❝ စကားတစ်ခွန်း အကြွားတစ်သန်း ❞
( စံလှမောင် - တောင်ကုတ် )
ကားမောင်းရင်း ဖုန်းပြောသူတွေကို တွေ့တိုင်း လွန်ခဲ့သော ၁၅ နှစ်ခန့်က အဖြစ်တစ်ခုကို သတိရနေပါသည်။
ယင်းအချိန်တုန်းက ကျွန်တော်သည် ရုံးကိစ္စ တစ်ခုဖြင့် ရန်ကုန်သို့ ရောက်နေခဲ့သည်။ မဟာရန်ကုန်၏ လမ်းသွယ် တစ်ခုထဲတွင် ကိုထွန်းဝေကို ရုတ်တရက် တွေ့လိုက်ရတော့ ကျွန်တော် လှိုက်ခနဲ ဝမ်းသာသွားခဲ့သည်။
ကိုထွန်းဝေသည် ကျွန်တော့်အစ်ကိုလတ်၏ သူငယ်ချင်း၊ ရွာတောင်ပိုင်းသား တစ်ယောက်ဖြစ်သည်။ ကိုထွန်းဝေ ဆယ်တန်း အောင်ပြီးနောက် တပ်ထဲသို့ ဝင်သွားခဲ့သည်။ တပ်ထဲတွင် အရာရှိ အဖြစ် ဆယ်စုနှစ် တစ်စုကျော် တာဝန်ထမ်းဆောင်ပြီးနောက် လက်ထောက် ညွန်ကြားရေးမှူး တစ်ယောက် ဖြစ်နေကြောင်း သိရသည်။ ကျွန်တော့်ကို တွေ့လျှင် ကိုထွန်းဝေ တစ်ယောက် အံ့ဩဝမ်းသာသွားလိမ့်မည် ထင်သည်။
“ကိုထွန်းဝေ”
ကျွန်တော့် ခေါ်သံကြောင့် ကိုထွန်းဝေမှာ ဖုန်းပြောနေရင်းက လက်ယပ်၍ ခေါ်လိုက်သည်။ ကျွန်တော် အပြေးတစ်ပိုင်းနှင့် ရောက်သွားခဲ့သည်။ ညာလက်က ဖုန်းကိုင်ထားသဖြင့် အားနေသော ဘယ်လက်ဖြင့် ကျွန်တော့်ပခုံးကို လှမ်းဆုပ်ကိုင်လိုက်သည်။ ကျွန်တော့်မှာ ကိုထွန်းဝေ၏ လက်ချောင်းများ အောက်တွင် ငြိမ်ကုပ်စွာ ရပ်နေရပါသည်။ ကိုထွန်းဝေ ပြောနေသော သိန်းသုံးလေးဆယ်တန် ဖုန်းမျိုးကို ကျွန်တော့်တို့လို မြို့နယ် ဒု-ဦးစီး တစ်ယောက် အနေဖြင့် စိတ်ကူးပင် မယဉ်ရဲပါ။
ပခုံးဆုပ်ဖက် ဖုန်းပြောလျက်က တရွေ့ရွေ့ လျှောက်နေသူ ကိုထွန်းဝေ နောက်သို့ ကျွန်တော့်မှာ မျက်စိသူငယ်၊ နားသူငယ်နှင့် မျောပါလျက်။
တန်ဖိုးကြီးပုံရသော ကားဖြူကလေးတစ်စီး အနားသို့ ရောက်မှ သူ့ ခြေလှမ်းတွေ ရပ်တန့်သွားသည်။
ဖုန်းပြောခြင်းကား မရပ်နားသေး။ ကျွန်တော် စိတ်ရှည်ရမှာပေါ့။ အစ်ကိုလတ်၏ ချစ်သူငယ်ချင်းကိုး။ မြို့အကြောင်း၊ ရွာအကြောင်း၊ အစ်ကိုလတ်အကြောင်းတွေကို မမောတမ်း မေးရန် ကျွန်တော့်အား စားသောက်ဆိုင် တစ်ခုသို့ ဦးဆောင် ခေါ်ယူသွားလိမ့်မည်ဟု မျှော်လင့်နေမိသည်။ တော်တော်လေး ကြာမှ ဖုန်းပြောခြင်း ကိစ္စပြီးလေသည်။ ကိုထွန်းဝေသည် ကျွန်တော့်ကို ခပ်စိမ်းစိမ်း ကြည့်လျက် ပထမဆုံး စကားတစ်ခွန်းကို စတင်သည်။
“ကဲ...ငါ့ညီ၊ အရေးကြီးကိစ္စ တစ်ခု ပေါ်လာလို့ သွားလိုက်ဦးမယ်နော်”
ကားဖြူကလေး တရွေ့ရွေ့ ထွက်သွားသည်ကို မျက်စိတစ်ဆုံး ငေးကြည့်ရင်း...
ကျွန်တော့်မှာ မတ်တတ်ရပ်လို့ လမ်းမှာငိုင်...။ ဒါက လွန်ခဲ့သော ၁၅ နှစ်ခန့်က အတွေ့အကြုံ တစ်ခုပါ။
ခုတော့ ကျွန်တော့်မှာ ပြည်သူနှင့်အတူ ဖုန်းတစ်လုံးတော့ ပိုင်ဆိုင်ခွင့် ရနေပါပြီ။ ကိုထွန်းဝေ တစ်ယောက်လည်း ညွန်ကြားရေးမှူး ဖြစ်နေပြီဟု သိရပါသည်။
▢ မဟေသီ ရုပ်စုံ မဂ္ဂဇင်း
📖 စံလှမောင် (တောင်ကုတ်)
နိုဝင်ဘာ ၊ ၂၀၁၇
No comments:
Post a Comment