ဦးသန်းရွှေ၏ ယတြာ (၁)

❝ ဦးသန်းရွှေ၏ယတြာ (၁) ❞

    ဗိုလ်ချုပ်မှူးကြီးသန်းရွှေကို ကြည့်လိုက်လျှင်အမြဲတမ်း မျက်နှာထား သုန်မှုန်နေတတ်ပြီး ဘာတစ်ခုမှ အလိုမကျသည့်အသွင် ဖြစ်နေတတ်သည် ။ စစ်အစိုးရများထဲတွင်ဟောင်ဖွာဟောင်ဖွာလုပ်မှု အနည်းဆုံးပုဂ္ဂိုလ်လည်း ဖြစ်သည် ။ သူ့ရှေ့ကဗိုလ်ချုပ်စောမောင်သည်ပင် ရောက်ရာ အရပ်တွင် စာအုပ်တွေထောင်ပြီး သူ မည်မျှသိကြောင်း ထုတ်ဖော်ကြွားဝါပြောဆိုတတ်သည် ။ သို့သော် ဗိုလ်ချုပ်မှူးကြီးကား ဘယ်နေရာမှစကားမပြော ၊ တပ်မတော်နေ့လိုမျိုးတွင်ပင် မဖြစ်မနေ စာတက်ဖတ်လိုက်သည်သာ များသည် ။ သူစစ်အစိုးရခေါင်းဆောင်အဖြစ် တာဝန်ယူနေရချိန်တွင် ဒေါ်အောင်ဆန်းစုကြည်မှာ သူ့အတွက်ဆူးငြောင့်ခလုတ်တစ်ခု ဖြစ်နေရသလို စိတ်ပျက်စရာ ဖြစ်နေရသည် ။ ဒေါ်အောင်ဆန်းစုကြည်ကား တစ်နိုင်ငံလုံးက လေးစားကြည်ညို ချစ်ခင်ရသည့်အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ သမီး ၊ ထို့ပြင် စစ်အစိုးရနှင့်ဆန့်ကျင်ဘက် ဒီမိုကရေစီ ဘက်တော်သား ။ ပိုဆိုးသည်က အမျိုးသမီး ဖြစ်နေခြင်း ။

    ဗိုလ်ချုပ်ကြီးများကို အာဏာရ ၊ နေရာရလာပြီးနောက် မကြာခဏရုပ်မြင်သံကြားများထဲတွင် တွေ့မြင်လာကြရသည် ။ သတင်းလာလျှင် သူတို့ တိုင်းခန်းလှည့်လည်မှုများ ၊ အခမ်းအနားတက် မှုများ ၊ ဖွင့်ပွဲများကို ဖွင့်ပေးခြင်းများ အားလုံး သူတို့ကို မတွေ့ချင် ၊ မမြင်ချင်မှ အဆုံးဖြစ်သည် ။

    တစ်နေ့တွင် ထူးခြားစွာ ဗိုလ်ချုပ်မှူးကြီးကိုအမျိုးသမီးများသာ ဝတ်ဆင်လေ့ရှိသည့် ချိတ်ထဘီကြီး ဝတ်လျက်သား အခမ်းအနားတစ်ခုတွင် တွေ့လိုက်ကြရသည် ။ ထိုနေ့ကား ၂၀၁၁ ခုနှစ် ၊ဖေဖော်ဝါရီလ ၁၂ ရက်နေ့ နေပြည်တော်တွင် ကျင်းပသောပြည်ထောင်စုနေ့ ညစာစားပွဲ အခမ်းအနားဖြစ်သည် ။ သူနှင့်အတူ အခြားသော ဗိုလ်ချုပ်များ အားလုံးလိုလိုလည်း ချိတ်ထဘီတွေ ကိုယ်စီနှင့် ဖြစ်နေသည် ။

သူတို့ ဘယ်လိုသဘောနဲ့ ချိတ်ထဘီတွေ ဝတ်လာကြသလဲတော့ မပြောတတ်ဘူး ။ ဒါပေမဲ့ သူတို့ကိုကြည့်ရတာ အတော်လေးထူးဆန်း နေတာတော့ အမှန်ပဲဟု ရန်ကုန်မြို့တွင် နေထိုင်သော စက်ပြင်ဆရာတစ်ဦးဖြစ်သည့် မြင့်ဦးက ပြောသည် ။

မြန်မာနိုင်ငံတွင် အမျိုးသားရော အမျိုးသမီးများပါ ပိုးထည်များ ဝတ်သည်ဆိုသော်လည်းယောက်ျားမိန်းမ ဒီဇိုင်းအဆင် ခွဲခြားဝတ်ဆင်ကြသည်က များသည် ။ ယောက်ျားများဝတ်လျှင် ပုဆိုးဟုခေါ်ပြီး ၊ ပုဆိုးဆင်က သီးခြားဖြစ်သည် ။ အမျိုးသမီးများ ဝတ်လျှင် ချိတ်ထဘီဟု ခေါ်ကြသည် ။ ထိုနေ့က ဗိုလ်ချုပ်များဝတ်ဆင်လာသည့် ပုံစံများမှာ လုံချည်ပုံစံမဟုတ် ချိတ်ထဘီအဆင်များ ဖြစ်နေသည် ။

မြန်မာနိုင်ငံ၏ နောက်ဆုံမင်းဆက် သီပေါမင်းသည် ဗြိတိသျှတို့ ထံတွင် ၁၈၈၆ ခုနှစ်၌ နန်းစွန့်ခဲ့ရသည် ။ ထိုခေတ်က ဘုရင်များသာ ချိတ်ထဘီအဆင်များကို ဝတ်ဆင်လေ့ရှိကြသည် ။ သို့သော် ခေတ်သစ်အာဏာရှင် စစ်ဗိုလ်ချုပ်များအားလုံး ချိတ်ထဘီတွေ ကိုယ်စီဖြစ်နေခြင်းအား တီဗီကြည့်နေသူအားလုံးက သဘောပေါက်လိုက်သည်မှာ ယတြာ ချေနေခြင်းသာ ဖြစ်မည်ဟု ယူဆကြသည် ။ အမည်မဖော်လိုသူ ဗေဒင်ဆရာတစ်ဦးကလည်း ထိုနေ့သည် ကိန်းခန်းဗေဒင် ဓာတ်သဘောအရ ဓာတ်ရိုက် ဓာတ်ဆင်ရန် အကောင်းဆုံး နေ့တစ်နေ့ ဖြစ်နေကြောင်း သိရသည် ။

မြန်မာနိုင်ငံသည် လွန်ခဲ့သော ရာစုနှစ်ဝက် တစ်ခုအတွင်း အုပ်စိုးသူ မင်းသုံးဆက် ပြောင်းသွားခဲ့ရသည် ။ ထိုမင်းဆက် အာဏာရှင်သုံးဦးစလုံးသည် ဗေဒင်ယတြာများကို ယုံကြည်ကိုးစား အားထားကြသူများ ဖြစ်ခဲ့သည် ။ ဗိုလ်ချုပ်နေဝင်းက ၁၉၆၂ ခုနှစ်မှ ၁၉၈၈ ခုနှစ်အထိ အုပ်စိုးသွားခဲ့သည် ။ သူလည်း ယတြာသဘောအရ သူ့ပုံကို မှန်ထဲတွင်
ကြည့်ပြီးမှန်ကို သေနတ်နှင့် ပစ်ခတ်ကာ ယတြာချေသူ ဖြစ်သည် ။ သူကိုးကွယ်သည့်နတ်ဆရာက သူ့ကို လုပ်ကြံမည့်သူ ရှိသည်ဟု ပြောသဖြင့် ကိုယ့်ကိုယ်ကိုယ် မှန်ထဲတွင် လုပ်ကြံလိုက်ခြင်း ဖြစ်သည် ။ ထို့ပြင် ၉ ဂဏန်းကို အဆောင်သဘောဖြင့် ၁၉၈၇ ခုနှစ်တွင် အသစ်ထုတ်ခဲ့သော ပိုက်ဆံများကို ၉ နှင့်စားလျှင် ပြတ်သည့် ကိန်းဂဏန်းများဖြင့် ခွတီးခွကျ ထုတ်ခဲ့သည် ။ ၄၅ ကျပ်တန် ၊ ၉၀ ကျပ်တန်များ ဖြစ်သည် ။ သို့သော် သူ့ယတြာ မစွမ်းဟုဆိုရမည် ။ နောက်တစ်နှစ်တွင် တိုင်းပြည်ပျက်ပြီး သူလည်း ရာထူးက ဆင်းပေးလိုက်ရသည် ။

    သူ့နေရာကို အာဏာသိမ်းပြီး ဆက်ခံသူမှာ ဗိုလ်ချုပ်စောမောင် ဖြစ်သည် ။ သူလည်း ဘယ်နေရာရောက်ရောက် ၊ ဘာပြောပြော ​ေဗဒင်နှင့် နတ်ဆရာတွေ အကြံအစည်အတိုင်း ခင်းကျင်းပြင်ဆင် ပြောဆိုလုပ်ကိုင်တတ်သည် ။ ဗိုလ်ချုပ်စောမောင်နောက် ဆက်ခံသည့် ဗိုလ်ချုပ်သန်းရွှေကား ဗေဒင်ဆရာ ၊ နတ်ဆရာပေါင်း ၇ ဦးခန့် ရှိသည် ။ သူတို့အားလုံး၏ အဓိကပစ်မှတ်သည် ဒေါ်အောင်ဆန်းစုကြည် ဖြစ်သည် ။

    ဗေဒင်ဆရာ ၊ နတ်ဆရာ ၊အောက်လမ်းဆရာများ အားလုံးသည် အရှေ့တောင်အာရှတွင် အလွန်ရေပန်းစားသူများ ဖြစ်ကြသည် ။ ပြည်ထောင်စုနေ့ ညစာစားပွဲတွင် ဗိုလ်ချုပ်မှူးကြီးသန်းရွှေနှင့် အပေါင်းအပါများကို ချိတ်ထဘီများဖြင့် ပြည်သူတွေ တွေ့ရှိလိုက်ကြရသော်လည်း ၊ အင်တာနက် Webpage ပေါ်တွင် ထိုပုံများကို မတင်ကြောင်း တွေ့ရသည် ။ ထိုအကြောင်းနှင့် ပတ်သက်ပြီး ဝစ်ကိုဆင်တက္ကသိုလ်မှ မြန်မာ့ရေးရာ အထူးကျွမ်းကျင်သူမနုဿဗေဒပညာရှင် အင်းဂရစ်က ယတြာချေသည်ကို လူသိမခံလိုသောကြောင့် အင်တာနက်ပေါ်သို့ ပုံများ မတင်ခြင်းဖြစ်မည်ဟုသုံးသပ်သည် ။

    ယင်းသို့ ဗိုလ်ချုပ်များ ချိတ်ထဘီဝတ်ခြင်းနှင့် ပတ်သက်ပြီး ပြည်တွင်းမီဒီယာမှ ပုဂ္ဂိုလ်တစ်ဦးကလည်း သူ၏ထင်မြင်ချက်ကိုအချက် နှစ်ချက်ဖြင့် သုံးသပ်ပြသည် ။ ပထမအချက် မှာ မြန်မာနိုင်ငံကို မိန်းမတက်ပြီး အုပ်ချုပ်သွားမည်ကို စိုးရိမ်သောကြောင့် မိန်းမအသွင် ထဘီဝတ်ထားသော
ဗိုလ်ချုပ်ကြီးများက ထိုနေ့ကို ယတြာချေသည့်အနေဖြင့်တက်ပြီး အုပ်ချုပ်လိုက်ခြင်း ဖြစ်သည် ။ ဒုတိယအချက် မှာ ဗိုလ်ချုပ်အားလုံး ထဘီ ဝတ်လိုက်ခြင်းကြောင့် ဒေါ်အောင်ဆန်းစုကြည်၏ အာဏာကိုလွှဲပြောင်း ယူလိုက်သလို ဖြစ်သွားမည်ဟု အခါပေးသည့်အတိုင်း လိုက်လုပ်ကြခြင်း ဖြစ်သည် ။ ၂၀၀၇ ခုနှစ်တွင် ရွှေဝါရောင် တော်လှန်ရေး ပေါ်ပေါက်လာခဲ့သည် ။ ထိုတော်လှန်ရေးသည် လက်ရှိ စိုးမိုးအုပ်ချုပ်နေသည့် စစ်အစိုးရ အပေါ် သံဃာတော်များက ဆန့်ကျင်သည့်လှုပ်ရှားမှုလည်း ဖြစ်သည် ။ ထိုဆန့်ကျင်ပွဲတွင် ပြည်သူတွေကလည်း အစိုးရထံ အမျိုးသမီးအတွင်းခံများ ပို့ရန် ဆော်ဩ ကြသည် ။အဘယ်ကြောင့်ဆိုသော်အမျိုးသမီးအဝတ်ကို နိုင်ငံခေါင်းဆောင်ကြီးများက
မြတ်နိုးတန်ဖိုးထားသောကြောင့်ဖြစ်ကြောင်း အများက သတ်မှတ်ကြသည် ။ သို့သော် ဗိုလ်ချုပ်မှူးကြီးသန်းရွှေသည် သူ့ရပ်တည်ချက် ခိုင်မြဲနိုင်ရေးအတွက် အောက်လမ်းနည်းများသုံးပြီး လုပ်ရမည်ဆိုလျှင်လည်း ဝန်မလေးကြောင်း အားလုံး သိသွားခဲ့ကြသည် ။

    ယခုတင်ပြခဲ့သည့် အမျိုးသမီး ချိတ်ထဘီဝတ် ဗိုလ်ချုပ်ကြီးများအကြောင်းသည် ယုတ္တိဗေဒနည်းအရ ခိုင်လုံခြင်းမရှိဟုဆိုလျှင် အယူသီးအစွဲအလမ်းကြောင့် ထင်ရာလုပ်ခြင်းဟုသာ ဆိုရပေလိမ့်မည် ။ ဤကဲ့သို့ ထဘီဝတ်ပြီးယတြာချေသော အမှုကိစ္စသည် ယခင်ကလည်း ရှိခဲ့ဖူးသည် ။ ယခင် ထောက်လှမ်းရေးအကြီးအကဲ တစ်ဦးသည်လည်း အမျိုးသမီးတစ်ဦးကဲ့သို့ ဝတ်ပြီး ဒေါ်အောင်ဆန်းစုကြည်ကို တန်ပြန်တိုက်ခိုက်ခဲ့ဖူးသည် ။
မည်သို့ဆိုစေ ပြည်သူများသည် တစ်ကြိမ်မဟုတ် ၊ နှစ်ကြိမ်မဟုတ် ထဘီ ယတြာများကို မြင်လာရသည့်အခါတွင် အဘယ်ကြောင့် စစ်အုပ်စုသည် ထိုသို့ လုပ်ဆောင်နေကြောင်းကို သဘောပေါက်စ ပြုလာကြသည် ။ ထိုအကြောင်းနှင့် ပတ်သက်ပြီး စစ်ဗိုလ်ချုပ်ကြီးများသည် လေသံလည်းမဟ ၊ အင်တာဗျူးလည်း မခံ ၊ အားလုံး နှုတ်ပိတ်ရေငုံနေကြသည်မှာ ဆိတ်ဆိတ်နေ ဝန်ခံရာရောက်နေသလောဟုလည်း စဉ်းစားစရာ ဖြစ်သည် ။

နောက်ဆုံးအကြိမ် ဒေါ်အောင်ဆန်းစုကြည် နေအိမ်အကျယ်ချုပ်မှ လွတ်မြောက်ချိန်တွင် စစ်ခေါင်းဆောင်များသည် တင်းမာစွာဆက်ဆံနေဆဲ ဖြစ်သည် ။ ဒေါ်အောင်ဆန်းစုကြည်ကလည်း မြန်မာနိုင်ငံအပေါ် စီးပွားရေးပိတ်ဆို့မှုများ ဆက်လုပ်ရန် အနောက်နိုင်ငံများကို ထပ်မံတိုက်တွန်းသည့်အခါတွင် နိုင်ငံပိုင်သတင်းစာများက သူမနှင့်သူမ နောက်လိုက် များကို ကြေကွဲဖွယ် နိဂုံးချုပ်ရလိမ့်မည်ဟု သတိပေးရေးသားခဲ့ကြသည် ။ သို့ဖြင့် ၂၀၁၃ ခုနှစ်တွင် ဒေါ်အောင်ဆန်းစုကြည်ကို စစ်အစိုးရ ပေးကျွေးထားသည့် အုပ်စုများက ဒီပဲယင်းတွင် ဝိုင်းဝန်းတိုက်ခိုက်လိုက်ခြင်းမှာ စစ်အစိုးရသည် ပြောသည့်အတိုင်း လုပ်တတ်ကြောင်း ပေါ်လွင်ထင်ရှားစေခဲ့သည် ။

မြန်မာနိုင်ငံသည် ၂၀၁၀ ပြည့်နှစ် ၊ နိုဝင်ဘာလတွင် ရွေးကောက်ပွဲ ကျင်းပပေးခဲ့သည် ။ စစ်ဖိနပ်အောက် ရောက်နေသော ပြည်သူများအတွက် ဒီမိုကရေစီကို နဖူးတွေ့၊ ဒူးတွေ့ ရင်ဆိုင်လိုက်ကြရခြင်း ဖြစ်သည် ။ဗိုလ်ချုပ်မှူးကြီးသန်းရွှေ အုပ်ချုပ်သည့်ခေတ်သည် ဒီမိုကရေစီအသွင်ထက်အာဏာရှင်ပုံစံဖြင့်သာ အုပ်ချုပ်သွားကြောင်း တွေ့ရှိရသည် ။ သူချိတ်ထဘီဝတ်ခြင်းနှင့် ပတ်သက်ပြီး အင်းဂရစ်ဂျော့က ဗိုလ်ချုပ်မှူးကြီးသန်းရွှေသည် အမှန်တော့
နန်းကျဘုရင်၏ အသွင်ကို ယူထားခြင်းသာ ဖြစ်သည် ။ အမှန်မှာ သူသည် မြန်မာနိုင်ငံကို ဘုရင်စနစ်ဖြင့် မင်းတရားကြီးအသွင် အုပ်ချုပ်ချင်နေသူ ဖြစ်သည်ဟု ရေးသားခဲ့သည် ။ ဘုရင်အသွင်နှင့် ထီးရိပ်နန်းရိပ်ကို အထင်ကြီး
လေးစားနေသောကြောင့်လည်း သူ့အိမ်တွင် ခေါ်ပြောနေကြသည်များမှာထီးသုံးနန်းသုံးများ ဖြစ်သည်ဟုလည်း ဆိုကြသည် ။

ပြည်ထောင်စုနေ့ ညစာစားပွဲတွင် မင်းတရားကြီး ယတြာအတိုင်းလိုက်ပြီး ချိတ်ထဘီဝတ်ကြသော ဗိုလ်ချုပ်များသည် ထိုနေ့ကိစ္စနှင့်
ပတ်သက်ပြီး နှုတ်ပိတ်ရေငုံနေကြသည် ။ အားလုံး အမိန့်မရဘဲနှင့်လည်း တစ်ညီတညွတ်တည်း ချိတ်ထဘီ ဝတ်ဆင်လာကြပြီးအခမ်းအနားတက်ရန်ဆိုသည်မှာလည်း မဖြစ်နိုင်ပေ ။ ထိုထဘီမျိုးသည် မည်သည့် အမျိုးသားများထံတွင်မှ အဆင်သင့် ရှိနိုင်သော အရာမျိုး မဟုတ်ပေ ။ တစ်နည်းကြည့်ရလျှင် ၂၀၀၄ ခုနှစ်က အရာကျသွားခဲ့ရသည့် ဗိုလ်ချုပ်ခင်ညွန့်ကဲ့သို့ပင် သူတို့ခေါင်းဆောင်ကြီး၏ နောက်ဆုံးအချိန်ကို နှစ်သိမ့်ပေးသည့်အနေဖြင့်အလိုလိုက် အကြိုက်ဆောင် စစ်ဗိုလ်ချုပ်အားလုံး ထမီလိုက်ဝတ်ခြင်းလည်း ဖြစ်နိုင်သည် ။ ဗိုလ်ချုပ်မှူးကြီးသန်းရွှေသည် ယခင်ဘုရင် ဝင်စားသည့် မင်းတစ်ပါး ဖြစ်သည်ဆိုဆို ၊ ဘုရင်မကြီးတစ်ပါး ဝင်စားသည်ဟုပြောပြော နောက်ဆုံးအချိန်တွင် ထဘီဝတ်ပြီး စွန့်လွှတ်ခဲ့ရသည်ကတော့ အမှန်သာ ဖြစ်ခဲ့သည် ။

Ref: Why Did Burma's Leader Appear on TV in Women's Clothes?,

By Robert Horn: Times, The Guardian.

     ◾တင်ညွန့်

    📖 ဦးသန်းရွှေ၏ ယတြာများ

.