မိုးဥတုတွင် နေအိမ်ပြင်ပထွက်ပြီး နေ့စဉ်သွားလာ အလုပ်လုပ်ကြရသူများသည် ခြေထောက်ရေစိုရာမှ နောက်ဆက်တွဲအဖြစ် ခြေအေးဝမ်းရောင်ခေါ် အစာမကြေ ၊ ၀မ်းဗိုက်လေပွရောဂါနှင့် အသက် ၄၀ ကျော်သူများမှာ သွေးတိုးရောဂါ ၀င်လာတတ်သည်ကို သတိပြုကြရန် တင်ပြလိုပါသည်။
သွေးတိုးရောဂါသည် အစာမှားမှ အငန်စားမှမဟုတ် ပြင်ပအအေးပတ်ဖွဲ့ခြင်း ၊ မိုးမိခြင်းကြောင့်လည်း ဖြစ်နိုင်သည် ။ သွေးစီးဆင်းမှုကြောင့် ပုံမှန်ပူနွေးနေသော သွေးကြောသည် အအေးဓာတ်ကြောင့် ကျုံ့သွားပြီးဖိအားတစ်ခုဖြစ်လာကာ သွေးမသွားနိုင်ဖြစ်ရသည် ။ ထိုအခါ သွေးပုံမှန်သွားစေရန် နှလုံးမှပို၍ ညှစ်အားပေးသည် ။ ထိုအားကို သွေးပေါင်ချိန် ကိရိယာနှင့် တိုင်းသောအခါ BP 140 / 90 mmHg ( အပေါ် သွေးဖိအား ၁၄၀ နှင့် အောက်သွေး ၉၀ မီလီမီတာ/ပြဒါး) အထိခံနိုင်ရည်ရှိသောအနေအထားဖြစ်သည်။ အပေါ်ရော အောက်ပါ ထို့ထက်ဖိအားပိုလာလျှင် သွေးတိုးရောဂါဟုသတ်မှတ်သည်။
မိုးဥတုတွင် နေအိမ်မှ ထွက်သွားချိန်နှင့် ပြန်လာချိန်များကို သွေးပေါင်ချိန် (သွေးဖိအား) မှတ်တမ်းထားရှိ လေ့လာကြည့်သည့်အခါ အိမ်မှမထွက်ခွာမီ ပုံမှန်ဖြစ်သော်လည်း ပြန်ရောက်လာချိန်တွင် မိုးရေစိုခဲ့ခြင်း သို့မဟုတ် ခြေထောက် ရေစိုခဲ့ခြင်းဖြစ်ခဲ့လျှင် သွေးပေါင်ချိန်တက်နေသည်ကို တွေ့ရှိရသည် ။အချိန်ကြာကြာ မိုးမိသည်နှင့်အမျှ ပို၍တက်သည်ကိုလည်း လေ့လာတွေ့ရှိရသည် ။
နံနက်စောစော အစာကိုစားပြီး နေအိမ်မှ ထွက်သွားသူများအတွက် မိုးမိပြီးနောက် အစာမကြေ ဖြစ်လာတတ်သည် ။ ခန္ဓာကိုယ်အအေးပပ်ခြင်း ၊ ခြေနှစ်ဖက် ရေစိုခြင်းကြောင့် ၀မ်းမီးနုံ့ပြီး အစာမကြေဖြစ်သည်ဟု ယူဆရသည် ။ အစာခြေခြင်းကို ၀မ်းမီးခေါ် ပါစက တေဇောဓာတ်က ဆောင်ရွက်သည် ။ ထိုဝမ်းမီးသည် အအေးဓာတ်ကြောင့် အားပျော့သွားခြင်းကို ၀မ်းမီးနုံ့သွားသည်ဟု ရိုးရာဆေးပညာက ဆိုသည် ။ ၀မ်းမီး အားကောင်းလာအောင် ချင်းနှင့် ရေနွေးပူပူကို သောက်ပေးခြင်းဖြင့် အစာကြေစေ နိုင်သည် ။
ငရုတ်ကောင်း ၊ ပိတ်ချင်းနှင့် ချင်းကို တြိကဋတ်သုံးပါးဟု အာယုဗေဒ ဆေးကျမ်းများကဆိုသည် ။ အစာကြေစေသော ( အစပ်သုံးပါး ) ဆေးသုံးပါးဟု ဆိုသည် ။ မိုးဥတုတွင် အပြင်မထွက်မီ အစားအသောက် စားသုံးလျှင် ဟင်းနှင့် ဟင်းချိုတွင် ငရုတ်ကောင်း ခပ်ခြင်း ၊ ချင်းထည့် ချက်ခြင်းဖြင့် အစာကြေအောင် အထောက်အကူ ပြုနိုင်သည် ။ အထူးသဖြင့် အသားဟင်းချက်လျှင် ချင်းကို နိုင်နိုင်ထည့်ချက်လျှင် မိုးဥတုနှင့်သင့်သည် ။
ရှေးလူကြီးများ ခြေအေးလျှင် ၀မ်းရောင်သည်ဟု ဆိုကြသည် ။ မိုးရေစိုချိန် ကြာသဖြင့် ခြေထောက် အေးလာသောအခါ အအေးဓာတ်သည် တဖြည်းဖြည်း အပေါ်သို့တက်လာပြီး ချက်တိုင်နှင့် ၀မ်းဗိုက်အထိ ရောက်လာသည် ။ အစာမကြေဖြစ်လာသည် ။ အစာမကြေလျှင် လေပွလာပြီး ၀မ်းဗိုက်သည် တင်းပြီး ဖောင်းလာသည်ကို ၀မ်းရောင်သည်ဟု ခေါ်ခြင်းဖြစ်သည် ။ အစာမကြေခြင်း၏ နောက်ဆက်တွဲ ရောဂါများမှာ ခေါင်းကိုက် ၊ ခေါင်းအုံခြင်းနှင့် သွေးတိုးရောဂါဖြစ်သည် ။
မိုးရွာထဲမှ ပြန်လာပြီးနောက် ကိုယ်တစ်ခြမ်း လေဖြတ်သွားသူကို တွေ့ဖူးသည် ။ အသက်၅၀ ခန့် အရွယ်ကောင်းဖြစ်သည် ။ ယခင်က သွေးတိုးဖူးသည် ။ သို့သော် အမြဲမတိုးသဖြင့် သွေးကျဆေးကို ပုံမှန် မသောက်ဟု ဆိုသည် ။နေအိမ်တွင် လဲကျသဖြင့် ဆေးရုံပို့သောအခါ သွေးပေါင်အလွန်တက်ပြီး ဦးနှောက်အတွင်း သွေးခဲရောက်သဖြင့် ပိတ်ဆို့ပြီး လေဖြတ်ရခြင်းဖြစ်သည်ဟုဆိုသည်။ ခြေအေးခြင်းမှ စခဲ့သည့် သွေးတိုးရောဂါဖြစ်သည် ။ သတိပြုကြစေရန် တင်ပြရခြင်းဖြစ်သည်။
သွေးတိုးရောဂါသည် သွေးအပျစ် ၊ အကျဲနှင့်လည်း ဆိုင်သည် ။ ပူလျှင် သွေးကျဲသည် ။ အေးလျှင် သွေးပျစ်သည်ဟုဆိုသည် ။ သွေးတိုးနှင့် နှလုံးရောဂါ ရေရှည် ဖြစ်နေသူများကို အထူးကု ဆရာဝန်ကြီးများက သွေးတိုးကျဆေးသာမက သွေးကျဲဆေးကိုပါ တွဲ၍ပေးသည်ကို တွေ့ရှိရသည် ။
မိုးဥတုသည် စွတ်စိုထိုင်းမှိုင်းသော ဥတုဖြစ်သဖြင့် သွေးထိုင်းသော ဥတုဖြစ်သည် ။ သက်ဥတုဖြစ်သည်ဟု မြန်မာဆေးဆရာကြီးများက ယူဆသည် ။ ၀မ်းပျက်လွယ်သော ဥတုဖြစ်သည် ။ ချဉ်ပေါင်ဟင်း ၊ ပဲဟင်းနှင့် အမှည့်လွန်သောအသီးများကို သတိထားစားသုံးသင့်သည် ။ အမှည့်လွန် သရက်သီးကို စားသုံးပြီး ၀မ်းမထိန်းနိုင်ဖြစ်ကာ ဆေးရုံရောက်ရသည့် လူကြီးများကို မိုးဥတုတွင်တွေ့ရသည် ။
အသီးအနှံပင် ဖြစ်သော်လည်း အမှည့်လွန်လျှင် ၀မ်းဗိုက်ကို ဥပဒ်ပေးတတ်သည် ။
မိုးရွာထဲတွင် ကြွေကျသည့်သရက်သီးမှည့်များကို ကောက်၍ စားသုံးသည့် ကလေးငယ်များ ခြေအေးဝမ်းရောင်ရောဂါနှင့် ၀မ်းလျှောဝမ်းပျက်ရောဂါဖြစ်ကြသည်ကို တွေ့ရသည် ။ဆေးဆိုးသည့် အစာမှ အန္တရာယ်ရှိသည်မဟုတ်။ မိုးမိကြွေ ၊ လေကြွေ အသီးအနှံများသည်လည်း အစာအိမ်ကို ဒုက္ခပေး တတ်သည်ကို သတိပြုကြစေလိုသည် ။
ရှေးကလူကြီးများသည် ရေမျောလာသည့် အသီးအနှံကို မစားရဟုဆိုသည် ။အချိန်ကြာမြင့်စွာ ရေစိမ်ပြီး ပွလာသည့် အသီးအနှံသည် အစာအိမ်နှင့် မသင့်ပါ ။ အာပေါဓာတ်လွန်ပြီး ပွဖောင်းသည့် အစာသည် ၀မ်းနှင့် ရင်ကို ဥပဒ်ပေးတတ်သည် ။ အချိန်လွန်၍ ရေစိမ်သော ပဲကြီး ၊ ပဲပင်ပေါက် နှင့် ပဲပြားများသည်လည်း ၀မ်းဖော ၀မ်းရောင်ဖြစ်စေနိုင်သည်ဟုဆိုသည် ။
ယောအတွင်းဝန်မင်းကြီး ဦးဖိုးလှိုင် ရေးသားပြုစုသော ကာယနုပဿနာကျမ်း ( မင်းတုန်းမင်းတရားကြီး လက်ထက်က ပြုစုသည် ) တွင် “ ရုပ်ကိုဖြစ်စေသောဥတု ” အကြောင်းဖော်ပြထားသည်မှာ ...
အအေးအပူ ဖြစ်သော တေဇောဓာတ်သည် ဥတုမည်၏ ။ ထို တေဇောဓာတ်သည် လေးပါးသော အကြောင်းတို့ကြောင့် ဖြစ်ကုန်၏ ။ လောက ဝေါဟာရအားဖြင့် အအေး ၊ အပူ နှစ်မျိုးရှိသည် ။ ဥတု ဟူသည်ကား တေဇောဓာတ်၏ ရုပ်သဘောဖြစ်၍ ဥပါဒ် ခဏ ၊ ဘင် ခဏသည် စိတ်နှင့်အတူတကွ ဖြစ်သောကြောင့် လည်းကောင်း. . . ဟု ရေးသားထားသည် ။
ရုပ်သဘောအရ နေကောင်းနေသူသည် ဥတုကြောင့် နေမကောင်းဖြစ်နိုင်သည် ။ ဥတုပျက်ခြင်းကြောင့် ရုပ်ကိုထိခိုက်စေနိုင်သည် ဟုယူဆရမည် ။ ဥတု မကောင်းသည့်အခါတွင် နေကောင်း ကျန်းမာနေသူများပင် အသွားအလာအနေအထိုင် ဆင်ခြင်သင့်သည့် သဘောဖြစ်သည် ။
ခြေဖ၀ါးတွင် ပထ၀ီကြောများ ရှိသည်ဟု ဆိုသည် ။ ရှေးကလူများသည် ဖိနပ်မစီးကြ ။ ခြေဖ၀ါးနှင့် မြေကြီးထိ၍ ခရီးသွားကြသည် ။ ထိုအခါ မြေကြီးမှ အခိုးအငွေ့ ပထ၀ီဓာတ်ရ၍ ကျန်းမာသည်ဟုဆိုသည် ။ ကလေးငယ်များကို မြေကြီးပေါ်တွင် ပေး၍ ဆော့ကစားစေလျှင် ကျန်းမာရေးကောင်းစေသည် ၊ သန်မာစေသည်ဟု ဆိုသည် ။
ဖိနပ်စီးသောခေတ်သို့ ရောက်ရှိလာသောအခါ သားရေဖိနပ် ၊ ရာဘာဖိနပ်များသည် အခိုးပိတ် စေသည်ဟုဆိုသည် ။ တစ်ခါတစ်ရံ ဖိနပ်ချွတ်၍ မြေကြီးပေါ်တွင် လမ်းလျှောက်ပေးလျှင် ကျန်းမာစေနိုင်သည်။ ခြေဖ၀ါးမှ ပထ၀ီကြောများ သန်မာစေနိုင်သည်ဟု ရှေးအယူအဆရှိသည် ။ အုန်းမှုတ်ခွက် နင်းခြင်း ၊ဆားနင်းခြင်းများသည် ခြေဖ၀ါးမှ အခိုးထွက်စေသော နည်းများဖြစ်သည် ။
ခြေဖ၀ါးကို အချိန်ကြာမြင့်စွာ ရေစိုခြင်းမှာ ဖ၀ါး ပထ၀ီကြောများ အေးစက်ပြီး အခိုးငုပ်စေသဖြင့် မကောင်းသော အနေအထားဖြစ်သည် ။ ရေစိုသော ခြေထောက်ကို အမြန်ခြောက်သွေ့အောင် ပြုလုပ်သင့်သည် ။ ပြင်ပမှပြန်လာလျှင် ခြေထောက်မှ ရေကို စုပ်ယူနိုင်သည့် ခြေသုတ်ခုံမျိုး ထားသင့်သည် ။ လူကြီးများ ခြေထောက်ရေစိုလျှင် အ၀တ်ခြောက်ဖြင့် သေချာစွာသုတ်ပေးပါ ။
မိုးဥတုတွင် နေအိမ်ပြင်ပရောက်လျှင် စိုနေသော အ၀တ်အစားများကို လဲခြင်း ၊ ဦးခေါင်းရေစိုလျှင် တဘက်ပ၀ါဖြင့်သုတ်ခြင်း ၊ ခြေနှစ်ဖက် (အထူးသဖြင့်) ခြေဖ၀ါးနှစ်ဖက်ကို ခြောက်သွေ့သောအ၀တ်ဖြင့် ပွတ်ပြီး နွေးထွေးအောင် ပြုလုပ်ခြင်းဖြင့် ခြေအေးဝမ်းရောင်ရောဂါ ၊ နောက်ဆက်တွဲ သွေးတိုးရောဂါများ ကာကွယ်နိုင်ကြောင်း တင်ပြလိုက်ရပေသည် ။
ကြည်လွင်မြင့် ( မုဒြာ )
ကြေးမုံ ၄-၇-၂၀၁၆
