❝ ကိုယ်က မွေးပြီး သူများ သား/သမီး ဖြစ်ရသည်❞
▢ သန်းငြိမ်းအောင် (ပညာရေး)
ကျွန်တော့်တွင် သားတစ်ယောက်၊ သမီးတစ်ယောက် ရှိပါသည်။ သမီးကြီးက ‘အပြုံး’ ဟုခေါ်၍ အပြုံးက နာမည်နှင့် လိုက်အောင် ပြုံးပြုံး, ပြုံးပြုံးနှင့် လောကဓံကို ကြံ့ကြံ့ခိုင် ခံနိုင်သူဖြစ်သည်။
အပြုံး အိမ်ထောင်ကျသွားပြီး လင်ယောက်ျားထက် စောစောထရမည် ဟူသော မြန်မာတို့၏ အယူအဆကို လက်ခံ၍ နံနက် ၄ နာရီထပြီး ၇ နာရီတွင် ချက်ပြုတ်ပြီးစီးပါပြီ။ ယောက္ခမ၏ စီးပွားရေးဖြစ်သော ရေရောင်းသည့် လုပ်ငန်းကိုလည်း ပိုက်ဆွဲ၊ ရေဖြည့် ပြည့်စုံအောင် ပြုလုပ်ပေးသည်။
ကိုရီးယားကားထဲက ကဲ့သို့ ယောက္ခမကို ဒူးထောက်၍ ရေခပ်တိုက်တတ်သော သမီးတစ်ယောက် ဖြစ်ပါသည်။ ကလေးတစ်ဦး၏ မိခင် ဖြစ်လာသည့်တိုင် တစ်အိမ်လုံး အဝတ်ကို လျှော်ပါသည်။ ယောက္ခမက အဝတ်လျှော်စက်ဖြင့် လျှော်လျှင် အဝတ်မဖြူဟု ဆိုသောကြောင့် လက်နှင့် အပင်ပန်းခံ လျှော်ဖွပ်ပေးသူ ဖြစ်ပါသည်။
ရေလိုက်ထည့် ဈေးရောင်းရသမျှကို ယောက္ခမ လက်ထဲ အပြည့်အဝ ထည့်တတ်ပါသည်။ သူ့ယောက္ခမက ကျွန်တော့်ကို ပြောပါသည်။
“သမီးကို ရထားလို့ အိမ်က အိမ်ဖော်ကိုတောင် ပြန်လွှတ်လိုက်ရတယ်”
••••• ••••• •••••
သား၏ နာမည်က လူဖုန်းဖြစ်ပါသည်။ သား ‘လူဖုန်း’ မိန်းမယူလာရင်တော့ အိမ်မှာ အိမ်ဖော် မလိုအပ်လောက်အောင် ကျွန်တော် အောင်မြင်ပြီဟု ယူဆပြီး သားကို မိန်းမယူဖို့ မြှောက်ပေးခဲ့သည်။ ယခု လူဖုန်း မိန်းမယူပြီး အိမ်ခေါ်လာပါပြီ။
မင်္ဂလာဦးညရဲ့ နံနက် ၁ဝ နာရီမှာ နှစ်ယောက်လုံး အိပ်ရာက အတူ နိုးလာပါပြီ။
“ကိုရေ... ကို ထမင်းချက်လိုက်နော်။ ညီမ ..ခေါင်းမူးနေတယ်”
“ကိုရေ .. ကို အဝတ်လေးလည်း လျှော်လိုက်ဦးနော်”
“ကိုရေ... ဇက်ကြောတွေ တက်လိုက်တာ ကိုရယ်... ဇက်ကြောဆွဲပေးဦးနော်ကို”
“ကို... လခထုတ်ရင် ညီမလက်ထဲ ထည့်နော်၊ ကို့လစာက ရှိုးပွဲလက်မှတ်ဖိုးတောင် မရှိဘူး”
‘လူဖုန်း’ ရဲ့မိန်းမ ခေါ်ခေါ်နေသော ‘ကို’ ကြောင့် ကျွန်တော် ခေါင်းကိုက်သွားခဲ့ရပြီ။ ‘လူဖုန်း’ ကတော့ အပိုးကျိုးသွားခဲ့ပြီ။ မိဘနဲ့အတူ နေကြတုန်းက မလုပ်ခဲ့ဖူးသော အိမ်အလုပ် အကုန်လုပ်ပြီး သူ့ယောက္ခမတွေကို
“ဖေဖေ၊ မေမေ”
ခေါ်နေပေပြီ။
သားနဲ့ သမီး မွေးရကျိုး နပ်ပါသည်။ ကျွန်တော်မွေးပြီး သူများ သားရင်း၊ သမီးရင်း ဖြစ်စေခဲ့သည်။
တော်လိုက်တဲ့ ကျွန်တော်။
▢ သန်းငြိမ်းအောင် (ပညာရေး)
📖 ကလျာ မဂ္ဂဇင်း
ဩဂုတ်လ ၊ ၂၀၁၅
No comments:
Post a Comment