❝ အပတ်စေ့တော့ နပ်လိမ့်မယ်ပေါ့ဟယ် ❞
“ ဘယ်လိုလဲ ဟေ့ကောင် ၊ အဆင်ပြေပုံ ပေါ်ရဲ့လား ”
ကျွန်တော် မတ်လ ၁၉ ရက်နေ့ က ပြည်မြို့ ရောက် တော့ အအေးဆိုင် ဖွင့်ထားတဲ့ သား အငယ်ကောင်လေး နဲ့ တွေ့တယ် ခင်ဗျာ ။ ရောက်တဲ့ အခါတိုင်း သည်လိုပဲ မေးမိတယ် ။
“ အဆင်ပြေမှာပါ အဖေ ”
သူ က လည်း သည်လိုပဲ အမြဲပြန် ဖြေလေ့ ရှိတယ် ခင်ဗျာ့ ။ သူ့ အအေးဆိုင် အလုပ် ဟာ ကျွန်တော် တို့ နဲ့ ရင်းနှီးတဲ့ အလုပ် မဟုတ်ဘူး ခင်ဗျာ့ ။ တကယ့် အစိမ်း ။ ကျွန်တော်တို့ ရမ်းစွတ်ကြိတ် ခဲ့ကြတာ ။ ပူရင် ဘယ်လို နေမလဲ ။ မိုးဦးကျ မှာ ဘယ်လို နေမလဲ ။
မိုးတွေ စွေ နေရင် ဘယ်လို နေမလဲ ။ ဆောင်းဦး မှာ ဘယ်လိုလဲ ။ ဆောင်းလယ် မှာ ဘယ်လိုလဲ ။ ကျောင်းဖွင့် ကျောင်းပိတ် ဘယ်လိုလဲ ။ ပြည် ရွှေဆံတော်ဘုရား ပွဲတော်ရက် မှာ ဘယ်လိုလဲ ။ ရွှေနတ်တောင် ဘုရားပွဲ ရက် မှာ ဘယ်လိုလဲ ။ လဲပေါင်း အမြောက်အမြား ကို စိတ်တစောစော နဲ့ စောင့်ကြည့် လုပ်ခဲ့ရတာ ၊ ဒါလည်း စစ်ပွဲ တစ်ပွဲ ပဲ ခင်ဗျာ့ ။
အမေရိကန် နှင့် ဗြိတိန် က အီရတ် ကို ဝင် တိုက်ကြတော့ ဘာ ဖြစ်လာမလဲ ၊ ဘယ်လို ဖြစ်လာမလဲ ၊ ဘာတွေ ရင်ဆိုင်ရမလဲ ၊ ရင်တမမ နဲ့ စောင့်ကြည့် နေရသလို ပေါ့ဗျာ ။ မှန်း ထားတာ နဲ့ တကယ် ဖြစ်လာတာ ညီချင် မှ ညီတာကလား ဗျာ ။
“ ဟဲ့ ... ကိုလေး စိတ်တွေ အရမ်း စောမနေနဲ့ ၊ အပတ်စေ့ တော့ နပ်လိမ့်မယ်ပေါ့ ဟယ် ”
ကျွန်တော်တို့ ငယ်ငယ် က တောရွာ ယာခင်း ထဲ မှာ နှမ်း ကြဲကြတဲ့ အခါ ( လွန်ခဲ့တဲ့ နှစ်ပေါင်း ငါးဆယ် လောက် က တော့ ယာထွန် ၊ ထွန်ရေးညက် ၊ နှမ်း ကို လက် နဲ့ ပက်ပြီး ကြဲကြတယ် ၊ ယခုအခါမှာတော့ ထွန်ရေး ညက်ပြီ ဆို မျဉ်းဆွဲပြီး အတန်းလိုက် စိုက်ကြတယ် ၊
ခေတ် က ပြောင်း သွားပြီဗျာ ။ ) အထူအပါး ညီပါ့မလား ၊ အပင်ပေါက် ညီပါမလား ၊ စိတ် က တစောစော ခင်ဗျာ ။ စိတ် က အရမ်း စော နေတော့ အပင်ဖြစ် နှေးတယ် ထင်ပြီး ဆွဲနုတ် ကြည့်မိ ၊ ခုနေအခါ ပြန် တွေးပြီး ပြုံးမိပါသေး ။ နှမ်းပင်လေးတွေ ပေါက်လာပြန် တော့လည်း စက်လှည့် တော့ စိတ် က တစ်မျိုး ( အရွက် လေးရွက် ထွက်လာသည် ကို စက်လှည့် တဲ့ဗျာ ) ။ လက်ပံပွင့် မှာ စိတ် က တစ်မျိုး (လက်ပံပွင့် ဆိုတာ က လက်ပံပွင့်ကလေး ထောင် ထား သလို ကားယား ကွတတ ၊ သုံးလက်မ လေးလက်မ လောက် အပင်ကလေး မြင့် လာပြီး လှတပတလေး ဖြစ် လာသည် ကို ဆိုလိုသည် ။ )
နှမ်းပင်ကလေးတွေ တစ်တောင် ၊ တစ်တောင့်ထွာ လောက် မြင့် လာပြီ ၊ ကြက်ချေးစု လာပြီ ၊ ပွင့်ဖူး ဆင်ပြီ ၊ ခေါင်းလောင်း ဆွဲပြီ လက်ရင်းသီးတွေ ဝင် လာပြီ နှမ်းခင်းကြီး က လေ တိုက်တိုင်း ယိမ်းက နေပြီ ဆို ကြည့်ပြီး ပီတိတွေ ဖြာနေပြီ ကော ။ ချိန်းထားတဲ့ ရည်းစားကလေး ဘွားခနဲ ပေါ်လာတဲ့ အခါ ခံစား လိုက်ရသလိုမျိုးလေး ။ သီးတံတွေ ရှည်လာပြီ ၊ အပွင့်တိတ်ပြီ ၊ ပင်ရောင်လွှတ်လာပြီ ၊ ရိတ်သိမ်း ဖို့ နီးလာပြီ ဆို နှမ်းခင်း ကြည့်ပြီး နှမ်းထွက် ကို မှန်းချင် လာပြီ ။ ရိတ်ပြီး ၊ ပုံပြီး ၊ ထောင်ပြီး ၊ နှမ်းထောင် တွေ ခါပြီ ၊ နှမ်းတွေ ရပြီ ၊ အိတ်တွေ နဲ့ ထည့် ပြီးပြီ ၊ အိမ် ပေါ် ရောက်လာပြီ ဆိုမှ သက်ပြင်း ချရတာ ကလားဗျာ ။
နှမ်း ဟာ အလွန် မရေရာတဲ့ အမျိုးဗျာ ။ ဒါကြောင့်လည်း “ မှန်းချက် နဲ့ နှမ်းထွက် လွဲပလေခြင်း ” ဆိုတဲ့ စကား ဖြစ် လာတာပေါ့ဗျာ ။ သည်နှစ် ဆို ကြည့်ပါလား ဗျာ ။ နှမ်း ပေါ်ကာစ က ၁၅ ပိဿာ တစ်တင်း ၁ဝဝဝဝ လောက် က နေ ဖေဖော်ဝါရီ ပထမပတ် မှာ တစ်သောင်းခွဲ နီးပါး ဖြစ်သွားခဲ့တယ် ။ အခုဆို တစ်သောင်းကို ပြန် ရောက်သွားပြန်ပြီဗျာ ။ ဆက်ပြီး ဆင်းသွားဦးမလား ။ မရေရာ လိုက်တာဗျာ ။ အရူး လင် လုပ်ရ သလိုပါပဲ ။ သည်နေ့ အလုပ် လုပ်ကြတဲ့ အခါ ရှေ့ ကို ကြိုဖမ်းလို့ မရဘူးဗျာ ။ ဖြစ်ချင်တာ ကို အသာ ဘေးချိတ် ၊
ဖြစ်လာတာ ကို အကဲခတ် ပြီး လှော်ခတ် ကြရတာဗျာ ။ ဒါကြောင့် လုပ်ငန်း တစ်ခု ကို လုပ်ပြီ ဆို အရမ်း စိတ် မစောရဘူး ။ အရမ်း စိတ် မလှုပ်ရှားရဘူး ။ စိတ် အေးအေး ထားပြီး ထိန်းရင်း သိမ်းရင်း ၊ ပြုပြင် ပြောင်းလဲရင်း ၊ ဖာရင်း ဆရင်း ၊ အမိအရ ဆုပ်ကိုင်ရင်း ၊ ဖရီးလွှတ် ပေးရင်း စသည် အားဖြင့် ကာလ တစ်ခု အထိ လိပ်ပတ်လည် အောင် စောင့် ကြည့်ရင်း သည်းခံ လုပ်ကြရတာဗျာ ၊ ( လိပ်ပတ်လည် ဆိုသည် မှာ ကျွန်တော်တို့ တော အရ ရက်ကန်း ရက်တဲ့ အခါ ရက်ပြီးသား ဖျင်စ ကို လိပ်တုံး မှာ ပတ် ရတယ် ၊ လိပ်တုံး တစ်ပတ် လည် သွားသည် ကို လိပ်ပတ်လည် သည် ဟု ခေါ်ကြ၏ ။ )
“ အပတ်စေ့တော့ နပ်လိမ့် မပေါ့ဟယ် ”
ထို စကား အမှန်ပဲ ခင်ဗျာ့ ၊ ကျွန်တော်တို့ အလုပ် လုပ်စား နေကြရသူများ ဟာ အပတ် စေ့ အောင် မနည်း စောင့်ကြရတာ ၊ အပတ်စေ့ လို့ နပ်တော့ မှ ပဲ စိတ်အေးကြရတာဗျာ ။ အပတ်စေ့ မှ နပ်တယ် ဆိုတာ ကျွန်တော် တို့ တောရွာ မှာ ထမင်း ချက်တဲ့ စကား ခင်ဗျာ ။ ထင်းမီးဖိုများ နဲ့ ထမင်း ချက်ကြတော့ ထမင်းရည် ငှဲ့ပြီးပြီ ဆို မီးဖို ထဲ က မီးကျီခဲတွေ ဆွဲထုတ် ၊ အိုးတဖင်စာ ရအောင် ဖြန့် ၊ အဲသည် မီးကျီခဲတွေ အပေါ် ထမင်းအိုး တင် ၊ ထမင်း နှပ် ။ တစ်ဖက် က မီးဖို ၊ ဖင်အောက် မှာ က မီးကျီခဲ ၊ အောက် က ပူ ၊ ဘေး က ပူ ၊ ခဏခဏ လှည့် လှည့်ပေး ။ ဟော ... အပတ်စေ့ တော့ ထမင်းစေ့လေး ဖျစ်ကြည့် ၊ ဟာ ... နပ် နေပြီဗျာ ။ ဒါကြောင့် အပတ်စေ့ မှ နပ်တယ် ဆိုကြတာဗျို့ ။
( တကယ် လက်တွေ့ လုပ်ကိုင် နေကြသူများ ကို အထူး ရည်ညွှန်းပါ၏ ) ။
◾မောင်ချမ်းသာ
📖 မောင်ချမ်းသာ ၏ ချမ်းသာနည်း
#ကိုအောင်နိုင်ဦး
.
No comments:
Post a Comment