🖋 ရှင်းရှင်းရေးပါလား
“ဦးလေးချမ်းသာ ရှိလား”
“အေးရှိတယ် လာကြလေ၊ အထဲကို”
မြင့်မြင့်နှင့် စိန်စိန်တို့ ညီအစ်မ အိမ်ထဲ ဝင်လာကြတယ်ခင်ဗျာ့။
“ဦးလေးချမ်းသာ ဒီမှာ အဖေ့စာရင်းစာအုပ်ထဲမှာ ဦးလေးက အုတ် ၉၅၀ ယူသုံးတယ်လို့ ရေးထားတယ်”
ကလေးမလေးတွေက ဗလာစာအုပ်ထိုးပေး၊ ကျွန်တော်ယူကြည့်၊ ဘကြီးချို လက်ရေးနဲ့ ရေးထားသောစာကြောင်းများ။ မနှင်းအိ ၁၅၀၀။ မောင်ချမ်းသာ အုတ် ၉၅၀ ယူသုံး။ မလှကြီး ပေါင် ပုဆိုးတစ်။ ဝေဝေ ဒန်အိုး ၂၅ ကျပ်၊ အဖုံးမပါ။ စာရင်းက အရှည်ကြီးခင်ဗျာ့၊ အတိုကောက်တွေရော၊ အရည်ကောက်တွေရော။ သည်ထဲမှာ ကျွန်တော့်နာမည် ပါနေတယ်။ မောင်ချမ်းသာ အုတ် ၉၅၀ ယူသုံးတဲ့ဗျာ။ လွန်ခဲ့သော ၁၀ နှစ်၊ ၁၉၉၂ ခုနှစ်မေလကဖြစ်ခဲ့တဲ့ အဖြစ်ခင်ဗျာ။ ကျွန်တော် နှစ်လုံးတွဲရေအိမ်သာ ဆောက်တယ်။ အဲသည် ရေလောင်းအိမ်သာဆောက်တော့ အုတ် ၈၀၀၀ ဝယ်ပုံထားတာဗျာ၊ ဆောက်နေရင်းတန်းလန်း အုတ်က မဖြစ်စလောက်ကလေး လိုနေတယ်ဗျာ့။
“ဟေ့ကောင်… ချမ်းသာ၊ မဖြစ်စလောက်ကလေး ဝယ်မနေပါနဲ့ကွာ၊ ငါ့ဆီကယူသုံး”
အခန့်သင့်ချင်တော့ ခြေရင်းအိမ်က ဘကြီးချိုက သူ့တိုက်ဆောက်ဖို့ ဝယ်ပုံထားတဲ့ အုတ်ပုံကြီးကို လက်ညှိုးထိုးပြတယ်။ အဲဒါနဲ့ ပန်းရံဆရာ ဦးထွန်းအေးကိုဟြေ၊ ပန်းရံတပည့်လေးများ သွားသယ်။
“၉၅၀ ရောက်ပြီ တော်တော့ဟေ့”
ရေလောင်းအိမ်သာ ဆောက်ပြီး မကြာဘူးခင်ဗျာ့။ မေလကြီး နေအလွန်ပူတဲ့လကြီး။ နေ့လည် ၂ နာရီလောက်။
“ဦးလေး… ဦးလေး… လာကြည့်ပါဦး၊ ဘကြီးချို ဘာဖြစ်သွားမှန်း မသိဘူး”
သူ့မြေးမလေး အပုစိန် ပျာပျာနဲ့ပြေးလာဟြေ။ ကျွန်တော် ကပျာကယာလိုက်ကြည့်။ ဘကြီးချို အသက်မရှိတော့ပါ။ မနက် ၈ နာရီလောက်က အကောင်းကြီးဗျာ့၊ ကျွန်တော်နဲ့ စကားဟြေနေသေး။ အရပ်ကူပါ၊ လူဝိုင်းပါ၊ လမ်းထဲက လူကြီးတွေ ပြေးခေါ်၊ လူငယ်လေးတွေခေါ်၊ သူ့သားသမီးများထံ ကြေးနန်းရိုက် အကြောင်းကြား။ (အဲသည်တုန်းက အောင်လံမှာ တယ်လီဖုန်း သိပ်မများသေး၊အသုံးလည်းနည်းသေး။)
ဘကြီးချိုက မုဆိုးဖို။ သူ့မြေးမလေး အပုစိန်နဲ့ အတူနေတာ။ သားသမီးများက ပုသိမ်မှာ၊ ရန်ကုန်မှာ၊ တောင်ငူမှာ။ တာဝန်ကျရာမှာနေရသော ဝန်ထမ်းများ။ သားသမီးများရောက်လာ၊ နာရေးကိစ္စဆောင်ရွက်ကြ၊ ရက်လည်ဆွမ်းသွပ်။ ခွင့်ရက်
စေ့တော့မည်၊ ကိုယ့်လုပ်ငန်းခွင် ပြန်ကြရတော့မည်။ အဖေမရှိတော့ဘူးဆိုတော့ အမွေခွဲကြရတော့မည်။ သေတ္တာဖွင့်ကြည့်၊ အိပ်ရာခင်းအောက်ရှာ၊ ခေါင်းအုံးထဲမှာ စိန်တွေ ရွှေတွေများ ကျန်သေးလား။ ရှာကြ၊ ဖွေကြတော့ ခေါင်းအုံးအောက်က ဗလာစာအုပ်တွေ့ရှိ။
ပေးရန်၊ ရရန်စာရင်းများ၊ သည်အထဲမှာ မောင်ချမ်းသာကပါနေ။
“အေး… ဟုတ်တယ်၊ အုတ် ၉၅၀၊ ဦးလေး ယူသုံးတယ်”
“အဖေ့ကို ပိုက်ဆံပေးပြီးသားလား”
သူတို့က မဝံ့မရဲမေး။
“ပေးပြီးသားကွ၊ အဲဒီတုန်းက အနားမှာ ဘယ်သူရှိပါလိမ့်၊ အဲ… အဲ… သမီးတို့ ခဏနေကြဦး၊ ဟေ့… စိန်သောင်း ပန်းရန်ဆရာဦးထွန်းအေး သွားခေါ်စမ်းကွာ”
အိမ်မှာ အဆင့်သင့်တွေရ၊ သူ့တပည့် မောင်ပုနဲ့အတူ ဦးထွန်းအေး ကန့်လန့်ကန့်လန့် ပါလာ။
“ကိုချမ်းသာ ဘာအလုပ်အပ်မလို့လဲဗျာ”
“အယ်… ဟိုဦးထွန်းအေး ကျွန်တော်တို့ ရေလောင်းအိမ်သာလုပ်တုန်းက ဘကြီးချိုဆီက အုတ်ယူသုံးသေးတယ်နော်”
“ဟုတ်တယ်လေ… ယူသုံးတယ် ၉၅၀၊ ဒီကောင်တွေ သွားသယ်တာပဲ” (သူ့တပည့်ဘက် မေးငေါ့ပြ။)
“အဲဒါ အုတ်ဖိုးချေတယ်နော်”
“အဲဒီနေ့ညနေ အလုပ်သိမ်းတော့ ခင်ဗျားနဲ့ ကျွန်တော်ပဲ သွားချေတာလေ၊
အုတ်တစ်ခဲ တစ်ကျပ်နှုန်းနဲ့ အုတ် ၉၅၀၊ ငွေ ၉၅၀ ကျွန်တော်သေချာရေပြီး ဘကြီးချိုလက်ထဲ ထည့်ခဲ့တာ”
ဘကြီးချို သမီးများ ပြန်သွားကြ၏။ သံသယမရှိ ကြည်လင်သောမျက်နှာများနှင့်။
တော်တော်ဆိုးတဲ့ ဘကြီးချိုဗျာ၊ ဘယ်နှယ့်ဗျာ၊ သူပေးထားတာတွေကိုတော့ရေးထား၊ သူရတာကျ ရေးမထားဘူးဗျာ။ ဆရာဦးထွန်းအေးက အပ်ချမတ်ချ ဟြေပြနိုင်ပေလို့ တော်သေးတာပေါ့။ နို့မို့ဆို ကလေးတွေ ယုန်ထင်ကြောင်ထင် ဖြစ်သွားမကောင်းဘူးဗျာ။
ဘကြီးချို အသက်ရှင်လျက်ရှိသေးရင်တော့ ရှင်းရလွယ်တာပေါ့။ ခုတော့ သူသေသွားပြီ။ အကောင်းပကတိကြီးက ရုတ်တရက်ဖြစ်သွား။ သေခြင်းတရား ဘယ်သူကြိုသိပါ့မလဲ။ ကျွန်တော်သည် ထိုအကြောင်းကို အမြဲဆင်ခြင်နေမိ၏။ ဒါသင်ခန်းစာပဲ၊ တန်ဟ၊
နောက်ဘယ်တော့မှ အလွတ်သဘောမလုပ်ရဲတော့ဘူး။
“သူငယ်ချင်း စာနဲ့ရေး၊ သေချာပီပီပြင်ပြင်ရေး”
သည်နေ့ ရက်စွဲနဲ့ သြဂုတ်လ (၁၅)၊ ၂၀၀၂ ကြာသပတေး၊ ကိုချမ်းသာယူ ငွေငါးသိန်း၊ အတိုးနှုန်း၊ ပေး ပိုက်ဆံ၊ ထိုးလက်မှတ်၊ သူလည်းထိုး၊ ကျွန်တော်လည်းထိုး၊ ငွေထုပ်ပိုက်ပြန်ခဲ့ ရှင်းလို့။ ကျွန်တော့်သူငယ်ချင်း မောင်တိုးထံမှ ငွေချေးယူသည့်အခါတိုင်း စာနဲ့ရေး လက်မှတ်ထိုးပေး၊ လက်မှတ်ထိုးယူ။ ကျွန်တော်က ချေးငွေ ပြန်ဆပ်သည့်အခါတိုင်း ငွေကိုပေး၊ သူ့လက်မှတ်ထိုးယူ၊ ကျွန်တော့်လက်မှတ်ထိုး။ သူငယ်ချင်းက သူငယ်ချင်း၊
ငွေကငွေပဲဗျာ့။ အပေးအယူ စာရင်းဇယားရှိတော့ ရင်းရလွယ်တယ်ဗျာ့။ ဖွ၊ မဆိုစကောင်း တစ်ယောက်ယောက် မတော်မဆ တစ်ခုခုဖြစ်ဦး၊ ရှုပ်စရာမရှိ။
ဘကြီးချိုထံမှ ယူသုံးသော အုတ် ၉၅၀၊ ကျွန်တော့်ဘဝမှာ သင်ခန်းစာ။
မောင်ချမ်းသာ
No comments:
Post a Comment