❝ ကျုပ်က စေတနာနဲ့ ပြောတာပါဗျ ❞
“ ဆရာ မင်းနိုင် ၊ ဆရာ မင်းနိုင် ”
“ ဆရာ ၊ ကျွန်တော်တို့ လေးဆယ်ကုန်း ရွာ ကပါ ။ တံခါး ဖွင့်ပေးပါဦး”
ဟိုဘက် အိမ် က ဆရာဝန် က နိုး မနိုးတော့ မသိဘူး ၊ အိပ် ပျော်အောင် မနည်း ကြိုးစား ထားရတဲ့ ကျွန်တော် က တော့ အိပ်ရာ ကနေ လန့် နိုး လာတယ် ။ နာရီ ကြည့် မိတော့ ည တစ်နာရီ ထိုးနေပြီ ။ တော်တော် နောက်ကျ နေ ပြီ ။ ဟိုဘက် အိမ် က ဆရာဝန် က ကျွန်တော်တို့ ရွာသား မဟုတ်ပါဘူး ။ မြို့ ပေါ် က နေ ကျွန်တော်တို့ ရွာ ကို ဆေးခန်း လာ ဖွင့်တာ ခြောက်လ ပဲ ရှိ သေးတယ် ။ အဲဒီ ဆရာဝန် ရွာ ကို ဆေးခန်း လာ ဖွင့်ခါစ က တော့ “ ဪ ...ငါတို့ ရွာလေး မှာ ဆရာဝန် တစ်ယောက် ရှိ တယ် ။ ကျန်းမာရေး အတွက် မပူရတော့ဘူးပေါ့ ” လို့ တွေး ပြီး ကျွန်တော် ဖြင့် ပျော်လိုက်ရတာ ။ ဒါပေမဲ့ ကျွန်တော့် ရဲ့ အပျော်တွေ က သိပ် မခံပါဘူး ။ညကြီး အချိန်မတော် လူနာတွေ က လာ လာ နှိုးကြတယ် ။ ဆရာဝန် ရဲ့ ဆေးခန်း နဲ့ ကျွန်တော့် အိမ် က ဝန်းနံရံ တစ်ချပ် ပဲ ခြားတယ်လေ ။ အိပ်ရေးဆတ် တဲ့ ကျွန်တော် ပါ ဆရာဝန် နဲ့ ရောပြီး အိပ်ရေး ပျက် ရတယ် ။
တံခါး ဖွင့်သံ နဲ့ အတူ ဆရာဝန်လေး ရဲ့ စကားသံ က ဖြည်း ညင်းစွာ ထွက်ပေါ် လာတယ် ။
“ ဘာ ဖြစ်လာလို့လဲဗျ ”
“ သူ့ ယောက်ျား က အရက် မူးပြီး ရိုက်တာ ခေါင်း ကွဲသွား လို့ ဆရာ ”
ဪ အရက် ၊ အရက် ။ လူတွေ ကို တော်တော် ဒုက္ခပေး တဲ့ အရက် ။ ဆရာဝန်လေး ကတော့ မှတ်တမ်းတင် ထားရဲ့လား မသိဘူး ။ ဆရာဝန်လေး ဆေးခန်း ဖွင့်လာတဲ့ ခြောက်လ အတွင်း ညကြီး အချိန်မတော် ဆေးခန်း လာတဲ့ လူ အများစုက အရက် နဲ့ ဆက်စပ် နေကြတာ ကို ကျွန်တော် သတိ ထားမိတယ် ။ အရက်မူး ပြီး ရန်ဖြစ်လို့ ၊ အရက်ကြောင်ပြီး လျှောက် ပြေး နေလို့ ၊ သွေးအန် နေလို့ ၊ အို ... စုံနေတာပဲ ဗျာ ။
အရက်အကြောင်း ကို ကျွန်တော် သိသလောက် ပြောပြရ ဦးမယ် ။ အရက် အကြောင်း မပြောသေး ခင် ကျွန်တော့် ကိုယ် ကျွန်တော် မိတ်ဆက် ပေးပါရစေ ။ ကျွန်တော် က မူလတန်း ကျောင်းအုပ်ဆရာကြီး ။ အငြိမ်းစား ယူ ထားတာ သုံးနှစ် ပဲ ရှိသေးတယ် ။ ဆရာတို့ ရဲ့ ထုံးစံအတိုင်း ဆရာ လုပ် တယ် လို့တော့ မထင်ပါနဲ့ ။ ကျွန်တော် က နေ့စဉ်သတင်းစာ က စပြီး ဂျာနယ် ၊ မဂ္ဂဇင်း ၊ စာပေကျမ်းဂန်တွေ အထိ အစုံ ဖတ်ထား သူမို့ ဗဟုသုတ အတော်လေး စုံပါတယ် ။
ကျွန်တော်တို့ ဗုဒ္ဓဘာသာဝင်တွေ စောင့်ထိန်းရမယ့် ငါးပါးသီလ ထဲ မှာ ”
သုရာမေရယ မဇ္ဇပမာဒဋ္ဌာနာ ၊ ဝေရမဏိ သိက္ခာပဒံ သမာဒိယာ မိ ” ဆိုတာ ပါတယ် မဟုတ် လား ။ မြန်မာ လို အလွယ် ပြောရရင် မူးယစ်စေတတ် သော အရာတွေ သောက်စား ခြင်း ၊ အရက်သေစာ သောက် စားခြင်း မှ ရှောင်ကြဉ်ပါ၏ ပေါ့ ဗျာ ။ သုရာ ဆိုတဲ့ အရက် ကို သုရာ မုဆိုးကြီး က စ,တွေ့ ခဲ့တယ်လို့ မှတ်သားဖူးတယ် ။ သုရာမုဆိုးကြီး က စ,တွေ့လို့ သုရာ လို့ အမည်တွင် ခဲ့တာ တဲ့ ။ သုရာ ဆိုတဲ့ မုဆိုးကြီး က ဟိမဝန္တာတော ထဲ တောလိုက် ထွက်ရင်း သုံးခွဆိုင် တွယ်နေ တဲ့ သစ်ပင်ကြီးတစ်ပင်အောက် ရောက်ခဲ့ သတဲ့ ။ ငှက်တွေ က သစ်ပင်ပေါ်ကနေ အောက် ပြုတ်ကျလာ လိုက် ၊ ခဏ အကြာ မှာ ထ , ပျံ လိုက် ဖြစ် တာ ကို သုရာမုဆိုး က တွေ့တော့ ဘာကြောင့် ဒီလို ဖြစ်ရ လဲ ဆိုတာကို လိုက် ရှာခဲ့တယ် ။ သစ်ခေါင်းထဲ က အနီရောင် အရည်တွေ သောက်ပြီး ငှက် တွေ အောက် ပြုတ်ကျ လာတာ ကို သုရာမုဆိုးကြီး က သတိ ထားမိခဲ့တယ် ။ အဲဒီ အရည်တွေ ဖြစ်ပေါ်လာပုံ က ဒီလို ပါ ။ သစ်ပင် ဘေး မှာ နွယ် တက် နေတဲ့ သဖန်းခါးပင် ၊ သျှိသျှားပင်တွေ က အသီး တချို့က သစ်ခေါင်း ထဲ ကြွေ ကျ ကြတယ် ။ ငှက်ပေါင်းစုံ က သလေးစပါး စတဲ့ သီးနှံ တွေ ကို သစ်ပင် ပေါ် ထိ ချီ လာပြီး လာ စားတဲ့ အခါ အကြွင်းအကျန်တွေ က သစ် ခေါင်း ထဲ ပြုတ်ကျကြတယ် ။
မိုး ရွာတဲ့ အခါ မိုးရေတွေ က သစ်ခေါင်း ထဲ ပြည့် လာတယ် ။ နေ ပူတော့ သစ်ခေါင်း ထဲ က အရာ အားလုံး ကို ချက်ပြုတ် သလို ဖြစ်ပြီး အချဉ် ပေါက် ကာ အနီရောင် ဖြစ်လာခဲ့တာ ။ မုဆိုးကြီး လည်း ငှက်တွေ
တောင် ဒီ အရည် သောက်ပြီး ခဏပဲ အိပ်ပျော်တာ ။ ဒီ အရည်တွေက အဆိပ်တော့ မဖြစ်နိုင်ဘူး လို့ တွေးပြီး သစ်ပင် အောက် ပြုတ်ကျ နေတဲ့ ငှက်တွေ ကို သတ် ၊ မီး ကင်ပြီး အဲဒီ အရည်တွေ နဲ့ မြည်း သတဲ့ ။
“ ကျေးဇူးပါပဲ ဆရာ ၊ ပြန်ခွင့်ပြုပါဦး ”
နှုတ်ဆက်သံနဲ့ အတူ ဆိုင်ကယ် မောင်းသွား တဲ့ အသံတွေ ကို ကြားလိုက်ရ တယ် ။ ကျွန်တော့် ရဲ့ အတွေး တွေ လွန် သွားလို့ ဘယ်ချိန် က လူနာ ခေါင်း ကို ချုပ်လိုက်တာလဲ တောင် မကြားလိုက် ရ ဘူး ။ ဆေးခန်း မီး ကို ပိတ်ပြီး သိပ် မကြာခင် မှာ ဆရာဝန် ရဲ့ ဟောက်သံ ကို ကြား လိုက်ရ တယ် ။ ကျွန်တော် က တော့ မျက်စိကြောင် နေတာ နဲ့ အရက် အကြောင်း ဆက်ပြီး တွေး နေ တယ် ။ မနေ့ က မှ ရွာထိပ်ပိုင်း က ဦးသာမောင် အရက်သောက် လွန်ပြီး ဆုံး သွားတယ် ။ ဦးသာမောင် မဆုံးခင် ဆရာဝန်လေး ဆီ ခေါက်တုံ့ ခေါက်ပြန် လာ တာပေါ့ဗျာ ။ အရက်သမား တွေ လာတိုင်း ဆရာဝန်လေး ပြောနေ စကားကို ကျွန်တော် တောင် လွတ်ရနေပြီ ။ ဘာတဲ့ ။
“ အရက် သောက်တာ ကောင်းကျိုး မရှိဘူးဗျ ။ ကမ္ဘာ ပေါ် မှာ တစ်နှစ် ကို အရက် ကြောင့် လူပေါင်း နှစ် ဒသမ ငါးသန်း ကျော် သေဆုံးနေကြ တယ် ။ AIDS တို့ ၊ ငှက်ဖျား တို့ ကြောင့် သေဆုံး နေတဲ့ လူ ပမာဏ ထက် အရက် ကြောင့် သေဆုံး နေရတဲ့ သူ က ပို များတယ် ”
ဆရာဝန်လေး က ဘယ်လောက်ပဲ ကျန်းမာရေး အသိ ပညာပေးပေး အရက်သမား တွေ က အရက် ကို ဆက် သောက် တာပဲ ။ ရွာသားတွေ က မနက် လင်း လာတာနဲ့ လယ်တော ဆင်း ၊ ညနေ ကျ မှ အိမ် ပြန် လာကြရတာ ။ ညပိုင်း အရက် သောက်တာ က သူတို့ အတွက် အပန်းဖြေ စရာ လို့ တွက်ထား ကြတယ် ။ အရက် က သူတို့ ဘဝ ရဲ့ အားဆေး လို့ တွက်ထား တယ် ။ ဟုတ် တယ်လေ ။ ကမ္ဘာ့ ရွှေဈေး အတက်အကျတွေ ၊ ကားဈေး အတက်အကျတွေ ၊ တန်ဖိုး နည်း အိမ်ရာ တိုက်ခန်းဈေး တွေ က သူတို့ ဘဝနဲ့ လား လားမှ မဆိုင်ဘဲ ကို ။ ကား ဈေးတွေ ဘယ်လောက် ကျ ကျ သူတို့ ဝယ် မစီးနိုင်တာ သိနေ ကြတယ် ။ သီးနှံ တစ်ခါ ပေါ်ရင် ချေး ထားတဲ့ ငွေ နဲ့ ငွေတိုး ကို အလျဉ် မီအောင် ကြိုးစားပြီး ဆပ်နေရတဲ့ ဘဝတွေ မဟုတ်လား ။ ရွာ ထဲ က တချို့ အရက် စွဲနေတဲ့ သူ တွေ ကျတော့ အလုပ် မလုပ်တော့ဘဲ မိုးလင်း မိုးချုပ် အရက် သောက် ကြတာ ။ မနက် လင်းတာ နဲ့ အရက်ဆိုင် ရှေ့ မှာ ရောက် နေကြပြီ ။ ပိုက်ဆံ ပါတဲ့ လူတွေ က ခေါင်းမော့ ရင်ကော့ ထားကြ ပြီး ပိုက်ဆံ မပါတဲ့သူတွေ က ကုပ်ချောင်း ကုပ်ချောင်း နဲ့ ။
အဲဒီလို မိုးလင်းမိုးချုပ် အရက် သောက် နေတဲ့ သူ တွေမှာ အနာဂတ် ဆိုတာ မရှိတော့ ဘူး ။ သူတို့ရဲ့ ပစ္စုပ္ပန် က လည်း အရက် ထဲ မှာပဲ ရှိ တယ် ။ လူ တချို့ ကျတော့ အလုပ်တော့ လုပ် ကြပါတယ် ။ အလုပ် လုပ်တဲ့ ရည်ရွယ်ချက် ကို က အရက်ဖိုး ရဖို့ တစ်ခု တည်း ပဲ ။ တချို့ လူတွေ က တော့ ရှာသမျှ ပိုက်ဆံ တစ်ဝက် က အရက် ထဲ ရောက် ကုန်တယ် ။ အရက် စွဲနေတဲ့ သူတွေ က သူတို့ရဲ့ မိသားစု ဝင်တွေ နဲ့ ရော ၊ ပတ်ဝန်းကျင် နဲ့ ရော သဟဇာတ မဖြစ်ကြ တော့ဘူး ။ တွေး ကြည့်လိုက် ရင် စိတ်ညစ်စရာ ချည်း ပဲ ။
ဒါတွေ ထားလိုက်တော့ ဗျာ ။ ဦးသာမောင် ရဲ့ အကြောင်း ဆက် ပြောပြမယ် ။ အဲဒီ လူ က အစ က အရက် မသောက် တတ်ဘူး ။ ဘယ်အချိန် က စ , သောက် သလဲ ဆိုတော့ သူ့ ရဲ့ လယ်တွေ ကို အစိုးရ က စက်ရုံ နေရာ အတွက် ဆိုပြီး သိမ်းခဲ့တဲ့ အချိန် က စပြီး သောက် ခဲ့တာ ။ သူ့ ရဲ့ မြေ ရှစ်ဧက အတွက် လျော်
ကြေး သိန်းလေးဆယ် ရတယ် ။ ရွာ က လယ်သိမ်း ခံ ရတဲ့ ဆင်းရဲသား တောင်သူ အများစု ကတော့ လယ် တစ်ဧ က ငါးသိန်း ပေးတာ ပျော်တောင် နေသေး ။ ပျော် နေတဲ့ တောင်သူတွေ ရဲ့ တချို့ လယ်တွေ က ရေ မရလို့ စပါး မစိုက်ရတာ ကြာနေပြီ ။ ပျော် နေတဲ့ လူတွေ ထဲ ဦးသာမောင် မ ပါဘူး ။ သူ တစ်ယောက် တည်း လက်မှတ် မထိုးပေး လို့ မြေတိုင်းစာရေးတွေ က သူ့ အိမ် ထိ လာပြီး ချော့လိုက် ၊ ခြောက်လိုက် လုပ် ကြတယ် ။
နောက်ဆုံး သူ့ သားငယ် ကို မိန်းမတောင်း ပေးစရာ ပိုက်ဆံ မရှိလို့ လက်ခံ လိုက်တာ ။ အလျော် ရတဲ့ သိန်းလေးဆယ် က လည်း အိုးခွဲ နေ ကြတဲ့ သူ့ သားသမီး ငါးယောက် က သိန်းသုံးဆယ် ယူ ၊ သူ နဲ့ သူ့ မိန်းမ အတွက် ဆယ်သိန်း ပဲ ကျန်ခဲ့တာ ။ ဆယ်သိန်း က လည်း သူ့ သားငယ် ရဲ့ မင်္ဂလာဆောင် မှာ ကုန်သွားရော ။ တောင်သူ က လွဲပြီး ဘာ လုပ်ငန်းမှ မလုပ် တတ်တဲ့ သူ့ အတွက် အသက်ကြီး မှ တခြား သူတွေ ရဲ့ လယ် မှာ စာရင်းငှား ပြန် လုပ်ရတယ် ။ ဒီလိုနဲ့ ညပိုင်းတွေ အရက်
သောက်တတ် လာတယ် ။ တဖြည်းဖြည်း အရက်စွဲ တဲ့ အရက်သမား အဆင့် ကို ရောက် သွားတာ ။ “ ကြောင် ၊ ဖော ၊ ရှော ” ဆိုတဲ့ အရက် သမားတွေ ရဲ့ ထုံးစံ အတိုင်း
ကြောင်တောင်တောင် ဖြစ် လာ ၊ တစ်ကိုယ်လုံး ဖောရောင် လာပြီး ရှော သွားတာ ။
“ ဟဲ့ ပလုပ်တုတ် ”
ကျွန်တော့် ရင်ဘတ် ပေါ် လက် တစ်ဖက် ရောက် လာလို့ အလန့်တကြား အော်မိတယ် ။ ကျွန်တော် ကသာ လန့် အော်
တာ ၊ ဘေး က ကျွန်တော့် မိန်းမ က အဟောက် တောင် မပျက်ဘူး ။ ကျွန်တော့် မိန်းမ က အဲဒီလိုပဲ ။ အအိပ် အရမ်း ကြမ်းတာ ။ သူမ ရဲ့ လက် ကလေးကို ဘေး အသာ ပြန်ချ ပေးပြီး ရွာ ထဲ က အရက် ကြောင့် ဒုက္ခ ရောက် ခဲ့ရတဲ့ သူတွေ အကြောင်း ဆက်ပြီး တွေး နေမိတယ် ။
အတွေး ထဲ ပေါ်လာတာ က မိခင် ရဲ့ အိမ် ကို အရက် မူး ပြီး မီးရှို့ တဲ့ မောင်ခင်မောင် အကြောင်းပဲ ။ မောင်ခင်မောင် က အရက် ကြောင့် အသိ ဉာဏ် ပျောက်ခဲ့ ရတာ ။ အရက် မူးပြီး ရွာ ထဲ မှာ ဆဲဆို ရမ်းကား နေတာ ကို အမေ ဖြစ်သူ က ဆုံးမ လို့ ဆိုပြီး သူ့ အမေ ရဲ့ အိမ် ကို မီးရှို့ ပစ်တာ ၊ တခြား အိမ်တွေပါ မီးတွေကူး ပြီး ရွာသူရွာသားတွေ တော် တော်လေး ကို ဒုက္ခ ရောက်ခဲ့ တာ ။ မောင်ခင်မောင် လည်း ထောင်နန်း စံခဲ့ရတယ် ။
အရက် ကြောင့် ဒုက္ခ ရောက်ခဲ့ ရတဲ့ မောင်စိုး နဲ့ မယ်ခင် တို့ လင်မယားနှစ်
ယောက် အကြောင်း ကို ဆက် ပြီး ပြောပြချင် သေးတယ် ။ မောင်စိုး ဆိုတာ အိပ်ရာ ထ , က နေ အိပ်ရာ ဝင်တဲ့ အချိန် ထိ အရက် သောက်တဲ့ အရက်သမား စစ်စစ် ။ မောင်စိုး က အလုပ် မလုပ်နိုင်တော့ မယ်ခင် မှာ ကလေး သုံးယောက် နဲ့ ဒုက္ခ ရောက်ရတယ် ။ မယ်ခင် က မိသားစု စားဝတ်နေရေး အတွက် ကြံရာမရ ဖြစ်ပြီး ရွာထဲ က တဏှာဘီလူး ဦးသိန်းမောင် နဲ့ နောက်မီး လင်းခဲ့ရ တယ် ။ သူ့ မိန်းမ လင်ငယ် ထားတာ သိ သွားတော့ မောင်စိုး က မူးမူးရူးရူး နဲ့ မိန်းမ ကို ဓား နဲ့ ခုတ် သ,တ်ပစ်ရော ။ မယ်ခင် လည်း သေ ၊ မောင်စိုး လည်း ထောင် ကျ ။ ကလေးသုံး ယောက် လည်း ခေါ်မယ့် သူ မရှိဘဲ ဒုက္ခ တွေ ရောက်ခဲ့ရ တယ် ။ ဒီ အရက် ကြောင့် ကျွန်တော်တို့ ရွာမှာ တော်တော် လေး ကို ဒုက္ခ ရောက် နေကြပြီ ။
အရက် ကြောင် ကြောင်ပြီး ကိုယ့် ကိုယ် ကို သ,တ် သေသွား တဲ့ ကျွန်တော့် ရဲ့ သူငယ်ချင်း ဘမောင် အကြောင်း ကို စဉ်းစားမိပြန် သည် ။ ဘမောင် အရက် ကြောင် တာ က တစ် မျိုး ။ မြေပြင် ပေါ် က ကျောက်ခဲ တွေ ကို စိန်ပွင့် တွေ လို့ မြင်ပြီး လိုက် ကောက်နေတာ ။ နောက် ပြီး သူ့ နောက် ကို ငရဲသားတွေ က လိုက်နေတယ် လို့ အမြဲ ပြောတာ ။ ကျွန်တော် တို့ မမြင်ရ မကြားရတွေ ကို သူ က မြင်နေ ကြားနေရတာ ။ သူ့ နောက် မှာ ငရဲခွေးတွေ လိုက် လာတယ်လို့ အော်ပြီး နှစ်ထပ် အိမ်ပေါ် က နေ ခုန်ချ လို့ အသေဆိုး နဲ့ သေခဲ့ရတာ ။
အရက် ရဲ့ ဆိုးကျိုးတွေ ကို တွေးရင်း နဲ့ ရင်ပူလာလို့ ခေါင်းရင်း က ရေအိုးစင် သွား ပြီး ရေ ခပ်သောက် ရသေး တယ် ။ တိတ်ဆိတ်တဲ့ ည အလယ်မှာ တိုင်ထိပ် နာရီဆီ က နာရီ လက်တံ ရွေ့လျား သံ ကို အတိုင်းသား ကြားနေရ တယ် ။ သုံးနာရီ ထိုး သွားပြီ ။ ကျွန်တော် အိပ်မှ ဖြစ်တော့ မယ် ။ ကျွန်တော့် မိန်းမ က တော့ အပူအပင် ကင်းစွာနဲ့ တခူးခူး တခေါခေါ အိပ်ပျော် နေတယ် ။ အိပ်ရာထဲ ပြန်ဝင် စောင်လေး ခြုံပြီး အိပ်ပျော်ဖို့ ကြိုးစားပေမဲ့ ကျွန်တော့် မျက်လုံးတွေက အိပ်စက်ဖို့ ကို ငြင်းဆန် နေတယ် ။ မနက်ခင်း က ဖတ်ခဲ့ရတဲ့ မှုခင်းသတင်း ထဲမှာ အရက် မူးပြီး သမီး အရင်း ကို စော်ကားတဲ့ ဖခင် တစ်ယောက် ရဲ့ အကြောင်း က ခေါင်း ထဲ ရောက် လာတယ် ။ အဲဒီ မှုခင်းသတင်းစာ ထဲ မှာ ပဲ အရက် မူးပြီး သူ့ အမေ ကို ရိုက် နေတဲ့ ပထွေး ကို သား တစ်ယောက် က ရိုက်သတ် တဲ့ သတင်း ပါ သေးတယ် ။ နောက် အရက် မူးပြီး လာ ဆုံးမ တဲ့ အဖေ ကို ဓား နဲ့ လိုက်တဲ့ သားတစ်ယောက် ရဲ့ သတင်း လည်း ပါ သေးတယ် ။ အရက် ကြောင့် ကျွန်တော်တို့ ရွာ တင် မဟုတ်ဘူး ၊ လောကကြီး တောင် ပျက်စီး နေကြပြီ ။
တော် ပါ သေးရဲ့ ။ ကျွန်တော့် ရဲ့ သား က အဲဒီ လောက် မဆိုးသွမ်းသေးလို့ ။ ကျွန်တော့် ရဲ့ သား က အိမ်ထောင်သည် ။ အိုးခွဲ အိမ်ခွဲ နေတဲ့ သူပါ ။ ကျွန်တော့် ရဲ့ သား က ညနေပိုင်းတွေ အရက် သောက် တတ်တယ် ။ အရက် သောက်ပြီး မူးနေတဲ့ သား က အိမ် ကို အလည် လာတော့ သူ့ အမေ ဖြစ်သူ က အရက် မသောက် ဖို့ ဆို ဆုံးမ တယ် ။
“ ဟဲသား ၊ ခွေးတောင် မသောက်တဲ့ အရက်တွေ ကို နင် က ဘာလို့ သောက်နေ တာတုံး ။ အရက် ကြောင့် နင် ဒုက္ခ ရောက်မှာ မကြောက်ဘူးလား ၊ ရောဂါ ရမှာ မကြောက် ဘူးလား ဟင် ”
“ သား ကြိုက်တဲ့ အရက် ကို ခွေး မသောက်တတ်တာ အမှန်ပဲ အမေ ရ ။ ဒါပေမဲ့ အမေ သောက်တဲ့ ဆေးလိပ် ကို လည်း ခွေး က မသောက် တတ်ဘူးလေ ။ ဆေးလိပ်သောက် ရင် လည်း ရောဂါ ရတာပဲ ” လို့ အော်ပြီး အိမ် ပေါ် က နေ ဆင်း ပြေးတာ ။ ဆေးကြမ်းလိပ် အမြဲ ဖွာ တတ်တဲ့ ကျွန်တော့် မိန်းမ ကတော့ စိတ်ဆိုး မာန်ဆိုးနဲ့ ကျန်ခဲ့ ရော ။
တကယ်တော့ အရက် သောက်တဲ့ သားသမီးတွေ ကို ဆိုဆုံးမမယ့် မိဘ ဟာ ပထမ ဆုံး မူးယစ် စေတတ်တဲ့ အရာ တွေကို ရှောင်ကြဉ်ရမယ် လို့ ကျွန်တော် ထင်တယ် ။ ဒါမှ ဆို ဆုံးမ နိုင်မှာပေါ့ ။
ကျွန်တော်တို့ ရွာလေး မှာ အရက်ပုန်းဆိုင်လေး တွေ အများကြီး ရှိတယ် ။ အရက်သမားတွေ ရဲ့ မိန်းမ တချို့က သူတို့ ယောက်ျားတွေ ကို မနိုင်တဲ့ အခါ အဲဒီ အရက်ပုန်းဆိုင်လေးတွေ သွားပြီး ၊ ဥက္ကဌ တိုင်မယ် ၊ ရဲ တိုင်မယ် လို့ ပြောတဲ့ အခါ အရက်ပုန်း ရောင်းတဲ့ သူတွေ က တဟားဟား ရယ် ပြီး “ နင့်ပထွေးတွေ က နင် တို့ ထက် ပို သိတယ် တဲ့ ။ လတိုင်း လိုင်းကြေး အမြဲ လာ တောင်း တယ် ” လို့ ပြော လွှတ်တာ ။
တကယ်တမ်း အရက်သမား တွေ မရှိစေချင် ရင် အရက် သောက်ခြင်း သည် ကျန်းမာရေး ကို ထိခိုက်နိုင်ပါသည် လို့ တီဗွီတွေ ၊ ရေဒီယိုတွေ မှာ ကြော်ငြာနေမယ့် အစား ၊ ပညာပေးတွေ လွှင့်ပေး နေမယ့် အစား အရက်တွေ မရှိ အောင် အရင် လုပ်သင့်တယ် ။ ရောင်း တဲ့ လူတွေ ရှိ နေရင် တွေ သောက်တဲ့ သူတွေ လည်း ရှိနေဦး မှာပဲ ။
“ ဆရာရယ် ၊ တန်ဆေး လွန်ဘေး ဆိုသလို အရက် သောက်တဲ့ အခါ ကောင်းကျိုး ရတဲ့ ဟာ မရှိဘူးလား ”
ဘေးအိမ် က ဆေးခန်း ကို လာတဲ့ အရက်သမား တစ်ယောက် က ဆရာဝန်
ကို အဲဒီ မေးခွန်း မေး ဖူးတယ် ။ ကျွန်တော် လည်း
ဆရာဝန်လေး ဖြေမယ့် အဖြေ စိတ်ဝင်စားတာ နဲ့ နားစိုက် ထောင်ခဲ့တယ် ။
“ အရက် ကို တစ်နေ့ နှစ်ယူနစ် လောက် သောက်ရင် တော့ သူငယ်ပြန်ရောဂါ နဲ့ နှလုံးရောဂါ ကို ကာကွယ် ပေး တယ် ။ အရက် ကို ပိုးသတ်ဆေး အဖြစ် သုံးလို့ ရတယ် ။ ဒါပေမဲ့ အရက် ကို စ , ပြီး မသောက်တာ အကောင်းဆုံးပါ ။ အရက် မှာ မူးယစ်စေ ၊ စွဲလမ်းစေ တတ်တဲ့ ဂုဏ်သတ္တိ တွေ ရှိတယ် ။ အရက် သောက်ရင် အသည်းရောဂါ ၊ အစာအိမ်ရောဂါ ၊ အာရုံကြော ရောဂါ နဲ့ တခြား ရောဂါ ပေါင်းစုံ ရ တတ်တယ်”
အရက် မှာ မူးယစ်စေ ၊ စွဲလမ်းစေတတ်တဲ့ ဂုဏ်သတ္တိ တွေ ရှိ တယ်တဲ့ ။ ဆရာဝန်လေး ရဲ့ ပြောစကား ကို ကျွန် တော် ထောက်ခံစရာ မလိုပါ ၊ ဆရာဝန်လေး ကိုယ်တိုင်ပဲ ထောက်ခံ ခဲ့တယ် ။
ကျွန်တော် က တစ်လ တစ်ခါ မြို့ ပေါ် ကို ပင်စင် လစာ သွား ထုတ် ရတယ် ။ ဆရာဝန်လေး က လည်း ဥပုသ် နေ့တိုင်း ဆေးခန်း ပိတ်ပြီး မြို့ပေါ် ပြန် နားတယ် ။ ကျွန်တော် ပင်စင် လစာ ထုတ်တဲ့ တစ်ညနေ မှာ လုံးဝ ထင်မှတ် မထား တဲ့ မြင်ကွင်း တစ်ခု တွေ့ခဲ့တယ် ။ ပင်စင်လစာ ထုတ်ရတဲ့ နေရာ ရဲ့ အနီးနားက ဘီယာဆိုင် မှာ အရက်သောက် နေကြတဲ့ ဆရာဝန်လေး တို့ သူငယ်ချင်း တစ်စု ကို တွေ့ခဲ့ ရတယ် ။
ဘုရား ...ဘုရား ... ။ လူနာ တွေ ကို ကျတော့ “ အရက် ကို စပြီး မသောက်တာ အကောင်း ဆုံးပဲ ။ အရက် မှာ မူးယစ်စေ ၊ စွဲလမ်း စေ တတ်တဲ့ ဂုဏ်သတ္တိ တွေ ရှိတယ် ။ အရက် သောက် တာ ကောင်းကျိုး မရှိဘူးဗျ ။ ကမ္ဘာ ပေါ် မှာ တစ်နှစ် ကို အရက် ကြောင့် လူပေါင်း နှစ် ဒသမ ငါးသန်းကျော် သေဆုံး နေကြတယ် ။ AIDS တို့ ၊ ငှက် ဖျား တို့ ကြောင့် သေဆုံးနေတဲ့ လူ ပမာဏ ထက် အရက် ကြောင့် သေဆုံးနေရတဲ့ သူက ပိုများတယ် ” လို့ ရွာသူရွာသား တွေ ကို ကျန်းမာရေးပညာ ပေး နေတဲ့ ဆရာဝန်လေး ကိုယ်တိုင် က အရက် မူးပြီး ခေါင်း ငိုက်စိုက် ကျလို့ ။
"တုံ ... တုံ ... တုံ ...”
ရွာဦး ဘုန်းကြီးကျောင်း က နေ လေးနာရီ တုံးခေါက် သံ က လေထု မှ တစ်ဆင့် ပျံ့နှံ့ လာတယ် ။ မကြာခင် ရောင်နီ လာ တော့မယ် ။ ရွာလယ် လမ်းမ ဆီ က ခွေးဟောင်သံ တွေ ကြား ရတယ် ။ သေချာတယ် ၊ ခွေးတွေ ဟောင် တာ အရက်သမားတွေ ပဲ ။ မနက် မှ မလင်းသေးဘူး ။ အရက်ဆိုင် ကို သွား နေကြပြီ ။ ခွေး ဟောင်သံတွေ ကြောင့် မအိ တို့ လည်း အိပ်ရာ နိုး လောက်ပါပြီ ။ တောက် ... ။ ကျွန်တော် လည်း ပြန် အိပ်လို့ ရတော့ မယ် မထင်ပါဘူးဗျာ ။
“ ဂျောက် ... ”
တံခါးပေါက် ဂျက် ( ချက် ) ကို အဖွင့် ကျွန်တော့် မိန်းမ က နိုး သွားပြီး အိပ်ရာ ထဲ က နေ လှမ်း အော်တယ် ။
“ သေနာကြီး ၊ မနက် အစောကြီး ရှိသေး ။ မအိ တို့ အိမ် သွားတော့မယ် မဟုတ် လား ။ ဟို အရည်တွေ သွား မျိုတော့ မယ် မဟုတ်လား ”
“ ငါ လမ်းလျှောက် ထွက် မလို့ပါ ဟ ”
ကျွန်တော့် ပါးစပ် က လိမ်ညာတဲ့ စကားလုံးတွေ အလိုအလျောက် ထွက်ပေါ် လာတယ် ။ သီလ တစ်ပါး ကို ချိုးဖောက်ပြီး တဲ့ အခါ အခြား သီလ တစ်ပါး ကို အလွယ် တကူ ချိုးဖောက် တတ်တယ် ဆိုတဲ့ စကား က သိပ် မှန် တာပဲ ။ ကျွန်တော့် မိန်းမ ပြောတဲ့ စကား က ဟုတ်တယ် ဗျို့ ။
အခု ထ , လာတာ က မအိ တို့ အိမ် ကို သွားမလို့ ။ မအိ ဆိုတာ အရက်ပုန်း ရောင်းတဲ့ မုဆိုးမလေး နာမည် ပဲ ။ ကျွန်တော် လည်း ပင်စင် ယူပြီးကတည်းက အလုပ် မရှိတော့တာ နဲ့ အရက် | ကို စ , သောက်ဖြစ်တာ ။ သောက်ရင်း နဲ့ အရက် ကို စွဲနေ ပြီဗျို့ ။ မသောက်ရရင် မနေ နိုင်တော့ဘူး ။ အရက် မူးပြီး မအိ ကို မထိခလုတ် ထိခလုတ် စ,ရတာ ကလည်း ရင်ခုန်စရာ အကောင်းသား ကလား ။ ဒီ အသက်အရွယ် ကြီး မှ ဒီလို ဖြစ် လာတာ မကောင်းမှန်း တော့ ကျွန်တော် သိပါတယ် ။ ဒါ ပေမဲ့ ဗျာ ... ဒါပေမဲ့ ပေါ့ ။ ပညာရှိ သတိ ဖြစ်ခဲ ဆိုတဲ့ စကား အတိုင်းပါပဲ ။ ခင်ဗျား တို့ အပြစ် တင် ရင်လည်း ကျွန်တော့် အနေ နဲ့ ခေါင်းညိတ်ပြီး ငြိမ် ခံနေရုံပဲ ။ ဆရာဝန်လေး ပြော သလို အရက် မှာ မူးယစ် စေတတ်တဲ့ ၊ စွဲလမ်းစေတတ် တဲ့ ဂုဏ်သတ္တိတွေ ရှိနေတယ် ဆိုတာ ကျွန်တော် ကိုယ်တိုင် ကြုံခဲ့ရပြီ မို့ ယုံလိုက်ပြီ ဗျို့ ။ ကျွန်တော့် မိတ်ဆွေတို့ကို အကြံ တစ်ခု တော့ ပေးချင်တယ်ဗျ ။ အရက် ကို လုံးဝ လုံးဝ မသောက်မိပါစေ နဲ့ လို့ ။
ဟို ...
ကျုပ် လို အရက် စွဲသွား မှာ စိုးလို့ပါ ဗျာ ... အေ့ ..... ။
◾ဟမ်စိုင်း ၊ ဆေး - မန်း ၊
📖 ရွှေအမြုတေ မဂ္ဂဇင်း
၂၀၁၆ ခုနှစ် ၊ ဒီဇင်ဘာလ
#ကိုအောင်နိုင်ဦး
.
