❝ အဖြေ တစ်ခု ပုစ္ဆာ ရာထောင် ❞
ပုစ္ဆာ သိလို့ အဖြေ ရှာ လိုက်ရတာ ထက် အဖြေ ကို တွေ့ နေရလို့ ပုစ္ဆာ ကို ပြန် ရှာ ရ တာ က ပိုပြီး ခက် ပါတယ် ။ လူ့ ဘဝ မှာ ဖြစ်ပျက်ကြုံဆုံ ရ တဲ့ ပြဿနာ တွေ ကို “ ဘာကြောင့် ” ဖြစ်ပါလိမ့် ဆို ပြီး ဖြစ် နေရတဲ့ အကြောင်း ရင်း ကို ပြန် ရှာပြီး မှ ဖြေရှင်း လို့ ရတာတွေ ရှိတယ် ။ အဲသလို ကြုံ နေရတာ ဟာ အဖြေ တစ်ခု ထွက် လာ ပြီး မှ ပုစ္ဆာ ကို ပြန် ရှာရတဲ့ သဘောပေါ့ ။
“ ဟော ဒီလိုတော့ ဖြစ်နေပြီ ၊ ဘယ်လို လုပ် ဖြစ် သွားပါလိမ့် ၊ ထင်တောင် မထင်ဘူး ။ အံ့ ကို ဩ ရော ” ဆိုတာမျိုး တွေပေါ့ ။
ငါ့ တူမ များ ရှင်းရှင်းလင်းလင်း သိရအောင် လေးလေး ပြော ချင်တာကို တစ်ဆင့် ချင်း ရေးပြမယ် ။ ကဲ ... နှစ် နဲ့ နှစ် ပေါင်း ရင် ဘယ်လောက် လဲ လို့ မေး လိုက်ပါပြီ တဲ့ ။ ဒါ ပုစ္ဆာ ပဲ ။ အဖြေ က လေး ၊ ရှင်းရှင်း လေး ။ အလွန် လွယ်တာ ။ ကလေးတွေ ပြောနည်း ။ “ အီးဇီးဂိုးရင်း ” ပဲ ။
၂ + ၂ = ၄
အဲ အဖြေ က လေး ရ နေတယ် ။ ဘာလို့ လေး ရတာလဲ ဆိုပြီး ပုစ္ဆာ ကို ရှာရပြီ ဆိုရင် တော့ ခက် သွားပြီ ။ ရှုပ် သွားပြီ ။ အဖြေ ( လေး ) ထွက် နိုင်တဲ့ ပုစ္ဆာ တွေ က ရာ နဲ့ ထောင် နဲ့ ချီပြီး ရှိ နေတာ ။ လေးလေး ဆယ်မျိုး လောက် တော့ ရေး ပြမယ် ။
၄ = ၃ + ၁
၄ = ၅ - ၁
၄ = ၆ - ၂
၄ =၂၀ ÷ ၅
၄ = ၄ x ၁
၄ = ၁၆/၄
၄ = ၁၀၀၀ - ၉၉၆
၄ = ( ၈၀ ÷ ၈ ) - ၆
၄ = ( ၈ x ၈ ) ÷ ၁၆
၄ = ၁၀ + ၅ - ၁၁
လေးလေး တို့ ဆက် တွေးရင် အဖြေ ( ၄ ) ရ နိုင်တဲ့ ပုစ္ဆာတွေ ထောင်ပေါင်း များ စွာ တွေ့ ရဦးမှာပဲ ။
လက်ရှိ တွေ့ နေရတဲ့ အဖြေ အတွက် အနီးစပ်ဆုံး မှန်ကန် နိုင်မယ့် ပုစ္ဆာ ကို စဉ်းစားဖို့ ဆိုတာ အတော် ခက်ပါတယ် ။ ထောင့် ပေါင်းစုံ က နေ ဖြစ်နိုင်ခြေ ရှိ တာတွေ ကို လှည့် တွေးပြီး ဖြစ်ရတဲ့ အကြောင်းရင်း မှန် ကို ရှာ ယူ ကြရတာပါ ။
အပေါင်းပုစ္ဆာ တွေ ကြား မှာ ရှိတဲ့ အဖြေ လား ။ ကိန်းတန်းရှင်း ပုစ္ဆာ တွေ ကြား မှာ ရှိတဲ့ အဖြေ လား ။ အပိုင်းဂဏန်း တွေ ကြား မှာ ရှိတဲ့ အဖြေ လား ။
အဲသလိုပါပဲ ။
လူမှုရေး ပြဿနာ တစ်ရပ် ကြုံ လိုက်ရပြီ ဆို တာနဲ့ အဲဒီ ပြဿနာ ဖြစ် ရတဲ့ အကြောင်းရင်း ကို စဉ်းစဉ်းစားစား ရှာဖွေ ကြရမယ် ။
ပတ်ဝန်းကျင် ကြောင့် ဖြစ် တာလား .....
အခြေအနေ အရ ဖြစ် တာလား ....
မမျှော်လင့်ဘဲ ဖြစ် တာလား ......
ဖြစ်ရတဲ့ အကြောင်းရင်း မှန် ကို အနီးစပ် ဆုံး မှန်ကန်အောင် စဉ်းစား ပြီး မှ အဲဒီ ပြဿနာ အပေါ် ကောက်ချက် ချလို့ ရတယ် ။
လေးလေး ဘာလို့ ဒီ အကြောင်း ကို ရေးပြ နေရသလဲ ဆိုရင် ....
ယောက်ျားလေး တစ်ယောက် က ..
ဒါမှမဟုတ် ယောက်ျားကြီး တစ်ယောက် က ...
ကိုယ့် ကို ချစ်ရေး ဆိုလာရင် ဖြစ်ဖြစ် ၊ လူကြီးတွေ က တစ်ဆင့် ပြော လာရင် ဖြစ်ဖြစ် ဘာကြောင့် ကိုယ့် ကို ပိုင်ဆိုင် ဖို့ ကြိုးစား တာလဲ ဆိုတာ စဉ်းစား စေချင်လို့ပဲ ။
ကိုယ့် ရဲ့ ပညာ ကြောင့် လား ။
ကိုယ့် ရဲ့ လုပ်ရည်ကိုင်ရည် ငွေ ရှာနိုင်မှု ကြောင့် လား ။
ကိုယ့် ရဲ့ ရုပ်ရည် ကြောင့် လား ။
ကိုယ့် မိဘ ရဲ့ ဥစ္စာဓန ကို လား ။
ကိုယ့် ဘဝ ကို သနား လို့ လား ။
အကြောင်းရင်း တစ်ခု တော့ ရှိရမယ် ။ ချစ်ပါတယ် ဆိုတဲ့ အဖြေ အတွက် ဘာကြောင့် ချစ် ရသလဲ ဆိုတဲ့ ပုစ္ဆာ ကို အကြောင်းရင်း ကို မှန်မှန်ကန်ကန် အနီးစပ်ဆုံး ရအောင် ရှာ ရမယ် ။ ဒါမှ ကိုယ့် ဘက် က သင့်တော်တဲ့ တုံ့ပြန်မှု ပေး နိုင်မှာပေါ့ ။
ငါ့ တူမ များ အရာရာ ကို စဉ်းစဉ်းစားစား ဆုံးဖြတ် စေချင်တဲ့ အလေ့အကျင့် ရှိစေချင် လို့ ခုလို ရေးပြတာပါ ။ လွယ်လွယ် ပေါ့ပေါ့ ဆုံးဖြတ် ရင် အမှန် နဲ့ မနီးစပ် နိုင်ဘူး ။
ပြီးတော့ ...
စဉ်းစား တွေးခေါ် တဲ့ အလေ့အကျင့် ရှိ သွားရင် “ မအ ” တော့ဘူး ။ စဉ်းစား တွေးခေါ်တဲ့ အလေ့အကျင့် မရှိဘဲ အသက် တွေ ကြီးသွားမယ် ဆိုရင် ဟို လူ ပြော ယုံ ၊ ဒီ လူ ပြော ယုံ အသက်ကြီး ထိ ခပ်တုံးတုံး လူကြီး ဖြစ် သွား မှာပေါ့ ။
မိန်းကလေး တစ်ယောက် အနေ နဲ့ အ , ပြီ ဆိုရင် သူ့ အတွက် အန္တရာယ် ပို များတယ် ကွယ့် ။ ကြုံသမျှ ပြဿနာ ကို အားကိုး ရှာပြီး ဖြေရှင်းတော့ မှာ ကိုး ။ မိန်းကလေး တစ်ယောက် အနေ နဲ့ အားကိုး ရှာ ရင်း ....
“ ကျား ကြောက် လို့ ရှင်ကြီး ကိုး
ရှင်ကြီး ကျား ထက် ဆိုး ”
ဖြစ်တတ်တယ် ။
ဖြစ်နိုင်ခြေ ရှိတာတွေ ကို အမျိုးမျိုး တွေးတော စဉ်းစား တတ်တဲ့ အလေ့အကျင့် ရှိ ထားပြီ ဆိုရင် ဘယ်လို ပြဿနာမျိုး ပဲ ကြုံကြုံ ထောင့်စုံ က လေ့လာပြီး အမှန် နဲ့ အနီးစပ်ဆုံး အဖြေ ကို ထုတ် နိုင်မယ် ။
ကျောင်း တွေ မှာ သင်္ချာ သင် ပေး နေတာ ဟာ ဂဏန်း တွက် တတ်ရုံ လို့ မထင်လေ နဲ့ ကွယ့် ။ ကျောင်း က ထွက် လာပြီး လူ့ ဘဝ ကို ရင်ဆိုင် ရ တဲ့ အခါ မှာ ပါ ကြုံဆုံ လာရမယ့် ပြဿနာ တိုင်း စဉ်းစား တွေးခေါ် တတ်ဖို့ လေ့ကျင့် ပေး လိုက်တာပဲ ။ အဲဒီ အလေ့အကျင့် ကို ကိုယ့် ဘဝ အတွက် အသုံး ချတတ်ဖို့ လိုတယ် ။ သင်္ချာ မှာ သက်သေ ပြချက် ရှာ ရသလို လူ့ ဘဝ ပြဿနာ တွေ မှာ ဖြစ်နိုင်ခြေ ရှိတဲ့ အကြောင်းခြင်းရာ တွေ ရှာ ရတယ် ။
တစ်ခါတလေ မှာ ကမ္ဘာမြေကြီး ရဲ့ ဆွဲငင် အား အကြောင်း ကို သာ စဉ်းစား နေ ကြလို့ ကမ္ဘာမြေကြီး ရဲ့ တွန်းကန် အား အကြောင်း မေ့ နေတတ်တယ် ။ အလွန် မာကျော တဲ့ ကျောက်စရစ် ကုန်းမြေ မှာ ပေါက် လာတဲ့ မြက်ပင်လေး ကို စိတ်ဝင်စား ကြည့်စမ်းပါ ။ မာကျော တဲ့ ကျောက်စရစ် မြေ ကို ထိုးဖောက် ထွက် လာတဲ့ မြက်ပင်လေး ဟာ လက်မ လက်ညှိုး နဲ့ ညှပ် ပြီး ပွတ်ခြေ လိုက်ရုံနဲ့ အရေ ဖြစ် သွား လောက်အောင် နု ပါတယ် ။ အဲဒီလို နု တဲ့ မြက်ပင် ရဲ့ အညွှန့် လေး ဟာ မာကျော တဲ့ ကျောက်စရစ် မြေသား ကို ဘယ်လို ထိုးဖောက် ထွက် လာသလဲ ဆိုတာ မျိုး လဲ စဉ်းစား သင့်တာပေါ့ ။ ဒါ အဖြေ အတွက် ပုစ္စာ ရှာ ကြည့် တဲ့ သဘောပဲ ။
ငါ့ တူမများ ကို နိဂုံးချုပ် ပြော ရရင်တော့ ...
ဒီ အခန်း ကို ဖတ် ပြီးတာနဲ့ စဉ်းစား တွေးခေါ် ပြီး မှ ဆုံးဖြတ် တတ်တဲ့ အလေ့အကျင့် ရသွားမယ် ဆိုရင် အတတ်နိုင် ဆုံး အမှား နည်း သွား ပါလိမ့်မည် ။
လူ ဆို တာ အမြဲ မမှန်နိုင်ပေမယ့် ...
လူ ဆိုတာ အမြဲ မမှား ဖို့တော့ လို တာပေါ့ ။
◾ ကံချွန်
📖 အပျိုစင်တို့သိဖို့ ယောက်ျားတို့အကြောင်း ( ၃ )
#ကိုအောင်နိုင်ဦး
၊
No comments:
Post a Comment