❝ ဝါသနာကိုမတားနဲ့ ရှင်မရာ ❞
ယောက်ျားများဟာ မိန်းမကို အချစ်ဆုံးပဲ ၊ စိတ်အဝင်စားဆုံးပဲလို့တော့ တရားသေတွက် မထားလေနဲ့ ၊ မှတ်ထင်မထားလေနဲ့ ။ တချို့ယောက်ျားလေးများဟာ မိန်းမထက် သူတို့ ဝါသနာကို စိတ်ဝင်စားတတ်တာ ရှိသေးတယ် ။
သမီးရည်းစား ချိန်းထားပြီးမှ ဘောပွဲရှိလို့ မလာဖြစ်တာတို့ ၊ စတိတ်ရှိုး သွားနေလို့ မလာဖြစ်တာတို့ ဆိုတာ ချစ်သူထက် ဝါသနာကို ဦးစားပေးတဲ့ သဘောပေါ့ ။ ဝါသနာတွေက အမျိုးမျိုးပဲ ။
အားကစား ဝါသနာပါသူ
ဂီတ ဝါသနာပါသူ
စာပေ ဝါသနာပါသူ
အဲသလို ဝါသနာတစ်ခုခု ရှိနေသူကို ရည်းစားထားမိပြီဆိုတာနဲ့ စဉ်းစား ။ သူ့ဝါသနာကို ကိုယ်ကရော စိတ်ဝင်စားသလား ။ ဝါသနာ ပါနိုင်မလား ဆိုတာ ။ ဖြစ်နိုင်ရင်တော့ ကိုယ့်ကို ချစ်ရေးဆိုလာကတည်း က ၊ ကိုယ်က ချစ်ရေးမပြန်ခင်ကတည်းက သူ့ဝါသနာကို သိထားနိုင်ရင်တော့ ကောင်းတာပေါ့ ။ ဝါသနာ မတူရင်ချစ်ရေးဆိုကတည်းက ၊ ကိုယ်က ချစ်ရေးမပြန်ခင်ကတည်းက လက် မခံလေနဲ့ ။ ရည်းစားဖြစ်ပြီးမှ ဝါသနာချင်းမတူရင်လည်း လက်ထပ်ဖို့ စဉ်းစားပေတော့ ။
သူ့ဝါသနာကို မသိဘဲလက်ထပ်ပြီးခါမှ သူက ကိုယ့်ကို ဂရုမစိုက်ရင်တစ်သက်လုံး စိတ်ဆင်းရဲရမယ်လေ ။ ယောက်ျားတွေမှာ
ဝါသနာ တစ်ခုခုရှိထားပြီဆိုရင် ချစ်သူဘဝမှာသာမိန်းကလေးကို ဦးစားပေးချင်ပေးမယ် ။ အဲ ရပြီးပြီဆိုလို့ကတော့ မိန်းမကို အိမ်မှာခေါက်ထားပြီး သူတို့ဝါသနာကို ရှေ့တန်းတင်တော့တာပဲ ။ အိမ်မှာ စားစရာမရှိရင်နေ ဝါသနာပါတာကို မလုပ်ရရင် မနေနိုင်ဘူးဆိုတဲ့ ယောက်ျားမျိုးတွေ ထိရှိတယ် ။
ယောက်ျားတစ်ယောက်ရဲ့ ဝါသနာဟာ
လောင်းကစားလို
အရက်လို
အပျော်အပါးလို
ဆိုးကျိုးကို ဦးတည်တဲ့ဝါသနာမျိုးဆိုလို့ ကတော့ အဲဒီ အိမ်ထောင်ဟာ သာယာစိုပြည်တဲ့ အိမ်ထောင်လုံးဝမဖြစ်နိုင်တော့ပါဘူး ။ယောက်ျားတွေဟာ အိမ်ထောင်ကျပြီးတဲ့အခါမှာ ကိုယ်လိုချင်တဲ့ မိန်းမကို ရပြီးတဲ့အတွက် ဝါသနာပါတာကို ပိုပြီးဦးစားပေးသွားတတ်ကြတယ် ။ တချို့အသောက်အစား ဝါသနာပါတဲ့သူများ " ရှင် မိန်းမနဲ့အရက် ဘယ်သူ့ချစ်သလဲ ၊ အရက်ဖြတ်မလား ၊ မိန်းမဖြတ်မလား " ဆို မေးလာရင် အရက် ချစ်တယ် ၊ မိန်းမ ဖြတ်မယ် ဆိုတဲ့ လူစားမျိုးတောင် ရှိပါသေးတယ် ။
လောင်းကစား ဝါသနာပါလို့ မိန်းမကို ပေါင်ပြီး ဖဲရိုက်တဲ့ ယောက်ျားမျိုးတောင် လေးလေးတို့ တွေ့ဖူးတယ် ။ယုံတမ်းစကား မဟုတ်ဘူး ၊ တကယ်ပြောတာ ။ အပေါင်ခံထားတဲ့သူက ဖဲဝိုင်းထဲမှာသာ သွေးဆူနေကြတုန်းမို့ အပေါင်ခံထားလိုက်ပြီး နောက်ရက် မှာယောက်ျားက လာမရွေးတော့ တစ်ရက်က နှစ်ရက် ၊ နှစ်ရက်က သုံးရက် ထမင်းကျွေးထားရတာ မတတ်နိုင်လို့ ပြန်ခေါ်ပေးလိုက်ရတာတွေ ကြားဖူးတယ် ။ တကယ် ။
အဲ အဆိုးဆုံးကတော့ မိန်းမရှုပ်တာ ပွေတာ ဝါသနာပါတဲ့ ယောက်ျားကို ယူမိတဲ့ မိန်းမပဲ ။
မိန်းမတွေမှာကလည်း
မုန့်ကိုသာ ဝေစားနိုင်မယ်
အချစ်ကိုတော့ ဝေမစားနိုင်ဘူး
ဆိုတဲ့စိတ်မျိုး ရှိကြတာဆိုတော့ ယောက်ျားက မိန်းမရှုပ်ပြီ ဆိုတာနဲ့ ငိုမယ့်သာ ပြင်ပေတော့ပဲ ။
ယောက်ျားတွေရဲ့ဝါသနာဟာကိုယ် ခွင့်လွှတ်နိုင်တဲ့ ဝါသနာလား ။ အားကစားလို ၊အနုပညာလို ၊ ကိုယ်နဲ့ စိတ်တူကိုယ်တူ ဝါသနာတူဖြစ်နိုင်မယ့်ဟာလား ကွဲကွဲပြားပြား ကြိုသိထားရရင် ရေရှည်အတွက် စိတ်အေးရမယ်လေ ။
ဝါသနာဆိုတာကဖျောက်ဖျက်လို့ ရသား ။
ဘာဝါသနာမျှ မပါပါဘူးဆိုတဲ့ ယောက်ျားဟာ မရှိသလောက်ပါပဲ ။ တချို့က ကိုယ်ဝါသနာပါနေတာကို ဝါသနာပါမှန်း မသိဘူး ။ ဆိုကြပါစို့ ။ စီးပွားရေးဝါသနာပါတဲ့လူ ။ အဲဒီ ဝါသနာမျိုးကိုတော့ရုတ်တရက်ဆို မသိကြဘူး ။ အချိန်ကြာမှ သိရတာ ။ ကိုယ်နဲ့ရပြီးတဲ့အခါ ကိုယ့်ဂရုစိုက်ဖို့ထက် “ ငွေ ” ရဖို့သာ ဂရုစိုက်နေ ၊ ငွေနောက်သာလိုက်နေ ၊ ငွေတွေပဲ ချမ်းသာသည်ထက် ချမ်းသာ ၊ အဲသလို စီးပွားရေး ဝါသနာပါသူများကို ရမိရင်လည်းအထိုက်အလျောက်တော့ ကသိကအောင့် ဖြစ်ရတာပဲ ။ အိမ်ထောင်ရေး သာယာမှုမှာ လစ်ဟင်းတာပါပဲ ။
ဒါကြောင့် ကိုယ်ရွေးချယ်မယ့် ယောက်ျားလေးရဲ့ ဝါသနာကိုလည်း ကြိုတင်သိထားသင့်တယ်လို့ လေးလေးက ပြောတာပါ ။
ယောက်ျားလေးများဟာ အိမ်ထောင်ကျပြီးရင် မိန်းမထက်ဝါသနာကို ဦးစားပေးတတ်ကြတယ်ကွဲ့ ။
◾ ကံချွန်
အပျိုစင်တို့သိဖို့ ယောက်ျားတို့အကြောင်း ( ၁ )
No comments:
Post a Comment