❝ သမီးတို့ အတွက် ပြိုင်ဘက် ❞
လူ တစ်ယောက် တိုးတက်ဖို့ အတွက် အခြေခံ အချက်တွေ ထဲ မှာ ယှဉ်ပြိုင်မှု ရှိဖို့ ဆိုတာ အရေး ပါတဲ့ အချက် တစ်ချက် ပဲ ။
ယှဉ်ပြိုင်စရာ ရှိ နေမှ ၊ ယှဉ်ပြိုင်ချင်စိတ် ရှိ နေမှ ...
လေ့လာမှု
လေ့ကျင့်မှု
ကြိုးစားမှု
ဆိုတာတွေ ရှိ မှာပါ ။ လူ့ ဘဝ ရပ်တည်နေဖို့ အတွက် လူတိုင်း ဟာ ကံကြမ္မာ နဲ့ ယှဉ်ပြိုင်နေကြရတယ်လေ ။ ကိုယ့် ရဲ့ အနာဂတ် ကို ကိုယ့် ဟာ ကိုယ် ပုံ ဖော်ဖို့ ပန်းပု ထုနေကြရတာ ကွယ့် ။ ဇွဲ ရှိရင် လှလှပပ ဖြစ်မယ် ။ ကိုယ့် ဘဝ အနာဂတ် ကို မှ ကိုယ် ဘာဖြစ်ချင်မှန်း မသိ ရင် မျှော်မှန်း ထားတာ မရှိရင် အချိန်တန် အရွယ် ရောက်တာ နဲ့ ယောက်ျား ကို အားကိုး ရမှာပဲ ။
ငါ့ တူမများ တွေး ကြည့်စမ်းပါ ။
ဘောလုံးပွဲတွေ ၊ အပြေးပြိုင်ပွဲတွေ လို ဟာ မှာ သာ ကိုယ် က ပွဲကြည့်လုပ် နေလို့ ရပေမယ့် အနာဂတ် အတွက် ကံကြမ္မာ ကို ယှဉ်ပြိုင်ရာမှာ တော့ ပွဲကြည့် လို ဘေး က ထိုင် ပရိသတ် လုပ် နေလို့ မရပါဘူး ။
ကိုယ့် ဘက် က ကြိုးစားမှု မရှိလိုက်တာ နဲ့ ကံကြမ္မာ က ကိုယ့် ဘဝ ကို တစ်ဖက်သတ် အနိုင် ယူသွားမှာပါပဲ ။
ငါ့ တူမများ ဘဝ တိုးတက်ချင် ရင် ကံကြမ္မာ ကို ဘယ်လို ရင်ဆိုင်မလဲ ။ အနာဂတ် ကို ဘယ်လို ပုံဖော်မလဲ ။ အဲဒီ အချက် ကို ပြတ်ပြတ်သားသား စဉ်းစား ထားသင့်တယ် ။
မိန်းကလေး တစ်ယောက် ရဲ့ ဘဝရည်မှန်းချက် ဟာ “ ယောက်ျား တစ်ယောက် ” ရ ရေး ထက်တော့ ပိုရမှာပေါ့ ။ စဉ်းစား ကြည့်စမ်း ။ ဒီနေ့ ထူးချွန် တဲ့ အမျိုးသမီးတွေ ဟာ သူတို့ ဘဝ ရည်မှန်းချက် ထားပြီး သူတို့ ဖြစ်ချင်တာ ကို ကြိုးစားခဲ့ကြ လို့ ထူးချွန် ခဲ့ကြတာ ။ ထူးချွန် တဲ့ အမျိုးသမီး ဦးရေ နည်း တာ ဟာ ဘဝ အတွက် ရည်မှန်းချက် ထားပြီး ကြိုးစားတဲ့ အမျိုးသမီး တွေ နည်း သေးလို့ပဲ ။ ငါ့ တူမများ လက်ထက် မှာ ထူးချွန်တဲ့ အမျိုးသမီးတွေ များပါစေ ဟေ့ ။
အဲသလို ထူးချွန်ဖို့ ၊ တိုးတက်ဖို့ ဘယ်သူ့ ကို ယှဉ်ပြိုင် ရမလဲ ။ တစ်ဆင့်ချင်း စဉ်းစား ရအောင် ။
မင်း တို့ ကျောင်း နေတုန်း ဆိုရင် ကျောင်းစာ မှာ အထူးချွန်ဆုံး ဖြစ်ဖို့ လိုတယ် ။ အမြဲ တိုးတက်နေဖို့ လိုတယ် ။ အဲသလို ထူးချွန် တိုးတက်နေအောင် မင်း ပြိုင်ရမှာက မင်းကိုယ် မင်း ပဲ ။ မင်း ရဲ့ ပြိုင်ဖက် က တခြား လူ မဟုတ်ဘူး ။ ဒီ အချက် ကို သိ ထားဖို့ လိုတယ် ။ မင်း ရဲ့ ပြိုင်ဖက် ဟာ တခြား လူ တစ်ယောက် ယောက် လို့ ထင် လိုက်တာ နဲ့ မင်း ရဲ့ တိုးတက်မှု ဟာ အတိုင်းအတာ တစ်ခု ထိ ပဲ ဖြစ်တော့မယ် ။ အစဉ် တိုးတက် မနေတော့ဘူး ။ ဘာလို့လဲ ဆိုတော့ မင်းရဲ့ ပြိုင်ဖက် လို့ မင်း သတ်မှတ်ထားတဲ့ သူ ထက် မင်း က သာတာနဲ့ ကျေနပ် သွားတော့မှာကိုး ။
ပြီးတော့ ...
မင်း ဟာ အတန်း ထဲ မှာ ပထမ ရနေတဲ့ ကျောင်းသူ ဆိုရင် မင်း ကိုယ် မင်း ကျေနပ် နေမလား ။ စဉ်းစားပါ ။ (လေးလေး က ခဏခဏ စဉ်းစား ပါ လို့ ခိုင်း နေရတာဟာ မိန်းကလေး အတော်များများ ဟာ အလှအပ အတွက် က လွဲရင် ဘာကို မှ သိပ် အလေးအနက် မစဉ်းစား ကြလို့ပါ ။ ကိုယ် က အတန်း ထဲ မှာ ပထမ ရနေပေမယ့် ကိုယ် တော်လွန်း လို့ ပထမ ရတာမဟုတ်ဘဲ တခြား ကျောင်းသူ ကျောင်းသားတွေ က ညံ့ လွန်းလို့ မင်း ပထမ ရတာရော မဖြစ်နိုင်ဘူးလား ။ အမှတ် သုံး - လေးဆယ် သာ ရ နေကြတဲ့ ကျောင်းသား ကျောင်းသူတွေ ကြားမှာ မင်း က လေးဆယ့်ငါးမှတ် လောက် စီ ရပြီး ပထမ ရနေတာ ဆိုရင် မင်း ရဲ့ ပညာရေး ကို အားရစရာ လို့ ယုံကြည် သတ်မှတ်မလား ။ ငါ ပထမ ရနေတာပဲ ဆိုပြီး ကျေနပ် နေ သင့်သလား ။ စဉ်းစား နော် ။ ညံ့ နေတဲ့လူတွေ ကြား မှာ တော် နေတဲ့ လူ တစ်ယောက် အတွက် ပြိုင်ဖက် ဟာ ဘယ်သူ ဖြစ်သင့်သလဲ ။
ယှဉ်ပြိုင်စရာ ရှိမှ ကြိုးစားဖြစ် မှာ ။
ယှဉ်ပြိုင်မှု ရှိမှ တိုးတက် မှာ ။
ရှင်းရှင်းလေးပဲ ကွ ။ မင်းတို့ ရဲ့ ယှဉ်ပြိုင်ဖက် ဟာ မင်းတို့ ပဲ ။ သူများ မဟုတ်ဘူး ။ လူ ဆိုတာ ကိုယ့် ကိုယ် ကို အမြဲ ယှဉ်ပြိုင်နေရတယ် ကွ ။ ယှဉ်ပြိုင်တဲ့ နေရာမှာလည်း ဘဝ အတွက် အကျိုး ရှိမယ့် အရာ တော့ ဖြစ်ဖို့ လိုသပေါ့ ။ မနေ့က ထက် ဒီနေ့ လှအောင် ဆို ယှဉ်ပြိုင် နေရင် အသက် ကြီး လာလို့ အိုစာ လာတဲ့ အခါ “ ဇရာ ”
ကို အရှုံး ပေး လိုက်ရမှာပဲ ။
မနေ့က ထက် ဒီနေ့ သာ အောင်
မနေ့က “ ငါ ” ထက် ဒီနေ့ “ ငါ ” က ပို တော်အောင်
ပညာရေး
စီးပွားရေး
လူမှုရေး ..
တွေ မှာ ယှဉ်ပြိုင် ရမှာ ။ အဲသလို ယှဉ်ပြိုင် နေရင် အဲဒီ လူ တိုးတက် မှာ သေချာတယ် ။ ဒီ အတွေးအခေါ် ဒီ အယူအဆ ဒီ စကား ဟာ ဘယ် နိုင်ငံ က ပညာရှိကြီး ရဲ့ အတွေးအခေါ် ပါလိမ့် ဆိုပြီး ထင် မနေနဲ့ ။ ဒါ မြန်မာစစ်စစ် ဗမာကြီး ဆိုင်းဆရာကြီး “ စိန်ဗေဒါ ” ပြော ခဲ့တဲ့ စကား ကွ ။ ဦးလေး တို့ မမီလိုက်ပေမယ့် လူကြီးများ အဆင့်ဆင့် မှတ်သားခဲ့ ၊ မှတ်တမ်းတင်ခဲ့ လို့ သိ ရတာ ။ ဆိုင်းဆရာကြီး စိန်ဗေဒါ က ပြော သတဲ့ ။
“ စိန်ဗေဒါ ဘယ်သူ့ မှ ပြိုင်နေတာ မဟုတ်ပါဘူး ၊ မနေ့က စိန်ဗေဒါ ကို ဒီနေ့ စိန်ဗေဒါ က ပြိုင် နေတာပါလို့ ”
ကောင်းလိုက်တဲ့ စကား ။ လက်ဖျားခါ လောက်အောင် ကောင်းတဲ့ စကား ။ တန်ဖိုး ရှိလိုက်တဲ့ စကား ။ ငါတို့ မြန်မာ
တစ်မျိုးသားလုံး လိုက်နာကျင့်သုံးရမယ့် နည်းလမ်း ဟေ့ ။ ငါ့ တူ များရော ငါ့ တူမ များ ပါ ဒီ စကား ကိုတော့ အလေးအနက် မှတ်ထားစမ်း ။ ရင် ထဲ ရောက်အောင် သွင်းထားစမ်း ။ အသိစိတ် ထဲ မှာ အမြဲ ရှိနေပလေ့စေ ။
သိ ပြီးတာနဲ့ လက်တွေ့ ကျင့်သုံးပေတော့ ။
မင်းတို့ ရဲ့ ပြိုင်ဖက်ဟာ မင်းတို့ ပဲ ။
မနေ့ က ထက် ဒီနေ့ သာအောင် မပြိုင်နိုင်ရင် မင်းတို့ ဘဝ မတိုးတက်ဘူး ဆိုတာ ယုံ ။
◾ ကံချွန်
📖 အပျိုစင်တို့သိဖို့ ယောက်ျားတို့အကြောင်း ( ၃ )
#ကိုအောင်နိုင်ဦး မှ မျှဝေသည် ။
.
No comments:
Post a Comment