❝ အမေ့စကား ❞
“ တစ်ခါက ရွာတစ်ရွာ မှာ ဒေါ်ငွေရှိ နဲ့ သား မောင်ရွှေအိုး ဆိုတာ ရှိတယ် ။ မောင်ရွှေအိုး က ဘာမှ မလုပ်ဘဲ အမေ့ လုပ်စာ ထိုင် စားနေတာ ။ ဒီ အထဲ ဟင်း မကောင်း ရင် စိတ် ဆိုးသေးတယ် ။ တစ်ရက် မှာ သူ မကြိုက်တဲ့ ဟင်းတွေဖြစ်နေတော့
“ တော်ပြီဗျာ ၊ ထမင်းမစားဘူး ”
“ ငါ့ သား ရယ် ၊ ဒါ နဲ့ စားထိုက်လို့ ဒါနဲ့ စားရတာလို့ သဘောထားမှပေါ့ ”
“ မစားဘူးဗျာ ”
“ မိဘစကား နားမထောင်ဘူးပေါ့လေ ”
“ မထောင်ဘူး ”
“ အေး - မင်း ကို ပါး ရိုက်ကျွေးတဲ့ လူ ပေါ်လာလိမ့်မယ် ”
“ ပေါ် ပေါ် ဗျာ ”
အဲသလို ပြောပြီး ရွာ ပြင် ဇရပ် မှာ ထွက် အိပ်နေသတဲ့ ။ အမေ ကတော့ သူ့ သား ဆာနေ ရင် စားရအောင် ဆိုပြီး ရှိတဲ့ ဟင်း နဲ့ပဲ ထမင်း ထုပ်လို့ သူ့ သား အိပ် နေတဲ့ ဘေး သွား ချထားသတဲ့ ။
အဲဒီ အချိန်မှာ ဓားပြနှစ်ဦး က အဲဒီ ဇရပ် ကို ရောက်လာတယ် ။
“ ငတုတ်ကြီး ၊ ဟိုမယ် လူတစ်ယောက် အိပ် နေပါလား ”
“ ဟုတ်ပါ့ ၊ သူ့ ဘေး မှာ ထမင်းထုပ် နဲ့ ”
“ အဆင်ပြေတာပေါ့ကွာ ။ တို့ ဆာလာတာ နဲ့ အံကျပဲ ။ ကောင်းသလား ၊ မကောင်းသလား မသိ ။ ဒီ လူ က ဒီ ထမင်းထုပ် ကို မစားဘဲ အိပ်နေတာသာ ကြည့်တော့ ”
“ ဒါဖြင့် သူ့ ကို နှိုးပြီး မေး ကြည့်ရအောင် ”
အဲသလို ဓားပြ နှစ်ယောက် ဟာ ရွှေအိုး ကို နှိုးပြီး
“ ဟေ့ကောင် ၊ ဒီ ထမင်းထုပ် မင်း ဟာလား ”
ရွှေအိုး က ကြည့်ပြီး သူ့ အမေ လာ ပို့သွားတာပဲ ဆိုတာ သိ လိုက်တယ် ။ ဒါကြောင့်
“ ဟုတ်ပါတယ် ”
“ ဟုတ်ရင် ဘာလို့ မစားရတာလဲ ”
“ မစားချင်လို့ ”
“ ဘာလို့ မစားချင်ရတာလဲ ”
“ မစားချင်လို့ မစားတာပေါ့ ”
“ မေးနေတာ ကောင်းကောင်း ဖြေပါ ။ ဒီ အထဲ မှာ အဆိပ် ခပ်ထားသလား ။ ကျီးတွေ ၊ ငှက်တွေ ပက် ကျွေးပြီး ဖမ်း မလို့လား ”
“ မဟုတ်ပါဘူး ”
“ မဟုတ်ရင် စားပြ ”
“ မစားဘူး ”
“ စားရမယ် ”
“ မစားချင်လို့ မစားတာဗျ ”
“ ဒီကောင် တယ် ခက်ပါလား ၊ ခု စားပြ ”
“ မစားဘူး ”
“ ကဲ မစားတော့လဲ ရိုက်ကျွေးရတာပေါ့ကွာ ”
ဖြန်း ဖြန်း ဖြန်း
လူဆိုး က မောင်ရွှေအိုး ရဲ့ ပါး ကို ဘယ်ပြန် ညာပြန် ရိုက်ပြီး အတင်း စားခိုင်းတယ် ။ ဒီတော့ မောင်ရွှေအိုး က --
“ အမေ ရေ - အမေ့ စကား မှန်တယ်ဗျ ။ သား ကို ပါး ရိုက်ပြီး ကျွေးနေကြပြီလို့ ” အော်ငိုလိုက်သတဲ့ ။
◾ ကံချွန်
📖 ကိုယ်ပိုင်ဟာသပုံပြင်များ
www.facebook.com/aung.naingoo.3726613
.
No comments:
Post a Comment