ပညာရှင် သစ်ခုတ်သမား

 

❝ ပညာရှင် သစ်ခုတ်သမား ❞
               ( ပုံပြင် )

ကလေးတို့ ...

အခု ပြောပြမယ့် ပုံပြင်က ယိုးဒယားနိုင်ငံမှာ ယနေ့ထက်တိုင်အောင် အရေးယူပြီး ပြောဆိုနေကြတဲ့ ရှေးဟောင်း ပုံပြင်တစ်ပုဒ် ရှိတယ်ကွယ့် ။ ယိုးဒယားနိုင်ငံဟာ ငါတို့ ပြည်ထောင်စု မြန်မာနိုင်ငံနဲ့ နယ်နိမိတ်ချင်း ဆက်စပ် နေတဲ့ အိမ်နီးနားချင်း နိုင်ငံတစ်ခု ဖြစ်တယ် ။ ဘာသာရေးဘက်မှာ ဆိုရင်လည်း ငါတို့ ဗုဒ္ဓဘာသာကို အရေးထားပြီး ဆည်းကပ် ကိုးကွယ်နေတဲ့ နိုင်ငံ ဖြစ်တယ် ။ ငါတို့ နှစ်နိုင်ငံဟာ ရှေးနှစ်ပေါင်းများစွာက စပြီး ယခုအထိ ဘာသာရေးဘက်မှာရော ၊ စာပေနဲ့ သီချင်းဂီတ စတဲ့ ယဉ်ကျေးမှု ဘက်မှာရော တစ်နိုင်ငံနှင့် တစ်နိုင်ငံ ရင်းရင်းနှီးနှီး ဆက်ဆံလာခဲ့ကြတယ်ကွယ့် ။ ကိုင်း ... ပုံပြင်ကို ရှေ့ဆက်ပြီး နားထောင်ကြပေတော့ ။

ဟို ... ရှေးရှေးတုန်းက ယိုးဒယားနိုင်ငံမှာ အသက် ငယ်ငယ်ရွယ်ရွယ်နဲ့ ရုပ်ရည် ချောမောလှပတဲ့ ဘုရင်ကလေး တစ်ပါး ရှိခဲ့တယ် ။ အဲဒီ ဘုရင်ကလေးဟာ ရုပ်ရည်ချောမောလှပတဲ့ မိန်းကလေး မှန်ရင် အလွန်ပဲ ချစ်မြတ်နိုးတော်မူလို့ မိန်းမမှန်ရင် ဘယ်သူ့ အပေါ်မှာ မဆို ယုံကြည်စိတ်ချလေ့ရှိတယ် ။ အခုလို မိန်းကလေးများ ယုံကြည်စိတ်ချတဲ့ အတွက် သူ့ရှေ့မှာ မိန်းကလေးများအကြောင်းကို မကောင်းပြောသူ မှန်ရင် ကြီးလေးစွာ အပြစ်ပေးခြင်း ခံကြရတယ် ။

တစ်နေ့တော့ ဘုရင်ကလေးနဲ့ နောက်ပါ အခြွေအရံတို့ဟာ တောလည်ကစား ထွက်သွားလိုက်ကြတာ နေပြည်တော်က အတော် ဝေးကွာတဲ့ တောစပ် တစ်နေရာကို ရောက်ရှိသွား ကြတော့တယ် ။ အဲဒီနေရာမှာ အသက်အရွယ်ကြီးကြီး လူကြီးတစ်ယောက်နဲ့ ရုပ်ရည် အလွန် လှပတဲ့ မိန်းကလေးတစ်ယောက်တို့ဟာ သစ်ပင်ခုတ်ပြီး ထင်းဖြတ် နေတာကို တွေ့တာနဲ့ ဘုရင်လည်း သူတို့ အနားကို သွားပြီး “ အဆွေသစ်ခုတ်သမား ၊ ထင်းဖြတ်ရတာ တော်တော် ပျော်ပါရဲ့ လား ၊ ပိုက်ဆံကြေးငွေကော ဘယ်လောက် စုဆောင်းမိပါပြီလဲ ” လို့ စုံစမ်းမေးမြန်းတော်မူတယ် ။

သစ်ခုတ်သမားကလည်း အခုလို ဘုရင်က မေးမြန်း စုံစမ်းတော့ “ မှန်လှပါ ၊ အခုလို ရိုးရိုးသားသား လုပ်ကိုင်စားသောက်နေရတာဟာ အလွန်ပဲ ပျော်ရွှင်ချမ်းမြေ့လှပါတယ် ၊ ငွေကြေးလည်း အတော်အသင့် စုဆောင်းမိပါပြီ ” လို့ ရိုသေစွာ ပြန်လည် လျှောက်ထားလိုက်တယ် ။

အဲဒီအခါ ဘုရင်က “ သင် ငွေကြေး အတော်သင့် စုဆောင်းမိရင် ဒီငွေတွေကို အကျိုး ရှိအောင် ဘယ်လို အသုံးပြုမလဲ ” လို့ ထပ်မံ မေးမြန်းတော့ သစ်ခုတ်သမားက “ မှန်လှပါ ၊ ဒီငွေတွေကို အခုလက်ငင်း စားသောက် နေထိုင်ရာမှာ သုံးစွဲဖို့ အတွက် အနည်းငယ် ချန်လှပ်ထားပြီး ကျန်ငွေတွေကို လေးပုံပုံ လိုက်ပါမယ် ။ အဲဒီ လေးပုံထဲက ပထမ အပုံကို မြေကြီးထဲမှာ မြှုပ်နှံထား ပြီး ဒုတိယ အပုံကို ရှေးက တင်ရှိခဲ့ဖူးတဲ့ ကြွေးဟောင်းများကို ပေးဆပ်ရပါမယ် ။ တဖန် တတိယ အပုံကိုတော့ မြစ်ထဲကို စွန့်ပစ်ပြီး နောက်ဆုံး ကျန်တဲ့ စတုတ္ထ အပုံ ကိုတော့ ကျွန်တော်မျိုးရဲ့ရန်သူကို ပေးရပါလိမ့်မယ် ” လို့ တင်လျှောက်လိုက်ပြန်တယ် ။

ဒီလိုတင်လျှောက်ချက်ကို ဘုရင်ကလေး ကြားသိရတော့ အတော် ထူးဆန်းတဲ့ စကားပဲလို့ ယူဆပြီး “ သင့်ရဲ့ လျှောက်ထားချက်စကားသည် အလွန် ထူးဆန်းလှသဖြင့် ကျွန်ုပ် နားမလည်နိုင်ပါ ၊ အဓိပ္ပာယ် ထပ်မံ ရှင်းပြစမ်းပါဦး ” လို့ ထပ်မံ မေးမြန်းရပြန်တော့တယ် ။ ဒါနဲ့ သစ်ခုတ်သမားက “ မှန်လှပါ အရှင်မင်းမြတ် ၊

( ၁ ) မြေကြီးထဲမှာ မြှုပ်နှံထားမယ် ဆိုတဲ့ စကားရဲ့ အဓိပ္ပာယ်ဟာ ကျွန်တော်မျိုး ထက် ဆင်းရဲနွမ်းပါးသူများကို ပေးကမ်းလှူဒါန်းမယ်လို့ ဆိုလိုခြင်း ဖြစ်ပါတယ် ။

( ၂ ) ရှေးက တင်ရှိခဲ့ဖူးတဲ့ ကြွေးဟောင်းများကို ပေးဆပ်မယ် ဆိုတဲ့ အဓိပ္ပာယ် ကတော့ ကျွန်တော်မျိုး ပေါ်မှာ မွေးကျေးဇူး ရှိခဲ့ဖူးတဲ့ မိအိုဖအိုများကို ပြန်လည် ထောက်ပံ့ပြီး မွေးကျေးဇူးဆပ်မယ်လို့ ဆိုလိုခြင်းဖြစ်ပါတယ် ။

( ၃ ) မြစ်ထဲကို စွန့်ပစ်မယ်ဆိုတဲ့ အဓိပ္ပာယ်ကတော့ အဲဒီ ပိုက်ဆံတွေနဲ့ အကျိုးမရှိတဲ့ အရက်သေစာ သောက်စားပျော်ပါးပစ်မယ်လို့ ဆိုလိုခြင်း ဖြစ်ပါတယ် ။

( ၄ ) ကျွန်တော်မျိုးရဲ့ ရန်သူကို ပေးရမယ်ဆိုတဲ့ အဓိပ္ပာယ်ကတော့ ရန်သူနဲ့ တူတဲ့ ကျွန်တော်မျိုးရဲ့ ဇနီးသည်ကို ပေးမယ်လို့ ဆိုလိုခြင်း ဖြစ်ပါတယ် ” လို့ ရှင်းလင်း တင်လျှောက်ရတော့တယ် ။ အခုလို တင်လျှောက်လိုက်တော့ ဘုရင်ကလေးက သစ်ခုတ်သမားဆင်းရဲသား ၊ သင် ရှေ့လျှောက်ထားချက် လေးချက် အနက် ပထမသုံးချက် ကို တော့ဖြင့် ငါကိုယ်တော်မြတ် သဘောတူ လက်ခံပါတယ် ၊ ဒါပေမယ့် နောက်ဆုံး စတုတ္ထအချက်ကိုတော့ သဘောမတူနိုင်ပါဘူး ၊ နောက်ပြီး စကားထာ လေးပုဒ်ရဲ့ အဓိပ္ပာယ် ကိုလည်း ဘယ်သူမှ ဖွင့်မပြောပါဘူးလို့ ကတိ ပြုရမယ် ၊ တကယ်လို့ တစ်စုံတစ်ယောက်သော သူကို သင်ကိုယ်တိုင် ဖွင့်ဟပြောမိတယ်လို့ ကျွန်ုပ် ကြားသိရပါက သင့်ကို ဖမ်းဆီးပြီး ထောင်သွင်း အကျဉ်းချထားမယ် ” လို့ အမိန့်ပေးပြီး ထွက်ခွာသွားတော်မူတယ် ။

ဘုရင်လည်း နန်းတော် ပြန်ရောက်တာနဲ့ တစ်ပြိုင်နက် သစ်ခုတ်သမား ပြောတဲ့ စကားထာ ( ၄ ) ချက်ကို ပေစာရွက် ပေါ်မှာ ကူးရေးစေပြီး ဒီစကားထာ ( ၄ ) ချက်ရဲ့ အဓိပ္ပာယ်ကို မှန်အောင် ဖြေဆိုနိုင်တဲ့သူ ရှိရင် ရွှေဒင်္ဂါး မြောက်များစွာ ချီးမြှင့်ပေးသနားတော်မူမယ်လို့ နိုင်ငံတော် တစ်ဝန်းလုံးမှာ မောင်းခတ် ကြေညာစေတယ် ။

ဒီကြေညာချက်ကို သစ်ခုတ်သမားရဲ့ မိန်းမ ကြားသိရတော့ ဝမ်းထဲက အကောက်ကြံပြီး ယောက်ျား ထံမှာ အဖြေမှန် ပြောပြဖို့ အမျိုးမျိုး မေးမြန်း တိုက်တွန်းတယ် ။ သစ်ခုတ်သမား ကလည်း သူ့မိန်းမကို အဖြေမှန် ဖွင့်ပြောလိုက်ရင် ဘုရင့်ရွှေနားတော်ကို ပေါက်ကြားသွားပြီး အဖမ်းခံရမှာ စိုးရိမ်မိတာနဲ့ ဖွင့်မပြောရဲရှာဘူး ။ ဒါပေမယ့် သူ့မယားကလေး ကလည်း သစ်ခုတ်သမား ထံမှာ မိန်းမတို့ ပရိယာယ်ကို သုံးပြီး အမျိုးမျိုး ချော့မော့ လှည့်ပတ်မေးမြန်းတော့ နောက်ဆုံးမှာ ဖွင့်ပြောလိုက်မိတော့တယ် ။

သစ်ခုတ်သမားရဲ့ မယားလည်း အခုလို စကားထာရဲ့ အဖြေမှန်ကို သိရတဲ့အခါ နန်းတော် ထဲသို့ ဝမ်းသာအားရစွာ ဝင်သွားပြီး ဘုရင့်ထံမှာ ရဲရဲဝံ့ဝံ့ လျှောက်တင်လိုက်တော့တယ် ။ ဘုရင်ကလည်း သူ့ရဲ့ ကြေညာချက် အတိုင်း သစ်ခုတ်သမားရဲ့ မယားကို ရွှေဒင်္ဂါး မြောက်များစွာ ဆုချတော်မူလိုက်တယ် ။ ဆုချပြီးမှ ဒီအဖြေမှန်ကို ဘယ်သူ့ထံမှ သိခဲ့ရသလဲလို့ ထပ်မံ မေးမြန်းစုံစမ်းတဲ့အခါ သူ့ယောက်ျား သစ်ခုတ်သမားက ဖွင့်ပြောလို့ သိခဲ့ရကြောင်းကို ကြားသိရတော့ အတော်ပဲ အမျက်ဒေါသ ထွက်ပြီး သစ်ခုတ်သမားကို ဖမ်းဆီးချုပ်နှောင်စေတယ် ။

ဒီအခါမှာ သစ်ခုတ်သမား က “ အရှင်မင်းမြတ် ၊ ကျွန်တော်မျိုးက စကား အနည်းငယ် လျှောက်ထားရန် ခွင့်ပြုတော်မူပါ ၊ ကျွန်တော်မျိုး တင်လျှောက်ခဲ့တဲ့ စကားထာ ( ၄ ) ချက် အနက် အရှင်မင်းမြတ် သဘောမတူတဲ့ နောက်ဆုံး စတုတ္ထ အချက်ဟာ ယခု မှန်နေပြီ မဟုတ်လား ။ ကျွန်တော်မျိုးရဲ့ ဇနီးဖြစ်သူဟာ ကျွန်တော်မျိုး အပေါ်မှာ အကောက်ကြံပြီး ထောင်ထဲကို ရောက်အောင် ပို့ ၊ အရှင်မင်းမြတ် ထံက လက်ခံရရှိတဲ့ ဆုတော်လာဘ်တော်နဲ့ ကျွန်တော်မျိုးထက် အသက် ငယ်ရွယ်တဲ့ အခြားသူ တစ်ဦးနဲ့ အိမ်ထောင်သစ် ထူထောင်ဖို့ စီမံနေတယ် ဆိုတာ ထင်ရှားနေပါတယ် ၊ ဒါကြောင့် ကျွန်တော်မျိုးက နောက်ဆုံး စတုတ္ထဝေစု ကို ရန်သူနဲ့ တူတဲ့ ဇနီးသည်ကို ပေးရပါတယ်လို့ တင်လျှောက်ခဲ့ခြင်းဖြစ်ပါတယ် ” လို့ ဘုရင့်ထံမှာ ရဲဝံ့စွာ အစီရင်ခံလိုက်တော့သည် ။

ဘုရင်ကလေးလည်း ဒီအခါ ကျတော့မှ အဖြစ်မှန်ကို သိရတာနဲ့ နောင်တတရား ရလို့ သစ်ခုတ်သမားကို အချုပ်အနှောင်က ချက်ချင်း လွှတ်ပြီး ပညာရှိအမတ်ကြီးရာထူးနဲ့ ကြီးကျယ်စွာ ချီးမြှောက်တော်မူလိုက်တယ်ကွယ့် ။ မိမိ ခင်ပွန်းသည် ပေါ်မှာ အကောက်ကြံတဲ့ သစ်ခုတ်သမားရဲ့ မိန်းမကိုတော့ တိုင်းပြည်က နှင်ထုတ်‌တော် မူလိုက်တယ် ။

ကိုင်း ကလေးတို့ ၊ ဒီပုံပြင်ကို ဖတ်ပြီး မင်းတို့တတွေ မှတ်သားနာယူဖို့က ဒီပုံပြင်မှာ ပါတဲ့ အတိုင်း “ နောင် ကြီးပြင်းလာတဲ့ အခါမှာ ပိုက်ဆံကြေးငွေကို အကျိုးရှိအောင် စနစ်တကျ သုံးစွဲတတ်ဖို့နဲ့ လျှို့ဝှက်အပ်တဲ့ စကားကို အချိန်အခါ မရောက်သေးဘဲနဲ့ ဘယ်သူ့ကိုမှ ဖွင့်မပြောသင့်ဘူး ” ဆိုတဲ့အချက် ( ၂ ) ခုပါပဲကွယ် ။ ကလေးတို့ ပျော်ရွှင်နိုင်ကြပါစေ ။

( ဘာသာပြန် )

〇 တက္ကသိုလ်စန်း
📖ရှုမဝ မဂ္ဂဇင်း
     ၁၉၅၇ ၊ ဖေဖော်ဝါရီ