မဟာနန္ဒာ pH10

 

❝ မဟာနန္ဒာ pH10 ❞

နန္ဒဝန်ဥယျာဉ် အလယ် မှာ တော့ နတ်သဘင် အစည်းအဝေး က စ နေပြီ ။ ရဲရဲနီတဲ့ ကသစ်ပင် ခြေ ရင်းက ပဏ္ဍုကမ္ဗလာမြကျောက်ဖျာ ထဲ မှာ ခါးလယ်ထိ မြုပ်ဝင်အောင် အိအိပုံ့ပုံ့ကြီး ဇိမ် နဲ့ ထိုင် နေတဲ့ သူ ကတော့ သိကြားမင်း ဦးမာဃ ထင်ပါရဲ့ ။

ခပ်လှမ်းလှမ်း က သုဓမ္မာဇရပ် ထဲ မှာ လည်း ရုံးလုပ်ငန်းတွေ နဲ့ အလုပ် များနေတဲ့ နတ်သူ ၊ နတ်သားတွေက ဖွေးဖွေး လှုပ် ။

မကြာခင် ဇရပ် ထဲ က အသံ တစ်သံ ထွက် လာတယ် ။

“ နတ်သစ်တွေ တန်းစီကြပါ ”

ဖြစ်ရလေဗျာ ၊ တန်းစီ တဲ့ ထုံးစံ က စကြဝဠာတိုက်တစ်သောင်း အထိ ပျံ့နှံ့နေပါရော့လား ။

“ နတ်ပုံတင်ဖို့ အဲလေ ၊ မှတ်ပုံတင်ဖို့ နဲ့ တူ တယ်နော် ။ အဟိ ”

အသံ ကြား လို့ လှည့် ကြည့်လိုက်တော့ ...

ဘယ်လို ကုသိုလ်ကောင်းမှုများ ပြုခဲ့လို့ မျက်စိလည်ပြီး နတ်ပြည် ရောက်လာတာပါလိမ့် ။ လူ့ဘဝ က နာမည်ပျက်တွေ တစ်လှေကြီး နဲ့ တို့ တိုင်းပြည် က ရုပ်ရှင်မင်းသမီး တစ်ယောက် ကို နတ်ဝတ်တန်ဆာ ၊ ဒွါဒရာ တွေ နဲ့ တွေ့ လိုက်ရတယ် ။ ကျုပ် မျက်စိ ထဲမှာ ရေကူးဝတ်စုံ နဲ့ ပဲ အမြဲ စွဲ နေတဲ့ သူ့ ကို ခုလို မလ္လိကာ ဝမ်းဆက် နဲ့ တွေ့လိုက်ရတော့ ရုတ်တရက်တော့ ကြောင် သွားတယ် ။

ဒါပေမဲ့ ကြာမူပါပါ နဲ့ ဆတ်စလူး ခါနေတဲ့ ပုံ ကတော့ မပျောက်သေးပါဘူး ၊ အင်းလေ ဘဝ ကူးကာစတော့ ဒီလိုပဲ နေမှာပေါ့ ။

တန်းစီရင်း ကျုပ် ရေ သောက်ချင်လာတယ် ။ ' ရေ ... ရေ ' လို့ စိတ် က တမ်းတလိုက်တဲ့ အခိုက်မှာတဲ့ အေးစက်သွားတဲ့ အထိအတွေ့ တစ်ခုကြောင့် ကျုပ် လက် ကို ကျုပ် ငုံ့ ကြည့်လိုက်တော့ ရွှေခွက် တစ်ခွက် နဲ့ ရေ အပြည့် ။ သောက်မယ် လို့ လုပ်တုန်းမှာပဲ အရင် လူ့ ဘဝ ကို ဖျတ်ခနဲ ကျုပ် ပြန် သတိရလိုက်မိတယ် ။

      •••   •••   •••   •••

လေယာဉ် ပေါ် မှ ဆင်းလိုက်တာနှင့် နိုင်ငံကျော် ၊ မန္တလေး နေ ၊ မန္တလေး နွေ ၊ မန္တလေး လေ နှင့် စ တွေ့လိုက်ရသည် ။ တစ်ကိုယ်လုံး တရှိန်ရှိန် ပူတက်လာပြီး ၊ အာခေါင်တွေ ခြောက် လာသည် ။ တံတွေး တို့ပင် အငွေ့ ပျံကုန်ကြပြီ ထင်သည် ။

ဘယ်မှာလဲ “ မန္တလေးရေ ”  ။ အခုလို မန္တလေး နွေ မှာ မန္တလေး ရေ တစ်ခွက် လောက်တော့ သောက်ဖို့ လိုအပ်ပြီ ထင်သည် ။

မှတ်မှတ်ရရ ချမ်းမြသာစည် လေယာဉ်ကွင်း အထွက် က လက်ဖက်ရည်ဆိုင် တစ်ဆိုင် မှာ ပထမဆုံး မန္တလေး ရေ တစ်ခွက် ဝင် သောက်မိလိုက်သည် ။ နောက်တော့ ဟိုတယ် မှာ ၊ ဘုရား မှာ ၊ ဈေးချို မှာ ဥတု က ပူပူနှင့် ရေ အခွက်ပေါင်း များစွာ ။

မန္တလေး မှာ သုံးရက် ခန့် သာ ကြာခဲ့သည် ။

ရန်ကုန် အပြန် လေယာဉ် ပေါ် မှာ ကတည်းက အိမ်သာ နှင့် ထိုင်ခုံ ကူးချည် သန်းချည် ။ ကြာတော့ နောက်ဆုံး ခုံ မှာ ထိုင်နေသော လေယာဉ်မယ်ကလေး က မိမိ ထိုင်ခုံ မှ ထ လိုက်သည် နှင့် ပြုံးစိစိ ။ လူ က ရှက်ရှက် ၊ ဝမ်း က ပျက်ပျက် နှင့် ရန်ကုန် မင်္ဂလာဒုံ လေဆိပ် ကို ပြန် ရောက်တော့ တစ်ကိုယ်လုံး နွမ်းခွေနုံးချည့်နေပြီ ။

ဆေးဖိုး ငါးရာ ခန့် ကုန် သွားသည် ။

ရွှေဘုံသာလမ်း က ဆရာဝန် ရဲ့ အပြောကတော့ အမီးဘဒ်ဒစ်စန်ထရီ amoebic dysentery တဲ့ ။ ရေ မသန့်လို့ ရေ ထဲက အမီးဗား Amoeba ဝမ်းကိုက်ပိုး ကြောင့် ဝမ်း ပျက်ရ တာတဲ့ ။

သူ ပြောသော အမြီးဗား တွေ ၊ ခေါင်းဗား တွေ တော့ မသိ ။ ရေ တော့ မိမိ တော်တော် ကြောက် သွားသည် ။ အထူးသဖြင့် မိမိ လို ပုဂ္ဂိုလ်မျိုး မှာမှ ရေ မသန့်၍ ဝမ်း ပျက်ရသည် ဆိုသော အဖြစ်က အလွန်ပင် ရှက်ရွံ့ နာကြည်းစရာ ကောင်းလှသည် ။

တစ်ချက်ကလေး မှားသည်နှင့် တစ်သက်တာ ကွဲခဲ့ရသော အရှက် ဟု ထင်သည် ။

“ ဟုတ် မဟုတ်တော့ မသိပါဘူးဗျာ ၊ ဓာတ်ခွဲကြည့်တော့ မန္တလေး ရေ က pH - 3 လောက် တောင် မရှိတတ်ဘူးလို့ ကြားဖူးတယ် ခင်ဗျ ၊ ကျုံးရေ ဆိုတာကလည်း ကန်ရေ ရေသေ ပဲ ဆို တော့ ပိုးတွေလည်း များမှာ စုံမှာ ပေါ့ဗျာ ”

ပြောရင်းဆိုရင်းပင် ဆေးတစ်လုံး ကို ဖြုန်းခနဲ ထိုးထည့်လိုက်သည် ။ နာလိုက်သည့် ဆေး ။ ရင် နာရသည်ပါ ပေါင်းလိုက်လျှင် နှစ်ခါ နာ ရသည့် အဖြစ် ။

သို့သော် ကြာကြာ ရင်နာ မနေနိုင် ။ နားစွန်နားဖျား ကြားလိုက်ရသော pH ဆိုသည့် စကားလုံး ဆရာဝန် အား မေး ကြည့်ရသည် ။

အလွယ်ဆုံး ပြောမယ်ဗျာ ။ ရေ ရဲ့ အရည်အချင်း အဲ ... ရေ ရဲ့ အဆင့်အတန်း ကို pH ဆို တဲ့ သင်္ကေတ နဲ့ တိုင်းတယ်ဗျ ။ ရေ ထဲမှာပါတဲ့ ဟိုက်ဒြိုဂျင်အိုင်ယွန် ( hydrogentions ) တွေရဲ့ ပမာဏကို အဲဒီ pH သင်္ကေတ နဲ့ တိုင်းတယ် ဆိုပါတော့ဗျာ ”

သည်လောက်ဆို မိမိ သဘော ပေါက်ပြီ ။

“ ဒီလိုဆို ဒေါက်တာ ရယ် ၊ အဲဒီ pH ဘယ်လောက် ရှိရင် ရေ အသန့်ဆုံး အကောင်းဆုံးလဲဗျ"

“ pH - 7 ရှိရမယ်လို့ ဓာတုဗေဒပညာရှင်တွေ က သတ်မှတ် ထားတယ် ခင်ဗျ ။ ဒါကြောင့် တိုးတက်တဲ့ နိုင်ငံတိုင်းမှာ သောက်ရေ ကို pH - 7 အဆင့် ရောက်အောင် ပြုပြင် သန့်စင်ထားကြ တယ်လေ ”

သည်တော့မှ pH - 7 ဟု တံဆိပ် ကပ်ထားသော ပုလင်းလေးများ ကို ပြေး မြင်မိသည် ။

“ ဒေသစိမ်း တစ်ခုခု ကို ခရီး သွားတော့မယ် ဆိုရင် ကိုယ် သောက်နေကျ ရေ ၊ ဒါမှမဟုတ် အဲသလို သန့်စင်ထားတဲ့ ရေပုလင်းတွေ ယူသွားရင် အကောင်းဆုံးပေါ့ဗျာ ”

သည်ကတည်းက မိမိ ရေသောက် ဆင်ခြင်လာသည် ။ အိမ် မှာ နေနေ ၊ အလုပ် ကို သွား သွား ၊ ခရီးပဲ ထွက်ထွက် pH - 7 ရေပုလင်းလေးများ ကို ကိုယ် နှင့် မခွာ ။

ကြာတော့ ရေ ပါး ဝလာသည် ။ pH - 7 မှ တစ်ဆင့် တက်၍ ပိုးလစ်ရှ်ဝါးတား ( Polish water ) ခေါ် ပိုလန်ရေ ဆိုသည့် နိုင်ငံခြား မှ လာသော သောက်ရေ ကိုပင် တစ်ပုလင်းလျှင် ငွေ အစိတ် ၊ သုံးဆယ် ပေးပြီး သောက် တတ်လေပြီ ။

ထို ပိုလန်ရေ ၏ Ph အဆင့် ကို လည်း တတ်သိနားလည်သော ဓာတုဗေဒပညာရှင်များ ထံ မေး ကြည့်မိသည် ။ pH - 7 ပင် ရှိပါသည် ဟု ဖြေကြသည် ။ ဤကမ္ဘာတွင် အသန့်စင်ဆုံး ရေ မှန်သမျှ pH - 7 သာ ရှိသည် ဟု ရှင်းလင်း ပြောပြသည် ။

သို့သော် ပိုလန်ရေ တွင် ပါဝင်သည့် ဓာတ်ဆားများ ၊ ဓာတ်သတ္တုများ က ကမ္ဘာပေါ်ရှိ အခြား အခြားသော ရေများ ထက် အာနိသင် ထက်မြက်ပြီး လူ့ကျန်းမာရေး ကို ပို၍လည်း အထောက် အကူ ပြုသည် ဟု လည်း ထပ်မံ ပို့ချလိုက်ကြသေးသည် ။

ကျေးဇူးတင် ဝမ်းမြောက်စွာဖြင့် pH - 7 နှင့် ပိုလန်ရေ ကိုသာ ကွယ်လွန်သည်အထိ မိမိ သောက်ခဲ့သည် ။

အခု ဟောဒီ ရွှေခွက် ထဲ က ရေ ကရော pH က ဘယ်လောက်လဲ ။ ဓာတ်ဆား နှင့် ဓာတ်သတ္တု ကကော ဘယ်လောက် ပါသလဲ ။

အဲဒီ အကျိုးပြုတွေ အသာထား ၊ အမီးဗားတွေ ဘာတွေရော ပါနေသလား ၊ ဒီ ရေ ဘယ် ကလာသလဲ ။ အတွေးတွေ တသီကြီး နှင့်အတူ ဘေးဘီ ကို လှည့်ကြည့်လိုက်တော့ ငွေလွှာသင်ဖျူး ခင်းထားသလို မှန်သားရေပြင်နဲ့ စိမ်းလဲ့လဲ့ကန်တော်ကြီး တစ်ခု ။

နန္ဒဝန်ဥယျာဉ် ၊ သုဓမ္မဇရပ် ၊ ပြီးတော့ ဟုတ်ပြီ ၊ မဟာနန္ဒာကန် ၊ ဒီ ကန် ဟာ တာဝတိံသာ ရဲ့ ကျက်သရေဆောင် မဟာနန္ဒာကန်တော်ကြီး ပေါ့ ။

ဒီလိုဆိုရင် ကျုပ် လက် ထဲက ရေ ဟာ ဒီ ကန် က ပဲပေါ့ ။ နတ်ပြည် က ရေ ဆိုတော့ စကြဝဠာ မှာ အကောင်းဆုံး ရေ ပေါ့ ။

ဒါပေမဲ့ ကျုပ် ဟာ ဘယ်လောက် သေချာတဲ့ လူ အဲ ... နတ် ဆိုတာ သိတယ် မဟုတ်လား ၊ ဒီ မဟာနန္ဒာကန်ရေ ရဲ့ pH ကို ကျုပ် အတိအကျ သိချင်တယ် ။

လူ့ပြည် မှာ အဆင့်အမြင့်ဆုံး ရေဟာ pH - 7 ဆိုရင် နတ်ပြည်မှာ အဆင့်အမြင့်ဆုံး ရေ ဟာ pH - 10 တော့ အနည်းဆုံး ရှိရမှာပေါ့ ။ အဲ ... လူတွေ ရဲ့ ဓာတုဗေဒအရတော့ မှား ချင် မှား မှာပေါ့ ။ ဒါပေမဲ့ ဒါက နတ်ရေကန် ထဲ က နတ်ရေစင် ပဲ ဟာ ။

နတ်ဓာတုဗေဒပညာရှင် တစ်ယောက်တော့ တွေ့ မှ ဖြစ်မယ် ။ အနီးကပ်ဆုံး ကတော့ ဝိသကြုံ ကို မေး ကြည့်ရင် အဆင်ပြေမယ် ထင် ပါတယ် ။ သူ က ဗိသုကာ ၊ အင်ဂျင်နီယာ သိပ္ပံ နတ် ပဲဟာ ။

      •••   •••   •••   •••

ဘယ်လောက်ကြာကြာ ခေါင်းငုံ့ပြီး တွေး နေမိသည်မသိ ၊ ဆတ်ခနဲ ကျုပ် လက်ထဲ က ရွှေခွက် ကို ပုတ်ချ ခံလိုက်ရတော့မှ ဘေးဘီ ကို ကြည့် မိတော့သည် ။

အလို အစေအပါး နတ်ဘီလူးတွေ ကျုပ် ကို ဝိုင်းထားကြပါလား ။

တဟင့် ... ဟင့် နဲ့ ရှိုက်သံငိုသံကြားလို့ လှည့်ကြည့်လိုက်တော့ ဟို ရုပ်ရှင်မင်းသမီးနတ်မ ကိုလည်း နတ်ဘီလူးကြီး တစ်ကောင် က ဖမ်း ချုပ်ထားတာ တွေ့လိုက်ရတယ် ။

ကျုပ် ရဲ့ နတ်မျက်စိ ကို ကျုပ် ကိုယ်တိုင် မယုံနိုင်အောင် ဖြစ်နေရတယ် ။

ဘာလဲ ။ ဘာဖြစ်တာလဲ ။ ကျုပ်တို့ ဘာတွေ ဖြစ်ကုန်ပြီလဲ ။

ကျုပ် နားဝေတိမ်တောင် ဖြစ်နေတုန်း ရုံးတာဝန်ခံ နဲ့ တူတဲ့ နတ်ကြီး တစ်ပါး ရောက် လာတယ် ။

“ ဒီ နှစ်ယောက် က သေစာရင်း မှား ပြီး နတ်ပြည်ရောက်လာတာ ကွ ။ ဟောဒီ အကောင် က လူ့ပြည် တုန်း က ဒုစရိုက် တုံး ၊ ဒီဟာမ ကတော့ တကယ့် ကို ကိလေသာ တုံး ။ ကဲ .. ကဲ ယက္ခ မင်းချင်း တွေ သူတို့ ကို ရောရုဝ ပြန် ပို့လိုက်ကွ ”

    •••   •••   •••   •••

ကျုပ် အရင် ဒိုင်ဗင် ထိုး ဆင်းသွားတဲ့ ရုပ်ရှင်မင်းသမီး နောက် ကနေ ကျုပ် လည်း မျက်စိ စုံ မှိတ်ပြီး ခုန် ချလိုက်ပါတယ် ။ အာကာသ တွင်းနက်ကြီး တစ်ခုထဲ ကို အဖြတ် မှာ ကျုပ် တစ်ခု တော့ ပူ လိုက်မိတယ် ။

ရောရုဝ က ရေ ကရော pH ဘယ်လောက် ရှိပါလိမ့် ။

◾   မင်းသစ် , ၁၉၉၂

www.facebook.com/aung.naingoo.3726613

.