❝ စကား တစ်လုံး ရဲ့ စေရာ ❞
ရထား ပေါ် က ဆင်း လိုက်ပြီ ။ ကြို သူ မရှိသော ဘူတာလေး ထဲ တွင် ဟိုငေး ဒီငေး နှင့် သာ ကြည့် နေ လိုက်သည် ။ မရောက်တာ ကြာ လို့လား မသိပါ ။ အရင်က နဲ့ မတူ အောင် ပြောင်းလဲ ကာ သွား သလို ခံစား နေမိ၏ ။
“ ဟာ ... ဂဒူး ”
မထင်မှတ်ဘဲ နှုတ်ဆက်သံ ကြောင့် ကြည့် လိုက် မိပြီး ကျွန်တော့် ကို ရင်းနှီးစွာ ပြုံးပြ နေပေမယ့် မမှတ်မိဘဲ ကြောင် ပြီးသာ ငေး ကြည့် နေမိသည် ။
“ ဟေ့ကောင် စောဂဒူး ၊ မမှတ်မိဘူးလား ။ ငါ မြတ်တိုး လေ ”
“ ဟာ မြတ်တိုး ၊ ဆောရီး ကွာ ၊ ရုတ်တရက် ဆိုတော့ မမှတ်မိဘူး ”
“ မင်း က ဝ လာ လိုက်တာကွာ ”
“ ငါ က ဝ တာထားဦး ၊ မင်း က ရော ပိန် သွား လိုက်တာ စောဂဒူး ရာ ”
‘‘ဒါနဲ့ မင်း ဒီကို ဘာ လာ လုပ်တာလဲ ”
‘‘အလည် လာ ရင်း ကုန်ကြမ်း ရှာ ရင်းပေါ့ကွာ ”
“ ဘာလဲ စာ ရေးဖို့ ကုန်ကြမ်းလား ”
ကျွန်တော် မြတ်တိုး ခေါင်း ညိတ် ပြ လိုက်ပြီး နှစ်ယောက်သား လက်ဖက်ရည်ဆိုင် သို့ သွား လိုက်ကြသည် ။
သူငယ်ချင်း တွေ မတွေ့ဖြစ်ကြတာ အတော် ကြာ ပြီမို့ စကားတွေ က ပြောလို့ ပင် မကုန်နိုင်ပေ ။
“ မင်း ကို မေးရဦးမယ် ။ မင်း နဲ့ နွေးနွေး က မယူ ဖြစ်ကြဘူး ဆို ။ ငါ တောင် အတော် အံ့ဩ သွားတယ် ။ ပြောစမ်းပါဦး ”
မြတ်တိုး အမေး ကြောင့် ကျွန်တော် သက်ပြင်း တစ်ချက် ချ လိုက်သည် ။
“ ဒီ အကြောင်းတွေ ဘယ်က စ ပြောရမှန်း မသိပါဘူး ကွာ ။ ခြားနားချက် တစ်ခု ကြောင့် လို့ ပြော ရမယ် ထင်တယ် ။ နောက်ပြီး တော့ ငါ့ ဘက် က အပြော တစ်ခု မှား သွားတာ လည်း ရှိတယ် ”
ကျွန်တော် စကား ကို ရပ် လိုက်ပြီး လက်ဖက်ရည် ကို တစ်ငုံ သောက်လိုက်သည် ။
‘‘ ကဲ ဆက် ရှင်းစမ်းပါဦး ၊ ငါတို့ သူငယ်ချင်းတွေ က တော့ မင်း တို့ အကြောင်း ကြား ရ တော့ စိတ် မကောင်းဘူး ။ နောက်ပြီး အံ့သြ နေကြတာ ။ ဒီလောက် တွဲလာခဲ့ ပြီးမှ လက် မထပ် ဖြစ်ကြဘူး ဆိုတော့ ..”
မြတ်တိုး မှာ ကျွန်တော့် ကို ကြည့် ကာ ကျွန်တော် ဆက် ပြောမယ့် စကား ကို နား စွင့်ကာ နေ တော့သည် ။
••••• ••••• •••••
ကျွန်တော် ပြော လိုက်သည့် စကား ကြောင့် သူငယ်ချင်းတွေ မှာ မယုံ တဲ့ ပုံစံ ဖြင့် ဟားတိုက် ကာ နေကြသည် ။
“ စောဂဒူး ရာ မင်း အတော် ရယ်စရာ ပြောတတ် တာပဲ ။ စာရူး ၊ ပေရူး လို့ မပြောရဘူး ။ ဆေးကျောင်းသူ ကို သွားပြီး စိတ်ကူး ယဉ် ရတယ် လို့ ကွာ ”
“ ဟုတ်တယ် ဂဒူး ရ ၊ မင်း ကြိုက်တာ က ကြိုက်ခွင့် ရှိတယ် ။ သူ က စကား ပြန် ပြော တာ လက်ခံတယ် ။ ဒါပေမဲ့ မင်း ကို အဖြေ ပေး တာတော့ သိပ် မယုံချင်ဘူး ကွာ ”
“ မင်းတို့ က ငါ့ အတော် အထင် သေးတာပဲ ။ မယုံ လည်း မတတ်နိုင်ဘူး ကွာ ”
ကျွန်တော် ဘာမှ ဆက် မပြောတော့ဘဲ လက်ဖက်ရည်ဆိုင် ထဲ တွင် ထိုင်ကာ သူမ ကို စောင့် ကာ နေ လိုက်သည် ။ သူငယ်ချင်းတွေ မယုံချင် လည်း မယုံချင် စရာ ပင် ။ သူမ လို ဆေးကျောင်းသူ တစ်ယောက် ဆီ က ကျွန်တော် ကြား ချင်တဲ့ စကား ကြားရမယ် လို့ ထင် မထားခဲ့ပေ ။ ဆယ်တန်းကျောင်းသား ဘ၀ ထဲ က သူငယ်ချင်း ဆိုတဲ့ စည်း ကို ထိန်း လာ ခဲ့ရင်း က သူမ ဆေးကျောင်း ဒုတိယနှစ် အရောက် မှာ တော့ နှလုံးသား တို့ ရဲ့ဆန္ဒ ကို ဦးနှောက် က မလွန်ဆန် နိုင်တာကြောင့် သူမ ကို ဖွင့် ပြော လိုက်မိသည် ။ တစ်ယောက် နဲ့ တစ်ယောက် အထူး ပြောစရာ မလို ပေမဲ့ သူမ က ကျွန်တော့် ကို ငြင်းပယ် လိုက်မလား လို့ တောင် ထင် မိခဲ့သည် ။ သို့ပေမဲ့ ကျွန်တော် ကြား ချင်သည့် စကား သူမ နောက်ဆုံးနှစ် အရောက် မှာ တော့ ကြားခဲ့ရ၏ ။
ထိုနေ့ က ကျွန်တော့် အတွက် အတိုင်း မသိ ပျော်ခဲ့ မိသည် ။ သူမ ကို ဘယ်လောက် ချစ်တယ် ဆိုတာ နှိုင်းပြ ဖို့ ခက်သလို သူငယ်ချင်း ဆိုတဲ့ အတိုင်းအတာ ကြား က ဖြစ်လာတဲ့ သံယောဇဉ် မို့ တစ်နေ့ ကျ ရင် သူမ နဲ့ အတူ ထာဝရ လက်တွဲ သွားမယ် လို့ ကတိတွေ ပေးရင်း စိတ်ကူး တွေ တောင် ယဉ် ခဲ့သည် ။
ကျုံးရေပြင် ကို ငေး ကြည့်ရင်း တစ်ယောက် နဲ့ တစ်ယောက် ငြိမ်သက် နေရင်း က သူမ ကို ကြည့် ကာ မေး လိုက်သည် ။
“ နွေး ပြောစရာ ရှိတယ်ဆို ပြောလေ ’’
“ တခြားတော့ မဟုတ်ပါဘူ ၊ အစ်ကို ၊ နွေး အထက်ပိုင်း က မြို့ တစ်မြို့ သွားရမယ် အစ်ကို ။ နောက်ပြီး အဲဒီ ဆေးရုံ မှာ တာဝန် ကျ တယ် ”
“ ဟုတ်လား .. ဒါဆို ကြာဦးမှာပေါ့ ”
“ အင်း .. ကြာတော့ ကြာမှာပါ ၊ နွေး က တော့ သုံးနှစ် လောက် နေပြီး ဒီကို ပြန် ပြောင်း လာမှာပါ ’’
သူမ နယ် ပြောင်း ကာ တာဝန် ထမ်း ဆောင်ရမည် ဆိုတာ ကြောင့် ရင် ထဲ မှာ တစ်မျိုး ဖြစ်သွားသည် ။ အစိုးရ ဝန်ထမ်း ဆို တော့လည်း ထားရာ နေ စေရာ ကို သွား ရတဲ့ ဘဝ မို့ သူမ ကို တားဆီးခွင့် မရှိချေ ။ သို့အတွက် ကြောင့် သူမ သဘော ကျမယ့် စကားတွေ ကို ပြော ရင်း နေ ပေး လိုက်သည် ။
“ အစ်ကို့ ပြောရဦးမယ် ”
“ ပြောလေ နွေး ”
“ တခြားတော့ မဟုတ်ပါဘူး ။ အစ်ကို့ စာမူ ပါတဲ့ မဂ္ဂဇင်းတွေ ဆိုရင် နွေး ကို ပို့ ပေးဦးနော် ”
“ စိတ်ချပါ နွေး ရဲ့ ”
“ ဒါနဲ့ အစ်ကို က စာ ရေးရင် .. ဘယ်လို လိုင်း ကို အားသန်လဲ ’’
“ အစ်ကို က တော့ ဘယ်လိုင်းရယ်လို့ မဟုတ်ပါဘူး ၊ တစ်လှည့်စီ ထားပြီး စိတ်ကူး ရ ရင် ရ သလို အစုံ ရေးတယ် ။ ဘာလဲ ၊ နွေး က အစ်ကို့ စာတွေ ဖတ်ပြီး မကြိုက်လို့လား ”
“ မဟုတ်ပါဘူး ၊ နွေး က သီးသန့် တစ်လိုင်း ထဲ ကို ရေး ရင် မကောင်းဘူးလား လို့ မေးချင်တာပါ ။ အစ်ကို ဘာပဲ ရေးရေး နွေး က တော့ အားပေး မှာပဲ ။ နွေး ကို ပို့ ပေး ဖို့သာ မမေ့နဲ့ ”
သူမ နဲ့ ကျွန်တော် သည် အရင် ကတည်း က စာပေ ဝါသနာအိုးတွေ မို့ စာအကြောင်း ၊ ပေအကြောင်း တွေ မကြာခဏ ဆိုသလို ပြောဖြစ်ကြပြီး ကျွန်တော် ရေး သမျှတွေ ကို လည်း သူမ က ဝေဖန် ကာ အကြံပြု ပေး တာကြောင့် ပြုပြင်စရာလေးတွေ ပြုပြင် နိုင်ခဲ့သည် ။
သူမ နဲ့ အရင် က လို မတွေ့ဖြစ်ကြပေမဲ့ မကြာခဏ ဖုန်း ပြောလိုက် နှင့် အတူ အဆက်အသွယ် တော့ မပြတ်ခဲ့ပေ ။
“ မောင်ဂဒူး ၊ ငိုင် လှချည်လား ကွ ၊ ဘာလဲ ဆရာဝန်မလေး နယ် ပြောင်း သွားလို့ လွမ်းနာ ကျ နေ တာလား ’’
ကျွန်တော် ဟိုတွေး ဒီတွေး နှင့် ငေးငိုင်ကာ နေရင်း ကြား လိုက်ရသည့် အသံ ကြောင့် အတွေး ပျက်သွား၏ ။
“ ဆရာ ဒီ အကြောင်းတွေ သိတယ် လား ’’
“ သိတာပေါ့ကွ ၊ ဆရာ့ ကို ပြောတဲ့ သူ ရှိတယ်လေ ”
“ ဟုတ်လား ၊ ဘယ်သူလဲ ”
“ ဘယ်သူ ရှိရမှာလဲ ညီမလေး ပေါ့ ”
ကူးကူး မှာ ကျွန်တော့် ကို ကြည့်ကာ ရယ် နေတော့သည် ။ ကျွန်တော့် မှာ လည်း ရှက်သလို ဖြစ် သွားပြီး ဆရာ့တို့ သားအဖ နှစ်ယောက် နဲ့ အတူ ရယ် လိုက်၏ ။
“ ဒါနဲ့ မင်းတို့ က ဘယ်တော့ လက်ထပ် ကြ မှာလဲ ”
“ အတိအကျ တော့ မပြောတတ်သေးဘူး ဆရာ ။ နောက် သုံးနှစ် လောက် နေ ရင်တော့ လက်ထပ် ကြဖို့ ပြော ထားတာပဲ ’’
“ အဲဒါလည်း ကောင်းပါတယ် ။ မင်း အတွက် ဆရာ အားလုံး တာဝန် ယူ ပေးမယ် ဟုတ်လား ”
“ တကယ် ပြော တာလား ဆရာ ”
“ တကယ်ပေါ့ ကွာ ”
ကျွန်တော် ဘာမှ တောင် အကူအညီ မတောင်းရ သေးပါ ။ ဆရာ ကူညီ ပေးမယ် ဆိုတာကြောင့် အတိုင်းမသိ ပျော်မိသည် ။ ဆရာတို့ မိသားစု နှင့် ကျွန်တော် သည် ဘယ် ဘဝ ရေစက် ကြောင့် လည်း ဆိုတာ မပြောတတ် ပေမယ့် ကျွန်တော့် အပေါ် တော့ မိသားစု လို ကောင်း ရှာပြီး ကျွန်တော့် အတွက် စီမံကိန်းတွေ ရေးဆွဲထားမှု က တော့ မိဘ အရင်းတွေ လားလို့ တောင် သူငယ်ချင်းတွေ က မေး ကြသည် ။ ထို့အတွက် ဆရာ သည် ကျွန်တော့် အတွက် ကျေးဇူး ကြီးမားလှ သလို မိဘတွေ နဲ့ မခြားတော့ပေ ။
“ စောဂဒူး ၊ မင်း အတော်ကံကောင်းတဲ့ ကောင် ပဲ ။ ဒီလို ဆရာ မျိုး က ရွှေ ထက် ရှား တယ် ကွ ၊ ဒါဆို မင်း မိန်းမ ယူတာ နဲ့ စီးပွားရေး လုပ်ဖို့ အစပျိုး ပေးမယ့် သဘောမျိုးပေါ့ ’’
“ ဟုတ်တယ် ’’
သူငယ်ချင်း တွေ မှာ အံ့ဩပြီးရင်း အံ့ဩ နေ ကြသည် ။ ကျွန်တော့် မှာ လည်း ထိုနည်း တူ စွာပင် ဖြစ်နေသည် ။ ထိုသို့ ဆရာ က ပြောထား မှု ကို ဆရာ့ အမျိုးတွေ က တော့ ကျွန်တော့် ကို မကြည်ကြပါ ။ ဆရာ့မိသားစု က တော့ ဆရာ ပြီး ရင် ပြီး တာမို့ ပြော စရာ မလိုပေ ။ သူမ နဲ့ အနေ ဝေးလို့ တစ်ပတ် တစ်ခါ ဆို သလို ဖုန်း ပြော ဖြစ်ကြ ပေမဲ့ ထို အကြောင်းတွေ မပြောပြ ဖြစ်တာထက် သူမ နဲ့ လက်ထပ်မယ့် နေ့ ကျမှ ဖွင့် ပြောဖို့ ဆုံးဖြတ် ထားခဲ့သည် ။ သူမ ပြောင်းသွား တာ ဘာမှ မကြာလိုက် သလို ထင်ရ ပေမယ့် ( ၂ ) နှစ် ပင် ကျော် လာခဲ့၏ ။
ကျွန်တော် က တော့ ဆရာ နှင့် တိုင်ပင် ကာ စီမံကိန်းတွေ ကြိုတင်ကာ ဆွဲ ထား လိုက် သည် ။ ဆရာကတော် က လည်း ကျွန်တော့် ကို ကြည့်ကာ ပြုံးစိစိ နှင့် ... ။
“ အဲဒါသာ ကြည့်တော့ မောင်ဂဒူး ရေ ၊ မင်း ဆရာ က တော့ မင်း မိန်းမ ယူ မှာ ကို တက်ကြွနေ လိုက်တာ ။ သူ့ ဆရာဝန်ဘွဲ့ တောင် မင်း ကို ပေး ရရင် ပေးဦး မလား မသိဘူး ”
ထိုသို့ လုပ်ဆောင်မှုတွေ ကြောင့် ကျွန်တော် ဆရာတို့ မိသားစု ကို ဘယ်လို ကျေးဇူး တင် ရ မှန်း မသိတော့ပါ ။ ၎င်းအပြင် သူမ ပြန်လာမယ့် နေ့ ကို ရေတွက် ရင်း စိတ်တွေပါ လှုပ်ရှား နေတော့သည် ။ သူမ ဘက် က လည်း သူမ မိဘတွေ ကို ကြိုတင် ပြောထားသည် မို့ သူမ ရောက် လာ တာ နဲ့ သူမ နှင့် တိုင်ပင်ကာ မင်္ဂလာစကား ပြော တောင်းရမ်း ဖို့ ကိစ္စပါ စဉ်းစား ထား လိုက်၏ ။
ဆရာ နဲ့ အတူ ရပ်ကွက် ထဲ က လူကြီးတွေ ခေါ် ကာ မိန်းမ တောင်းရမ်းဖို့ ကိစ္စ အတွက် သူမ တို့ အိမ် သို့ သွား လိုက်သည် ။ ကျွန်တော့် မှာ လည်း စိတ်တွေ လှုပ်ရှား ကာနေပြီး သဘော တူပါ့ မလား ဆိုတာ လည်း စိုးရိမ်ကာ နေ မိ၏ ။ လူကြီးတွေ ပြော တာ ကို သူမ နဲ့ အတူ နားထောင် ရင်း ...
“ ပြော ရမှာတော့ အားနာပါတယ် ဆရာ ၊ ကျွန်တော့် သမီး ကို သိန်း ၅၀ တင် တောင်း နိုင်မှ သဘော တူမယ် ”
“ ဟုတ်တယ် ၊ ကျွန်မ သမီး ကို +++ကုမ္ပဏီ ပိုင်ရှင် ရဲ့သား က ဆိုရင် တိုက် တစ်လုံး ၊ ကား တစ်စီး နဲ့ တောင် တင်တောင်း ဖို့ ကမ်းလှမ်း ထားတာ ”
“ ဟုတ်ပါ့ ၊ နောက်ပြီး +++ ဌာန က လူကြီး ရဲ့ သား က စိန် တစ်ဆင်စာ နဲ့ ကား တစ်စီး တောင် ပြော ထားသေးတာ ။ ဒီမှာ စကား ကျွံ ထားလို့ သာ ”
ဆရာ က တော့ ကျွန်တော့် အတွက် သူမ မိဘတွေ ကို နား ဝင်အောင် အကျိုးသင့် အကြောင်းသင့် ပညာတတ် ပီပီ ဖြစ်သင့် ဖြစ်ထိုက် တာ ကို ပါ ရှင်းပြ နေတော့သည် ။ သူမ မှာ လည်း မိဘတွေ ပြော စကားကြောင့် မျက်နှာ ပျက် နေ၏ ။ ထို စကားတွေ ကြား ရတော့ ကျွန်တော့် မှာ လည်း အောင့်သက်သက် နှင့် ။
ဆရာ က တော့ ငွေ တင် တောင်း ခိုင်းတဲ့ ကိစ္စ က လွဲ၍ တခြားသော ကိစ္စအဝဝ ကို တာဝန် ယူ ဖို့ ပြော ပေမယ့် မရပါ ။ သူမ မိဘတွေ နဲ့ အသိုင်းအဝိုင်းတွေ က တော့ သူမ ရဲ့ ဆရာဝန် ဆိုတဲ့ ဂုဏ် နဲ့ အတူ ပဲ ငွေကြေး ကို သာ အဓိက ထား ပြော နေမှုတွေ က လူ အရောင်းအဝယ် လုပ်တဲ့ သဘော နဲ့ တူ နေတာ ကြောင့် ...
“ ဦးလေး တို့ က သမီး ကို ရောင်းစား နေကြတာလား ”
“ မင်း ဘာ စကား ပြောတာလဲ ’’
“ ဟုတ်တယ်လေ ၊ ခု ပြောနေကြတဲ့ပုံတွေ အဲဒီ သဘော သက်ရောက် နေတယ် ။ ကျွန်တော်တို့ လာတာ လူ အရောင်း အဝယ် လုပ် ဖို့ လာတာ မဟုတ်ဘူးဗျ ။ ဆရာ သိန်း ၅ဝ တင် တောင်း မှ မိန်းမ ရမယ် ဆိုရင် မရချင် နေပါစေတော့ ဗျာ ”
ကျွန်တော် ခံပြင်းမှုတွေ နဲ့ အတူ ပြော လိုက်သည့် စကား ကြောင့် သူမ မိဘတွေ မှာ အထိ မခံ တဲ့ ရွှေပန်းကန် လို ဖြစ်ကာ ကျွန်တော့် ကို မောင်းထုတ် နေ တော့သည် ။ သူမ မှာ မိဘ ကို ထိ တော့ နာရင်း နဲ့ အတူ ... ။
ဆရာ က တော့ ကျွန်တော့်အတွက် စိတ် မကောင်း ဖြစ် သွားပြီး နှစ်သိမ့် ပေး ခဲ့သည် ။ သူမ ကတော့ ကျွန်တော့် ကို အပြောအဆို ရိုင်း သလို ဖြစ်သွားခြင်း နဲ့ အတူ အတွေ့ ပင် မခံ တော့ ပေ ။ ငွေ ကို ဘုရား လို ကိုးကွယ်တဲ့ မိဘတွေ ရဲ့ဆန္ဒ ကို မလွန်ဆန်ရဲ သလို ကျွန်တော် ပြော လိုက်သည့် စကားတွေ က သူမ အပေါ် အလေးအနက် မထား သလို ဖြစ်သွားမှု ကို နာကြည်း ကာ သွားခဲ့သည် ။ ကျွန်တော် ကတော့ သူမ ကို မမုန်းပါ ။ ပြောဆို ခဲ့ တဲ့ အမှား အတွက် တောင်းပန်ချင် ပေမဲ့လည်း ....
••••• ••••• •••••
အတိတ် က အကြောင်းတွေ ကို မြတ်တိုး ကို ရင်ဖွင့် ပြ လိုက်တော့ ရင် ထဲ မှာ ပေါ့ပါး ကာ သွား တော့သည် ။
“ မင်း ပြောခဲ့တဲ့ စကား က အတော် ထိတယ်ကွာ ။ နောက်ပြီးတော့ နွေးနွေး အပေါ် အလေးအနက် မထား သလို လည်း ဖြစ်သွားတယ်ကွ ။ ဒါနဲ့ မင်း နွေးနွေး နဲ့ နောက်ထပ် တွေ့ဖြစ် သေးလား ’’
“ မတွေ့ဖြစ်ကြတာ ဒီနေ့ ထိ ပဲ ’’
အချိန်တွေ က သာ တရွေ့ရွေ့ ကုန်ဆုံးလာ ခဲ့ပေမယ့် ကျွန်တော် သူမ ကို အချစ်ဦး မို့ အရူးအမူး ဖြစ်နေဆဲ ပင် ။ အမှား မှန်း မသိတဲ့ အမှား အတွက် လည်း တောင်းပန် ချင်သည် ။ တစ်နေ့ သူမ တစ်ယောက် နားလည် လာ မှာ ပဲ လို့ စောင့်စားရင်း နဲ့ သာ မျှော် နေမိပေမယ့် သူမ နဲ့ ပတ်သက်တဲ့ သတင်း က တော့ မရခဲ့ပေ ။ ကျွန်တော် မြတ်တိုး နဲ့ အတူ လက်ဖက်ရည်ဆိုင် က ထွက် လာ လိုက်ပြီး သူတို့ အိမ် သို့ ပြန်လာ ခဲ့သည် ။ နှစ်ယောက်သား စကား တပြောပြော နှင့် ဟိုးငေး ဒီငေး ရင်း က မထင်မှတ်ဘဲ တွေ့ လိုက်ရသည့် မြင်ကွင်း ကြောင့် ကျွန်တော် အံ့ဩ ကာ သွားတော့သည် ။ ကျွန်တော် ရှာဖွေ ကာ တွေ့ချင် နေတဲ့ နွေးနွေး ဖြစ် နေတာကြောင့် ပင် ။ သူမ ကို ဝမ်းသာအားရ နှင့် လှမ်းကာ ခေါ် လိုက် မိသည် ။ သူမ မှာ လည်း အံ့ဩတဲ့ အမူအရာ တွေ နဲ့ အတူ ပြုံး ပြကာ သူမ ပြော လိုက်သည့် စကား က ရင်ဘတ် ကို တက်နင်း ခံရသည့် ပမာ ။
သူမ ရဲ့ အပြုံး က ဖော်ရွေတဲ့ အပြုံး မဟုတ်ပါ ။ မဲ့ပြုံး မို့ သူမ နှင့် အတူ ပါ လာတဲ့ လူ တစ်ယောက် ကို လက် ဆွဲကာ ...
“ ကိုစောဂဒူး ၊ ဒါ နွေး နဲ့ မကြာခင် လက်ထပ်ကြမယ့် သတို့သား လေ ။ နာမည် က ကိုလင်းထက် တဲ့ ။ ခု နာမည် ကြီး နေတဲ့ +++ ကုမ္ပဏီ ပိုင်ရှင်ပေါ့ ။ နွေး တို့ မင်္ဂလာဆောင် ကြရင် လာခဲ့ဦး နော် ’’
ကျွန်တော် ဟန်ဆောင် အပြုံး နဲ့ သာ ပြုံးပြ လိုက်ရ ပေမယ့် ရင် ထဲ မှာ တော့ ခံရ ခက် တဲ့ ဝေဒနာ တစ်ခု နဲ့ အတူ သူမ ပြော လိုက်သည့် စကားလုံး တွေ ရဲ့ အဓိပ္ပာယ် သက်ရောက်မှု က နာကြည်း မုန်းတီး နေဆဲ ဆိုတာ အဖြေ က ထွက် နေ ခဲ့သည် ။ ထို့အတွက် ဘာမှ မပြောလို တော့ပေ ။ ဖူးစာ မပါ လို့ပဲ လို့ မှတ်ယူရင်း ... အမှား မှန်း မသိတဲ့ ကိုယ့် ရဲ့အမှား ကြောင့် လို့ သာ ။
◾စောအိဏ်းနှင်း ( ရွှေဘို )
📖 ရုပ်ရှင်တေးကဗျာ မဂ္ဂဇင်း
အောက်တိုဘာ ၊ ၂၀၁၃
#ကိုအောင်နိုင်ဦး
.
No comments:
Post a Comment