❝ ဆဲသလိုများ ဖြစ်သွားလား ❞
ဦးအေးကို ဆိုတာက ဟောဒီ တပေါင်းလည်ရွာ ရဲ့ ရွာ မျက်နှာဖုံး လယ်ပိုင်ရှင်ကြီး တစ်ယောက်ပေါ့ ။ အလှူအတန်းရက်ရောသလို ရပ်ရွာ သာရေးနာရေးကိစ္စ တွေမှာ လည်း ရှေ့ဆုံးက ဦးဆောင်ပြီး အားတက်သရော ပါဝင်လေ့ ရှိတယ် ။ နောက်ပြီး ဒီ တပေါင်းလည် တစ်ရွာလုံး မှာ သူ့ ကျေးဇူး နဲ့ ကင်းတဲ့ သူ က မရှိသလောက် ရှား တယ် ။ လူ မပြော နဲ့ ရွာဦးဘုန်းကြီးကျောင်း က အောင်နက် တို့ ဂုတ်ကျား တို့ တောင် ဦးအေးကို ထန်းလျက်ခဲ ကျွေးဖူးတဲ့ ကျေးဇူး ရှိတယ် ။
ဒါပေမဲ့ ဦးအေးကို က စိတ်ရင်း ကောင်း သလောက် စိတ် က လက်တစ်ဆစ် ရယ် ပါ ။ လူ ဖြောင့် စိတ်တိုကြီး လို့ ပြောရမယ် ။ စကား ပြောရင်လည်း တုတ်ထိုးအိုးပေါက် ၊ ပိဿလေး ဘေး ပစ် နဲ့ ။ သူ့ အိမ် မှာ သူရင်းငှါး လုပ်တဲ့ မောင်သြလေး ဆို တဲ့ ကောင် ကို ချီးမွမ်းတာ ပဲ ကြည့် ။
" ငဩ ဆို တဲ့ ကောင် က အရမ်း ဖင် ပေါ့တာ ။ အလုပ် လုပ် တာများ ကိုစက်ဖေ အိမ် က ခိုင်းနွားကြီး ကျနေတာပဲ မခိုမကပ်ဘူး ။ ထမင်း စားတော့လည်း နဒီသင်း ဝက်မကြီး ကန်စွန်းခင်းထဲ လွှတ်လိုက်တဲ့ အတိုင်းပဲ ၊ ထောင်း ထည့်နေသလားတောင် မှတ်ရတယ် " တဲ့ ။
မောင်ဩ ခမျာ နာသာခံခက် နဲ့ ။ ဒါ့ကြောင့် ရွာ ထဲ က လူ တော်တော်များများ က ဦးအေးကို ကို မလွှဲရှောင်နိုင်လို့ သာ အလိုက်အထိုက် ဆက်ဆံနေကြရတာ ။ သူ့ မြင်တာနဲ့ တတ်နိုင်သ လောက် ဝေးဝေး က ရှောင်သွားကြတယ် ။
တစ်နေ့ ရွာဦးကျောင်း ဆရာတော် အရှင်ဥတ္တရ က ကျောင်းဝန်းထဲ က အများ သုံး သောက်ရေကန် ဆယ် ဖို့ ရွာသူ ရွာသားတွေ ကို အစည်းအဝေး ခေါ် တယ် ။ ထုံးစံအတိုင်း ဦးအေးကို က ဦးစီးဦးဆောင် ပေါ့ ။ အစည်းအဝေး မှာ ဦးအေးကို က ဘာ ပြောသလဲဆိုတော့
" အေး ... ကျောင်း ၊ ကန် ၊ ဇရပ် ဖော်ဆောင် ပြုလုပ်တယ် ဆိုတာ ကုသိုလ် ရတယ် ။ အဲဒီတော့ ရွာထဲ က အကုသိုလ် များ တဲ့ သူတွေ အပါယ်တံခါး ပိတ်အောင် ဒီ သောက်ရေကန် ကို ဝိုင်း ဖော်ကြတာပေါ့ ကွာ "
ရွာထဲ က လူတွေ ကို အကုသိုလ်များ တယ် လို့ ပြောတာကို အားလုံးက မကျေနပ် ပေမယ့် ဘုန်းကြီး ရှေ့ မှာ ဆိုတော့ ငြိမ် နေကြရတယ် ။
ရေကန် ဖော် တဲ့ နေ့ လည်း ရောက်ရော သူ့ အိမ် က သူရင်းငှါး မောင်သြလေး ရယ် ၊ ရွာ အရှေ့ပိုင်း က ဇိုးသမား မောင်သွင် ရယ် ၊ ဘုန်းကြီးကျောင်း မှာ ကပ်ပြီး စားသောက်နေတဲ့ နိုင်ကြည်သားနေ နဲ့ ရောင်နီသက်လွင် ရယ် ပဲ လာကြတယ် ။ ကျန်တဲ့ သူတွေ က အကုသိုလ် များ လို့ ရေကန် လာဖေါ်ကြတယ် အပြော ခံရ မှာ စိုးလို့ မလာကြဘူး လေ ။
ဦးအေးကို လည်း တောက် တခတ်ခတ် နဲ့ စောင့် နေသေးတယ် ။ နေ တော်တော် မြင့်လာတော့ သူလည်း စိတ် မရှည်တော့ဘဲ လာတဲ့ သူ နဲ့ ပဲ လုပ်တော့မယ် လို့ ဆော်သြ လိုက်တယ် ။ ဒါပေမဲ့ သူ စိတ်တိုပြီး ပြောလိုက်တဲ့ စကား ကြောင့် လာတဲ့ သူတွေပါ ပြန် ကုန်ပါလေရော ။ သူ ပြောတာ ကို ကြည့်ဦး ။
" တောက် ၊ အလုပ် လုပ်ရမယ် ဆိုတော့ တစ်ကောင် မှ ပေါ် မလာကြတော့ဘူး ၊ ကြာတယ်ကွာ ။ ဘယ် ခွေးမသားမှ မလာလာ ၊ လာတဲ့ ခွေးမသားတွေ နဲ့ ပဲ လုပ်တော့မယ် " တဲ့ ။
◾လင်းခေတ်ဇော်
📖 ဟာဟ ( ၁ )
www.facebook.com/aung.naingoo.3726613
.
No comments:
Post a Comment