကူးတော့မယ် ဆိုရင် တခြား သီချင်းတွေ ဆို အပြီး မှာ “ နောင်နှစ်တွင် လည်း ဆီးလို့ ကြိုကွယ် .. မောင်ကြီး လာ ပါမယ် ... လာပါမယ် ... ဒီနှစ် လို ပဲ ဆီးလို့ ကြိုမယ် ... မောင်ကြီး လာပါတယ် ... လာပါတယ် ... ပြန်ပါဦးမယ် ... ပြန်ဦးမယ် ... နှုတ်ခွန်း ဆက်ပါတယ် ” ဆိုတဲ့ နှုတ်ဆက် သီချင်းလေး နဲ့ ခွဲတာ ။ ဒီ သီချင်း ဟာ သင်္ကြန် အတက်နေ့ မှာ မဏ္ဍပ်တိုင်း လိုလို မှာ ကြား နေရတယ် ။ သူတို့ သူတို့ တစ်တွေ ရှေ့ နှစ်ခါ သင်္ကြန် မှာ လည်း ပြန်ပြီး တွေ့ကြဦးမယ် ... ဆုံကြဦးမယ် ပေါ့ ။

ဒီလို ဒီလိုနဲ့ လူငယ်တို့ ဘာဝ သံယောဇဉ်တွေ ငြိကြ ၊ တွယ်ကြ တာ လည်း နည်း မယ် မဟုတ်ဘူး ။ ဒါ လူငယ် တို့ ဘာဝ မဟုတ်လား ။

ခု ခေတ် မှာ တချို့ လူငယ်တွေ က “ မြနန္ဒာ ရေညိုညို ရစ်ခတ်သမ်း ၊ ရွှေမန်းတောင် ထိပ် တူစုံမောင်မယ် ပျော်ချင်ပါတယ် ” ဆိုတဲ့ သီချင်း ကို သာ ဆို နေကြတာ ။ နန္ဒာရေညို က ဘယ်က နန္ဒာရေ မှန်း တောင် သိကြတာ မဟုတ်ဘူး ။ တစ်ယောက် သော လူငယ် က တော့ “ အမေ ရယ် ... နန္ဒာကန် ဆိုတာ ဘယ်မှာ လဲ ၊ မန္တလေးတောင် ရဲ့ အနောက်ဘက် က လား ”  တဲ့ ။

ဟုတ်တာပေါ့ ။ မြန်မာမင်းတွေ လက်ထက် က ရှိ ခဲ့တဲ့ မဟာနန္ဒာ ကန်တော်ကြီး ကို ဗြိတိသျှအစိုးရ က ရေတွေ ဖောက် ထုတ်ပြီး လယ်မြေတွေ လုပ် ပစ် လိုက်တော့ မန္တလေး တောင်ထိပ် ပေါ် က မြောက်ဘက် လှည့်ပြီး လှည့် ကြည့်လိုက်တဲ့ အခါ မြင်ရတဲ့ နန္ဒာကန်ရေ တွေ က ရှိမှ မရှိတော့ဘဲ ကိုး ။ အခု မန္တလေး - မတ္တရာ - မိုးကုတ် ကားလမ်းမကြီး ဟာ တစ်ဖက်ဆည်ဘောင်ကြီး ပါ ပဲ ။ ကားလမ်း ဘေး မှာ မဟာနန္ဒာရေကန် ရဲ့ ကျောက်စာ ၊ ကျောက်စာ ဂူကလေး နဲ့ မြေ ထဲ မြုပ်လု မြုပ်ခင် ရှိနေတာ မြင်ရပါသေးတယ် ။

ဒီ သီချင်း အကြောင်း ပြောတော့ အမေ ငယ်ငယ် က ကြုံရပုံကလေး သတိရ လို့ ပြုံးမိပါသေးရဲ့ ။ အမေ ငယ်ငယ် က “ မြနန္ဒာ ရေညိုညို ရစ်ခတ်သမ်း တော့ ရွှေးမန်းတောင်ထိပ် ပူနိမ် ၊ ဗြောင်နိမ် ” လို့ စိတ်ပါလက်ပါ ကျေကျေနပ်နပ် သီဆို နေတုန်း အမေ နဲ့ အတူ နေ အဒေါ် တစ်ဦး က “ ညည်း သီချင်း က လည်း အေ ... အရူး သီချင်း နဲ့ တူ လိုက်တာ ၊ ဘာ သီချင်း လဲ ” တဲ့ ။

အမေ့ အဒေါ် တို့ နဲ့ အမေ တို့ နဲ့ တစ်ခေတ် ကွာဟ နေတာကိုး ။ အခု ခေတ် စင်မြင့် တွေ ပေါ် က “ အသံချဲ့ခွက် ကို ကြိမ်းမောင်း နေတယ် ထင်တာပဲ ” လို့များ ပြော မလား မသိပါဘူး ။

ဆရာစိန်ဗေဒါ သုံးတဲ့ စကား အတိုင်း ပြောရ ရင် “ သူ့ ခေတ် နဲ့ သူ့ နား ” တော့ လည်း ကောင်းကြမှာပေါ့လေ  ။

ကဲ .. မန္တလေးသင်္ကြန် က တော့ အမေ့ တစ်သက် မှာ ပဲ အပြောင်းအလဲတွေ အမျိုးမျိုး တွေ့မြင် နေရတယ် ကွယ် ။

◾လူထုဒေါ်အမာ

📖 အမေ့ ရှေးစကား စာအုပ် မှ

📖 ပိတောက်ဖူးတဲ့ လတန်ခူး
      နှစ်ဦးသင်္ကြန်ခါ

#ကိုအောင်နိုင်ဦး

.