🍹🍾 သည်လိုပဲ အမြဲ ရနေဦးမလား
“ လေးလေးရယ် ခုမှတော့ လွန်ခဲ့ပါပြီ ။ ပြန်မလာတော့ပါဘူး ”
ကား ဒရိုင်ဘာ ကိုသိန်းမောင်ကြီးက ဆွေးဆွေးမြည့်မြည့် ပြောလေ၏ ။
“ ကဲ မှာ ဂျမ်းလား ၊ စာနီလား ၊ ဘီယာလား ”
“ ဖြတ်လိုက်ပြီ ၊ အမြည်းပဲ စားတော့မယ် ၊ နာတယ် လေးလေး ”
“ နောက်ကျသွားပါပြီ ”
“ ကျွန်တော်တို့ ”
မှန်ပါသည် ။ ကျွန်တော်တို့ ဆိုရာ၌ ကိုသိန်းမောင်ကြီး နှင့် ပုလင်းတူ ဘူးဆို့များထဲ၌ ကျွန်တော် မောင်ချမ်းသာလည်း အပါအ၀င် ဖြစ်လေသည် ။
ကိုသိန်းမောင်ကြီး မိုးကောင်းခဲ့သော ကာလများ ။ ၁၉၇၇ - ၁၉၈၇ - ၁၉၉၅ ကာလများ ။
ထိုစဉ်က ကျွန်တော် မောင်ချမ်းသာက တောမြေပဲ ကုန်သည် ။ ကိုသိန်းမောင်က ကားစပယ်ယာ ၊ ထို့နောက် ဒရိုင်ဘာ ၊ ထို့နောက် အုံနာ ။
တွဲမိခဲ့ကြသည် ။ သူ့ဘက်က ကုန်ရရေးအတွက် ၊ ကျွန်တော်တို့ဘက်က ကုန်များ အချိန်မီ မြို့သို့ ရောက်ရေးအတွက် ။
သောက်ဟယ် ၊ စားဟယ် ၊ ပျော်သမှ အရမ်းကို ပျော်ခဲ့ကြ ။ ငွေထုပ်ကလေးက အိတ်ထဲ အမြဲ ရှိနေသကိုး ။
ကိုသိန်းမောင်ကြီးသည် စပယ်ယာ ၊ ဒရိုင်ဘာ ၊ အုံနာ ရာထူး အဆင့်ဆင့် တက်ပြီးနောက် ရာထူး အကြီးအကျယ် လျော့ကျကာ တောရွာမှာ ယာလုပ်သည့် အဆင့်သို့ ရောက်သွားလေတော့၏ ။
ယခုအခါမှာတော့ ဒုတိယ ရာထူးဖြစ်သော ဒရိုင်ဘာ အဖြစ် အဝေးပြေး ဆယ်ဘီးကားကြီးများပေါ် ရောက်နေလေပြီ ။
“ မစုဘူး ၊ မစုခဲ့မိဘူး ၊ စုရကောင်းမှန်းကို မသိခဲ့တာ ”
“ အမှန်အတိုင်း ပြောရရင် ဒီလိုပဲ အမြဲ ရနေလိမ့်မယ်လို့ ထင်ခဲ့မိတာ ”
“ မင်းချည်းမှ မဟုတ်ပါဘူးကွာ ၊ ငါလဲ ဒီလိုပါပဲ ”
“ ၁၉၇၄ - ၁၉၈၀ ရန်ကုန် ကြည့်မြင်တိုင် ညဈေးတန်းမှာ မောင်ချမ်းသာက မှောင်ခို အထည်သည်ကလေးပါ ခင်ဗျာ ။
ရောင်းကောင်းတဲ့ နေ့များဆို
“ လာကြဟေ့ ကျွဲခေါင်း ပေါက်စီ ”
ညဈေး သိမ်းပြီဆို အပေါင်းအဖော်များနှင့် လက်ဖက်ရည်ဆိုင်သွား ။
“ ကဲ ချလကွာ ကျွဲခေါင်း ပေါက်စီ ”
“ အဲသည်တုန်းက ကြည့်မြင်တိုင်က လက်ဖက်ရည်ဆိုင် ( နာမည်မေ့ ) မှာ ကျွဲခေါင်းပေါက်စီက နာမည်ကြီးဗျာ ။ အလုံးထွားထွား ၊ အသားများများ ၊ ရှည်ချွန်းချွန်း ၊ တကယ့် ကျွဲခေါင်းကြီးလိုပါပဲ ။
တစ်ခါတလေကျတော့ ကြည့်မြင်တိုင်ဘူတာနားက ဆိတ်သားခပတ်ဆိုင် ။
“ လုပ်ဟေ့ စပါယ်ရှယ် ”
အပေါင်းအသင်းများနှင့်ပါပဲ ။ တစ်လတစ်လ ထောင့်လေးငါးရာ နှစ်ထောင်ရပါ၏ ။ မိသားစု ငါးယောက် ရရစားစား ၀ါးဝါးမျိုမျို ။
မစုမိပါ ၊ ဘာမျှ မစုခဲ့မိပါ ။ ရန်ကုန်မှ အောင်လံသို့ ပြန်ပြောင်းသောအခါ အိမ်ရောင်းလို့ ရသော ပိုက်ဆံကလေးသာ လက်ထဲ ပါခဲ့ပါ၏ ။
ထိုအကြောင်းကို ကပ္ပိယ ဦးစံမြင့် သို့ ပြောမိသောအခါ ။
“ ဟာ ဆရာက ဘာဟုတ်သေးလဲဗျာ ”
“ ကျွန်တော့် အဖြစ်ကမှ ”
အောင်လံကနေ မန္တလေး တစ်ခေါက်ဆို အမြတ် ငါးထောင်ရတယ် ဆရာ ။ အဲဒီတုန်းက ငါးထောင်ဆိုတာ ”
“ သိတယ် သိတယ် ၊ ကြက်သား တစ်ပိဿာမှ တစ်ဆယ် ၊ ဆယ့်နှစ်ကျပ် ပေးရတဲ့ ခေတ်မို့လား ”
“ မှန်တာပေါ့ ဆရာ ၊ ရွှေ တစ်ကျပ်သား ကျပ် ၁၅၀၀ ၊ ကျပ် ၁၆၀၀ ခေတ်ပါ ဆရာ ။ ရွှေ သုံးကျပ်သားဖိုးလောက် ကိုယ်တွက်ကျန်တာ ဆရာရေ့ ”
“ အဲဒါ သုံးဟယ် စားဟယ် ဟိုတယ်တက်ဟယ် နဲ့ ဘာမှ ကောင်းကောင်း မစုမိဘူးဆရာ ”
“ ဒီလိုပဲ အမြဲ ရနေလိမ့်မယ်လို့ မှတ်တာကိုး ”
“ ဖြစ်ချင်တော့ ”
“ အင်း ပြောပါဦး ”
“ ဖြစ်ချင်တော့ ကျွန်တော်တို့ လိုင်း ပျောက်သွားတယ် ဆရာ ၊ ခေတ်ကုန်သွားတယ် ”
“ ဘာလိုင်းလဲ ဗျာ့ ”
“ ဘိလပ်မြေလိုင်းလေ ၊ ၁၉၉၀ ခုနှစ် နောက်ပိုင်း ဘိလပ်မြေ စက်ရုံတွေ အလျှိုအလျှို ၊ ဘိလပ်မြေတွေ တံဆိပ်မျိုးစုံနဲ့ ထွက်လာတော့ ”
“ အင်း ဟုတ်ပြီ ဟုတ်ပြီ ”
“ လိုင်းပျောက် ခေတ်ပျောက်သွားတော့ ”
“ ဆရာရယ် လိုင်းပျောက် ခေတ်ပျောက်သွားတော့ အခု ကျွန်တော် ဘုန်းကြီးကျောင်းမှာ ထင်းပေါက်ရတဲ့ ဘ၀ ရောက်သွားတော့တာပေါ့ ဆရာရယ် ”
မှန်ပါပေသည် ။ မှန်ပါပေသည် ။ မိုးသည် အမြဲ မကောင်းတတ်ပါ ။ လေသည်လည်း အမြဲ သဘောကောင်း မနေတတ်ပါ ။ ထို့အတူ စီးပွါးရေး ဆိုတာကလည်း ဆိုတာကလည်း .... ။
သည်လိုပဲ အမြဲ ရနေဦးမလားလို့ ။
သည်လိုလည်း အမြဲ ရမနေတတ်ပါ ။
သည်လိုလည်း အမြဲ ရချင်မှ ရမယ် ဆိုရင်တော့ ။
ရတုန်း စုမိလိုက်တဲ့ လူက ကျော်တက်သွား ၊ ကျော်တက်သွားပါ၏ ။
မောင်ချမ်းသာ
ကုမုဒြာ ဂျာနယ် ၊ ၉ စက်တင်ဘာလ ၂၀၀၅
No comments:
Post a Comment