နွားအို မြက်နုကြိုက်

 

❝ နွားအို မြက်နုကြိုက် ❞

ငါ့ တူမများ ကြားဖူးပါလိမ့်မယ် ။ အသက်ကြီးကြီး ယောက်ျားကြီး များ က မိန်းကလေး ငယ်ငယ်လေး လိုချင်တဲ့ အခါ ပိုးပန်းတဲ့ အခါ ယူလိုက်တဲ့ အခါ ဝန်းကျင် က ပြောတဲ့ စကား ရှိပါတယ် ။ အဲဒီ စကား က

“ နွားအို မြက်နုကြိုက် ” လေ .. ဆို ပြီးတော့ ကိုယ့် အသက် အရွယ် ။ ကိုယ့် သိက္ခာ ။ ကိုယ့် ဂုဏ် နဲ့ လိုက်လျောညီထွေ မနေတတ် လေ တော့ “ နွားအို ” နဲ့ အနှိုင်း ခံ ရတော့တာပေါ့ ။ ယောက်ျား ဆို တာ အသက် ကြီး လာ ရင် “ လူကြီး လူကောင်း ” တစ်ယောက် အဖြစ် ရပ်တည် နိုင် ဖို့ သိပ် အရေး ကြီးတာ ။

အသက် ကြီး တဲ့ ယောက်ျား ကို မယူ ပေမယ့် ကိုယ် နဲ့ ရွယ်တူ တန်းတူ ယောက်ျား ဆို တာ က လည်း နှစ် ကြာလာတော့ အသက် ကြီး လာမှာပဲ ။ ဒါကြောင့် အသက် ကြီး တဲ့ ယောက်ျားများ နဲ့ ပတ်သက် ပြီး ငါ့ တူမများ သိသင့်တယ် ထင်လို့ လေးလေး ပြော ပြချင်တယ် ။

ဒီအကြောင်း ပြော ဖြစ်ဖို့ ဖန် လာတာ က လေးလေး ဆီ လာ တဲ့ စာ တစ်စောင် ကြောင့် ပေါ့ ။ အဲဒီ စာ က ..

••••  ••••  •••••  •••••  •••••

ဆရာဦးကံချွန် ရှင့် -

ကျွန်မ နာမည်  မ ….... ဖြစ် ပါသည် ။ ကျွန်မ အသက် ( ၄၂ ) နှစ် ရှိ ပါပြီ ။ ကျွန်မ ၏ ခင်ပွန်းဘမှာ ကျွန်မ ထက် အသက် ( ၃ ) နှစ် ကြီးပါသည် ။ သူ့ အသက် ( ၄၅ ) နှစ် ပါ ။

ကျွန်မ ၏ ပြဿနာ ကို ကူညီ ဖြေရှင်း ပေး နိုင်ရန် ကျွန်မ ၏ အဖြစ်အပျက် ကို ရေး ပြပါရစေ ။ ကျွန်မ တို့ အိမ်ထောင်သက် နှစ်ဆယ့်သုံးနှစ် ရှိ ပါပြီ ။ သား အကြီး သည် ပင် ပြီးခဲ့သည့် လ က အသက် နှစ်ဆယ် ပြည့်ပါပြီ ။ သမီးအလတ် က ( ၁၈ ) နှစ် ။ သမီး အငယ် က ( ၁၅ ) နှစ် ။ သားသမီး သုံးယောက် ရှိပါပြီ ။ ပေါင်းသင်းခဲ့သော အိမ်ထောင် သက် ( ၂၃ ) နှစ် အထိ ကျွန်မ ခင်ပွန်း သည် ကျွန်မ အပေါ် သစ္စာ ရှိ ခဲ့ပါသည် ။ မိသားစု အပေါ် တာဝန် ကျေပါသည် ။ ကျွန်မတို့ သည် နှစ်ဦး နှစ်ဖက် သူငယ်ချင်း လည်း မေတ္တာ မျှ ၍ လူကြီးများ လည်း ကျေနပ် သော ကြောင့် ထူထောင် ခဲ့သော အိမ်ထောင် ဖြစ်ပါသည် ။

လွန်ခဲ့သည့် ( ၆ ) လ ခန့် က မူ ကျွန်မ ခင်ပွန်း မှာ မိသားစု အပေါ် ဆက်ဆံရေး ပြောင်း လာပါသည် ။ သားသမီးများ ကို အကြောင်း မဲ့ ဆူပူ လာသည် ။ လုံးဝ မအော် မငေါက် ဖူး သော သမီးငယ် ကို ပင် အော်လား ငေါက်လား လုပ် လာသည် ။ ကြည်ကြည် သာသာ စကား ပြောသည့် အချိန် အလွန် နည်း လာပါသည် ။ ကျွန်မ နှင့် ပြောဆို ရာ တွင် လည်း မျက်မှောင် ကုပ် ကာ မပြော မဖြစ် သော စကား လောက် သာ ပြော ပါသည် ။

ဘာလို့ စိတ် တို နေရတာလဲ ဟု မေးတိုင်း ငါ ဘာ တို နေလို့လဲ ဟု ပြန် အော်ပါသည် ။ ကျွန်မ သူ့ ဘေး သွား ထိုင် လျှင် လည်း ထ ထွက် သွားတတ်ပါသည် ။

ဝန်းကျင် မှ ပြော စကား အရ ကျွန်မ ခင်ပွန်း သည် ဈေးသည် ကောင်မလေး တစ်ယောက် နှင့် ယူ ထားသည် ဟု သိ ရပါသည် ။ ကျွန်မ သည် ထို ကိစ္စ ကို မသိဟန် ဆောင် ကာ ခွင့်လွှတ် နိုင်အောင် ကြိုးစား ပါသည် ။ သူ့ ကို ရန် လည်း မပြုပါ ။ ဆရာ ဦးကံချွန် ရေး သလို အိုင် တွေ့ လို့ ခြေ ဆေးတာ ပဲ ဟု သဘော ထား ပါသည် ။ မိန်းကလေး ကို က မကောင်း လို့ ပဲ ဟု စိတ် ဖြေ ပါသည် ။ လုံးဝ မသိဟန် ဆောင် ၍ မူမပျက် ဆက်ဆံပါသည် ။ သားသမီးများ ကို လည်း ပို၍ ရိုရိုသေသေ ဆက်ဆံရန် ကျွန်မ မှာ ထားပါသည် ။

မိသားစု အားလုံး က အရိုအသေ မပျက် အပြုစု မပျက် ဆက်ဆံ နေ သော် လည်း သူ က အမြဲပဲ စိတ် တို ၍ ရန် လို နေပါသည် ။ ကျွန်မတို့ အနေဖြင့် သူ့ ကို မည်သို့ ဆက်ဆံ ရမှန်း မသိ ဖြစ် နေသောကြောင့် ဆရာဦးကံချွန် ထံ စာ ရေး ၍ မေး ရ ခြင်း ဖြစ် ပါသည် ။

••••••  ••••••  •••••••  •••••

အဲဒီ စာ ကို ဖတ်ပြီးတော့ လေးလေး ဒီလို စာ ပြန်ခဲ့တယ်။

••••••  ••••••  •••••••  •••••

မ ...... ခင်ဗျာ ။

ကျွန်တော် မ .…. ၏ စာ ကို  ..... ရက် နေ့ က ရရှိပါသည် ။ ထို စာ ကိုဖတ် ပြီး နောက် တစ်ဆင့် ချင်း ဖြေရှင်း အကြံ ပေး လိုပါသည် ။ ပထမ ဆုံး ဖြေရှင်း လို သည် မှာ ကျွန်တော် ရေး ခဲ့သော အပျိုစင်တို့ သိဖို့ ယောက်ျားတို့ အကြောင်း ပထမ စာအုပ် တွင် ပါရှိသည့် အိုင် တွေ့ လို့ ခြေဆေး တာ မလွန်ပါဘူး ။ သောက်ရေအိုး ထဲ က ရေ နဲ့ ခြေ ဆေး တာ မှ မဟုတ်ဘဲ ” ဟု ရေးခဲ့သည် မှာ မိန်းကလေးများ ကိုယ့် ကိုယ် ကို တန်ဖိုး ရှိအောင် နေ တတ်ရန် သတိ ပေး လို ၍ ဖြစ်ပါသည် ။ ထို စာသား မှာ ယောက်ျားများ ကို ကာကွယ်ရန် အတွက် ရှုပ်ခြင်း ပွေခြင်း ကို ဆင်ခြေ ပေးရန် အတွက် ရေး ပြခဲ့ခြင်း မဟုတ်ပါ ။

ထို “ အိုင်တွေ့ ၊ ခြေဆေး ” စကား ကို အကြောင်း ပြု၍ အမျိုးသမီး တို့ အတွက် ရည်ရွယ် ရေးသားခဲ့ ခြင်း ပါ ။ ထို စကား ကို အကြောင်း ပြု ၍ အမျိုးသားတို့ အတွက် ရေး ပါမူ အိုင်တွေ့ တိုင်း ခြေ ဆေး နေလျှင် ခြေထောက် “ ပေ ” ယုံ သာ ရှိ ပါမည် ။ အဘယ်မှာ အိုင် ထဲ က ရေ သည် ရေကောင်း ရေသန့် ဖြစ် ပါမည်နည်း ။

ကိုယ့် ကိုယ် ကို တန်ဖိုး ထားသော ယောက်ျား ဆိုလျှင် ။ ဣန္ဒြေ သိက္ခာ ရှိသော ယောက်ျား ကောင်း ဆိုလျှင် ။ အိုင် တွေ့ သော် လည်း ရှောင် သွား နိုင်စွမ်း ရှိ ရပါမည် ။ သို့ မှ သာ မွန်မြတ်သော ယောက်ျား ကောင်း ဖြစ်ပါမည် ။ အိုင် တွေ့ တိုင်း ခြေ ဆေး နေသော ယောက်ျား အား ယောက်ျား ကောင်း ယောက်ျား မြတ် မခေါ်နိုင်ပါ ။

“ မ .....” ၏ ခင်ပွန်း သည် မိသားစု အပေါ်  စိတ် တိုနေခြင်း ။ အလိုမကျ ဖြစ်နေခြင်း ။ ပျော်ပျော်ရွှင်ရွှင် ကြည်ကြည်လင်လင် မနေနိုင်ခြင်း များ သည် မလုပ်သင့်သော အလုပ် ( ပြစ်မှု ) ကို သူ လုပ်ထားမိသည့် အတွက် ကျူးလွန် ထားမိသည့် အတွက် သူ့ လုပ်ရပ် က သူ့ ပြန် ခြောက်လှန့် နေသောကြောင့် သူ့ ပျော်ရွှင်မှု များ ဆိတ်သုဉ်း ပျက်စီး နေခြင်း ဖြစ်ပါသည် ။

သူ ၏ “ ဖောက်ပြန်မှု ” ကို မိသားစု က ခွင့်လွှတ် နိုင်သော်လည်း ဘာသာတရား က ခွင့် မလွှတ်ပါ ။ မည်သည့် ဘာသာ က မှ ခွင့် မပြုပါ ။ မကောင်းမှု ကျူးလွန် ထား သူ အား သူ ၏ ပြစ်မှု က သူ့ ကို ဒဏ် တတ် ပါသည် ။ သူ လုပ်သည့် အစား သူ ရပါသည် ။ အကောင်း လုပ် လျှင် အကောင်း ရ ပါမည် ။ မကောင်း လုပ် လျှင် မကောင်း ရပါမည် ။

ဖောက်ပြန် သူ အတွက် စိတ် သောက ရောက် စရာသည် မလွဲမသွေ ကြုံ ရမည် ဖြစ် ပါသည် ။

ထို့ကြောင့် ...

“ မ …...” တို့ မိသားစု အနေဖြင့် အတတ်နိုင်ဆုံး ခွင့်လွတ် ထားပါ ။ သူ နောင်တ ရ လာ ပါ က ပျော်ရွှင်သော မိသားစု ဘဝ ပြန်လည် ရပါလိမ့်မည် ။

( ၁ ) သူ့ အား ပြိုင် ၍ မရွဲ့ပါနှင့် ။ သူ နေချင် သလို နေ သော် လည်း ကိုယ် က စည်းကမ်း နှင့် သာ နေပါ ။

( ၂ ) သူ့ ပျော်ရွှင်မှု ကို ဖျက်ဆီး သူ မှာ သူ ၏ ဒုစရိုက် ဖြစ်ပါသည် ။

( ၃ ) မိသားစုဝင် က ခွင့်လွှတ် သော်လည်း ဘာသာတရား နှင့် ဝန်းကျင် က ခွင့်မလွတ်ပါ ။ အိုင် တွေ့  ၍ ခြေ ဆေးသော အမှု သည် ခွင့်လွတ်ရန် ထိုက်သော အမှု မဟုတ်ပါ ။ မိန်းကလေး များ ကို သာ အိုင် အဖြစ် မရောက်ရန် သတိ ပေး လို၍ ရေး ခဲ့ခြင်းပါ ။ ယောက်ျား ကောင်း တစ်ယောက် သည် အိုင် တွေ့ လျှင် ရှောင်သွားနိုင်စွမ်း ရှိသော ယောက်ျား ဖြစ် ရပါမည် ။ သူ ၏ လုပ်ရပ် အား ရပ်တန့် ရန် ဒေါသ မပါဘဲ တရား ပြ ၍ ဖြောင့်ဖြ ပြောဆိုပါ ။

မကောင်းမှု ကို မကောင်းမှု ဖြင့် တုံ့ပြန်၍ မရပါ ။

မကောင်းမှု ကျူးလွန် သူ အား ထိန်းသိမ်း နိုင် မှ သာ ပျော်ရွှင်သော အိမ်ထောင်စု ထူထောင် ၍ ရပါမည် ။

•••••  ••••••  •••••••  •••••••

လေးလေး အဲသလို စာ ပြန် ခဲ့တယ် ။ ယောက်ျား ဆို တာ မရ ခင် မှာ တစ်ကမ္ဘာလုံး ရှိသမျှ မိန်းမတွေ ထဲ မယ် ကိုယ့် ရည်းစား ကို သာ လှတယ် ထင် ပေမယ့် ရ ပြီးတာ နဲ့ ကိုယ့် မိန်းမ က လွဲ ရင် တစ်ကမ္ဘာလုံး ရှိသမျှ မိန်းမတွေ ကို လှတယ် ထင် တတ် ကြတာကွယ့် ။

ငါ့ တူမ များ အိမ်ထောင်ရှင် ဘဝ ရောက်ရင် ကိုယ့် ခင်ပွန်း ကို အိမ်ထောင် တစ်ခု သာယာ ပျော်ရွှင်ရေး အတွက် “ သစ္စာ ရှိသော ယောက်ျား ” ဖြစ်ဖို့ လိုတယ် ဆိုတာ ကြို ပြော ထားပေရော့ ။

ငွေ တွေ ဘယ်လောက် ရှိ နေနေ သစ္စာ မရှိရင် အဲဒီ အိမ်ထောင် ဟာ မသာယာပါဘူး ။

◾ ကံချွန်

📖 အပျိုစင်တို့သိဖို့ ယောက်ျားတို့အကြောင်း ( ၃ )

#ကိုအောင်နိုင်ဦး

.