❝ စောလုံ စောင့်ပါခလှည့် ❞
( နရသီဟပတေ့ )
ပုဂံရာဇဝင်မှာ ထင်ရှားခဲ့တဲ့ နရသီဟပတေ့မင်းရဲ့ စကားတစ်ခွန်း ဖြစ်ပါတယ် ။ ငယ်မည် မင်းခွေးချေး ခေါ်တဲ့ နရသီဟပတေ့ဟာ ပုဂံရာဇဝင်မှာ ဖြစ်ရပ်စုံလင်လှတဲ့ ဘုရင်တစ်ပါးပါ ။ အမျက်စောင်မာန်ကြီးခြင်း ၊ စည်းစိမ်ယစ်မူးခြင်း ၊ အသိဉာဏ်နည်းခြင်း ၊ မဆင်မခြင် အဆောတလျင် ဆုံးဖြတ် အမိန့်ပေးခြင်းစတဲ့ စရိုက်လက္ခဏာတွေနဲ့ ပြည့်စုံသူလို့ ဆိုပါတယ် ။ သူ့လက်ထက် မှာ ထူးထူးခြားခြား ( လို့ဆိုရမယ့် ) ဖြစ်ရပ်တွေကလည်း အများသား ။ မိဖုရားကြီး ဖွားစောဟာ အမြဲတစေအနီးကပ် ထိန်းမတ်နေရတဲ့ ဘုရင်ပါတဲ့ ။
“ စောလံု ၊ စောင့်ပါခလှည့် ” ။ ဒီစကားဖြစ်ပေါ်လာပုံက ဒီလိုပါ ။
နွေလရာသီမှာ ရေဖျန်းကစားမြဲဖြစ်တဲ့ နရသီဟပတေ့ဟာ နန်းတော်ကနေ မြစ်ဆိပ်အထိ အမိုးအကာအပြည့် တဲတန်းလျားရှည်ကြီးကို ထိုး ၊ မြစ်ဆိပ်မှာလည်း မင်းတဲဆောက်စေပြီး ရေကစားလေ့ ရှိပါတယ် ။ မောင်းမမိဿံ အစုံအလင်နဲ့ပါ ။ ဒီပွဲတစ်ပွဲမှာ မိဖုရားစောလုံကို “ မျက်စိ ၊မျက်နှာ ၊ ဦးဆံရွှမ်းရွှမ်းစွတ်အောင် ရေပက် " လို့ မောင်းမငယ်တစ်ဦး ထံ ကျိတ်မှာထားပါတယ် ။ စောလုံ ဆိုတာကနရသီဟပတေ့ အလွန် မြှောက်စား ချစ်ကြည်တဲ့ မိဖုရားငယ်တစ်ဦးပါ ။ အချစ်ကြီးသူမို့ ခပ်ကြမ်း
ကြမ်းကလေး ကျီစယ်တဲ့သဘောပါ ။ မောင်းမမိဿံတွေအလယ်မှာ စောလုံဟာ ရေမွန်းပြီး ဝူးဝါးပြိုလဲ အရှက်တကွဲဖြစ်ခဲ့ရပါတယ် ။ ဒါကို နရသီဟပတေ့က တဟားဟားနဲ့ ရယ်ပွဲဖွဲ့၊ ဘုရင်ရယ်တော့ အားလုံးက လည်း လိုက်ရယ်ကြပေါ့လေ ။
စောလုံဟာ ငယ်ရွယ်ချောမောသလောက် အလှဂုဏ်နဲ့ မာန်မာနကြီးရတဲ့အထဲ ရေသဘင်ပွဲမှာ အရှက်တကွဲဖြစ်ခဲ့ရတော့ မင်းကြီးအပေါ် အမျက်သို နှလုံးနာပြီး ပွဲတော်စာ ( ထမင်းအုပ် ) မှာ အဆိပ်ခပ်ပါရော ။ ဒီအမှု ပေါ် သွားတော့ မင်းကြီးက စောလုံကို စစ်မေးပါတယ် ။ စောလုံက “ ဟယ် ... ပန်းပွတ်သည်မြေး ၊ နင့်ကို ငါ လုပ်ကျွေးမွေးမြူ၍ ငါ့ကိုနင် သူကောင်းပြုလျှင် ဤသို့သောကိုယ်ဖြစ်၍ အထင်အရှားရှိပြီးမှ မောင်းငယ်ကို နှုတ်ထည့်၍ အဝတ်အစား ဦးဆံစွတ်အောင် နင်လုပ်သောကြောင့် နင့်ကိုငါ နှလုံးထောင့်၍ ကြံသည် ” လို့ ပြန်ပြောပါတယ် ။
“ ပန်းပွတ်သည်မြေး " ဆိုတဲ့ စကားလုံးဟာ နရသီဟပတေ့ရဲ့ မျိုးရိုးဇာစ်မြစ်ကို လှန်ပြီး ငယ်ကျိုးငယ်နာ ဖော်လိုက်တဲ့စကားပါ ။ ဒီစကားလုံးကို ဘုရင်မခံနိုင်ပါဘူး ။ ဒါ့အပြင် အဆိပ်ခပ် လုပ်ကြံတယ်ဆိုတာကလည်း အဆုံးစွန်သော ရာဇဝတ်ပြစ်မှုဆိုတော့ ...
ပန်းပဲသမားတွေခေါ် သံကျပ်စင်လုပ်ခိုင်းပြီး “ ဖိုထိုးကျပ်တင် သတ်စေ အမိန့်ချပါတယ် ။ မိဖုရားစောလုံဟာ ခုနစ်ရက်လုံးလုံး အဓိဋ္ဌာန်ဝင် ၊ သီတင်းသီလ စောင့်ပြီးမှ သံကျပ်စင်တက်တယ်လို့ ဆိုပါတယ် ။ သီလဂုဏ်ကြောင့် မီးသုံးကြိမ်သေပြီးမှ ငါသည် ခဏချင်း ကျွမ်း၍ ပျောက်စေသားလို့ ဓိဌာန်ပြီး အနိစ္စရောက်သွားပါတယ် ။
နရသီဟပတေ့မင်းဟာ စောလုံကိုသတ်ပြီးနောက် စက်တော်ခေါ်ချိန်ရောက်ရင် ယောင်ယမ်းတမ်းတ ခေါ်မိပါတယ်တဲ့ ။ အခါတိုင်း သူအိပ်ရာအဝင်မှာ ထွေးပွေ့ချော့သိပ် ခစားရသူဟာ စောလုံဖြစ်ခဲ့တာကလား ။ ဒီတော့ မင်းကြီးဟာ အိပ်ရာဝင်တာနဲ့ မြည်တမ်းပါတော့တယ် ။ “ စောလုံ ...စောင့်ပါခလှည့် ၊ စောလုံ...စောင့်ပါခလှည့် ” တဲ့ ။
စောလုံကို စီရင်ပြီးပါပကောလို့ မိဖုရားစော သတိပေးတော့မှ ငါမှားပြီရယ်လို့ နှလုံးကြေကွဲအိပ်မပျော်နိုင်ဖြစ်ရပါတယ် ။ မဟာထေရ်ဆရာတော် တရားနဲ့ဆုံးမမှ အတန်အသင့် ဝေဒနာပြေပြီး “ နောင် ငါမျက်ကဲ့သော် လခွဲဆယ်ရက်ထားပြီးမှ အချင်းခပ်သိမ်းကို မေးမြန်းစိစစ်ဦး ၊ ပြီးမှ စီရင်သင့်သူ စီရင် ၊ လွှတ်သင့်သူ လွှတ်စေ ” လို့ မိန့်မှာပါသတဲ့ ။
****** ******** *******
ချစ်ခင်လေးစားအပ်သော မိတ်ဆွေ ... ။ ကျွန်တော်တို့မှာ ကိလေသာ အကြမ်းစားတွေ အခံရှိနေလေတော့ တစ်စုံတစ်ခု မိမိကို ထိခိုက်လာတယ်လို့ ထင်မြင်ယူဆလိုက်တဲ့အခါ ပြင်းထန်တဲ့ ပေါက်ကွဲမှုတွေ ထွက်ပေါ်လာတတ်ကြပါတယ် ။ အဲဒီပေါက်ကွဲမှုရဲ့ဖြစ်စဉ်နောက်ခံအကြောင်းရင်းတွေထဲမှာ တရားခံဟာ “ သူ " ပဲဖြစ်နေတတ်ပြီး “ မိမိ " ရဲ့အပြစ်မရှိဘူးလို့လည်း ယူဆတတ်ကြပါတယ် ။ သူ့ကြောင့် ၊ ဒင်းကြောင့် ... ငါကဲ့သို့သော သူကိုများ စသည်ဖြင့် အတ္တမာန်မာန ၊ ဒေါသမီးအဆိပ် တောက်လောင်ပျံ့နှံ့လာတဲ့
အခါမျိုးမှာ မပြောသင့်တာ ပြောမိ ၊ မလုပ်သင့်တာ လုပ်မိနဲ့ ။
နရသီဟပတေ့ကတော့ “ စောလုံ ၊ စောင့်ပါခလှည့် ” လို့ လွန်ခဲ့တဲ့ နှစ်ပေါင်း ၇၀၀ ကျော်ကတည်းက မြည်တမ်းရေရွတ်ခဲ့ဖူးပြီ ။
◾ ချစ်ဦးညို
📖 သမိုင်းမတွင်ပေမယ့် သမိုင်းဝင်နေတဲ့ စကားများ
No comments:
Post a Comment