လူတွေက ' ကံ ' ကြမ္မာအလှည့်အပြောင်းဆိုပြီး အကောင်းအဆိုးနှစ်မျိုးကိုပဲ ဂရုစိုက်တတ်ကြပါတယ် ။ အထူးသဖြင့် လောကီအကျိုး ၊ ငွေကြေး ၊ ဂုဏ် ၊ နာမည်ကျော်စောမှု စသဖြင့်ပေါ့လေ ။
ကျွန်တော်ကတော့တိုက်တိုက်ဆိုင်ဆိုင် ဖြစ်ပေါ်လာတတ်တဲ့ ပီတိဖြစ် စရာလေးတွေ ၊ ပျော်စရာလေးတွေ ၊ တရားကျစရာ..တွေ ကြုံလာရင်လည်း ' ကံကောင်းလိုက်တာ ' လို့ ထင်မိတတ်ပါတယ်ဗျာ ။ ဆိုပါစို့ ကိုယ်အလွန်လေးစား တဲ့ စာရေ.ဆရာကြီးတစ်ယောက်ကို ဖျတ်ခနဲ မြင်ဖူးရုံလေးရှိတာနဲ့ကို ကံကောင်းတယ်လို့ပဲ ခံစားရတတ်တာမျိုးပေါ့ ။ စကားပြောခွင့် ၊နည်းနာခံခွင့် ၊ စာပေဆွေးနွေး နိုင်ခွင့်လောက် များ ရမယ်ဆိုရင်တော့ မပြောပါနဲ့တော့ပါပဲ ။
ခုလည်း ဂီတနဲ့ပတ်သက်လို့အထူးသဖြင့် သီချင်းအဆိုနဲ့ ပတ်သက်လို့ ကံကောင်းခဲ့ရတာလေး ပြန်တွေးမိနေပါတယ် ။
မှတ်မှတ်ရရ ၂၀၀၀ ပြည့်နှစ်မန္တလေးမြို့မဂီတအသင်းကြီးရဲ့ စိန်ရတုပွဲ သွားရောက်ကူညီဖျော်ဖြေခဲ့ရတုန်းကပါ ။ အဲဒီတုန်းက ရန်ကုန်က ဂီတပညာရှင် အတော်များများ မန္တလေးကို သွားခဲ့ကြပါတယ် ။ မိတ်ဆွေရင်းချာသဘော ၊ မိသားစုသဘောနှင့်မို့ ချစ်ဖို့အလွန်ကောင်းပါတယ် ။ အောက်ပြည်အောက်ရွာက ဂီတပညာရှင်များကလည်း မြို့မပွဲသို့ မြို့ မသီချင်းတွေ တတ်အားသလောက်ဆိုကြပါတယ် ။
ကျွန်တော်ကတော့ နန်းတော်ရှေ့ဆရာတင်ရဲ့ “ လှောင် ” သီချင်းကို ဆိုပါတယ် ။ ကျွန်တော်ကံကောင်းတယ်ဆိုရတာက သီချင်းတစ်ပုဒ်လုံးကို ( အောင် ) ကာရန်တွေနဲ့ချည်း ယူထားတာမို့ ဆိုသူရဲ့ အမည်ကို သီချင်းထဲ ထည့်ဆိုတဲ့အခါ " သုမောင် " ဆိုတော့ ကာရန်သင့်သွားတာကြောင့်ပါပဲ ။ အဲဒီ ' လှောင် ' သီချင်းကို မူလက ( မန္တလေး ) ဦးချစ်ဖွယ်ကြီး ဆိုခဲ့တာပါ ။ နောက်တော့ ဦးချစ်ဖွယ်ရဲ့သား ( မန္တလေး ) ဦးသိန်းတန်က ဆိုခဲ့တယ်လို့ သိရပါတယ် ။ မူလသီချင်းကို ဓာက်ပြား ၊ တိပ်ခွေ စသဖြင့် သွင်းထားတာ မရှိလို့ ဘယ်သူနဲ့ အကျော်ကြားဆုံးလဲ ကျွန်တော် မသိရပါဘူး ။ ကျွန်တော့်အနေနဲ့တော့ အဲဒီ “ လှောင် " သီချင်းကို မြို့မအဖွဲ့နဲ့ ရန်ကုန်မှာပဲ တိပ်ခွေစီးရီးထဲမှာ ကျွန်တော် သွင်းဖူး ဆိုဖူးတာပါ ။ သီချင်းစာသားမှာက
“ အလွန်တကယ် သရော်လှောင် ရွံတယ် ကျွန်တော် ရှောင် ခုနစ်ဆယ်ကျော် တောင်ကို မြို့မနဲ့ ဝေးမယ်မထင်ပေါင် သားတွေက လှောင် သမီးတွေက လှောင် ပွဲတီးတဲ့ခါ မိန်းမကလှောင် နေ့တိုင်း မင်းတို့ ကျုပ်ကို လှောင် လှောင်ပေမယ်လို့ကွယ် သုမောင်ကြီးတရားမချို့ ပေါင် သနားဖို့အကောင် " တဲ့ ။
အရင့်အရင် ကျွန်တော့်ထက် ဦးစွာသီဆိုခဲ့တဲ့ ပညာရှင်ကြီးတွေထဲမှာ “ အောင် ” ကာရန်ပါတဲ့ သူမရှိခဲ့ဖူးလို့ သိရပါတယ် ။ ဥပမာ ဦးသိန်းတန်ကြီးဆိုရင်လည်း " သိန်းတန်ကြီး တရားမပေါင် သနားဖို့အကောင် " လို့ပဲ ဆိုရမှာပါ ။ ဦးချစ်ဖွယ်ကြီးဆိုတာ ဖြစ်ရင်လည်း " ချစ်ဖွယ်ကြီးတရားမချို့ပေါင် ” လို့သာ ဆိုခဲ့မှာပါဗျာ ။
ခုတော့ ကျွန်တော်ဘယ်လောက် ကံကောင်းပါသလဲ ။ “ အောင် ” ကာရန်ယူထားတဲ့ သီချင်းကိုမှ ဆိုခွင့်ရခဲ့တာ ။ ဒီသီချင်းဟာ ကျွန်တော့်အထက်ဘိုးစဉ်ဘောင်ဆက်က ပေါ်ခဲ့ပေမယ့် ကျွန်တော့်အလှည့်ကျခါမှ တိပ်ခွေသွင်းဖြစ်ပြီး ကိုယ့်နာမည် ထည့်ဆိုခွင့် ရလိုက်တော့ နောင်တစ်ချိန်မှာ ကျွန်တော့်သီချင်းလိုများ ဖြစ်သွားလေမလားပေါ့ ။
အဲသလိုများ ဖြစ်သွားခဲ့ရင်လည်း ကျွန်တော်ကတော့ တိတ်တိတ်ကလေးကျိတ်ပြီး ဂုဏ်ယူနေမိတော့မှာပါပဲ ။
စောစောကပြောသလို မန္တလေးမှာ စင်တင်ဂီတဖျော်ဖြေရတော့လည်း
ပရိသတ်ကို ဟန်နဲ့ ပန်နဲ့ ရင်ဘတ်ကြီး ပုတ်ပုတ်ဆိုပြရတာ အရသာရှိလိုက်တာဗျာ ။ အဲသလိုကျွန်တော်ကဆိုတော့ အမေလူထုဒေါ်အမာက သူစင်အောက်က နားထောင်ရကြောင်း ၊ ငယ်မူပြန်ပြီး ခြေလက်နဲ့ စည်းဝါးလိုက်နေမိကြောင်း မဟေသီမဂ္ဂဇင်းမှာ ဆောင်းပါးတစ်ပုဒ် တကူးတကန့် ရေးခဲ့ပါသေးတယ် ။ အမေတို့ငယ်ငယ်က သီချင်းဆိုပဲ။ ကဲ... ကျွန်တော် သုမောင်ကို ကံ မကော င်းပေဘူးလား ။
တလောဆီက အစ်ကိုချစ်ဆွေ ( စန္ဒရားချစ်ဆွေ ) က ဘာသဒ္ဓါပေါက်တယ် မသိပါဘူး ။ “ ဟေ့ကောင်... ဗလ မင့်ကို သီချင်းအသစ်တစ်ပုဒ်စပ်ပေးမယ် ” လို့ ပြောပါတယ် ။ ဒီလို ရေးရတာက အစ်ကိုချစ်ဆွေဟာ သီချင်းသစ်မပြောနဲ့ ၊ သူ့သီချင်းဟောင်းတွေ ပြန်ဆိုချင်တယ်လို့ တောင်းရင်တောင် ( ဘယ်လောက်ပုံ ေပး ပေး ) စိတ်မထင်ရင် ဘုဆတ်ဆတ်ကြီး ငေါက်လွှတ်တတ်တဲ့သူ
ပါ ။ “ မင်းဆိုလို့ ကရုဏာသက်စရာ တစ်ကွက် မှ မရှိဘူး ” လို့လည်း ငေါ့တော့တော့ လှောင်တောင်တောင် ပြောချင်ပြောတတ်ပါရဲ့။
ခုတော့ ဘာအဆက်အစပ်မှ မရှိဘဲ (လက်ဖက်ရည်ဆိုင်မှာ) သူကစပြီး စေတနာတွေ စီးဆင်းလာတော့ " ဟ..ငါ ထီပေါက်တာပဲ ” လို့လက်ခမောင်းခတ်မိပါတယ် ။ အကြောင်းသိတွေကလည်း “ ေဟ့ ... ဘိုသု ထီထိုး ” လို့ ဩဘာပေးကြလေရဲ့။
တကယ်ပါပဲ ။ အဲဒီကိစ္စကို သူ မမေ့မလျော့အကောင်အထည် ဖော်ခဲ့ရာမှာ မနေ့က ( ၁၉ - ၅ - ၂၁၀၃ ) မှာ မြန်မာ့အသံတီးဝိုင်းနဲ့ သူ့သီချင်းကို သီဆိုဖြစ်ခဲ့ပါတော့တယ် ။ “ အစ်ကိုချစ် ” ကိုယ်တိုင် စန္ဒရားမတီးပေမယ့် ကျွန်တော့်အနားကပ်ပြီး တစ်ချိန်လုံး လိုက်ဆိုပြပေးခဲ့ပါတယ် ။ ( သူ့အသံကလေးပါအမှတ်တရရှိအောင် ကျွန်တော်က သီချင်းတိုက်တုန်း အိတ်ဆောင်ကက်ဆက်နဲ့ တိတ်တိတ် သွင်းယူထားလိုက်ပါတယ် ) ကိုင်း... သီချင်းကို ကြည့်ပါဦး ။ ခေါင်းစဉ်က “ မောင်မောင် ပစ်တိုင်းထောင် "
စာသားတချို့ကို ဖော်ပြရရင်...
" ကျရာအရပ်မှာ တထောင်ထောင် အရှုံးမပေးပေါင် အပြုံးကလေးဆောင် အမုန်းတေးစကားကို ရှောင် မောင်ပစ်တိုင်းထောင် ဘဝကို အရှုံးမခံ ရုန်းကန်ခြင်းနဲ့ ပြိုင်ရအောင် အားငယ်စိတ်တွေရှောင် မောင်ပစ်တိုင်းထောင် နှလုံးသားလေးများ ဖြူစင် သမောင် ( ပစ်တိုင်းထောင် ) မောင် မောင် ပစ်တိုင်းထောင် ××× ” စသဖြင့်ပေါ့ဗျာ ။
ကြည့်စမ်းပါဗျာ ။ ဒီသီချင်း ကျွန်တော့်ကိုယ်ပိုင်ဖြစ်မယ့်သီချင်းကလည်း “ အောင် ” ကာရန်ပါပဲလား ။အကြောင်းအရာကလည်း ကျွန်တော့်စရိုက်နဲ့ ကိုက်ပါပေ့။ ' ကျရာအရပ်မှာ တထောင်ထောင် ' တဲ့ ။ ကျွန်တော့်မှာလေ ဆိုနေရင်းက ထလိုက်ရတဲ့ကြက်သီး။
ပြီးတော့ စာဖတ်သူကို ကျွန်တော် တိတ်တိတ်ခိုးသွင်းထားတဲ့ အစ်ကို
ချစ်ဆွေရဲ့ အသံတွေ ဖွင့်ပြချင်စမ်းပါဘိ ။ ဆိုပေါက်လွဲလို့ ဆဲတဲ့အသံတွေ ၊ ပီဘိ အဆိုတော်သစ်ကလေးကို သီချင်းချပေးနေသလို အရစ်အဟဲတွေ ပြပေးနေတာတွေ ၊ အဝင်အထွက်တွေ စိတ်တိုင်းမကျလို့ စာရွက်ကို တဗြန်းဗြန်း ရိုက်တဲ့အသံတွေ ။
ဪ.. ငါးဆယ်ကျော် အဘိုးအိုလေးကို ခုနှစ်ဆယ်ကျော်အဘိုးကြီးက သီချင်းတက်ပေးနေပုံများ နံဘေးကနေလာကြည့်ကြစေချင်စမ်းပါဘိ ။
ကိုင်း... ကျွန်တော် ကံမကောင်းပေဘူးလားဗျာတို့ ။
သုမောင်
ပေါ်ပြူလာဂျာနယ်
ဇူလိုင်လ ၁ ရက် ၊ ၂၀၀၃ ခုနှစ်
No comments:
Post a Comment