🚘 ကားလေး ပျောက်သွားတာပဲ အဖတ်တင်ပါတယ်
“ အဲဒါ မင်းဘယ်လိုသဘောရသလဲ ”
“ သူတို့ စိတ်ကူးထားတဲ့ ကုန်လှောင်ဖို့ ငွေထုတ်ချေးဖို့ ဆိုတာကတော့ လွယ်တော့ လွယ်တာပေါ့ အစ်ကိုကြီး ၊ ဒါပေမယ့် ဒီအလုပ်တွေက တကယ် မသေချာ မရေရာတဲ့ အလုပ်တွေ ၊ ဒီအလုပ်တွေက လောင်းကစာနဲ့ သိပ်မထူးလှဘူး ”
“ ငါလဲ ဒီသဘောပဲ ဒါပေမယ့် သူတို့က ငါ့လာ အပူကပ်နေတော့ ”
“ ခက်တယ် အစ်ကိုကြီး ဒီမှာ လုပ်စားလို့ ရလောက်တဲ့ ပညာ တစ်ခုခု ပါလာတယ် ဆိုရင်တော့ ”
၂၀၀၅ ခုနှစ် သြဂုတ်လ ၁၀ ရက် ဗုဒ္ဓဟူးနေ့က အစ်ကိုကြီး ကိုတင်ရှိန်နဲ့ ကျွန်တော် ပြောဖြစ်ကြတဲ့ စကားတွေပါ ခင်ဗျာ ။
သူ့တူတွေ နိုင်ငံခြားထွက် အလုပ်လုပ်ရာက ပြန်လာကြတယ် ။ ငွေတွေ ပါလာတယ် ။ သည်မှာ ဘာလုပ်လို့ ဘာကိုင်ရမှန်း မသိဘူး ဖြစ်နေတယ် ။
အဲဒါ အစ်ကိုကြီး နဲ့ ကျွန်တော် စကားစပ်မိစပ်ရာ ပြောကြတာ ။
ဖြစ်တတ်ပါတယ် ။ စမ်းတ၀ါးဝါး ။
တချို့ကျတော့ နိုင်ငံခြားသွား အလုပ်လုပ်ကြတယ် ။ သည်မှာ သုံးလို့ရမယ့်ပညာတွေ ၊ လုပ်စားလို့ ဖြစ်နိုင်လောက်တဲ့ ပညာတွေပါ တတ်လာခဲ့ကြတယ် ။
သူတို့ကျတော့ ပါလာတဲ့ ငွေကို ရင်းနှီးပြီး လုပ်ငန်းတစ်ခု ဖတ်ခနဲ ကောက်ထူထောင်လိုက်ရုံပဲ ။
နိုင်ငံခြားထွက် အလုပ်လုပ်တဲ့ လူတွေထဲမျာ ကျွန်တော့်တူ မောင်ကောင်းကြီး ကတော့ .. ။
“ မပြောချင်တော့ပါဘူးဟယ် ”
“ ဒါဖြင့်လဲ မပြောပါနဲ့တော့ အစ်မရယ် ”
“ ဟေ့ အေး ငါပြောလိုက်ရမှ ဒါမှ ငါ့ရင်ထဲက အလုံးကြီး ကျသွားမှာ ”
သြော် လူ့သဘာဝ ၊ ရင်ထဲက အလုံးကြီးကို သူတစ်ပါးထံ အံချ ဖွင့်ချလိုက်ရရင် ရင်ရှင်းသွားသတဲ့ဗျာ ။
“ အင်း အင်း ဆိုပါဦး ”
“ ငါ့ဟယ် ငါ့သား မောင်ကောင်းကြီးပေါ့ ၊ နိုင်ငံခြားထွက်ချင်လှချည်ရဲ့ ၊ သင်္ဘောတက်ချင်လှချည်ရဲ့ ဆိုလို့ ငါ့ ဗင်ကားလေး ရောင်းပြီး သင်္ဘောပေါ် တင်ပေးလိုက်တာ ”
“ အမှန် အကန်လိုင်းလား ”
“ အမှန်အကန်လိုင်းပါဟယ် ၊ အဲဒါ ငါ့မှာ စိတ်ချလက်ချ ရှိနေတုန်း ဗြုန်းဆို ပြန်ရောက်လာရောဟယ် ၊ ဘာကြာတုန်း ၊ သင်္ဘောပေါ်မှာ သုံးလတည်းရယ် ”
“ နေထိုင် မကောင်းလို့လား အစ်မ ”
“ အကောင်း ပကတိကြီးပါတော် ”
“ ဟင် ဒါနဲ့များ ”
“ ဒီကောင်က လက်ကြောမတင်းတော့ သင်္ဘောပေါ်က မောင်းချလိုက်တာပေါ့ ၊ အိမ်မှာ နေတုန်းကလဲ သူက ပေါ်ကြော့ဟဲ့ ”
“ ဒါဖြင့် ဘာလို့ ”
“ အမယ်လေးဟယ် သေမတတ် ပူဆာ တညည်းညည်း တညူညူ ဂျီတိုက်နေတော့ နားအေး ပြီးရောဆိုပြီး ကားလေးရောင်းပြီး ရင်းလိုက်တာ ”
“ နေဦး အစ်မ ဒီကားလေး ရောင်းလိုက်တုန်းက ဘယ်လောက်ရတုန်း ”
“ ခြောက်သိန်းခွဲလေ ”
“ အင်း အစ်မ ကျွန်တော်က ကားနဲ့ပတ်သက်ရင် ဘာမှ မသိဘူး ။ နုံတယ် ဆိုဆို ၊ အတယ် ဆိုဆို အဲဒီ အစ်မတို့ ရောင်းလိုက်တဲ့ ကားမျိုး ဒီနေ့ဆို ဘယ်လောက် တန်ပါ့မလဲ ”
“ သိန်းနှစ်ရာ့ငါးဆယ် အောက်ထစ်ပေါ့ ငါ့မောင်ရယ် ”
ဟုတ်ပေလိမ့်မည် ။ ၁၉၉၅ ခုနှစ် ဧပြီလက ကျွန်တော့်သူငယ်ချင်း ရွှေချစ် ဆိုတဲ့ကောင် ကားဝယ်တာ လေးသိန်းကျော်လေးပဲ ပေးရတယ် ။
ဟိုတလောလေးက မေးကြည့်မိတော့ သိန်းနှစ်ရာ့ငါးဆယ် ခြောက်ဆယ် လောက် ပေါက်တယ်တဲ့ ခင်ဗျာ ။
( ပိုင်ရှင်ကို မမေးရဲဘူး ၊ ဘေးလူကို တီးခေါက်ကြည့်တာ ) ။
၁၉၉၅ - ယနေ့ ၂၀၀၅ - ဆယ်နှစ် အတွင်း ဖြစ်သွားတာ ။
“ ငါ့ဟယ် အဲဒီကားကလေးသာ ရောင်းမပစ်လိုက်ရဘူးဆိုရင် ဒီနေ့ ”
“ ဟုတ်တာပေါ့ အစ်မ ဒါလေးရောင်းပြီး စီးပွါးရေး လုပ်ငန်းတစ်ခု ထူထောင်လို့ ရသေးတာပေါ့ ”
“ အဲဒါ ငါပြောတာ ”
“ အခုကော အစ်မသား ဘာတွေ လုပ်နေတုန်း ၊ စီပွါးရေး တစ်ခုခု ”
“ အမယ်လေး ဟိုအလုပ်က သူနဲ့ မတန်ဘူး ၊ ဒီအလုပ်ကိုဖြင့် မကြိုက်ဘူးနဲ့ သင်္ဘောသားလူထွက်ကြီးက အိမ်မှာ ယောင်တောင်ပေါင်တောင်ပါပဲဟယ် ”
သြော် ကျွန်တော့် အစ်မကြီးရဲ့ အဖြစ်က မလွယ်ပါလား ။
“ ကားလေး ပျောက်သွားတာပဲ အဖတ်တင်ပါတယ် ငါ့မောင်ရယ် ”
ကျွန်တော် ချက်ချင်း ထွက်ပြေးခဲ့ပါ၏ ။ မတော် ကျွန်တော့်ရှေ့မှာ ငိုနေမှဖြင့် ။
မောင်ချမ်းသာ
ကုမုဒြာ ၊ ၂၃ စက်တင်ဘာ ၂၀၀၅
No comments:
Post a Comment