ဂရန်ပေါင်သော နေ့ရက်များ

 

❝ ဂရန်ပေါင်သော နေ့ရက်များ ❞

တန်ဆောင်တိုင် ပြီး ပြီ ဆိုသည် နှင့် တူးပို့ တူးပို့ သင်္ကြန် ရနံ့ ကား ဗီဒီယို လောက ထဲ သို့ တိုးဝှေ့ စီးဆင်း သွားလေတော့သည် ။

“ ကိုဂျပိန် ... သင်္ကြန်ဇာတ်လမ်း တစ်ပုဒ် အားချင်း လိုချင်တယ် ”

ဒါရိုက်တာ က အားချင်း လိုချင်တယ် ဆိုတော့ အိုင်ဒီယာဂျပိန် ကား သင်္ကြန်သမား စစ်စစ် မို့ အထွေအထူး တွေးစရာ မလို ။ ခေါင်း ထဲ မှာ ရှိပြီးသား ။

“ သင်္ကြန်သမား ကို သင်္ကြန် ဇာတ်လမ်း အပ် တော့ သင်္ကြန် ရနံ့ အသင်းဆုံး ဇာတ်လမ်းလေး ရတာပေါ့ဗျာ ”

ဂျပိန် ၏ လေ ကား နည်းနည်း မြောက် နေမှန်း သိသည်  ။ သို့သော် ဒါရိုက်တာ တွေ ၊ ထုတ်ဝေသူ တွေ ရှေ့မှာ လေပေါင် က အဲဒီလောက် တင် ထားမှ တော်ကာ ကျသည်  ။

“ သင်္ကြန်သမား မို့ သင်္ကြန်ဇာတ် အပ်တာပေါ့ဗျာ  ”

“ ရေမစိုတဲ့ သင်္ကြန် ဖြစ်ရမယ်နော် ”

“ ဟာ ...ဘယ်လို ရေမစိုတဲ့ သင်္ကြန်လဲ ... ကျွန်တော် နား မရှင်းဘူး ”

“ ခင်ဗျားတို့ ရိုက်နေကျ ဇာတ်လမ်းတွေ ဟာ ငါးပြတိုက် တို့ .. တိုင်းရင်းသား ကျေးရွာ တို့မှာ ကုမ္ပဏီတွေ ဆီ က စပွန်ဆာ တောင်း ... ဒေါ်ထား တို့ အဖွဲ့  ... အက်စတာ တို့ အဖွဲ့ က ကောင်လေး ၊ ကောင်မလေး တွေ ကို ငှား ... ရေပက်မဏ္ဍပ် ရှေ့ မှာ ရေပက်ခံ ထွက်... သင်္ကြန် အတုတွေ လုပ် ... ကောင်လေး နဲ့ ကောင်မလေး က သင်္ကြန် မှာ တွေ့. ..သင်္ကြန်မှာ လမ်းခွဲ ...ဒီ ဇာတ်လမ်းတွေ ပဲ မဟုတ် လား... သင်္ကြန် ဆိုတာ အနှစ်သာရ ရှိရမယ်ဗျ ”

ဒါရိုက်တာ အနည်းငယ် ငိုင်သွားသည် ။ မျက်နှာ မှာ ပြုံးရိပ် သန်းလာသည် ကို ဂျပိန် မြင်လိုက် ရသည်  ။

“ ခင်ဗျား အိုင်ဒီယာ ကရော ”

“ ရေ မစိုဘဲ ရိုက် ရမယ့် သင်္ကြန် ”

“ ကြိုက်နေပြီဗျာ ”

ဒါရိုက်တာ ၏ အသံ ။

“ ခင်ဗျား တစ်ခုပဲ စဉ်းစားကြည့် ...သင်္ကြန် ဆိုတာ နှစ်ဟောင်း က အတွေးအခေါ် အယူအဆ ဟောင်းတွေ ကို ထားရစ်ခဲ့ပြီး နှစ်သစ် မှာ စိတ်သစ် လူသစ် ၊ ဘဝသစ် ၊ အတွေးအခေါ်သစ် အနာဂတ် တွေ နဲ့ ချီတက်ရမယ့် အနာဂတ်သစ် သင်္ကြန် လို့ အဓိပ္ပာယ် ဖွင့်လို့ ရတယ်... ကျွန်တော် က သင်္ကြန် ကို အမြင်သစ် နဲ့ သွားချင်တယ် ... ခင်ဗျား သိအောင် တစ်ခု ပြောပြမယ် ... နှစ်စဉ် ပေါ့ပေါ့တန်တန်ပဲ ဆင်း ပြီး သင်္ကြန် အတက် မှာ ဇနီး လေးယောက် ဆီ ပြန် တက်သွားတာပဲ .. ကျွန်တော် က ဒီနှစ် ၂၀၀၇ မှာ သိကြားမင်း ကို ပြည်သူတွေ ကြား ထဲကို ထဲထဲဝင်ဝင် နှိုက်နှိုက်ချွတ်ချွတ် လေ့လာခိုင်းမှာ ... ဘယ်သူ နဲ့ ပူးတွဲပြီး လေ့လာခိုင်းမလဲ ဆိုတော့ အိမ်တွင်းမင်းမဟာ ဂီရိ နဲ့  ”

“ ဟာ ... ကောင်းလိုက်တဲ့ အိုင်ဒီယာ ”

အိုင်ဒီယာ ဂျပိန် ကို ဒါရိုက်တာ တော်တော် ကြွေသွားသည့် သဘော မှာ ရှိနေသည်  ။

“ အိုင်ဒီယာ ဂျပိန်လေ ဗျာ ... ကိုယ့်နာမည် ကိုတော့ ဘယ် သိက္ခာ အကျ ခံပါ့မလဲ . . . လူတွေ က မေ့ နေကြတာဗျ .. မင်းမဟာဂီရိ မှာ ညီအစ်မ နှစ်ယောက် ရှိတယ်... ဒွေးဖြူ နဲ့ မြတ်လှ ... မီး မလာ တဲ့ ရက် ဆိုရင် ပြဿနာ မရှိဘူး တဲ့ ... မီး လာတဲ့ ရက်မှာ ကိုရီးယား ကြည့်နေလို့ အိမ်တွင်းအုန်း လိုက်ကာ ကို ပိတ်ဖို့ မေ့နေတယ် ... မီး ကို ကြောက် တဲ့ မောင်နှမသုံးယောက် မီးကြောင့် သေရတဲ့ မောင်နှမ သုံးယောက် ခမျာ ဘယ်လောက် စိတ်ဆင်းရဲမလဲ ... ပြီးတော့ ဒီနေ့ခေတ် အိမ် ရဲ့ ဧည့်ခန်းမှာ မတော်တရော် ပုံ တွေ ချိတ် ထားတာကို အိမ်တွင်း မင်းမဟာဂီရိ ရဲ့ နှမ နှစ်ယောက် က ဘယ်လောက် မျက်နှာ ပူမလဲ ... ဒါတွေဟာ လူတွေ ကြား က လူတွေ ရဲ့ ဖောက်ပြန်မှု နဲ့ လူဒုက္ခ ၊ နတ်ဒုက္ခ တွေ ကို ထုတ်ဖော်ပြ မှ သင်္ကြန် စစ်မှာ ပေါ့ဗျာ ”

“ ကိုဂျပိန် ... ဒီနှစ် သင်္ကြန် ဟာ ခင်ဗျား နဲ့  ကျွန်တော် ကံ စပ်တယ် လို့ ပဲ ပြောရမလို ဖြစ်နေပြီ ... ခင်ဗျား သင်္ကြန်သမား စစ်ပါတယ်ဗျာ ... ။ ကဲ ... အမြန်ဆုံးသာ ရေး ပေတော့ ... ရော့ ... စရန် သုံးသောင်း ... ပြီးတဲ့ အချိန် သာ ဖုန်းဆက်လိုက် ... ”

“ ဇာတ်ကောင်တွေ ကရော ... ”

“ ခင်ဗျား ကြိုက်တဲ့ လူ ကို ရွေး ... ကျွန်တော် က ကြို ငှားရမှာ  ”

“ လူရွှင်တော်တွေ ပဲ စဉ်းစားပါဗျာ ... ဈေးကွက် ကတော့ ခင်ဗျားတို့ ပဲ သိတယ် ”

ဒါရိုက်တာ အိမ် ထဲ မှ ထွက်မယ် မကြံသေးဘူး ၊ ဂျပိန် ကတော် စိုးမြတ်ပေပါ က စရန်ငွေ ကို မျက်စောင်း ထိုး နေပြီ ။ ဒါတွေက ဂျပိန် နော ကျေနေပြီ မို့ ‘ လာသိမ်း ' ဆိုသည့် မျက်လုံး ဖြင့် အချက် ပြ လိုက်သည်  ။ ဒါရိုက်တာ ကား သဘော‌ ခွေ့ သွားသည့် အမူအရာ ။ အိမ် က အထွက် တွင် ဒါရိုက်တာ ၏ အမူအရာ မှာ ကျေနပ်သွား သည့် အမူအရာ ။ ဒါရိုက်တာ ထွက်သွားတော့ မှ ...

ဂျပိန် အတိတ် က သင်္ကြန် ကို ဗိန်းမောင်း နှင့် ရောက်သွားလေတော့သည်  ။ လွမ်း လိုက်တာ သင်္ကြန် ရယ် ... ။

ပိတောက် ကို နှုတ်ဆက် ထွက်ခွာသွားကြတဲ့ သင်္ကြန်မင်းသား တွေ ကို အရင် လွမ်းဆွတ် မိခဲ့သည် ။ ရွှေတိုင်မြေကိုခင်မောင်ဆွေ ( ယဉ်ကျေးမောင် ) ၊ ဂန္ထဝင်မောင်ဝိုင်း ( မောင်မောင်ဆိုလေ ထီးရိုးရှည် ) ၊ ဂျပိန် ကား ( မောင်မောင်မြင့်အောင် အမည်ဖြင့် ဒိုးဒိုးဒေါက်ဒေါက် ) သက်ရှိထင်ရှား ရှိနေသေးသည် ။ သင်္ကြန် မှ သည် အနုပညာလောက မှာ ထွန်းတောက် နေသော သင်္ကြန်သမား များ စွာ ရှိသည် ။

ကျေးဇူးပြု ၍ တစ်ချိန် မှာ ရေးသား တင်ပြပါမည် ။

ဘာပဲဖြစ်ဖြစ် ချစ်ခဲ့ရတဲ့ သင်္ကြန် ကိုတော့ ထာဝရ လွမ်းတာတော့ အမှန် ။

ဂျပိန့် အတွေးများ က အတိတ် တစ်နေရာ ဆီ မှာ  ။

ဂျပိန် သင်္ကြန် ထွက်တော့မယ် ဆိုရင် မိသားစုဝင်များ က နားကပ် တို့ ၊ ဆွဲကြိုး တို့ ၊ အိမ်ဂရန် တို့ ကို သိမ်းဆည်းကြတော့သည်  ။

ဂျပိန် ကား ကျောင်းသားဘ၀ သင်္ကြန် ကား တစ်ကား ထွက် နိုင်လောက်သည့် ငွေကြေး မရှိ ။ အဲဒီတော့ မရှိ ရှိတာ မျက်စောင်း ထိုး ရတာပေါ့ ။ ဒါကတော့ သင်္ကြန်သမား တိုင်း ကြုံတွေ့ခဲ့ရသော သင်္ကြန် ၏ အမှတ်တရများ သာ ။

“ ဘာတွေ စဉ်းစားနေတာလဲ လင်တော်မောင် ”

“ ဘာမှ မဟုတ်ပါဘူး ကွ ... ငါ့ အဖေ နဲ့ အမေ ပေါ့ ... ငါ အခု သင်္ကြန်ဇာတ်ကား ရေးရတော့မယ့် အချိန် မှာ ငါ့ မိဘနှစ်ပါး က မရှိတော့ဘူး လေ ... တောင်ဥက္ကလာ က အိမ် အမှတ် ၉၄ ၊ ၃ လမ်း ၊ ( ၈ ) ရပ်ကွက် က ငါ သင်္ကြန် ထွက် တိုင်း ပေါင် နေကျ ဂရန်လေး ကို ပြေးပြီး သတိရလို့ ပါ ... ငါ့ အမေ ပြောတဲ့ စကားလေး နား ထဲ မှာ ပြန် ကြားယောင်လို့ ပါ ... ဘာတဲ့ ... သင်္ကြန် ရောက်တိုင်း ငါ့ အိမ်ဂရန် ကို အမြဲ သတိထား တဲ့ ကြား က ဘယ် အချိန် ပျောက် ပျောက် သွားမှန်း မသိဘူး ဆိုတဲ့ စကား လေး ပါ ... ”

◾ ဗေလုဝ

📖 ဟဒယ မဂ္ဂဇင်း
      မတ် ၊ ၂၀၀၇

www.facebook.com/aung.naingoo.3726613

.