❝ မျက်ကပ်မှန် ❞
▢ ဖေလင်းသစ်
“အိမ်က ကောင်တွေကို စိတ်ပျက်တယ်ကွာ”
အီကြာကွေးကို လက်ဖက်ရည် ချိုရဲရဲထဲ တို့စားရင်း မဲတူက ညည်းညူတယ်။
“ဘယ့်နှယ် ဖြစ်လာရတာတုံး” လို့ ကိုကောက်က အကျိုးသင့် အကြောင်းသင့် မေးတော့ မဲတူက “ဉာဏ်တုံးလွန်းလို့” တဲ့။ “အဖေတူလို့ နေမှာပေါ့” ဆိုပြီး ဘဲဥမက ပြောလိုက်တော့ မဲတူရဲ့ မျက်နှာ မည်းသွားတယ်။
လန်ဘားက ပုံပြင်ပြောနေကျ ရွှီးရဲ့ မျက်နှာကို လှမ်းကြည့်ပြီး-
“ဒီနေ့ ငါ ပုံပြင်ပြောစရာ ရှိတယ်” တဲ့။
“လုပ်ပါ၊ အပျင်းပြေတာပေါ့”
ဆိုပြီး ကိုအောင်က အားပေးတယ်။
“တစ်ခါက စီးပွားရေးလုပ်ငန်းရှင် တစ်ယောက်ဟာ ကား မတော်တဆမှုဖြစ်ပြီး နားရွက်နှစ်ဖက် ပြတ်ထွက်သွားသတဲ့”
“မသက်မသာပါလား”
“နားရွက်နှစ်ဖက် မရှိတဲ့ ကိစ္စအတွက် စီးပွားရေးလုပ်ငန်းရှင်က စိတ်မှာ မလုံမလဲ အမြဲ ဖြစ်နေတာပေါ့၊ ဒါပေမဲ့ အဲဒီလို ထိခိုက်ဒဏ်ရာရတဲ့ အတွက် အာမခံကုမ္ပဏီက လျော်ကြေးတွေတော့ အများကြီး ရသတဲ့”
“ကောင်းတာလား၊ ဆိုးတာလား”
“လျော်ကြေးငွေတွေ ရတော့ သူက လုပ်ငန်းထပ်ပြီး ချဲ့ထွင်တယ်။ ကွန်ပျူတာလုပ်ငန်းတစ်ခု တိုးချဲ့မယ်။ ဒါပေမဲ့ အဲဒီလုပ်ငန်းကို သူက နားမလည်ဘူး။ ဒါကြောင့် ကျွမ်းကျင်တဲ့သူကို မန်နေဂျာခန့်ပြီး လုပ်ငန်းကို လည်ပတ်ဖို့ စိတ်ကူးတယ်”
“ကောင်းသားပဲ”
“အလုပ်လျှောက်ထားတဲ့ သူတွေထဲက သူ စိတ်တိုင်းကျတဲ့ လူသုံးယောက်ကို ခေါင်းခေါက် ရွေးယူလိုက်ပြီး တစ်ဦးချင်းကို အင်တာဗျူး လုပ်သတဲ့”
“စိတ်ဝင်စားစရာပဲ”
“ပထမဆုံး အင်တာဗျူး ဝင်လာတဲ့သူက မဆိုးပါဘူး။ မေးတဲ့ မေးခွန်းတွေ အားလုံးကိုလည်း ပြေပြေလည်လည် ဖြေနိုင်တယ်။ စီးပွားရေး လုပ်ငန်းရှင် နောက်ဆုံးမေးတဲ့ မေးခွန်းက ငါ့မှာ သူများနဲ့ မတူတဲ့ တစ်မူထူးခြားနေတာ ဘာမြင်သလဲတဲ့”
“တစ်မူထူးခြားတာ ဟုတ်လား”
“အင်တာဗျူး ဖြေတဲ့လူက ဆရာ့မှာ သူများနဲ့ မတူဘဲ တစ်မူထူးခြားနေတာ နားရွက်တွေ မပါတာပဲလို့ ပြောလိုက်တယ်”
“ဒီလူတော့ အရွေးခံရမှာ မဟုတ်ဘူး”
“ဟုတ်တယ်၊ အဲဒီလူကို မရွေးဘူး။ ဒုတိယလူကို အင်တာဗျူး လုပ်တယ်။ ဒုတိယလူက ပထမလူထက် ပိုနိပ်တယ်။ နောက်ဆုံး မေးခွန်းကတော့ ငါ့မှာ သူများနဲ့ မတူဘဲ တစ်မူထူးခြားနေတာ ဘာမြင်သလဲပဲ”
“အဖြေက”
“အဖြေကတော့ မြင်ပါတယ် ဆရာ၊ ဆရာ့မှာ နားရွက်နှစ်ဖက် မရှိဘူးတဲ့”
“ပြုတ်မှာပေါ့”
“ပြုတ်တာပေါ့၊ ဒီလိုနဲ့ တတိယလူ အလှည့် ရောက်လာတယ်။ သူက ပထမလူရော ဒုတိယလူထက်ပါ သာတယ်၊ ဖြေတာ အကောင်းဆုံးပဲ”
“နားရွက်နဲ့ ပြုတ်ဦးမှာပါပဲကွာ”
“စီးပွားရေးလုပ်ငန်းရှင်က ဒီလူကို တော်တော် သဘောကျနေပြီ၊ ငါ့မှာ သူများနဲ့ မတူတဲ့ တစ်မူထူးခြားနေတာ ဘာမြင်သလဲဆိုတဲ့ မေးခွန်းကို တောင် သိပ်မမေးချင်တော့ဘူး။ မေးလိုက်မိပြီး အဖြေကို မကြိုက်လို့ ဖြုတ်လိုက်ရမှာ နှမြောနေတယ်။ ဒါပေမဲ့ မျှတအောင် ဆိုပြီး အဲဒီမေးခွန်းလည်း သူ မေးပါတယ်”
“ဘယ်လို ဖြေသလဲ”
“တတိယလူရဲ့ အဖြေက ဆရာ မျက်ကပ်မှန် တပ်ထားပါတယ်တဲ့။ အဖြေကို ကြားတော့ စီးပွားရေးလုပ်ငန်းရှင်က သိပ်အံ့သြသွားတာပေါ့။ အိုး ... မင်းက သိပ်အကင်းပါးပါလား။ ဘယ့်နှယ်လုပ် သိသလဲ မေးတယ်”
“ဘယ်လို သိပါလိမ့်”
“အင်တာဗျူး ဖြေသူက ရယ်မောပြီး ဆရာ့မှာ နားရွက်မှ မရှိတာ၊ ဘယ့်နှယ်လုပ် မျက်မှန်တပ်မှာလဲ။ မျက်ကပ်မှန်ပဲ တပ်ရမှာပေါ့လို့ ပြောလိုက်တယ်”
“အကင်းပါးပါ့ကွာ”
▢ ဖေလင်းသစ်
📖မော်ဒန် သတင်းဂျာနယ်
၁၃ ဇန်နဝါရီလ ၂၀၁၂။
No comments:
Post a Comment