( ၅ )
ယခင် ဆောင်းပါးတွင် ဆိုခဲ့သည့် အတိုင်း အများ စုသော ပြည်သူလူထု သည် အနုပညာရှင်များ အပေါ်တွင် ဤ၍ ဤမျှ မေတ္တာတရား ကြီးမားလှ ချေသည် ။ ချစ်ကြသည် ။ ခင်မင်ကြ သည် ။ အရွယ်ကို လိုက်၍ လေးစား ကြသည် ။ ထို့ထက် တစ်ဆင့်တက်၍ ဆိုရသော် အများ ပြည်သူတို့ သည် အနုပညာရှင် ဆိုလျှင် ( တ ဖူးဖူးမှုတ် ) ထားချင်ကြသည် ။
အကြင် အနုပညာရှင် တစ်ဦးတလေ အိမ် လာ လည် လျှင် တွေ့သမျှ အသိ မိတ်ဆွေကို ပြောပြ ရင်း ဂုဏ်ယူကြသည် ။
“ ကျွန်မတို့ အိမ်တော့ ထမင်းတောင် စားသွားသေး ... ”
အစရှိသည် ဖြင့် အားကျမခံ အနိုင် ယူ တတ်ကြ ပြန်သေးသည် ။
ထို့ ထက် အကွက် လည်အောင် ရေးပြရန် မလိုပါ ။ စာရှုသူ တလောကလုံး သိကြသည် ။ မိမိ တို့ အိမ် သို့ လာ လည်သည် ထမင်းစားသည် ကို မဆိုထားဘိ ။ ရုပ်ရှင်ရိုက် နေသည် ဟု သတင်း ကြား လျှင် ပင် လှုပ်လှုပ်ရွရွ အပြေးအလွှား သွား ကြည့်ကြသည် ။ သို့မဟုတ် ထိန်း၍ မ ရအောင် ဝိုင်းအုံ ကြည့်ရှုနေ သော လူ အုပ်ကြီး ကို မြင်ဖူးကြပေချိမ့်မည် ။
ဤလို ချစ်မြတ်နိုးမှု ကို ပြည်သူလူထု ထံ မှ ရရှိရန် လွယ်ကူသည် မဟုတ် ၊ အထက် ၌ ဥပမာ ယှဉ် ၍ ပင် ပြခဲ့ပြီးပြီ ။
သို့ပါလျက် အချို့သော ရုပ်ရှင်မင်းသား ၊ မင်းသမီး တို့ သည် ပြည်သူ့ မေတ္တာရိပ် ခိုလှုံ နေရာမှ ဘေး ပဲ့ ထွက် တတ်ကြသည် ။ နောင်တွင် ပြည်သူတို့ ၏ ချစ်မေတ္တာထီးရိပ် မှ ရှောင်ဖယ် မသွားမိအောင် သတိ ကျပ်ကျပ် ထားရန် လို လာပြီ ။
သိကြ ကြားကြ ပြီး ဖြစ်သော သရုပ်ဆောင် အထီး အမတို့ ၏ မရှင်း မရှင်း ပြဿနာများ ကြောင့် နှာခေါင်းရှုံ့ ခံ နေကြရသော အချို့ သရုပ်ဆောင်များ အား သာဓု သနား မိသည် ။ ရင်လည်း နာသည် ။ နှမြောတသ နှင့် ယူကျုံးမရ ရှိလှ သည် ။ သူတို့ တစ်တွေ နာမည် ပျက်ရသော ( ဝါ ) ပြည်သူ တို့ မေတ္တာ ကုန် ရသော အကြောင်းအရင်း မှာ သူတို့ မွှေး သော မီး က သူတို့ အား ပြန် လောင် သည့် ကိစ္စ ဖြစ်ချေသည် ။ ယင်း ကိစ္စ သည် သူတို့ ၏ ( ဖို + မ ) ပြဿနာ ။
နောင်တွင် တောက်ပလာမည့် အနုပညာ ကြယ်ကလေးများ အတွက် ပါ သတိတရား ရစေသော ငှာ ပွင့်ပွင့်လင်းလင်းပင် ဖော်ပြရ တော့မည် ။
ဆိုကြပါစို့ ...
သရုပ်ဆောင် မင်းသား ဇနီးမောင်နှံ ။
သရုပ်ဆောင် မင်းသမီး ဇနီးမောင်နှံ ။
နှစ်ဦးစလုံး သရုပ်ဆောင် ဇနီးမောင်နှံ ။
သရုပ်ဆောင် မင်းသား ဇနီး မောင်နှံ ဆိုရာ ၌ ဇနီး သည် က သရုပ်ဆောင် မဟုတ် အရပ်သူ ။ ဤလို အတွဲများ အနက် အချို့သော မင်းသား တို့ သည် မနူးမနပ် မိန်းကလေးများ နှင့် ထွေးလုံးရစ်ပတ် ရှုပ်ယှက်ခတ် တတ် ကြသည် ။
ငယ်ရွယ်သူ မြီးကောင်ပေါက် ကလေးများ က ( စ ) လာသည့် တိုင် မိမိ တို့ က နှမသားချင်း သဖွယ် သဘောထား ရှောင်ရှားရမည် ။ ပညာ ပေး ဆုံးမစကား ပြောရမည် ။ ထိုထို ကောင်မလေးများ ၏ ဆက်ဆံ ပုံ မ ဟန်လျှင် ရပ်တန်း က ရပ် ပစ်ရန်သာ ရှိသည် ။ ကိုယ် က ပါ ရော ၍ ပလူးရန် မဟုတ် ။
သဘင် ၊ ဂီတ ၊ ရုပ်ရှင်နယ် မှ ကျော်ကြားနေသူ အတော်များများ သော အနုပညာရှင် ( အထီး ) များ သည် မိမိ ကို လေးစား၍ သဘောကျ နှစ်ခြိုက်၍ ဓာတ်ပုံ တောင်း လျှင် စာ ရေး လျှင် တစ်ချိန်တည်း ရည်စား လုပ် ပစ်ချင်ကြသည် ။ ရိသဲ့သဲ့ စာပြန် လေချေ ၏ တကား ။
ယုတ်မာလှသည် ။ လူပျို လူလွတ် အနုပညာရှင်များ ပင်လျှင် စည်းစောင့်သင့်သော ကိစ္စ ဖြစ်ပါ လျှက် မယား လက်ရှိ နှင့် အနုပညာ ငနဲများ က ပို၍ နန့်ကြော ထ နေကြသည် ။ သူတို့ ထံ စာ မရေးနှင့် ။ ရေး မိသည် နှင့် ဂီတသမား က တီးဝိုင်း ၊ အဆိုဝိုင်း ရှိ ရာ ချိန်းသည် ။ ရုပ်ရှင်သမား က ကား ရိုက်ရာ သို့ ခေါ်သည် ။ ဇာတ်သဘင် ငနဲ တို့ ကလည်း ဇာတ်စင် ပေါ်ရှိ သီးသန့် အခန်း သို့ ဖိတ်မန္တက ပြုသည် ။ အသီးသီး ပြဿနာ လုပ်ကြတော့သည် ။
ကောင်မလေး တစ်ယောက် က ဆရာဝန် တစ်ဦး တစ်ယောက် ကို မေတ္တာ ရှိ သည် ထား ။ ဤသည် မှာ ဆရာဝန် ၏ ဆေးပညာ ၊ ရုပ်ရည် တစ်ခုခု နှင့် သက်ဆိုင်သည် ။ ညွှန်ကြားရေးမှူး တစ်ယောက် ကို ကြိုက်သည် ဆိုပါကလည်း ရာထူး ကိစ္စ သာ ဖြစ်ချေမည် ။ ( တစ် နည်း ) သူ ၏ ရုပ်သဏ္ဌာန် ခန့်ညား၍ သော်လည်း ဖြစ်နိုင်သည် ။
တစ်ဖန် ကောင်မလေး တစ်ဦး တစ်ယောက် သည် ကျောင်းနေဖက် ကျောင်းသား ကို လည်း ကောင်း ၊ ရယ်စရာ အပြော ကောင်းသော အရပ် ထဲ မှ ချာတိတ် ကို လည်းကောင်း ၊ တိုက်ပွဲပြန် စစ်ဗိုလ် တစ်ဦး ကို လည်းကောင်း ၊ ရာထူး ၊ ရုပ်ရည် ၊ အပြု အမူ အစရှိသည့် တစ်စုံတစ်ရာ ကို လည်းကောင်း စိတ် နှင့် တွေ့ ၍ မေတ္တာ ရှိမိသည်ထား ။ ကောင်မလေး ကိုယ် နှိုက် က စတင် အကြောင်း ဖန် ရန် လွယ်ကူ သည် မဟုတ် ။
အနုပညာ ငနဲများ ကို အစဖော်ရန် ကား အလွန် လွယ်လှသည် ။ အဆို ကောင်း ၍ အက ကောင်း ၍ သရုပ်ဆောင်မှု ပီပြင် ၍ စသဖြင့် အနုပညာ ကို ဦးတည်၍ ချီးကျူး စာ ရေး လိုက်လျှင် ကိစ္စ ပြီးသည် ။ အနုပညာရှင် ဆိုသူ ငနဲ တို့ ကလည်း ကိလေသာ မုဆိုး ကဲ့ သို့ မိတ်ဆက်စာ တစ်စောင် ရောက် လာ လျှင် သမင်မလေး တစ် ကောင် ဟူ၍ ရေတွက် နေ ကြသည် ။
ကျီး အတောင်ပေါက်စ တစ်ကောင် ကဲ့သို့သော မြီးကောင်ပေါက်မကလေးများ က လည်း ( အနု ပညာ ) ကို အကြောင်း ပြု၍ ဂုဏ်ပြု စာ ရေးသည် ။ ထိုထို ဇာတ်သဘင် ၊ ဂီတ ၊ ရုပ်ရှင် သမားတွေ က လည်း ( အနုပညာ ) ကို အကြောင်းပြု စာပြန် ၊ ဟိုချိန်း ၊ သည် ချိန်း ၊ အနုပညာ ကို ခုတုံး လုပ်၍ ရှုပ် နေကြသည် ။ အနုပညာ၏ ဂုဏ်သိက္ခာမှေးမှ န်နေရသည် ။ သေးသိမ်နေရပြီ ။
စာကြောင်းများ ပင် ထပ်နေပြီ လား မပြောတတ် ။ ယခုခေတ် ကောင်မလေးများ တော်တော် ခက် ကြသည် ။ ခက်သည် ဆိုရာတွင် သာဓု တို့ ဘက် မှ ( ဝါ ) မိဘများ ၊ အုပ်ထိန်းသူများ ဘက် မှ အထိန်း ရ ခက်သော အခက် ကို ဆို လိုပါသည် ။
သူတို့ ဘက်မှ မူ အလွန် လွယ်နေကြသည် ။ ကိုယ်တွေ့ တစ်ရပ် ပြောရ မည် ဆိုလျှင် ...
တစ်ကြိမ်သော တစ်နှစ်သော အခါ က တောင်သူလယ်သမားနေ့ မြေပဒေသာကျွန်း ပျော်ပွဲ ရွှင်ပွဲ အတွက် ပြဇာတ် က ရန် စည်းဝေးကြစဉ် က သာဓု နားလေး သည် ကို အကြောင်းပြု ၍ ဦးရဲခေါင် က ...
“ ခင်ဗျား နဲ့ စကား ပြောရတာ တယ် မောတာပဲဗျာ ”
“ အဲ ... နောက် မမောရအောင် နိုင်ငံခြား သွားရင် နားကြပ် တစ်ခု ဝယ် ခဲ့ပေါ့ဗျာ ”
သာဓု ကလည်း ဤလို ပြန် ပြော လိုက်ပြီးနောက် ၅ ရက် လောက် အ ကြာ တွင် ဦးရဲခေါင် အမေရိကန် သွား သည့် ဓာတ်ပုံ သတင်းစာ တွင် တွေ့ရ သဖြင့် ( နားကြပ် ) နားကြားကိရိယာ ပါ လာလျှင် မည်မျှ ကောင်းလေမည် နည်း ဟု ရော်ရမ်း တမ်းတ မိ၏ ။ ထို့နောက် ၄ - ၅ ရက် ကြာ တွင် ပင် မြေပဒေသာ မှ ဦးရဲဆွေ ရောက် လာ ပြီး နားကြား ကိရိယာ တစ်ခု ပေး၏ ။ ဝန်ကြီးဦးရဲခေါင် ပေး ခိုင်းသည် ဟူ၏ ။
“ မောင်မင်းကြီးသား ကျန်းမာ ချမ်းသာပါစေ ” ဟု သာဓု က သာဓု ခေါ်ရင်း ဆုတောင်းမိ၏ ။
ထိုအချိန်က သာဓု အစည်းအဝေး ပေါင်းစုံ တက် နေရသည် ဖြစ်ရာ နားကြပ် မပါဘဲ တက်ရ စဉ်က ယောင်နန ၊ မကြား ရ၍ အနီး မှ လူ အား မေးရသည် ။ အလွန် စိတ်မော ရသည် ။ နားကြပ် ရပြီး သောအခါ
“ ဗျို့ ... ဝန်ကြီး ၊ ရဲဘော်ကြီးသခင်ဖေသန်း ကို အတင်းပြောလို့ မရတော့ဘူး နော် ၊ ဒီမှာ နားကြပ် ရနေ ပြီ ” ဟူ ၍ ပင် လက်မ ထောင်၍ ဝန်ကြီး ကို အံတု နိုင် လာသည် ။ နားကြပ် တပ် ရသည့် အခါ တိုင်း သူ့ အား မေတ္တာ ပို့ နေ ရပါသည် ။
နောက်မကြာမီ မြေပဒေသာကျွန်း အတွက် ဇာတ် တိုက်ကြကာ တစ်နေ့သော် ရုပ်ရှင် ကော်ပိုရေးရှင်း အစည်းအဝေး မှ အပြန် အောင်တေဇ ရုပ်ရှင်ထုတ်လုပ်ရေးတိုက် တွင် ခေတ္တ ဝင် အမော ဖြေ ၊ လက်ဖက်ရည် သောက်နေစဉ် လွယ်အိတ်ကလေး နှင့် ကျောင်းသူလေး တစ်ယောက် ဝင်လာ သည် ။
“ ဆရာ ၊ ဒီ ကောင်မလေး ကို သင့်တော်မယ့် အခန်း က ရုပ်ရှင် ရိုက်ပေး ပါလား ဆရာ ၊ သိပ် ဝါသနာပါတယ် ”
ရုပ်ရှင်များ ထဲ တွင် ဆရာဝန် အခန်း မှ ပါလေ့ ရှိသူ မစ္စတာဆင်း က ပြော သဖြင့် ကလေးမ အား ဂရုစိုက် ကြည့် ရာ ၁၈ နှစ် ထက် ကျော်ပုံ မရ သေး ။
“ မြင်တဲ့ အတိုင်း ပဲ ဆရာ ရေ ၊ တစ်နေ့ တစ်နေ့ အဲလိုပဲ ရုပ်ရှင် ကုမ္ပဏီ တွေ လျှောက်သွားပြီး ၊ ရုပ်ရှင် ရိုက်ရနိုးနဲ့ ... ” ဟု အောင်တေဇ ရုပ်ရှင်ပိုင်ရှင် မောင်တင်ကြီး က ဝင် ပြောပြန်သည် နှင့် သူ့ အား သာဓု က လှမ်း ခေါ်လိုက်ပြီး အဖော် ပါ မပါ မေး ရာ မောင်တင်ကြီး က ပင် ဆက်၍ ...
“ ဘယ်တော့မှ မပါဘူး ဆရာရဲ့ ၊ အဲ ဒါကို ကျွန်တော် ကလဲ စိတ် ပူလို့ တစ်ယောက်တည်း လျှောက် မသွားဖို့ ပြောတာ မရဘူး ၊ ဝါသနာ က ကြီး လွန်း အားကြီးတယ် ဆရာ ”
အသက် လည်း ငယ်သည် ။ ရုပ်ရည် အားဖြင့် လည်း မျှော်လင့် ချက် ရှိသည် ။ အရပ်အမောင်း ကောင်းသည် ၊ ကြိုးစားလျှင် တောက်ပြောင် သော မင်းသမီး တစ်လက် ဖြစ်လာနိုင်သည့် လိုအပ်ချက် များ လည်း သူ့ တွင် ရှိသည် ။
စောစောက မောင်တင်ကြီး ပြော သည့် အတိုင်း ရုပ်ရှင်ဝါသနာ ပြင်းထန် လွန်း၍ တစ်ယောက် ထီး တည်း ရုပ်ရှင်ကုမ္ပဏီများ သို့ လျှောက် သွားနေသည် မှာ မကောင်း ၊ အလွန် အန္တရာယ် ကြီးလှသဖြင့် ...
“ ကဲ ၊ ညိုပြာ ခုလို လျှောက်သွား မ နေနဲ့ တော့ ။ သမီး နဲ့ လိုက်တဲ့ အခန်း ပေါ် ရင် ဆရာ ခေါ်မယ် ” ဟု နှစ်သိမ့် ပြီး ၊ လိပ်စာ ယူ ထား လိုက်သည် ၌ နောက် ၂ ရက်ခန့် အကြာ တွင် မှာ ပင် မြေပဒေသာ ၌ ကပြရန် အတွက် ညိုပြာ တို့ အရွယ် တစ်ယောက် လို လာ သဖြင့် ချက်ချင်း ကား လွှတ်၍ ညိုပြာ ကို အခေါ် ခိုင်း လိုက်သည် ။
ညိုပြာ သည် အမည် မှန် မဟုတ်ပါ ။
အတို ရုန်း ကြပါစို့ ။
ဇာတ် တိုက်ကြသည် ။ ညိုပြာ မှာ ထင်ထားသည် ထက် ပို၍ သွက်လက် သောကြောင့် သူ့ တက်လမ်း အတွက် သာဓု ဝမ်းသာ ရ ချေသည် ။
ပထမ ပွဲဦးထွက် ည က ကပြပြီး ကြ ၍ ထမင်း စားကြမည် အပြု တွင် ညိုပြာ ပျောက် နေ သဖြင့် ပွဲခင်း ထဲ ရော ဇာတ်စင် ပေါ် မှာ အရှာ ခိုင်း လိုက်ဆဲ သူ ကမူ အပူအပင် မရှိ နာမည်ကြီး မင်းသား တစ်ယောက် နှင့် အတူ သာဓု တို့ ထမင်းပွဲ သို့ ရောက် လာသည် ။
“ ဘဘ ၊ ဒီ အစ်ကို ကလေ မော်လမြိုင် ကား ရိုက် သွားရင် လိုက်ခဲ့ပါ တဲ့ ခေါ် နေတယ် ”
သာဓု ဒိုင်းခနဲ ဒေါသ ထွက် မိသည် နှင့် “ ဟေ့ကောင် ၊ မင်း ဟာ က ဘာ သဘောလဲ ၊ ဒီ ကောင်မလေး က ငါ့ ကွပ်ကဲမှု နဲ့ ငါ့ ဩဇာ အောက် မှာ ပညာ ယူရမယ် ကြံကာ ရှိသေးတယ် ။ မင်း က ”
“ မဟုတ်ပါဘူး ဆရာ ၊ ဒီလို ... ”
“ ဟုတ်ဟုတ် မဟုတ်ဟုတ် ၊ အမှန် အတိုင်း ဆိုရင် မင်း ငါ့ ကို လာ ပြောရ မယ် ၊ သူ့ မိဘ ဆီ မှာ ငါ တာဝန် ခံ ထား ရတာကွ ”
သာဓု အော်ငေါက် လွှတ် လိုက်ပြီး ညိုပြာ ကို မေးသော အခါ မြုံစိစိ လုပ် နေသည် ။ စားသောက်ပြီး ကြသော် အားလုံးကို ကား ဖြင့် ပြန် လွှတ်ပြီး သာဓု က ဇာတ်စင် ပေါ် တွင် နေရစ်ခဲ့ ပြီး စုံစမ်းရာ လာ သမျှ မင်းသားများ ကို သူ က အတင်း လိုက် မိတ်ဖွဲ့သည် ဟု သိ ရ၍ သာဓု ခေါင်း ကြီး သွားသည် ။
ညိုပြာ နှင့် လိုက် လာသော မင်းသား သည် ကိလေသာ ဘက် တွင် နာမည် ကြီးသူ ။ မိန်းကလေး များ ကို ပူးကပ် ဆွယ်မြှူ ရတတ် သမျှ ချူ ရာ တွင် အရှက် မဲ့ သူ ဖြစ်၍ ဟိုးလေးတကျော် ဖြစ်ခဲ့ရပေါင်း များ ပြီ ။ သူ နှင့် အတူ သူ့ အစ်ကို သည် လည်း ဤမှာ ဘက် ၌ နာမည်ကြီး ။
သာဓု အလုပ် ရှုပ်ရတော့သည် ။ နောက် တစ်နေ့ ကပြ ရန် ညိုပြာ နေရာ တွင် အစားထိုးရေး အတွက် ကမန်းကတန်း ရှာ တက်သုတ်ရိုက် ဇာတ် တိုက် နေခိုက် ညိုပြာ မိဘ ထံ စာ တစ်စောင် ( အကြောင်းစုံ ဖော်ပြ၍ ) ရေးသား ပေးပို့ ကာ ထိုနေ့ မှ စ၍ ပယ် လိုက်ရ ချေသည် ။
တစ်လခန့် ကြာသော် သတင်း တစ်ခု ရောက်လာသည် ။ ညိုပြာ ကို ထို ညီအစ်ကို က မော်လမြိုင် သို့ ခေါ်သွား ပြီး သီချင်းဆို တီးဝိုင်း ( စတိတ် ရှိုး ) အခန်း အတွက် ၅ စက္ကန့်စာ လောက် ရုပ်ရှင် ရိုက်သည် ။ ညိုပြာ ပေး လိုက်ရသော တန်ဖိုး ကား တစ် ဘဝ စာ ။
အဆိုပါ မြေပဒေသာ ပြဇာတ် တွင် ယခု ချယ်ရီ အယ်ဒီတာ အောင်ပြည့် လည်း ပါသည် ။ ညိုပြာ ပြဿနာ လုပ်၍ ချက်ချင်း ဖြုတ် လိုက်ရစဉ် က အောင်ပြည့် ကပင် ကွယ် ရာ၌ သာဓု ကို ( ဦးဒေါသ ) ဟု အပြစ် တင် သံ ကြား ရသည် ။ နောက် မော်လမြိုင် ဇာတ်လမ်း ပြော ပြလိုက်ရင်း က ..
“ ဘယ့်နှယ့်လဲကွ သားကြီး ၊ အောင်ပြည့် ဆရာဦးဒေါသ လား ”
“ ဒီလိုလေးပါ ဆရာ ၊ ဆရာ က ကောင်မလေး ကို ချက်ချင်း ဖြုတ် နောက် တစ်ယောက် ချက်ချင်း ရှာ ချက်ချင်း သင်ပြီး ဇာတ်တိုက်ရ ၊ ဆရာ ပင်ပန်းတာ မကြည့်နိုင်လို့ ... ”
“ အေး ။ ဆရာ က ဟင် ဆိုရင် မရ တော့ဘူး ၊ ပင်ပန်းလို့ လဲ သေပလေ့ စေ ဒါမျိုးတော့ သည်း မခံ နိုင်ဘူး ၊ မြွေ သေ ရင် သေ မသေရင် တုတ်ကျိုး ၊ ဒါပဲ ”
ဤလို ကောင်မလေးမျိုး နှင့် အနှီ လို အကောင်မျိုး တွေ ကြောင့် အနုပညာ ဟူသော နာမဝိသေသန ညှိုး မှိန် နေရချေသည် ။ ဤ ဆောင်းပါး အစ တွင် တင်ပြခဲ့သည့် အတိုင်း အနုပညာရှင် ဆိုပါက မည်သူနှင့် မျှ မတူအောင် အရေး ပေး ကြသည် ။ ချစ်ကြ ခင်ကြသည် ။ သင်္ဘောဆိပ် အထိ ဆင်း ကြည့် ကြို ဆိုတတ်ကြသည် မှာ တပြုံးပြုံး တရွှင်ရွှင် နှင့် ၊ ဤလို အခွင့်အရေး နှင့် ဂုဏ်မျိုး လူတိုင်း မရနိုင် ။ ယင်း ကဲ့သို့သော မြတ်နိုးမှု သည် ( အနုပညာသည် ) များ အတွက် သီးသန့် ထား အပ်သော မြှောက်စားမှု တစ်ရပ် ဟု ဆိုချင်သည် ။
အများ လူထု က အနုပညာ ကို အခြေခံ၍ အနုပညာရှင်များ ကို ချစ် မေတ္တာ များကြသည် ။ အနုပညာရှင် အတော်များများ က မူ အနုပညာ ကို ခုတုံး လုပ်၍ ခလောက် ဆန်နေကြ သည် ။
အချို့သော အနုပညာရှင် ၊ အထူးသဖြင့် ရုပ်ရှင်သရုပ်ဆောင် အိမ်ထောင်သည် တို့ သည် လည်း ရှိရင်းစွဲ ကို ပြတ်စဲကာ ထည်လဲ နှင့် အပျော် တွဲ လမ်းတွင် စခန်း သွား နေ ကြသည် ။
ဖူးဖူးမှုတ် မျှ ချစ်မေတ္တာ ထားပြီး အားပေးနေကြသည့် အများ ပြည်သူ တို့ အား ကွယ်ရာ မှာ လှောင်ကြ ပြောင်ပြ နေသလို ဖြစ် နေချေပြီ ။
သွေး နှင့် ကိုယ် သား နှင့် ကိုယ် ဖြစ် ၍ ဖိုမကိစ္စ ရှိနေကြသည် ကို သာဓု မငြင်း ၊ မကန့်ကွက် ။
အယ်လစ်စဘက်တေလာ ဆိုလျှင် စာရှုသူတိုင်း သိကြသည် ။ သူ သည် ကမ္ဘာကျော်ရုပ်ရှင် မင်းသမီး ကုဋေ ကြွယ် သူဌေးမ ၊ အနုပညာရှင် ။
သူ့ တွင် လည်း ဖိုမပြဿနာ ရှိသည် သာ ဖြစ်စေကာမူ တိတ်တခိုး ကမြင်းသူ မဟုတ် ။ ယခု ထိ ရှစ်ကြိမ် မက အိမ်ထောင် ထည်လဲ ထူ ခဲ့ပြီးပြီ ။ အိမ်ထောင်သစ် ထူ တိုင်းလည်း တခမ်းတနား နှင့် လူသိရှင်ကြား လက်ထပ်သည် ။ ပြောင်ပြောင်ပင် ယူသည် ။ ကမ္ဘာ ကလည်း ကျေနပ်သည် ။ ဆက်၍ ဆက်၍ အားပေးမြဲ ။ ချစ်ခင်မြဲ ။
မည်သည့် လူတန်းစား နှင့် မျှ မတူ ၊ အနုပညာသည် တို့ ခံယူရသော ( ရတောင့် ရခဲ လှသော ) ပရိသတ် လူထု ၏ မြတ်နိုးမြှောက်စား မေတ္တာ ထားမှု ကို ကျေးဇူးသိ သစ္စာ ရှိသော အားဖြင့် ...
သာဓု ဖြစ်စေချင်သည် မှာ အထက် ပါ သဘောမျိုး ။
( ၅ - ၁၂ - ၈၄ )
◾သာဓု
📖 ချယ်ရီ မဂ္ဂဇင်း
ဇန်နဝါရီ ၊ ၁၉၈၅
📖 အနုဝင်္ကပါ
#ကိုအောင်နိုင်ဦး
.
No comments:
Post a Comment