နပ်ပျက်မှု

 

❝ နပ်ပျက်မှု ❞

တစ်နေ့သော အခါ ငှက်ပျောတောကျေးရွာ တရားရုံး သို့ ၎င်း ရွာသား မောင်ဘိုးရွှန်းဆိုသူသည် အမှု တစ်မှု လာရောက်တိုင်တန်းပါသည် ။ ၎င်း တိုင်တန်းသော အမှု မှာ ၎င်း ၏ သရက်ပင် ယာတောရှိ ထန်းများ ကို ထန်းသမား ကိုပျင်း အား ကိုယ်ဝန် နှင့် အလှီး ခိုင်းထားရာ လွန်ခဲ့သော တပေါင်းလဆန်း ၁၂ ရက် နေ့ က ၎င်း ၏ အမေ နှင့် စကား များပြီး ထန်း မလှီးဘဲ နေရာ ထန်း နှစ်နပ် ပျက်သည် ။ ၎င်း ၏ ထန်းများ မှ တစ်နေ့ တစ်နေ့ လျှင် ထန်းလျက်အချိန် ၁၅ ပိဿာ ခန့် ရရှိသည် ။ ယခု မလှီးဘဲ နပ် ပျက်သည့် အတွက် အကျိုး ဆုံးရှုံးခြင်း ဖြစ်ရ၍ တန်ရာ တန်ကြေး လျော်ငွေ ရ ရန် ဖြစ်ပါသည် ။

အုပ်ချုပ်ရေးမှူး ကိုမြအောင် သည် မောင်ဘိုးရွှန်း ၏ တိုင်တန်းချက် ကို စာ နှင့် ရေးမှတ်ပြီး လက်မှတ်ထိုးခိုင်းကာ တစ်ရက် နှစ်ရက် အတွင်း ဆင့်ခေါ် စစ်ဆေးမည် ဟု ပြောဆို၍ မောင်ဘိုးရွှန်း အား ပြန်၍ လွှတ်လိုက်ပါသည် ။

ငှက်ပျောတောရွာ ၏ ပတ်ဝန်းကျင်တွင် ထန်းပင် များစွာ ရှိပါသည် ။ ထန်း တက်တတ် သူတိုင်း ထန်း မရှိပါ  ။ များသောအားဖြင့် မြေရှင်ကြေးရှင်များ မှာသာ ထန်း ပိုင် ရှိ၍ ထန်းသမားများ မှာ အခစား ဖြင့်သာ လုပ်ကိုင်ကြရပါ သည် ။ ထန်းရှင် နှင့် ထန်းသမား တို့ ထန်း နှင့် ပတ်သက်၍ အလုပ် လုပ်ကြရာတွင် သုံးမျိုး သုံးစား ရှိပါသည် ။

၎င်းတို့မှာ (  ၁ ) ရည်လှဲ့ ၊ ( ၂ ) ပင်ခ ၊ ( ၃ ) ကိုယ်ဝန် ဟူ၍ ဖြစ်ပါသည် ။

( ၁ ) ရည်လှဲ့ ဆိုသည်မှာ ထန်းသမားများ ၏ ကိရိယာ ဖြစ်သော ရင်းထောင် ရင်းဆွဲ ဟု ထန်းသမား ဝေါဟာရ နှင့်ခေါ်သော လှေကား လုပ်ရန် ဝါး ၊ ထန်းရေချို ခံယူရန် မြူအိုးများ ၊ ထန်းလျက် ချက်ရန် ဖျဉ် ခေါ် မြေအိုးများ နှင့်  သံဒယ် ၊ သို့မဟုတ် သတ္တုဒယ် နှစ်လုံး ၊ ၎င်းအပြင် ထန်း ပြင် ဆင် ပြုလုပ်ရန် ဓားချွန် ၊ ထန်းလှီးရန် ဓားနှီး ခေါ် ဓားထီးမားပွင့် ၎င်း အားလုံးတို့ကို ထန်းသမား ကိုယ်ပိုင် ဝယ် ယူ၍ တည်ထောင် ထားရပြီး လေးနေ့ တွင် တစ်နေ့ ကျိုချက်၍ ရ သော ထန်းလျက် ကို ထန်းရှင် သို့ ပေးရပါသည် ။

တစ်ဖန် ၎င်း ရည်လှဲ့ နည်း တွင် ထန်းရှင် က ထန်းသမား သို့ အရင်း တည်ထောင်ရန် ပေးရသော ( က ) အ ပျောက်ငွေ ၊ ( ခ ) မ,ငွေ ဟူ၍ နှစ်မျိုး ရှိပါသေးသည် ။

( က ) အပျောက်ငွေ ဆိုသည်မှာ ငွေ အနည်းငယ်သာ ထန်းသမား သို့ ပေးရ၍ နောင်အခါ ထန်းရှင် သို့ ပြန် မပေးရ တော့ချေ ။

( ခ ) မ,ငွေ မှာ ငွေများများ ပေးရ၍ ထန်း အချိန် ကုန် သောအခါ ထန်းရှင် သို့ ပေးရင်းငွေ အတိုင်း အတိုးမရှိဘဲ ပြန် ၍ ဆပ်ရပါသည် ။ အပျောက်ငွေ နှင့် မငွေ အနည်းအများ မှာ ထန်းသမား အရည်အချင်း နှင့် ထန်း အကောင်းအဆိုး ကို ကြည့်၍ ထန်းရှင် နှင့်ထန်းသမား တို့ အပေးအယူ တည့် အောင် ပြောဆို၍ ပေးယူကြရပါသည် ။

( ၂ ) ပင်ခ ဆိုသည်မှာ ထန်းအဆိုးအကောင်း ကို လိုက်၍ ထန်းတစ်ပင် လျှင် ထန်းလျက် တစ်ပိဿာ မှ နှစ် ပိဿာ အထိ ထန်းရှင် ကို အပြတ် ပေးရပါသည် ။ ဥပမာ ထန်း ၁ဝဝ ရှိသော ထန်းတော ကို ထန်းသမားတစ်ဦးသို့ ထန်းရှင် က ချထားလျှင် ထန်းတစ်ပင် တစ်ပိဿာခွဲ နှင့် အပေးအယူ တည့် ပါက ထန်းလျက် ၁၅ဝ ပိဿာ နှင့်တည့် ပါက ထန်းလျက် ပိဿာ ၂၀၀ ပေး ရပါသည် ။ သို့ သော် ထန်းသမား က အပင် ၁၀၀ လုံး မလှီးနိုင်ပါ ။ ထန်း သုံးသီး သုံးတန် မျှပြီး အပင် ၆ဝ - ၇ဝ လောက်သာ လှီး နိုင်ပါ သည် ။

ကျန် အပင်များ ကို ထန်းသမား က ထန်းရွက် ၊ ထန်း သီးများ နှင့် ထန်းလျှော်များ ကို သုံးရပါသည် ။ ထန်းရွက် ကို ထန်းရွက် ရှားပါးပြီး ထင်း ပေါသောအရပ်များ က ထင်း နှင့် အိမ်မိုးရန် ထန်းရွက် ကို လဲလှယ်ကြရာ ၎င်း ထင်း နှင့် မိမိတို့ ကြိုတင်ပြီး စုဆောင်းထားသော ထင်းများ ကို ထန်း လျက် ကျိုချက်ရာ တွင် အသုံးပြုရပါသည် ။ ထန်းသီး ကို ထန်းသမား တွင် နွား ရှိပါက နွားစာ အဖြစ် သုံး၍ နွား မရှိ လျှင် ရောင်းချပါသည် ။ သို့မဟုတ် ထင်း နှင့် လဲ ပါသည် ။

၎င်း ပင်ခ နှင့် ထန်း လှီးရန် ချထားသော နည်းမှာ ထန်းရှင် က ထန်းသမား သို့ အပျောက်ငွေ ပေးရခြင်း ၊ မ,ငွေ ပေးရခြင်း မရှိတော့ပါ ။ ထန်းသမား က ပင်ခ ထန်းလျက် ပေးရာ၌ ထန်း ရာသီ လများ အတွင်း သုံးခါ နှင့် ပြေလည် အောင်ပေးကြရပါသည် ။

( ၃ ) ကိုယ်ဝန် ဆိုသည်မှာ ထန်းရှင် ကိုယ်တိုင် က ထန်းကိရိယာ အားလုံး နှင့် ထန်း နှင့် ပတ်သက်သော လုပ် ကိုင်ဖွယ်ကိစ္စများ ကို အားလုံး လုပ်ပေးရ၍ ထန်းသမား က လူ ကိုယ်တည်း သက်သက်ဖြင့် ထန်း ပြင်ခြင်း နှင့် ထန်း လှီးခြင်း ၊ ရင်းထောင် ရင်းဆွဲ ပြင်ခြင်း ကိုသာ လုပ်ကိုင် ပေးရပြီး ထန်းရှင် က ထန်းသမား အား ၃ နေ့ လျှင် တစ်နေ့ကျိုချက် ၍ ရသော ထန်းလျက် တို့ကို ပေးရ၍ ထမင်း နှစ်ထပ် နှင့် ကွမ်း ၊ ဆေး ၊ သရေစာ တို့ ကိုလည်း လူ့ တာဝန်ဝတ္တရား ကျေ ပွန်အောင် ပြုစုရပါသည် ။ လုပ်ကိုင်ပြင်ဆင်ပြီးသော ထန်းပင်များ ကို နံနက် တစ်ခါ ၊ ညနေ တစ်ခါ ထန်းသမား က တက်၍ ထန်းစများကို ဓား နှင့် လှီးပြီး မြူအိုးအသစ် နှင့် လဲလှယ်ခဲ့၍ ထန်းရေချိုများ ကို ထန်းပင် အောက် သို့ ချပေး ရပါသည် ။ ထန်း တစ်ခါ လှီးသည် ကို ထန်းသမား ဝေါဟာရ ဖြင့် “ တစ်နပ် ” ဟု ခေါ်ပါသည် ။ ဤသို့ဖြင့် ထန်းများကို နေ့စဉ် နှစ် နပ် လှီး ရပါသည် ။

တစ်စုံတစ်ရာကြောင့် ထန်း တစ်နပ် မလှီးရလျှင် နပ် ပျက် သည် ဟု ခေါ်ပါသည် ။ ၎င်း နပ်ပျက်သော ထန်းရေချို များ သည် ချဉ်ပေါက်ကုန်၍ ထန်းလျက် ကျို ၍ မကောင်းတော့ပါ ။ ကျိုချက်သော်လည်း ထင်း ပို ကုန်ပြီး ထန်းလျက် မခြောက်ဘဲ ဖြစ်နေတတ်ပါသည် ။ သို့ဖြစ်၍ ထန်းများ ကို နပ်မှန်မှန် လှီးဖို့ အလွန် အရေးကြီးသော အလုပ် ဖြစ်ပါသည် ။

ထန်း တော ချင်း တစ်တော နှင့် တစ်တော မတူသလို ထန်းသမား ချင်း လည်း မတူကြပါ ။ ထန်းရေချို အယိုသန်သော ထန်းတော ၊ အယိုနည်းသော ထန်းတော ရှိသလို ထန်းသမားများ တွင်လည်း အရည်အချင်း ( ထန်းပညာ ) ချင်း လည်း မတူကြပါ ။ ထို့ပြင် ရာသီဥတု ကိုလည်း ထန်း များက လိုက်ပါသေးသည် ။ မိုး ကောင်းလျှင် ဘယ်လို  ၊ မိုး နည်းလျှင် ဘယ်လို ၊ နေ ပူလျှင် ၊ နေအေးလျှင် လေ များ များ တိုက်လျှင် ၊ လေ နည်းနည်း တိုက်လျှင် ဘယ်ကဲ့သို့ စသည်ဖြင့် ထန်း ၏ ပရိယာယ် နှင့် ထန်း ၏ စည်းကမ်း ၊ နည်းလမ်းဥပဒေ တို့ မှာ အများကြီး ရှိပါသေးသည် ။ သို့သော် ဤအမှု တွင် ထန်း နှင့် ပတ်သက်သော အကြောင်း ခြင်းရာ တို့ ကို ဤမျှလောက် နှင့် ပေါ်လွင် ထင်ရှားလောက်ပြီ ဖြစ်၍ အမှု ကို ဆက်လက် ရေးသားရပါတော့မည် ။

တပေါင်းလဆုတ် ၃ ရက် နေ့ တွင် အမှု ကို ရက်ချိန်း ပေးထား၍ တရားရုံး တွင် လူကြီးများ နှင့် တရားလို ၊ တရားခံ ၊ သက်သေတို့ စုံလင်သော နေ့ ၁၂ နာရီအချိန်တွင် အမှု ကို စတင် ခေါ်၍ တရားလို မောင်ဘိုးရွှန်း ကို စ၍ စစ် ဆေးပါသည် ။ ငှက်ပျောတောရွာ ၏ အုပ်ချုပ်ရေးမှူး ဖြစ်သူ ကိုမြအောင် သည် မောင်ဘိုးရွှန်း တိုင်တန်းထားသော လျှောက်လွှာကို ဖတ်ပြီး ...

အောင် ။  ။ “ တရားလို မောင်ဘိုးရွှန်း က အခု ဖတ်ပြတဲ့ တိုင်တန်းချက် ကို လျှောက်လွှာ အတိုင်းပဲလား ၊ ဘာများ ဖြည့်စွက် အစစ် ခံလိုပါသေးသလဲ ”

ရွှန်း ။  ။ “ ကျွန်တော် အနည်းငယ် ပြောလိုပါသေးတယ် ။ ပထမနေ့ မနက် က ထန်းသမား ကိုပျင်း ထန်း မလှီးဘဲ တဲထဲ အိပ်နေလို့ ထန်းလှီးဖို့ ကျွန်တော် ပြောတော့ ' ငါ မလှီးနိုင်ဘူး ၊ ဗိုက် နာနေလို့ ' လို့ ပြောပါတယ် ၊ ဒါနဲ့ ကျွန်တော် လည်း မနက် တစ်နပ်တော့ ကိစ္စ မရှိဘူး ဆိုပြီး ဒီအတိုင်း နေလိုက်ပါ တယ် ၊ အဲဒီနေ့ နေ့လယ် ၁၂ နာရီ လောက် ကျတော့ ကိုပျင်း သူ့ အိမ် ပြန်သွားပါတယ် ၊ ကျွန်တော် လိုက်သွားပြီး ထန်း လှီးဖို့ ပြောတော့ “ မင်း တို့ ထန်း ငါ မလှီးနိုင်တော့ဘူး ၊ မင်း အမေ က မာန ကြီးတယ် ၊ ငါ နဲ့ ကြာရှည် ဖြစ်မှာမဟုတ်ဘူး ” လို့ ပြောပြီး ခေါ် မရခဲ့ပါဘူး ၊ အဲဒီ ညနေ တစ်နပ် လည်း လုံးလုံး မလှီးရပါဘူး ”

“ ထန်းသမား ဆိုတာလည်း လူကြီးများ သိတဲ့အ တိုင်း လွယ်လွယ်ကူကူ နဲ့ ငှားလို့ မရနိုင်ပါဘူး ၊ အဲဒါကြောင့် နောက်တစ်နေ့ မနက်တစ်နပ်လည်း ထန်း မလှီးရဘူး ၊ ညနေ အနပ် ကျမှ ထန်း နည်းနည်း လှီး တဲ့ ကိုကျော် ကို မရအရ ခေါ်ပြီး အလှီးခိုင်းရပါတယ် ၊ ကျွန်တော့် ထန်းဟာ ၃ နပ် မလှီးရဘဲ ပျက် ပါတယ် ၊ ၃ နပ် ဆိုတော့ ၂ ရက်လုံး ထန်း ရေချိုမရလို့ ထန်းလျက် မကျိုရပါဘူး ၊ နောက်လည်း ဆက် လက်ပြီး မလှီးတော့ဘူးလို့ သိရပါတယ် ၊ ဒါကြောင့် ထန်းလျက် ၂ ရက် ကျို ဆုံးရှုံးရုံတွင် သာမက ထန်းသမားတို့ ၏ ထုံးတမ်းအတိုင်း ထန်းတုံးသည့်တိုင် ( ထန်း ရာသီ ကုန်ဆုံး သည့်တိုင် ) ဆက်လက် မလှီးတဲ့အတွက် ကျွန်တော့် မှာ အင် မတန် နစ်နာဆုံးရှုံးပါတယ် ၊ လူကြီးမင်းများ ကသာ စစ် ဆေးဝေဖန်ပြီး သင့်လျော်သလို စီရင်ဆုံးဖြတ် ပေးပါရန် အစီ ရင်ခံလိုပါတယ် ”

အောင်  ။  ။ “ တစ်နေ့တွက် ထန်းလျက် ဟာ အခု ဘယ် လောက်ရသလဲ ”

ရွှန်း ။  ။ “ ၁၅ ပိဿာ လောက် ရပါတယ် ”

အောင် ။  ။ “ မောင်ပျင်း နဲ့ စ ပထမ ထန်း လှီးဖို့ စကား ပြောစဉ် က ဘယ်လို ဝန်ခံကတိ ပြုခဲ့ကြသလဲ ”

ရွှန်း ။  ။ “ ထန်း ကို ကိုယ်ဝန် နဲ့ လှီးဖို့ ၊ အကယ်၍ အကြောင်း ပေါင်း မသင့်လို့ ဆက် မလှီးနိုင်တော့ရင် ၄ - ၅ ရက် က ကြို တင် ပြောဖို့ ကတိ ရှိကြပါတယ် ”

အောင် ။  ။“ စာချုပ်စာတမ်းများ ချုပ်ဆိုကြသေးသလား ”

ရွှန်း ။  ။“ မရှိပါဘူး ၊ ဘယ် ထန်းရှင် နဲ့ ထန်းသမား မှ စာချုပ်စာတမ်းနဲ့ ချုပ် မနေကြပါဘူး ၊ ထုံးစံအတိုင်း ပါးစပ် နဲ့ ပဲ ပြောဆိုကြတာပါပဲ ” 

အောင် ။  ။ “ မောင်ပျင်း စလှီးတဲ့ အနပ် က တကယ် ဗိုက်နာ တာ ဟုတ်တယ်လို့ ထင်သလား ”

ရွှန်း ။  ။ “ ဗိုက်နာတာ မဟုတ်ပါဘူး ၊ ကျွန်တော့် အမေ နဲ့ တစ်ယောက်တစ်ခွန်း စကား များလို့ ပရိယာယ် နဲ့ ပြောတာလို့ ထင်ပါတယ် ”

အောင် ။  ။ “ ကိုဘကျော် ကို အခု မင့် ထန်း လှီးဖို့ ဘယ်လို ငှား ထားရသလဲ ”

ရွှန်း ။  ။ “ ကိုပျင်း လှီး သလို ကိုယ်ဝန် နဲ့ လှီးဖို့ ပြောထားပါ တယ် ၊ သူ က ထန်း ၁ဝ ပင် လောက်သာ ပြင်ဆင်ရသေးလို့ မလှီးဘဲ ပစ်လိုက်ရင် ဖြစ်ပါတယ် ၊ ပြီးတော့ သူ့ ထန်းက ကိုယ်ပိုင် ထန်း မို့လို့ ကန့်ကွက်မဲ့ လူလည်း မရှိပါဘူး ”

အောင် ။  ။ “ ထန်းလျက် က မကျိုရတဲ့ နှစ်ရက် ထဲမယ် မောင်ပျင်း ပေးရမယ့် နေ့များ ပါသေးသလား ”

ရွှန်း ။   ။ “ မပါ ပါဘူး ၊ နှစ်ရက်စလုံး ကျွန်တော့် နေ့တွေ ချည်းပါ ”

၎င်းနောက် တရားခံမောင်ပျင်း ကို စစ်ဆေးပါသည် ။

အောင် ။  ။ “ ထန်းရှင်မောင်ထွန်း အစစ် ခံတဲ့အတိုင်း ထန်း မလှီးဘူးဆိုတာ ဟုတ်သလား ”

ပျင်း ။  ။ “ ဟုတ်ပါတယ် ၊ ဘာလို့ မလှီးတယ် ဆိုတာကို လူကြီးများ နားလည်အောင် အစီရင် ခံပါရစေ ၊ ထန်းသမား ဆိုတာ လူကြီးများ သိတဲ့အတိုင်း အလွန် လမ်းကျဉ်းပါ တယ် ( ဘေးရန် နှင့် နီးပါသည် ဟု ဆိုလိုသည် ) တစ်ရပ် တစ်ကျေးက ဧည့်သည် ဖြစ်စေ ၊ ကိုယ့် ရွာသူ ရွာသား ဖြစ်စေ မေတ္တာ မပျက်အောင် ပေါင်းသင်းရပါတယ် ။ သောက်တတ် စားတတ်သူများ ထန်းတဲ ကို လာပြီး ထန်းရေ မရှိဘူး လား ဆိုရင် ကိုယ် မသောက်ရချင်နေပေစေ ဧည့်ဝတ်ကျေအောင် ပြုစုရပါတယ် ၊ သူတို့ မကျေနပ်လို့ ရင်းထောင်တို့ ၊ ရင်းဆွဲတို့ ကျုပ်တို့ မသိအောင် ဖျက်ဆီး ထားရင် ထန်း ရှောပြီး( ထန်း ပင်ပေါ် ကလိမ့်ကျပြီး ) သေ နိုင်ပါတယ် ။

“ ဒီလို ဧည့်ဝတ်ကျေအောင် ထန်းရေတစ်လုံး ပို လောင်းတာ ကို ကိုဘိုးရွှန်း အမေ က မလောင်းရဘူး ၊ ထန်း ရေချို ကုန်တယ် လို့ ပြောလို့ မလောင်းရပါဘူး ၊ ဒီလို မလောင်းရရင်ဖြင့် ကျုပ် လည်း အသေခံပြီး ခင်ဗျား ထန်း ကို မလှီး တော့ဘူးလို့ ဆိုပြီး မလှီးဘဲ နေတာပါ ”

အောင် ။  ။ “ ဗိုက်နာတယ် ဆိုတာကော ဟုတ်သလား ”

ပျင်း ။  ။ “ ဗိုက်နာတာလည်း ဟုတ်ပါတယ် ၊ ဒါပေမဲ့ ဗိုက် နာတာက ခဏ နာတာပါ ”

အောင် ။  ။ “ ဒါ ဖြင့် ထန်းရေ အပို တစ်လုံး မလောင်းရလို့ ထန်း မလှီးတာ မှန်သလား ”

ပျင်း ။  ။ “ ထန်းသမား ရယ် ၊ ကိုယ်ဝန်ဆောင်မိန်းမ ရယ် ၊ ဆင် ဦးစီး ရယ် ၊ မင်းခစားယောက်ျား ရယ် တစ်နေ့ တစ်နေ့ ကို သင်္ချိုင်း ကို မျက်စောင်း သုံးခါ ထိုးတယ်လို့ ကြားဖူးပါတယ် ၊ အဲသလိုမို့လို့ ထန်းရေ အပို မလောင်းရရင် ဧည့်ဝတ် မကျေဘူး ၊ မကျေရင် ကျုပ်တို့ မယ် ဘေးရန် များပါတယ် ၊ အဲဒါ ကြောင့် ထန်း မလှီးဘဲ နေတာ ”

အောင် ။  ။ “ ဧည့်သည် က အမြဲ လာနေတာမှ မဟုတ်ပဲ ၊ တစ်ခါတစ်ရံ လာလို့ ရှိရင် မင့် ထန်းရေအိုး ထဲ က မျှတ တိုက် လိုက်ရင် မဖြစ်ဘူးလား ”

ပျင်း ။  ။ “ မဖြစ်ပါဘူး ၊ ကျုပ်တို့ က အလုပ်ကြမ်းသမား ဆိုတော့ သောက်နေကျ ရေချိန်အတိုင်း မကိုက်ရင် နေလို့ ထိုင်လို့ မကောင်းပါဘူး ၊ အလုပ် လည်း ခရီး မတွင်ပါဘူး ၊ ဒါကြောင့် ပို လောင်းထားမှ ဖြစ်ပါတယ် ”

အောင် ။  ။ “ ဧည့်သည် ကို ထန်းရေ မတိုက်တိုင်း မင့် ကို ရန် ရှာလိမ့်မယ်လို့ အတပ် ပြောနိုင်သလား ”

ပျင်း ။  ။ “ လူကြီးများ စဉ်းစားကြည့်ပါ ၊ ထန်းရေ သောက် တတ်မှတော့ လိမ်မာရင် ဘယ် သောက်မလဲ ၊ မလိမ်မာသူ တွေ မို့လို့ သောက်တာပါ ၊ မလိမ်မာတဲ့ လူတွေ ဟာ ထန်းရေ ကလေး တစ်ခွက် နှစ်ခွက် မပေးတာနဲ့ မပေးတဲ့ ထန်းသမား ကို ရန် ရှာမှာ နဲ့ ရန် မရှာမှာ ဘယ်ဟာကို လုပ်မယ် ဆိုတာ စဉ်းစားကြည့်ရင် သိနိုင်ပါတယ် ”

တရားလို က တင်ပြသော သက်သေနှစ်ယောက် မှာ တရားလို ၏ မိခင် မဖွားတင် နှင့် ထန်းသမား ကိုဘကျော် တို့ ဖြစ်သည် ။ ၎င်းတို့ နှစ်ယောက်အနက် မဖွားတင် ကို လိုအပ် သည်ဟု တရားရုံး မှ မထင်သဖြင့် ထန်းသမား ကိုဘကျော် ကို သာ စစ်ဆေးပါသည် ။

အောင် ။  ။ “ မောင်ဘိုးရွှန်းထန်း ကို မင်း လှီးတာ ဘယ်လို လှီး ရသလဲ ”

ကျော် ။  ။ “ ကိုပျင်း လှီး သလို ကိုယ်ဝန် နဲ့ လှီးရပါတယ် ”

အောင် ။  ။ “ တစ်ယောက် ရဲ့ လက်ကျ ကို တစ်ယောက် ဝင် လှီးရတော့ ထန်း အခြေအနေ ဟာ ဘယ်လို နေသလဲ ”

ကျော် ။  ။ “ ကိုယ့် ဘာသာ ကိုယ် အစ ကတည်းက လုပ် ကိုင် ပြုပြင်ပြီး မလှီးရတော့ တညက် ( ထန်းလျက် ) ရသင့်သလောက် မရ နိုင်ပါဘူး ၊ ပြီးတော့လည်း သုံးနပ်တောင် မလှီးရပဲ နပ်ပျက်ထားတော့ သာ ဆိုး ပါသေးတယ် ၊ ထန်း ဆိုတာ အခုလို ထန်းဖိုဦးမယ် သုံးနပ် မပြောနဲ့ တစ်နပ် ပျက် တာတောင် အတော်လိုက်ယူရပါတယ် ”( ဓားလိုက်ရ သည်ဆိုသည်မှာ နပ်ပျက်ထားသော ထန်းစများသည် အဖျားများခြောက်သွေ့နေ၍ အခါတိုင်း တစ်နပ် တစ်နပ် လှီးနေကျထက် ပို လှီးပစ်ရသောကြောင့် ထန်းစ တိုလွယ် သည် ။ သို့အတွက် ရက် အနည်းငယ် နှင့် ထန်းစ ကုန်သွား ၍ ထန်းရေချို အရနည်းသည် ။ အရ နည်းခြင်းကြောင့် ထန်းလျက် လည်း အရ နည်းသည် ဟု ထို သက်သေ က ဆိုလို သည် ။ )

အောင် ။  ။ “ အခု မင်း လှီး မှ ထန်းလျက် ဘယ်လောက် ရ သလဲ ”

ကျော် ။  ။ “ ၁၀ - ၉ ပိဿာလောက် ရပါတော့တယ် ”

အောင် ။  ။ “ နောက်ကော တိုးရလိမ့်မယ်လို့ မင်း ထင်သေး သလား ”

ကျော် ။  ။ “ နည်းနည်းတော့ တိုး ရလိမ့်မယ်လို့ ထင်ပါ တယ် ၊ ဒါပေမဲ့ ပို လှီး မှ တိုး မှာပါ ၊ ဓား ပို လှီး ရင်လည်း ထန်း မြန်မြန် ဆင်းရပါလိမ့်မယ် ”( ထန်းစ မြန်မြန် ကုန်သွား လိမ့်မည် ဟု ဆိုလိုသည် ။ )

တရားခံမောင်ပျင်း အား တရားလို နှင့် သက်သေ ကို စစ်ပြီးတိုင်း မေးလိုရာ မေးနိုင်တယ် ဟု မေးခွင့် ပြုရာ ဘာမျှ မမေးလိုကြောင်း ပြောဆိုပါသည် ။

၎င်းနောက် တရားလို မောင်ဘိုးရွှန်း က လူကြီးများ အား အနည်းငယ် ပြောဆိုခွင့် ပေးရန် ခွင့် တောင်းသဖြင့် လူကြီးများ က ခွင့်ပြုရာ -

ရွှန်း ။  ။ “ အခု ကျွန်တော် ထန်း ကို ကိုပျင်း ဆက်လက် မလှီး တော့ကြောင်း အစစ်ခံသွားလို့ ထင်ရှားနေပါတယ် ၊  ဘာ ကြောင့် မလှီးနိုင်တယ် ဆိုတာကို သူ အကြောင်းပြတာ လည်း မလုံလောက်ပါဘူး ၊ ဧည့်သည် ဆိုတာ ၁၀ ရက် တစ်ရက် အလာခဲကြီးပါ ၊ ဧည့်သည် မလာဘဲ ထန်းရေကို ပို လောင်းထားတော့ ထန်းရေပေါတိုင်း ထန်း မလှီးခင်ကတည်းက သောက်သောက်နေပါတယ် ၊ သောက်တော့ ထန်း ကို အချိန်မှန်မှန် မလှီးနိုင်ပါဘူး ၊ ထန်း ဆိုတာ အချိန် မှန်မှန် မလှီးနိုင်ရင် ထန်းရေချို လျော့ပါတယ် ၊ ဒါကြောင့် ပို မလောင်းဖို့ ကျွန်တော့် အမေ က ပြောခြင်းပါ ၊ ထန်းရေချို ကို နှမြောလို့မဟုတ်ပါဘူး ၊ ဘယ် ထန်းရှင်မှ ထန်းပေါ်ချိန်မှာ ထန်းရေချို ကို မနှမြောကြပါဘူး ၊ သူ က ဆက်လည်း မလှီး တဲ့အတွက် ကျွန်တော် အများကြီး နစ်နာပါတယ် ၊ နပ်ပျက် တဲ့ နှစ်ရက် တင် မက အခုဆို နေ့တိုင်း ငါးပိဿာလောက် လျော့ နေပါတယ် ၊ ကိုဘကျော် ဆက်လှီး လို့ ၁၅ ပိဿာ ထိ တိုးလာဖို့ရာ မလွယ်ပါဘူး ၊ ဒီလို တိုးမလာရင် ထန်းဖို တုံး သည့်တိုင်အောင် ကျွန်တော့် မှာ နေ့တိုင်း နစ်နာနေမှာပါ ၊ ဒါကြောင့် လူကြီးများ စဉ်းစားဝေဖန်ပြီး အမိန့် ချမှတ်ပါရန် အစီရင်ခံပါတယ် ”

ထို့နောက် တရားခံမောင်ပျင်း အား ဘာများ ပြောလို သေးသလဲဟုမေးရာ ...

ပျင်း ။  ။ “ ကိုဘိုးရွှန်း ပြောတဲ့အတိုင်း သူ့ ထန်း ကို နဂို ကတိ ရှိတဲ့ အတိုင်း ဆက်လက် မလှီးဘူး ဆိုတာ မှန်ပါတယ် ၊ မလှီးတာကလည်း ထန်းရေ တစ်လုံး ပို မလောင်းရ လို့ မဟုတ်ပါဘူး ၊ ကိုဘိုးရွှန်း အမေ ဟာ ချုပ်ချယ်တာတွေ အများကြီး ရှိပါတယ် ၊ ဆေးလိပ် ကို တစ်နေ့ ဘယ်နှစ်လိပ် သောက်တယ် ၊ နေ့ခင်းနေ့လယ် မော လို့ တစ်ရေးတစ်မော အိပ် ရင်လည်း အိပ်ပြန်ပြီ ၊ အစားအသောက်လည်း ဘယ်လောက် စားနိုင်တယ်ဆိုတာတွေ တတွတ်တွတ် ပြောနေ တာပါပဲ ”

“ ထန်းသမား အလုပ် ဆိုတာ အလွန် ပင်ပန်းပါတယ် ။ အား ရှိအောင် မစားရင် ၊ မအိပ်ရင် တစ်နေ့ မဟုတ်တော့ ဘယ်သူမှ မလုပ်နိုင်ကြပါဘူး ၊ ဒါကြောင့် ကြာကြာနေရင် ဒီထက် ဆိုး မှာ မြင်လို့ ကျွန်တော် သူ့ ထန်း ကို ဆက် မလှီးတာပါ ၊ ဒီပြင်လည်း ကျွန်တော်ဟာ ပစ္စည်းမရှိတဲ့ ဆင်းရဲ သားတစ်ယောက်ပါ ၊ အခု သူ့ ထန်း မလှီးတော့ သူများ ခိုင်း ရာ အလုပ်ကို အစားနဲ့ လုပ်ကိုင် စားနေရပါတယ် ၊ ကိုဘိုးရွှန်း နဲ့ နဂို ကတိ အတိုင်း ထန်း ကို ဆက်လက် မလှီးလို့ အပြစ် ရှိတယ် ဆိုတာ သိပါတယ် ၊ ဒါပေမဲ့ ကျွန်တော် ဟာ ဆင်းရဲသူ တစ်ယောက် ဖြစ်လို့ သက်သက်သာသာ အပြစ် ပေးပါ ရန် အစီရင်ခံပါတယ် ”

မောင်းပျင်း ၏ လျှောက်လဲချက် ပြီးဆုံးသောအခါ  အမှုသွား အမှုလာ ကို လူကြီးများ အထပ်ထပ် ဝေဖန်စဉ်းစားကြပြီး တရားခံမောင်ပျင်း အား ပြစ်မှု ထင်ရှားသဖြင့် ဒဏ်ငွေ ၃ဝိ တပ် ရိုက်၍ ၎င်း ဒဏ်ငွေ ကို တရားလို မောင်ဘိုရွှန်း သို့ ပေးစေ ဟု အမိန့် ချမှတ်လိုက်ပါသတည်း ။

◾တောင်သာ - မာဒင်

📖 ရှုမဝ မဂ္ဂဇင်း
       ၁၉၆၅ ခု  ၊ ဒီဇင်ဘာလ

www.facebook.com/aung.naingoo.3726613

.