🍄 ဖောက်ထွက်
" မောင်ရေ… မှိုတွေ ထွက်နေပြီ”
ဝါဆိုလ၏ တစ်ခုသော နံနက်ခင်းတွင် ကျွန်တော့်မိန်းမသည် ရွှင်လန်း ဝမ်းမြောက်စွာ သတင်းလာပို့လေ၏။
“မှိုတွေပေါက်နေပြီ လို့ဟြေစမ်းပါကွာ၊ မင်းဟာ… ”
“ဟင်… မောင်ကလည်း မှိုကပေါက်လာတာမှ မဟုတ်တာ၊ မြေကြီးထဲက ထွက်လာတာကြီးကို၊ မယုံ လာကြည့်”
“ ဟောဗျာ… ဝေါဟာရထွင်တဲ့ ပညာရှိမနဲ့တွေ့နေပြီ၊ မှန်းစမ်း ဘယ်မှာလဲံ”
သူခေါ်ရာလိုက်ခဲ့၊ ကျွန်တော်တို့ အိမ်နောက်က ခြတောင်ပို့မှာ၊ နှစ်စဉ်
ဝါဆိုလတိုင်း ပေါက်နေကျ တောင်ပို့မှိုကျင်းကြီးခင်ဗျာ။ တွေ့ပါပြီ၊ မှိုတွေဖွေးလို့။ သူဟြေတဲ့အတိုင်းပဲဗျာ၊ မှိုတွေမြေကြီးထဲက တိုးထွက်လာတာ။ မြင်ဖူးကြမှာပေါ့။ မှိုပေါက်တာ။ မှိုဆိုတာ ဒုံးပျံထိပ်ဖူးလို အဖျားက ခပ်ချွန်ချွန်၊ မြေကြီးထဲက အတင်းတိုးထွက်၊ အပြင်ရောက်မှ အပွင့်က ကားလာ၊ ဟော… ထီးကြီးဖွင့်လိုက်သလိုပဲဗျာ။ ကျွန်တော်တို့ မှိုကျင်းက မှိုတွေ တစ်ခါပေါက် ၁၀၀-၁၅၀ ဗျာ။ ကျွန်တော့်မိန်းမ မှိုရတဲ့မျက်နှာနဲ့ ဟိုအိမ်ပို့ သည်အိမ်ပို့ ဝေငှချက်စား၊ အဲသည်နေ့များဆို သူ့မျက်နှာချိုလို့ရွှင်လို့ဗျာ။
မြေကြီးထဲက မှိုတွေ တိုးထွက်လာတာနဲ့ ဥထဲက ကြက်လေးဖောက်ထွက်လာတာ သဘာဝချင်းတူတယ်ဗျာ့၊ ကြက်ကလေးတွေပေါက်တာကို ကျွန်တော် အကြိမ်များစွာမြင်ဖူးတယ်။ ဥထဲက ဝါဝါအနှစ်ကလေးက ကြက်ကလေးဖြစ်လာ၊ အတောင်ပံလေးတွေနဲ့ အမွေးလေးတွေပေါက်လာ၊ ဟော… သူ့ရက်စေ့တော့ ကြက်ကလေးက ကြက်ဥ အခွံ ကိုသူ့နှုတ်သီးချွန်ချွန်ကလေးနဲ့ ထိုးဖောက်တော့တာပဲဗျို့၊ ပထမ အရာကလေးဖြစ်၊နောက်အက်လာ၊ မကြာဘူးဗျို့ ကြက်ဥအခွံက ထက်ပိုင်းကွဲပြီး ကြက်ကလေး အပြင်ရောက်လာတော့တာပဲဗျာ၊ အပြင်ရောက်စကြက်ကလေးများ အပ်ဂလီးချက်ကင် (ugly chicken) အရမ်းအရုပ်ဆိုးတာဗျာ၊ ပေစုတ်နေတာပဲ။ ပြင်ပလေနဲ့ တွေ့ထိ၊ အမွေးနုလေးတွေ ဖွာလာ၊ နာရီပိုင်းအတွင်း လှလှကလေး ဖြစ်လာတော့တာပဲ။ ကြက်ကလေးယူ နမ်းကြည့်၊ ညှပ်ညှပ်နဲ့ တကယ့်ချစ်စရာလေးဗျာ။
“ဒီမှိုနဲ့ ကြက်ဟာ လူဘဝ တော်တ်ာအတုယူဖို့ ကောင်းတယ်ကွ”
“လာပြီဖျက်မြင်း၊ ကဲ… ဉာဏ်ကြီးရှင် ဦးနားဝေး လုပ်စမ်းပါဦး၊ ဘယ်လိုအတုယူဖို့
ကောင်းတာလဲဗျာ”
ကပ်တီးမူးလဲ ဦးနားဝေသည် ရေနွေးကြမ်း ဖန်ဖန်ကလေးကို အားရပါးရ ကျိုတ်ချလိုက်ပြီးနောက် (ဦးနားဝေးက အလကားရ အကုန်တွယ်တဲ့ လူစားဗျာ့၊ ဒါပေမယ့် ဦးနှောက်ကတော့ မဆိုးဘူး)
“ငါ အဲဒါစဉ်းစားမိနေတာ ကြာပြီကွ”
“စဉ်းစားရုံပဲလားဗျာ။ အကောင်အထည်မဖော်ဘူးလား”
“မင်းလည်းငါ့အကြောင်း သိသားနဲ့”
“မှန်တယ်၊ သူဘယ်တော့မှ လက်ကြောမတင်းဘူး၊ ခြေကြောလည်းမတင်းဘူး၊
ပျင်းဖို့ပဲတတ်တယ်။”
“ပျင်းတာမဟုတ်ပါဘူးကွာ၊ မလုပ်ဖြစ်တာပါ”
ကျွန်တော်တို့နှစ်ယောက် လေကြော ရှည်ကြလေ၏။ တယ်လီဖုန်းထဲမှာ ဆိုရင်တော့ မီတာတော်တော်တက်မှာ၊ ကွန်ပျုတာကို လှည့်စားလို့မရဘူး။
“လူတွေဟာ မွေးလာကြတုန်းက အတူတူပဲကွ၊ ဘယ်သူမှအပိုပါမလာဘူး”
“အပိုပါမလာလို့ တော်သေးတာပေါ့ဗျာ၊ အပိုပါလာရင် ဒုက္ခများကုန်တော့မှာပေါ့၊ ဥပမာဗျာ ပါးစပ်တစ်ပေါက် အပိုပါလာပြီဆိုပါတော့ အရမ်းစား အရမ်းစား…”
“ ဟေ့ကောင်… မင်းပါးစပ်ပိတ်ထားစမ်း”
ဦးနားဝေးက ငေါက်၍ ကျွန်တော့်ပါးစပ်ကို ဘရိတ်အုပ်လိုက်လေ၏။ ဒက်စတော့။ “ဒီမှာ စကားအကောင်းဟြေနေတယ်။ နားထောင်”
“ဟုတ်ကဲ့”
ကျွန်တော် မျက်နှာပိုးသတ်လိုက်ရ၏။ ဆရာ့ရှေ့ရောက် ကျောင်းသားကလေး ကဲ့သို့။
“အမေမွေးတုန်းက ခြေနှစ်ချောင်း၊ လက်နှစ်ဖက်၊ ဦးခေါင်းတစ်လုံးကွ၊ ဒါပေမယ့် တချို့လူတွေက ကြီးလာတော့ လူလားမြောက်လာတော့ လက်တွေ ခြေတွေ ပွားလာတယ်”
“ဟာဗျာ… မဟုတ်ကဟုတ်က”
“ဥပမာ တင်စားတာကွ၊ တကယ်တော့ ဘယ်ပွားထွက်လာမလဲဟာ”
“အင်း… ဆိုပါဦး”
“ဒီလိုကွာ… ခပ်ထူထူလူတွေထဲက ခပ်ချွန်ချွန်လူတွေက အတင်း
ကုန်းရုန်းဖောက်ထွက်၊ ဉာဏ်ရှိသလို လှော်ခတ်ကြတော့၊ လုပ်ငန်းတွေက တစ်ခု နှစ်ခုဖြစ်၊တစ်နေရာက နှစ်နေရာဖြစ်၊ တချို့များကွာ မိမိဇာတိမြို့ရွာမှာလည်း လုပ်ငန်းတွေနဲ့ပြည့်၊ ရန်ကုန်၊ မန္တလေး၊ မော်လမြိုင်လို မြို့ကြီးတွေမှာလည်း လုပ်ငန်းခွဲတွေထောင်”
“သဘောပေါက်ပြီ ဦးနားဝေး”
သည်တစ်ခါတော့ ဦးနားဝေးစကား မှန်သဗျာ၊ ဟုတ်တာပေါ့ဗျာ၊ သည်ဟိုတယ် လုပ်ငန်းကိုပဲ၊ သည်စားသောက်ဆိုင် လုပ်ငန်းကိုပဲ၊ သည်မော်တော်ကား လုပ်ငန်းကိုပဲ ကိုယ့်ပြည်ကိုယ်ရွာမှာသာမကာ အမေရိကန်မှာ၊ ဂျပန်မှာ၊ တောင်ကိုရီးယားမှာ၊ စင်္ကာပူမှာ စသည်အားဖြင့် လုပ်ငန်းခွဲ ထူထောင်ကြတာဗျာ့၊ သူတို့ အတိုင်းအတာနဲ့ သူတို့ပေါ့နော်။ အဲဒါ ဘာကြောင့်လဲဆိုတော့ သူလို ငါလိုမနေဘဲ အတင်းဖောက်ထွက်ကြလို့ပေါ့ဗျာ။
“ဟား… ဟား… ဒါကြောင့် အချို့များလက်တွေ ခြေထောက်တွေ ပွားလာတယ်လို့ဟြေတာကွ”
“ တော်ပါတော့ ဦးနာဝေးရယ်”
မောင်ချမ်းသာ
No comments:
Post a Comment